کراچی : شہر قائد میں گیس کے بد ترین بحران کی وجہ سے گھروں میں چولہے ٹھنڈے ہوگئے لیکن سی این جی اسٹیشنز پر پابندی کے باوجود فروخت جاری ہے۔
تفصیلات کے مطابق ایس ایس جی سی گھریلو صارفین کو سوئی گیس فراہم کرنے میں بری طرح ناکام ہوچکا ہے جبکہ سی این جی اسٹیشن مالکان پابندی کے نوٹیفکیشن کے باوجود گیس فروخت کررہے ہیں۔
مختلف علاقوں میں گیس کی غیراعلانیہ لوڈشیڈنگ نے عوام کی پریشانی بڑھا دی، مہنگائی کے مارے شہری صبح کا ناشتہ اور دوپہر کا کھانا ہوٹل سے خریدنے پر مجبور ہوگئے۔
صارفین کو گیس فراہمی کیلئے3دن سی این جی اسٹیشن بندش کا نوٹیفکیشن جاری کیا گیا تھا، ایس ایس جی سی شہر میں سی این جی اسٹیشن کو مکمل بند کرانے میں ناکام نظر آرہی ہے۔
مزید پڑھیں : کراچی میں ایک بار پھر گیس کا شدید بحران، چولہے ٹھنڈے ہوگئے
تازہ ترین اطلاعات کے مطابق کراچی کے علاقے گرومندر کے پاس پابندی کے باوجود سی این جی اسٹیشن کھلا ہوا ہے جہاں پر گاڑیوں میں سی این جی کی فلنگ دھڑلے سے کی جارہی ہے۔
