نیو کاسل یونائیٹڈ فٹبال کلب کے کوچ نے سعودی عرب میں 2034 کا فیفا ورلڈ کپ ہونے پر خوشی کا اظہار کیا ہے۔
برطانوی نیوز ایجنسی روئٹرز کے مطابق نیو کاسل یونائیٹڈ فٹبال کلب کے کوچ و مینجر ایڈی ہاوے نے کہا ہے کہ سعودی عرب میں فیفا ورلڈ کپ 2034 منعقد ہونے سے یہ ایونٹ اچھی طرح منظم ہونے کی توقع ہے۔
کوچ کا کہنا تھا کہ آسٹریلیا کے 2034 ورلڈ کپ کی میزبانی کی بولی سے دستبرداری کے فیصلے کے بعد فیفا سے توقع ہے کہ واحد درخواست دہندہ کے طور پر سعودی عرب کی میزبانی کا اعلان کرے گا۔
کوچ کا کہنا تھا کہ نیو کاسل فٹبال کلب کے اکثریتی حصص سعودی عرب کے ادارے پبلک انویسٹمنٹ فنڈ کی ملکیت ہیں اور ہماری ٹیم کو تربیتی کیمپوں کے لیے وہاں جانے کا تجربہ ہے۔
انہوں نے بتایا کہ ریاض اور جدہ کے دوروں میں ہم نے منفرد تجربات حاصل کئے ہیں، ہم سعودی عرب کے دورے کے دوران جہاں بھی گئے ہماری بہت اچھی دیکھ بھال کی گئی یہ اس بات کی علامت ہے کہ یہاں منعقد ہونے والا ورلڈ کپ کیسا رہے گا اور یہ واقعی ایک اچھا ایونٹ ہو گا۔
قبل ازیں نیو کاسل کلب نے سینٹ جیمز پارک میں ستمبر میں کوسٹاریکا اور جنوبی کوریا کے خلاف سعودی عرب کے دو بین الاقوامی دوستانہ مقابلوں کی میزبانی بھی کی ہے۔
