ARYNews.tv | Urdu – Har Lamha Bakhabar

Tag: COAS

  • آرمی چیف کی اقوام متحدہ کے ملٹری ایڈوائزر سے ملاقات

    آرمی چیف کی اقوام متحدہ کے ملٹری ایڈوائزر سے ملاقات

    اسلام آباد: پاک فوج کے سپہ سالار جنرل قمر جاوید باجوہ کی اقوام متحدہ سیکریٹری جنرل کے ملٹری ایڈوائزر سے ملاقات ہوئی، یو این ملٹری ایڈوائزر نے پاکستان میں سیلاب کی تباہ کاریوں پر افسوس کا اظہار کیا۔

    تفصیلات کے مطابق پاک فوج کے شعبہ تعلقات عامہ (آئی ایس پی آر) کا کہنا ہے کہ آرمی چیف جنرل قمر جاوید باجوہ کی اقوام متحدہ سیکریٹری جنرل کے ملٹری ایڈوائزر سے ملاقات ہوئی۔

    ملاقات میں اقوام متحدہ میں پاکستان کے مستقل مندوب منیر اکرم بھی موجود تھے۔

    آئی ایس پی آر کے مطابق ملاقات میں باہمی دلچسپی، علاقائی سیکیورٹی اور دیگر امور پر تبادلہ خیال ہوا جبکہ پاکستان میں بدترین سیلاب کی تباہ کاریوں پر بھی تبادلہ خیال ہوا۔

    آرمی چیف جنرل قمر جاوید باجوہ نے اقوام متحدہ کے امور کے فروغ کے لیے ملٹری ایڈوائزر کے کردار کو سراہا۔

    دوسری جانب یو این ملٹری ایڈوائزر نے سیلاب کی تباہ کاریوں پر افسوس کا اظہار کیا، انہوں نے سیلاب متاثرہ خاندانوں سے اظہار تعزیت بھی کیا۔

    ملٹری ایڈوائزر نے امن دستوں اور انسداد دہشت گردی امور میں پاکستان کے کردار کو بھی سراہا۔

  • پاک چین تعلقات منفرد اور خصوصی اہمیت کے حامل ہیں، آرمی چیف

    پاک چین تعلقات منفرد اور خصوصی اہمیت کے حامل ہیں، آرمی چیف

    راولپنڈی: پاک فوج کے سپہ سالار جنرل قمر جاوید باجوہ کا کہنا ہے کہ پاک چین تعلقات منفرد اورخصوصی اہمیت کے حامل ہیں، ہمارے تعلقات اجتماعی مفادات کےتحفظ میں اپنا کردارادا کرتےرہیں گے۔

    پاک فوج کے شعبہ تعلقات عامہ آئی ایس پی آر کے مطابق چائنیز پیپلزلبریشن آرمی کے پچانویں یوم تاسیس پرجی ایچ کیو میں تقریب کا انعقاد کیا گیا۔

    آرمی چیف جنرل قمر جاوید باجوہ تقریب کے مہمان خصوصی تھے، تینوں مسلح افواج کے اعلیٰ افسران نے بھی تقریب میں شرکت کی جبکہ چینی سفیر نونگ رونگ اور چینی سفارت خانے کے دیگرحکام بھی موجود تھے۔

    آئی ایس پی آر کے مطابق چینی سفیر نے پی ایل اے کی یوم تاسیس کی تقریب پرآرمی چیف سےاظہارتشکر کیا۔

    پاکستان میں چین کے سفیرنونگ رونگ نے تقریب سے خطاب کرتے ہوئے کہا کہ دونوں ممالک ہر موسم کے آہنی دوست ، باہمی بھائی اور اسٹریٹجک پارٹنرہیں۔

    انہوں نے بتایا کہ پاک چین فوجی تعاون کے فروغ کیلئے نیا سیٹ اپ بنایا گیا ہے، پاک چین مشترکہ تعاون کمیٹی کا حالیہ اجلاس باہمی تعلقات میں نئی پیشرفت ہے، یہ نظام فوجی رابطوں میں فروغ کےلئے اہم پلیٹ فارم ثابت ہوگا۔

    آئی ایس پی آر کے مطابق آرمی چیف جنرل قمر جاوید باجوہ نے بھی پی ایل اے کے یوم تاسیس پرچین کو مبارکباد پیش کرتے ہوئے ملکی دفاع، سلامتی اور چینی قوم کی تعمیرمیں پی ایل اے کے کردار کو سراہا۔

    آرمی چیف نے کہا کہ دونوں ریاستیں، فوج اور عوام میں منفرد نوعیت کےگہرے تعلقات ہیں، پی ایل اے اور پاک آرمی ایک دوسرے کے بھائی ہیں، ہمارے تعلقات اجتماعی مفادات کے تحفظ میں اپنا کردار ادا کرتےرہیں گے۔

  • چیف آف آرمی اسٹاف کی ہدایت پر چولستان میں امدادی کیمپ قائم

    چیف آف آرمی اسٹاف کی ہدایت پر چولستان میں امدادی کیمپ قائم

    راولپنڈی: چیف آف آرمی اسٹاف جنرل قمر جاوید باجوہ کی ہدایت پر چولستان میں امدادی کیمپ قائم کر دیا گیا۔

    تفصیلات کے مطابق بہاولپور کور نے آرمی چیف کی ہدایت پر چولستان کے خشک سالی سے متاثرہ افراد کے لیے منصوبہ تیار کر لیا۔

    چولستان میں 42 بستروں کی گنجائش والا کیمپ لگایا گیا، اور 70 دیہاتوں کو پانی بھی فراہم کیا گیا، 5 ہزار سے زائد مریضوں کا علاج کیا گیا اور انھیں مفت ادویات فراہم کی گئیں۔

    چولستان کےدور دراز علاقوں میں مفت راشن اور پکا ہوا کھانا بھی فراہم کیا گیا، بیس کیمپ کی جگہوں پر مویشیوں کے علاج معالجے کی سہولت بھی فراہم کی جا رہی ہے۔

    کور کمانڈر بہاولپور لیفٹیننٹ جنرل خالد ضیا نے چنن پیر میں میڈیکل کیمپ کا دورہ کیا، واضح رہے کہ پاک فوج کی جانب سے امدادی سرگرمیاں موسم گرما میں جاری رہیں گی۔

  • صدر اور آرمی چیف سے گورنر پنجاب کی ملاقاتیں جلد متوقع

    صدر اور آرمی چیف سے گورنر پنجاب کی ملاقاتیں جلد متوقع

    لاہور : صدر اور آرمی چیف سے گورنر پنجاب کی ملاقاتیں عید کی چھٹیوں کے بعد متوقع ہیں، ملاقات کے ایجنڈے کو حتمی شکل دے دی گئی ہے۔

    تفصیلات کے مطابق گورنر پنجاب عمر سرفراز چیمہ نے آرمی چیف جنرل قمرجاوید باجوہ اور وزیراعظم شہباز شریف کو الگ الگ خط لکھ دیا ہے۔

    خطوط میں انہوں نے حمزہ شہباز کو صوبے میں تمام غیر آئینی عمل کا ذمہ دار قرار دیا۔ آرمی چیف سے اپیل کی گئی ہے کہ قومی و صوبائی حکومت پر عوامی اعتماد کی بحالی کیلئے کردار ادا کریں۔

    آرمی چیف کو لکھے گئے خط میں کہا گیا ہے کہ حمزہ شہباز کا الیکشن غیر آئینی ہے۔ وزیراعظم کا بیٹا ہونے کی وجہ سے حمزہ شہباز غیر آئینی طور پر مسلط ہوگیا، عمر سرفراز چیمہ نے صدر اور وزیراعظم کے نام خطوط کی کاپیاں بھی آرمی چیف کو بھجوادیں۔

    گورنر پنجاب نے وزیراعظم شہباز شریف کو لکھے گئے خط می مؤقف اختیار کیا کہ عثمان بزدار کا استعفیٰ متنازع ہے۔ وزیراعلیٰ کا الیکشن پنجاب اسمبلی کی سو سالہ تاریخ پر سیاہ دھبہ ہے، ن لیگ نے پنجاب اسمبلی میں ڈی فیکٹوممبران کی حمایت حاصل کی۔

    خط کے متن کے مطابق متنازع الیکشن کے لیے لاہور ہائی کورٹ سے رجوع کیا گیا، تمام غیرآئینی عمل کا مرکزی کردار حمزہ شہباز ہے، تقریب حلف برداری کے حوالے سے چیف سیکریٹری اور آئی جی پنجاب نے گھناؤنا کردارادا کیا۔ آپ اور آپ کے بیٹے اور خاندان پر مجرمانہ کیسز ہیں۔

    ملک کی بدقسمتی ہےآپ دونوں ضمانت کے باوجود اہم عہدوں پرہیں، کوئی طاقت مجھے آپ کےبیٹے کے غیرآئینی اقدامات کو روکنےسے منع نہیں کرسکتی۔ میں تمام صلاحیت بروئے کار لاکرآئین پاکستان کی حفاظت کروں گا۔

    گورنرپنجاب نےٹویٹ بھی کیا کہ آئینی اور قانونی طور پر جو میرے اختیار میں تھا میں نے کردیا۔ علاوہ ازیں ذرائع کا کہنا ہے کہ صدر اور آرمی چیف سے گورنر پنجاب کی ملاقاتیں عید کی چھٹیوں کےبعد متوقع ہیں۔۔ ملاقات کے ایجنڈے کو حتمی شکل دے دی گئی ہے۔۔

  • آرمی چیف کا ایل او سی کا دورہ، جوانوں کے ساتھ عید منائی

    آرمی چیف کا ایل او سی کا دورہ، جوانوں کے ساتھ عید منائی

    راولپنڈی: آرمی چیف آف اسٹاف جنرل قمر جاوید باجوہ نے لائن آف کنٹرول پر جوانوں کے ساتھ سے عید منائی۔

    پاک فوج کے شعبہ تعلقات عامہ ( آئی ایس پی آر) کی جانب سے جاری بیان کے مطابق آرمی چیف جنرل قمر جاوید باجوہ نے عید لائن آف کنٹرول پر تعینات جوانوں کے ساتھ منائی۔

    لائن آف کنٹرول آمد پر کور کمانڈر لیفٹیننٹ جنرل ساحر شمشاد مرزا نے آرمی چیف کا استقبال کیا۔

    آرمی چیف نے کوٹلی سیکٹر کے علاقے ڈنگی میں جوانوں کے ہمراہ عید کی نماز پڑھی، اس موقع پر پاکستان کی سلامتی، امن و استحکام کے لیے خصوصی دعائیں مانگی گئیں۔

    آئی ایس پی آر کے مطابق اس موقع پر آرمی چیف نے افسروں، جوانوں کے ساتھ عید کی خوشیاں شیئر کیں اور پرامن پاکستان کے لیے شہداء اور ان کی فیملیز کی قربانیوں کو خراجِ عقیدت پیش کیا۔

  • وزیر اعظم نے قومی سلامتی کمیٹی کا اجلاس طلب کرلیا

    وزیر اعظم نے قومی سلامتی کمیٹی کا اجلاس طلب کرلیا

    اسلام آباد: پاکستان کوموصول ہونے والے دھمکی آمیز خط پر وزیراعظم نے قومی سلامتی کمیٹی کا اجلاس طلب کر لیا ہے۔

    وفاقی وزیر اطلاعات فواد چوہدری نے سماجی رابطے کی ویب سائٹ ٹوئٹر پر کئے گئے ٹوئٹ میں بتایا کہ وزیراعظم نے قومی سلامتی کمیٹی کا اجلاس طلب کرلیا ہے، اجلاس آج بعد دوپہر وزیراعظم ہاؤس میں ہوگا۔

    فواد چوہدری کے ٹوئٹ میں کہا گیا کہ قومی سلامتی کمیٹی کے اجلاس میں سول وعسکری قیادت شرکت کرے گی اہم ترین اجلاس میں پاکستان کو موصول ہونے والا دھمکی آمیز خط پیش کیا جائیگا۔

    یاد رہے کہ 27 مارچ کو اسلام آباد میں جلسہ عام سے خطاب میں وزیراعظم عمران خان نے خط لہرایا تھا اور دعویٰ کیا تھا کہ ملک میں باہر سے پیسے کی مدد سے حکومت تبدیل کرنے کی کوشش کی جارہی ہے، ہمیں لکھ کر دھمکی دی گئی، میرے پاس خط ہے اور وہ ثبوت ہے۔

    یاد رہے کہ سال دوہزار بیس میں وزیراعظم عمران خان نے قومی سلامتی کمیٹی کی تشکیل نو کی تھی، اہم قومی و اسٹریٹجک فیصلوں کا فورم 12 ارکان پر مشتمل کیا گیا تھا۔

    وزیر اعطم قومی سلامتی کمیٹی کے چیئرمین مقرر کئے گئے جبکہ وزیر دفاع ، وزیر داخلہ ، وزیر خارجہ ، مشیر خزانہ ، معاون خصوصی برائے اطلاعات و نشریات ، چیئرمین جوائنٹ چیفس آف اسٹاف کمیٹی ، تینوں مسلح افواج کے سربراہان بھی سلامتی کمیٹی کا حصہ بنائے گئے تھے۔

  • پاکستان ازبکستان سے تعلقات کو قدر کی نگاہ سےدیکھتا ہے، آرمی چیف

    پاکستان ازبکستان سے تعلقات کو قدر کی نگاہ سےدیکھتا ہے، آرمی چیف

    راولپنڈی: ازبکستان کے سفیر ایبک عارف عثمانوف نے آرمی چیف جنرل قمر جاوید باجوہ سے ملاقات کی ہے۔

    پاک فوج کے شعبہ تعلقات عامہ آئی ایس پی آر کے مطابق پاکستان میں ازبکستان کے سفیر ایبک عارف عثمانوف نے جی ایچ کیو راولپنڈی کا دورہ کیا اور آرمی چیف جنرل قمر جاوید باجوہ سے ملاقات کی۔

    آئی ایس پی آر کے مطابق ملاقات میں باہمی دلچسپی کے امور، علاقائی سلامتی کی صورتحال سمیت دوطرفہ تعاون کے فروغ پر تبادلہ خیال کیاگیا۔

    ملاقات میں آرمی چیف نے کہا کہ پاکستان ازبکستان کے ساتھ اپنے تعلقات بالخصوص دفاعی تعاون کو قدر کی نگاہ سے دیکھتا ہے، ملاقات میں خطے میں امن و سلامتی کے فروغ سمیت دوطرفہ تعلقات کو مزید وسعت دینے کے عزم کا اعادہ کیا گیا۔

    اس موقع پر ازبک سفیر نے علاقائی استحکام میں پاکستان کے کردار کو سراہا اور دونوں برادر ممالک کے درمیان بہتر تعلقات کے لئے کام جاری رکھنے کا عہد کیا۔

  • آپریشن ردالفساد کے 5 سال مکمل: آرمی چیف کا شہداء کی قربانیوں اور قوم کے عزم کو سلام پیش

    آپریشن ردالفساد کے 5 سال مکمل: آرمی چیف کا شہداء کی قربانیوں اور قوم کے عزم کو سلام پیش

    راولپنڈی : آرمی چیف جنرل قمر جاوید باجوہ نے آپریشن ردالفساد کے کامیابی سے 5سال مکمل ہونے پر کی قربانیوں اور قوم کے عزم کو سلام پیش کیا۔

    تفصیلات کے مطابق پاکستانی فوج کے شعبہ تعلقات عامہ (آئی ایس پی آر) کے ڈائریکٹر جنرل میجر جنرل بابر افتخار نے سماجی رابطے کی ویب سائٹ ٹوئٹر پر آپریشن ردالفساد کے 5 سال مکمل ہونے پر اپنے بیان میں کہا کہ 2دہائیوں سے دہشت گردی کیخلاف جاری جنگ میں سمیٹی گئی کامیابیوں کومستحکم کرنے اور ملک بھر سے دہشت گردی کے مکمل خامتے کیلئے یہ آپریشن شروع کیا گیا ، آپریشن رد الفساد میں عوام کی سیکیورٹی یقینی بنانا بنیادی مقصد رہا۔

    ڈی جی آئی ایس پی آر کا کہنا تھا کہ غیر یقینی صورتحال سے امن کی جانب سفر کیلئے آپریشن کامیابی سے جاری ہے ، آپریشن ردالفساد کی کامیابیاں شہدا ء کے خون کے نذرانوں اور عوام کے بھرپور جدوجہد سے ممکن ہوئیں ،بلاشبہ دو دہائیوں کی کامیابیاں بھاری قربانیوں سے ممکن ہوئیں ہیں ، آزادی آسانی سے نہیں ملتی، آزادی کی بھاری قیمت چکانا پڑتی ہے۔

    ترجمان کے مطابق آرمی چیف جنرل قمر جاوید باجوہ نے آپریشن ردالفساد کے 5سال مکمل ہونے پر اپنے پیغام میں کہا ہے کہ دیرپا امن کیلئے دی گئی شہداء کی عظیم قربانیوں کو سلام پیش کرتے ہیں ، اس مقصد کیلئے عظیم قوم نے جو عزم دکھایا اس کو بھی سلام پیش کرتے ہیں۔

  • پاکستان یورپی یونین کیساتھ تعلقات کو خصوصی اہمیت دیتا ہے، آرمی چیف

    پاکستان یورپی یونین کیساتھ تعلقات کو خصوصی اہمیت دیتا ہے، آرمی چیف

    راولپنڈی: سپہ سالار پاک فوج جنرل قمر جاوید باجوہ کا کہنا ہے کہ پاکستان یورپی یونین ممالک سے مشترکہ مفادات پر مبنی تعلقات کے فروغ کے خواہاں ہے۔

    پاک فوج کے شعبہ تعلقات عامہ ( آئی ایس پی آر) کی جانب سے جاری بیان کے مطابق آرمی چیف جنرل قمر جاوید باجوہ نے بیلجیئم کا سرکاری دورہ کیا۔

    دورے کے موقع پر آرمی چیف نے برسلز میں یورپی یونین ملٹری کمیٹی کے چیئرمین جنرل کلاڈیو سے ملاقات کی، ملاقات میں باہمی دلچسپی، علاقائی سیکیورٹی اور افغانستان کی صورتحال پر گفتگو کی گئی جبکہ ملاقات میں یورپی یونین کیساتھ باہمی تعلقات کےامور پر بھی بات چیت کی گئی۔

    آئی ایس پی آر کے مطابق پاک فوج کے سپہ سالار نے کہا کہ پاکستان یورپی یونین کیساتھ تعلقات کوخصوصی اہمیت دیتاہے، پاکستان یورپی یونین کیساتھ تعاون کومزید فروغ دینےکاخواہاں ہے۔

    ملاقات میں یورپی یونین ملٹری کمیٹی کےچیئرمین نے علاقائی امن کیلئےپاکستان کےکردار کو سراہا، جنرل قمر جاوید باجوہ نے دورہ بیلجئیم میں سیکرٹری جنرل یورپین ایکسٹرنل ایکشن سروسز سٹیفانو سانینوسے بھی ملاقات کی۔

     

  • وزیر اعظم اور آرمی چیف آج کا دن بلوچستان میں گزاریں گے

    وزیر اعظم اور آرمی چیف آج کا دن بلوچستان میں گزاریں گے

    اسلام آباد: وفاقی وزیر اطلاعات و نشریات فواد چوہدری کا کہنا ہے کہ وزیر اعظم عمران خان اور آرمی چیف آج کا دن بلوچستان میں سیکیورٹی فورسز کے جوانوں کے ساتھ گزاریں گے۔

    تفصیلات کے مطابق وفاقی وزیر اطلاعات و نشریات فواد چوہدری نے سماجی رابطے کی ویب سائٹ ٹویٹر پر اپنے ٹویٹ میں کہا کہ آج کابینہ کا اجلاس منسوخ کر دیا گیا ہے۔

    فواد چوہدری کا کہنا تھا کہ وزیر اعظم اور آرمی چیف آج کا دن بلوچستان میں سیکیورٹی فورسز کے جوانوں کے ساتھ گزاریں گے۔

    انہوں نے کہا کہ جوان جن کے عزم پہاڑوں سے بلند اور جذبوں میں سمندروں سے زیادہ وسعت ہے، وہ ہمارا فخر بھی ہیں اور ہمارا مان بھی، پاکستان کے یہ بیٹے مادر وطن کے لیے سربکف ہیں۔

    یاد رہے کہ 2 فروری کی رات دہشت گردوں نے نوشکی اور پنجگورمیں سیکیورٹی فورسز کے کیمپوں پر حملے کیے تھے۔

    پاک فوج نے دہشت گردوں کا حملہ ناکام بناتے ہوئے 13 دہشت گرد ہلاک کر دیے تھے جبکہ ایک افسر سمیت 7 اہلکار شہید ہوئے تھے، دہشت گرد افغانستان اور بھارت میں ہینڈلرز کے ساتھ رابطے میں تھے

    بعد ازاں سیکیورٹی فورسز نے نوشکی اور پنجگور میں کلیئرنس آپریشنز کیے جس کے دوران 20 دہشت گردوں کو ہلاک کیا گیا۔