ARYNews.tv | Urdu – Har Lamha Bakhabar

Tag: cold

  • کوئٹہ سمیت بلوچستان کے شمالی اضلاع شدید سردی کی لپیٹ میں

    کوئٹہ سمیت بلوچستان کے شمالی اضلاع شدید سردی کی لپیٹ میں

    کوئٹہ: بلوچستان میں کوئٹہ سمیت شمالی اضلاع شدید سردی کی لپیٹ میں آ گئے ہیں۔

    محکمہ موسمیات کے مطابق کوئٹہ میں کم سے کم درجہ حرارت منفی 4 ڈگری سینٹی گریڈ ریکارڈ کیا گیا ہے، قلات میں درجہ حرارت منفی 7، زیارت میں منفی 6 ڈگری سینٹی گریڈ ریکارڈ کیا گیا۔

    محکمہ موسمیات کے مطابق شمالی اضلاع میں یخ بستہ ہواؤں کا راج ہے، کھلے مقامات پر کھڑا پانی جم گیا ہے، شدید سردی سے صبح اور رات کے اوقات میں معمولات زندگی متاثر، اور سڑکوں، بازاروں میں رش معمول سے کم رہنے لگا ہے۔

    آئندہ چوبیس گھنٹوں کے دوران بھی شمالی اضلاع میں موسم شدید رہنے کی پیش گوئی کی گئی ہے، جب کہ آئندہ چوبیس گھنٹوں کے دوران صوبے کے بیش تر اضلاع می موسم سرد اور خشک رہے گا۔

    دھند کے باعث تیز رفتار کار حادثے کا شکار، 5 افراد جاں بحق

    واضح رہے کہ ملک کے دارالحکومت اسلام آباد اور گرد و نواح میں موسم سرد اور خشک ہے، تیز ہوائیں بھی چل رہی ہیں اور دھوپ بھی نکلی ہوئی ہے۔ ملک بھر میں سردی کی لہر برقرار ہے، اور بالائی علاقوں نے برف کی چادر اوڑھ لی ہے۔ محکمہ موسمیات نے آج بالائی خیبرپختونخوا اور کشمیر میں تیز ہواؤں کے ساتھ بارش اور پہاڑوں پر برف باری کی ہیش گوئی کی ہے۔

  • سردی، کھانسی اور بیماریوں سے محفوظ رکھنے والا پھل

    سردی، کھانسی اور بیماریوں سے محفوظ رکھنے والا پھل

    نارنگی (اورنج) عام طور پر سردیوں کے موسم میں دستیاب ہوتا ہے، یہ آپ کے جسم کو صحت سے متعلق دیگر کئی فوائد فراہم کرسکتا ہے۔

    یہ رس دار پھل غذائی اجزاء اور پانی کے مواد سے بھرا ہو اہوتا ہے، موسم سرما کے اس پھل کو مدافعتی نظام کے لیے نعمت سمجھا جاتا ہے۔

    سردیوں کی آمد کے ساتھ ہی جہاں دیگر پھل ہمارے بازاروں کی زینت بنتے ہیں وہیں نارنگی کی خوشبو بھی فضاء کو معطر کررہی ہوتی ہے، قدرت کا یہ انمول تحفہ وٹامن سی کی دولت سے مالا مال ہے جبکہ اس کے چھلکے میں بھی کئی فوائد پوشیدہ ہوتے ہیں۔

    ماہرین کا ماننا ہے کہ اگر روزانہ ایک نارنگی (اورنج ) کھایا جائے تو امراض قلب اور بلڈ پریشر سمیت متعدد بیماریوں سے بچے رہنے کے ساتھ ساتھ صحت مند بھی رہا جاسکتا ہے۔

    ماہرین کی جانب سے مسلسل 15 برس تک 28 ہزار لوگوں پر تحقیق کرنے کے بعد پھل اور سبزیوں کے انسانی صحت اور دماغی قوت پر پڑنے والے مثبت اثرات کی تصدیق کرتے ہوئے کہا گیا کہ اگر کوئی شخص روزانہ کی بنیاد پر نارنگی کا ایک گلاس رس (اورنج جوس) نوش کرے تو اس کا حافظہ متاثر ہونے کا خطرہ 47 فیصد تک ٹل جاتا ہے۔

    ہالینڈ میں نیشنل انسٹی ٹیوٹ آف ہیلتھ اینڈ انوائرمنٹ نے یورپی کینسر اینڈ نیوٹریشن نے اپنے پروگرام کے دوران 20 سے لیکر 70 سال عمر تک کے افراد کا سروے کیا جس میں ان سے غذا، صحت سے متعلق معلومات حاصل کی گئیں۔

    طبی ماہرین کا کہنا ہے کہ نارنگی کے رس (اورنج جوس) کا استعمال فالج کا خطرہ بھی ٹال دیتا ہے اور اسی طرح دیگر تازہ پھلوں کا جوس بھی فالج کے خطرے کو کم کرتا ہے۔

    برٹش جرنل آف نیوٹریشن کے مطابق اگر ایک ہفتے کے دوران 8 گلاس نارنگی کا جوس نوش کیا جائے تو فالج کا خطرہ 25 فیصد تک کم ہوجاتا ہے۔

    بڑی عمر کے لوگوں کو تین ماہ تک روزانہ ایک گلاس اورنج جوس پلایا جائے تو ہاتھ پاؤں سُن ہونے کے مسائل کو حل کیا جاسکتا ہے کیونکہ نارنگی کا رس خون کی مقدار کو بڑھا دیتا ہے۔

    ماہرین کے مطابق روزانہ ایک گلاس اورنج جوس جسم کے اندر موجود زہریلے اور فاسد مادوں کو ختم کرتا ہے۔

    نارنگی وٹامن سی سے بھرپور ہوتا ہے جبکہ اس میں وٹامن اے بھی پایا جاتا ہے جو بالوں کی نمی برقرار رکھنے میں مدد دیتا ہے۔

  • سرد موسم میں نزلہ زکام کھانسی سے نمٹنا بہت آسان، لیکن کیسے؟

    سرد موسم میں نزلہ زکام کھانسی سے نمٹنا بہت آسان، لیکن کیسے؟

    موسم سرما آچکا ہے اور سرد موسم میں ٹھنڈی ہوائیں چلنے سے جسم میں پیدا ہونے والی متعدد بیماریاں اپنی آمد کی اطلاع دینےکیلئے باری باری دستک دیتی رہتی ہیں لیکن اب اس میں پریشانی والی کوئی نہیں ہے۔

    آج ہم آپ کیلیے چند ایسے نایاب اور نہایت آسان ٹوٹکے بیان کرنے والے ہیں جن پر عمل کرکے آپ نزلہ زکام اور کھانسی گلے کی خراش جیسی علامات سے نجات حاصل کرسکتے ہیں۔

    سردیوں کی آمد کے ساتھ ہی نزلہ، زکام، بخار اور کھانسی عام بیماریاں بن کر سامنے آ تی ہیں جن سے ہر دوسرا فرد متاثر نظر آ تا ہے۔

    ان کے علاوہ سرد موسم میں ٹھنڈ کے سبب دیگر علامات جیسے سر میں درد، جسم میں درد، زیادہ ٹھنڈ لگنا اور ناک بہنا زندگی مشکل بنا دیتی ہیں۔

    اس حوالے سے طبی ماہرین کا کہنا ہے کہ نزلہ زکام میں آپ کو بھرپور غذائیت اور قوت مدافعت مظبوط رکھنے کی اشد ضرورت ہوتی ہے تاکہ اس کے وائرس سے لڑنے کے لیے درکار طاقت حاصل کی جا سکے۔

    پانچ میں سے ایک شخص کو سرد موسم میں کھانسی ہونا عام سی بات ہے جس کی علامات تین ہفتوں تک رہ سکتی ہیں لیکن بعض صورتوں میں آٹھ ہفتوں تک بھی رہ سکتی ہیں۔

    این ڈی ٹی وی کی ایک رپورٹ کے مطابق سردی کے باعث یہ بیماریاں لاحق ہونے کی صورت میں آپ کو انتہائی تھکاوٹ محسوس ہو سکتی ہے اور روزمرہ کے کام مؤثر طریقے سے کرنے میں مشکلات پیش آسکتی ہیں۔

    تاہم چند گھریلو ٹوٹکے ایسے ہیں جو سردی اور کھانسی کے علامات کو کم کرنے میں مددگار ثابت ہو سکتے ہیں۔

    وٹامنز کی ضرورت

    ویسے تو تمام وٹامنز ہمارے جسم کی بنیادی ضرورتوں کو پورا کرتے ہیں لیکن ان میں وٹامن سی کی اہمیت اور افادیت بہت زیادہ ہے۔ یہ وٹامن ہمیں بہت سے پھلوں اور سنزیوں سے حاصل ہوتا ہے۔

    ماہرین کہتے ہیں کہ وٹامن سی مدافعتی نظام کو مضبوط کرنے والا ایک بہترین وٹامن ہے، اور مضبوط مدافعتی نظام موسمی بیماریوں سے جسم کے لڑنے کے لیے مددگار ثابت ہو سکتا ہے۔
    ترش پھلوں کو اپنی غذا میں شامل کرنے سے مدافعتی افعال کو بڑھانے میں مدد مل سکتی ہے جو وٹامن کے حصول کا بہترین ذریعہ ہیں۔

    شہد کی اہمیت

    شہد کا استعمال کھانسی کے لیے ایک مؤثر علاج ثابت ہوسکتا ہے۔ یہ اینٹی بیکٹیریل اور اینٹی مائیکروبائل خصوصیات سے بھرپور ہوتا ہے۔

    شہد بالغ افراد اور بچے دونوں استعمال کر سکتے ہیں۔ ایک چمچ شہد کو ادرک کے رس کے چند قطروں کے ساتھ ملا کر استعمال کرنے سے کھانسی سے نجات حاصل کی جا سکتی ہے۔

    اس کے علاوہ ایک پیالا گرم پانی کے ساتھ ایک لیموں کا رس اور ایک چائے کا چمچ شہد بھی کھانسی کیلیے اکسیر ہے۔

    ہلدی کی افادیت

    سرد موسم میں ہلدی کا استعمال بہت ضروری ہے۔ یہ آپ کے جسم کو گرم رکھنے میں مدد دیتا ہے۔ سردی اور کھانسی کے علامات کو کم کرتا ہے۔ ہلدی میں اینٹی بیکٹیریل خصوصیات بھی ہوتی ہیں اور یہ سوزش کو کم کرنے میں مددگار ہے۔

    ادرک کا استعمال

    ادرک میں سوزش کو کم کرنے والے مرکبات ہوتے ہیں۔ ادرک کا استعمال کھانسی کو کنٹرول کرنے میں مددگار ثابت ہو سکتا ہے۔

    تازہ ادرک کو شہد کے ساتھ ملا کر یا چائے میں ڈال کر استعمال کریں تاکہ مؤثر نتائج حاصل ہو سکیں۔

    سوپ پئیں

    آپ سوپ کے استعمال سے سردی کی شدت کو کم کرسکتے ہیں۔ سوپ جسم کو حرارت دیتا ہے اور ضروری غذائی اجزاء فراہم کرتا ہے جو انسانی جسم کے مدافعتی نظام کو مظبوط بناتے ہیں۔

    بھاپ اور غرارے

    نمک والے پانی سے غرارے کرنا نظام تنفس کے انفیکشن کو روکنے میں مددگار ثابت ہو سکتا ہے۔ یہ نزلہ اور گلے کی خراش کی شدت کو بھی کم کرتا ہے۔

    اسی طرح سے بھاپ لینا ناک کی بندش سے نجات دلانے میں مدد دیتا ہے۔ یہ ہوا کی نالیوں میں نمی فراہم کر کے کھانسی میں بھی آرام دیتا ہے۔

  • سرد موسم سے نمٹنے کے لیے شہریوں کو 25 پاؤنڈ ملیں گے

    سرد موسم سے نمٹنے کے لیے شہریوں کو 25 پاؤنڈ ملیں گے

    لندن: برطانیہ میں سرد موسم سے نمٹنے کے لیے شہریوں کو 25 پاؤنڈ کی امدادی رقم ملے گی۔

    برطانوی میڈیا کے مطابق ملک میں جیسے جیسے درجہ حرارت گرتا جا رہا ہے اور برف باری ہر چیز کو ڈھکتی جا رہی ہے، ڈپارٹمنٹ فار ورک اینڈ پنشن (ڈی ڈبلیو پی) نے ملک کے 18 پوسٹ کوڈ علاقوں کے لیے ’سرد موسم کی ادائیگیوں‘ کی اسکیم کو فعال کر دیا ہے۔

    ان علاقوں کے تقریباً 10,000 رہائشیوں کو ان کے حرارتی اخراجات کو پورا کرنے میں مدد کے لیے 25 پاؤنڈ کی امدادی رقم ملے گی، یہ اسکیم نومبر سے مارچ تک چلتی ہے۔

    اسکیم کے تحت جب بھی درجہ حرارت مسلسل 7 دنوں تک 0C سے نیچے گرتا ہے، تو اہل گھرانوں کو 25 پاؤنڈ کی ایک بار کی ادائیگی کی جاتی ہے۔ یہ اسکیم خود بہ خود عمل میں آتا ہے اگر درجہ حرارت ریکارڈ کیا جاتا ہے یا لگاتار سات دنوں تک صفر سے نیچے رہنے کی پیش گوئی کی جاتی ہے، تو ہر پوسٹ کوڈ والے علاقے میں اہل گھرانوں کو ادائیگیاں خود بخود روانہ ہو جاتی ہیں۔

    طوفان برٹ ساحل سے ٹکرا گیا، برطانوی شہروں میں برفباری، تیز ہوائیں، طوفانی بارشیں

    زیادہ تر اہل خاندان پوسٹ کوڈز برطانیہ کی کاؤنٹی کمبریا میں واقع ہیں، جہاں 17 نومبر کو ادائیگیوں کو متحرک کرنے والا درجہ حرارت لوگوں نے سہا، جب سردی نے ہر شے منجمد کر دی تھی۔

    اس امدادی رقم کے وہ لوگ اہل ہیں جو پنشن کریڈٹ، انکم سپورٹ، انکم بیسڈ جاب سیکرز الاؤنس (JSA)، آمدنی سے متعلق ایمپلائمنٹ اینڈ سپورٹ الاؤنس (ESA)، یونیورسل کریڈٹ، مارگیج انٹرسٹ کے لیے کلیم کرتے ہیں۔

  • موسم کے حوالے سے آج کی تازہ خبر

    موسم کے حوالے سے آج کی تازہ خبر

    کراچی: محکمہ موسمیات کا کہنا ہے کہ ملک کے بیش تر علاقوں میں آج اتوار کو موسم سرد اور خشک رہے گا۔

    تفصیلات کے مطابق ملک کے مغربی علاقوں میں آج مطلع جزوی ابر آلود رہے گا، بلوچستان، خیبر پختون خوا، اسلام آباد، گلگت بلتستان میں تیز ہواؤں کے ساتھ بارش کا امکان ہے۔

    محکمہ موسمیات کے مطابق کشمیر، پوٹھوہار میں تیز ہواؤں اور گرج چمک کے ساتھ بارش اور پہاڑوں پر برف باری کا بھی امکان ہے، بلوچستان کے جنوب مغربی اضلاع میں چند مقامات پر موسلادھار بارش کی توقع ہے، جب کہ اسلام آباد اور گرد و نواح میں موسم سرد اور مطلع جزوی ابر آلود رہے گا، شام/رات میں تیز ہواؤں اور گرج چمک کے ساتھ بارش کا امکان ہے۔

    خیبر پختون خوا کے بیش تر اضلاع میں مطلع ابر آلود رہے گا، وزیرستان میں تیز ہواؤں اور گرج چمک کے ساتھ بارش اور پہاڑوں پر برفباری کی پیش گوئی ہے، جب کہ پنجاب کے بیشتر اضلاع میں موسم خشک رہے گا، اور مری، گلیات اور گرد و نواح میں گرج چمک کے ساتھ بارش اور برف باری ہو سکتی ہے۔

    بلوچستان کے بیش تر اضلاع میں مطلع ابر آلود رہنے کا امکان ہے، موسیٰ خیل، مکران، کوہلو میں تیز ہواؤں کے ساتھ بارش اور پہاڑوں پر برف باری کی پیش گوئی ہے، اس دوران پنجگور، گوادر، تربت، کیچ اور مکران میں موسلادھار بارش کی بھی توقع ہے۔

    سندھ کے بیش تر اضلاع میں مطلع ابر آلود رہنے کے علاوہ آندھی اور تیز ہوائیں چلنے کا امکان ہے، موسمیات کا کہنا ہے کہ کشمیر اور گلگت بلتستان میں موسم شدید سرد اور مطلع ابر آلود رہے گا، جب کہ شام اور رات میں تیز ہواؤں اور گرج چمک کے ساتھ بارش اور برفباری کا امکان ہے۔

  • سردیوں میں فلو سے بچنے کا آسان طریقہ

    سردیوں میں فلو سے بچنے کا آسان طریقہ

    سردیوں کے موسم میں عام طور پر بہت سے لوگوں کی ناک بہنے لگتی ہے، یا وہ دن بھر کھانستے رہتے ہیں، چناں چہ موسم سرما کے فلو سے بچنے کے لیے یہاں چند اہم نکات پیش کیے جاتے ہیں۔

    ’نیویارک پوسٹ‘ میں شائع ہونے والی رپورٹ کے مطابق مندرجہ ذیل قدرتی طریقے استعمال کرتے ہوئے موسمی فلو سے محفوظ رہا جا سکتا ہے۔

    وٹامن سی

    طبی ماہرین کے مطابق فلو ہونے کی صورت میں متاثرہ شخص کو وٹامن سی کی کم از کم ایک ہزار ملی گرام مقدار یومیہ لینی چاہیے، وٹامن سی پھلوں کے سٹرس میں پایا جاتا ہے جب کہ یہ سپلیمنٹ کی شکل میں بھی عام دستیاب ہوتا ہے۔

    وٹامن سی اینٹی آکسیڈنٹ سے بھرپور ہوتا ہے جو جسم کے خلیوں کی حفاظت کے لیے انتہائی اہم ہے اور یہ جسم کے خلیوں کو فری ریڈیکلز نامی نقصان دہ مادوں سے محفوظ رکھتا ہے۔ تاہم طبی ماہرین نے متنبہ کیا ہے کہ ایک دن میں 2 ہزار ملی گرام سے زیادہ وٹامنز نہیں لینے چاہییں کیوں کہ اس سے معدے پر اثر پڑتا ہے اور کچھ کیسز میں یہ گردے کی پتھری کا باعث بھی بن سکتے ہیں۔

    وٹامن ڈی 3

    طبی ماہرین کے مطابق ہم دھوپ سے روزانہ بڑی مقدار میں وٹامن ڈی 3 حاصل کر سکتے ہیں، یہ وٹامن جسم کی قوتِ مدافعت میں اضافے کا باعث ہوتا ہے اور وائرس سے جسم کی حفاظت کرتا ہے۔ تاہم زیادہ مقدار میں نہیں لینا چاہیے کیوں کہ خون میں اگر کیلشیئم جمع ہو جائے تو متلی، قے، کمزوری اور بار بار پیشاب آنے کی علامات ظاہر ہو سکتی ہیں۔

    زنک اور شہد

    زنک انسانی جسم کے لیے بہت زیادہ اہم ہے جس سے جسم کی قوتِ مدافعت میں اضافہ ہوتا ہے اور وہ صحت مند رہتا ہے۔ فلو کے ابتدائی تین دن زنک سپلیمنٹ لیا جا سکتا ہے۔ جب کہ شہد کے حوالے سے یہ بات تحقیق میں ثابت ہو چکی ہے کہ کھانسی میں شہد کا استعمال بڑوں اور بچوں کے لیے یکساں طور پر مفید ثابت ہوتا ہے۔

    بلسان

    بلسان ایک قدرتی بوٹی ہے جو اینٹی آکسیڈنٹس سے بھرپور ہوتی ہے، جس سے جسم میں قوت مدافعت بڑھتی ہے اور انفیکشن میں بھی کمی آتی ہے، برسوں سے موسم سرما میں لاحق ہونے والے فلو میں بلسان ایک قدرتی علاج کے طور پر استعمال کیا جاتا ہے۔

    چکن سوپ

    90 کی دہائی میں یونیورسٹی آف نیبراسکا میڈیکل سینٹر کی جانب سے کی گئی تحقیق میں یہ بات سامنے آئی کہ مرغی کے شوربے میں زکام کا مؤثر علاج موجود ہے۔ ڈاکٹر اسٹیفن رینارڈ نے لیبارٹری میں اپنی اہلیہ کی دادی کے طریقے سے تیار کردہ مرغی کے سوپ کا تجزیہ کیا جس میں انہوں نے یہ دریافت کیا کہ اس سوپ میں ایسے اجزا موجود ہیں جو سوزش کو کم کرنے کے اثرات رکھتے ہیں۔

    نمکین پانی کا اسپرے اور گرم پانی سے نہانا

    نمکین پانی کا اسپرے (سیلائن اسپرے) ایک مکمل طور پر محفوظ طریقہ ہے جو ناک کی بندش کے لیے کافی مفید ثابت ہوتا ہے، جب کہ اس کے کوئی سائیڈ ایفیکٹس بھی نہیں ہوتے جو دیگر سپریز میں پائے جاتے ہیں۔ گرم پانی کے بخارات سے نہانے کے کافی فائدے ہوتے ہیں، جو فلو کی صورت میں جسم کے مساموں کو کھولنے اور فلو کو کم کرنے میں کافی معاون ثابت ہوتا ہے۔

    صحت مند غذا اور پرسکون نیند

    جسم کی قوت مدافعت کو مضبوط بنانے کے لیے ضروری ہے کہ غذائی نظام کو بہتر بنایا جائے اور متوازن خوراک استعمال کی جائے جو جسم کو درکار پروٹینز اور وٹامنز مہیا کرے لہٰذا مالٹے، کینو اور سنگترے کا استعمال بہتر ثابت ہوتا ہے۔ اسی طرعح غذائیت سے بھرپور پھل اور سبزیاں جن میں گاجر، شہتوت، پالک وغیرہ شامل ہیں یہ اینٹی اکسیڈنٹس سے بھرپور ہوتی ہیں، جو جسم کو قدرتی غذائیت فراہم کرنے کا بہترین ذریعہ ہیں۔

    طبی ماہرین کے مطابق ایک بالغ شخص کو کم سے کم 7 سے 8 گھنٹے کی پرسکون نیند لینی چاہیے، جس سے قوت مدافعت میں اضافہ ہوتا ہے۔

  • ملک کے میدانی علاقوں میں سردی نے زور پکڑ لیا

    ملک کے میدانی علاقوں میں سردی نے زور پکڑ لیا

    ملک کے میدانی علاقوں میں سردی نے زور پکڑ لیا ہے، بالائی علاقوں میں کہیں بارش کہیں مطلع ابر آلود رہنے کا امکان ہے۔

    محکمہ موسمیات کے مطابق ملک کے بیش تر میدانی علاقوں میں موسم سرد اور خشک رہے گا، جب کہ بالائی خیبر پختون خوا، گلگت بلتستان اور کشمیر میں بارش اور پہاڑوں پر برف باری کا امکان ہے۔

    خطہ پوٹھوہار اور شمال مشرقی پنجاب میں بھی ہلکی با رش اور بوندا باندی کی توقع ہے، پنجاب، کے پی کے میدانی علاقوں، اور بالائی سندھ میں صبح اور رات میں دھند اور اسموگ رہنے کا امکان ہے، پنجاب کے بعض میدانی علاقوں میں بھی شدید دھند کا امکان ہے۔

    اسلام آباد میں مطلع ابر آلود رہنے کے علاوہ بوندا باندی اور ہلکی بارش ہو سکتی ہے، خیبر پختون خوا کے بیش تر بالائی اضلاع میں موسم سرد اور مطلع ابرآلود رہے گا، دیر، چترال، سوات، کوہستان، بالاکوٹ، مانسہرہ، ایبٹ آباد، اور مردان میں بارش، جب کہ صوابی، مالاکنڈ، وزیرستان اور کرم میں بارش اور پہاڑوں پر برف باری کا امکان ہے۔

    صوبہ پنجاب کے بیش تر علاقوں میں موسم خشک اور سرد رہے گا، مری، گلیات، راولپنڈی، اٹک، چکوال، جہلم، منڈی بہاؤالدین میں بونداباندی اور بارش کا امکان ہے، گجرات، گوجرانوالہ، نارووال، سیالکوٹ، لاہور اور حافظ آباد میں بھی بوندا باندی کا امکان ہے۔

    ساہیوال، سرگودھا، لاہور، گوجرانوالہ، نارووال، فیصل آباد، جھنگ، خانیوال، ملتان، بہاولپور، خان پور، رحیم یار خان، سیالکوٹ، حافظ آباد، گجرات، منڈی بہاؤالدین، جہلم، بھکر، لیہ، ڈیرہ غازی خان میں دھند اور اسموگ چھائے رہنے کا امکان ہے۔

    بلوچستان کے بیش تر اضلاع میں موسم سرد اور خشک رہے گا، جب کہ شمالی اضلاع میں شدید سردی اور مطلع جزوی ابر آلود رہے گا، سندھ کے بیش تر اضلاع میں بھی موسم خشک رہے گا، جیکب آباد، موہن جودڑو، سکھر، لاڑکانہ ، دادو، گھوٹکی اور پڈعیدن میں دھند اور اسموگ کا امکان ہے، کشمیر اور گلگت بلتستان میں مطلع ابر آلود رہنے کے علاوہ بارش اور پہاڑوں پر برفباری کا امکان ہے۔

  • موسمی تبدیلی کا شاخشانہ، کراچی میں سردی فروری میں فرار

    موسمی تبدیلی کا شاخشانہ، کراچی میں سردی فروری میں فرار

    کراچی: موسمی تبدیلی کے اثرات شہر کراچی میں واضح دکھائی دینے لگے ہیں، اس بار سردی فروری میں ہی فرار ہو گئی اور گرمی کا موسم چھانے لگا ہے۔

    تفصیلات کے مطابق کراچی میں سردی اچانک ختم ہو گئی ہے، پنجاب میں بھی سردی کچھ دن کی مہمان ہے، کراچی میں عام طور پر شروع فروری میں سردی ہوتی ہے، تاہم اس بار مہینے کے آغاز ہی میں موسم پوری طرح بدل گیا ہے۔

    چند قبل کراچی کے علاقے لیاری میں دھند بھی دیکھی گئی جو ایک غیر معمولی صورت حال تھی، کراچی میں عموماً اس طرح کی دھند نہیں پھیلتی۔

    چیف میٹرولوجسٹ سردار سرفراز نے اے آر وائی نیوز کے پروگرام باخبر سویرا میں بتایا کہ آگے موسم خشک ہونے جا رہا ہے، دن میں تیز دھوپ ہوگی۔

    انھوں نے کہا چند دنوں میں بالائی علاقوں میں تو بارشوں اور برف باری کا نیا اسپیل شروع ہوگا لیکن سندھ اور کراچی میں سردی ختم ہو گئی ہے، اور اگلی سردی کا اب دسمبر کے آخرے ہفتے میں امکان ہے۔

    ادھر محکمہ موسمیات کا کہنا ہے کہ ملک کے بیش تر علاقوں میں آج موسم سرد اور خشک رہے گا، آئندہ چوبیس گھنٹوں کے دوران کراچی، کوئٹہ، لاہور، اسلام آباد، پشاور سمیت ملک کے بیش تر علاقوں میں موسم سرد اور خشک رہنے کی پیش گوئی ہے، کشمیر اور گلگت بلتستان میں موسم شدید سرد اور مطلع جزوی ابرآلود رہے گا۔

  • کورونا وائرس کی وجہ سے ایک اور بیماری میں کمی

    کورونا وائرس کی وجہ سے ایک اور بیماری میں کمی

    کرونا وائرس نے دنیا بھر کو شدید طور پر متاثر کیا ہے تاہم ماہرین کے مطابق اس کی وجہ سے رواں برس عام نزلہ زکام کی شرح میں حیرت انگیز کمی آئی ہے۔

    بین الاقوامی ویب سائٹ کے مطابق حال ہی میں کی جانے والی ایک تحقیق میں دیکھا گیا کہ دسمبر کے وسط میں دنیا کے بیشتر ممالک میں عام نزلہ زکام اور فلو عام ہوجاتا ہے مگر اس سال جب کووڈ 19 کی وبا تیزی سے پھیل رہی ہے، متعدد موسمی بیماریوں کی شرح حیران کن حد تک کم ہے۔

    ماہرین کے مطابق کرونا وائرس کی وبا کے دوان مختلف ممالک میں عارضی لاک ڈاؤن، فیس ماسک کا استعمال، سماجی دوری، ذاتی صفائی جیسی احتیاطی تدابیر پر عمل ہورہا ہے اور اس کے نتیجے میں نظام تنفس کی دیگر بیماریوں کی شرح پر نمایاں اثرات مرتب ہوئے ہیں۔

    سائنسدانوں کو توقع ہے کہ اس سال کے رجحانات سے انہیں ان امراض کے پھیلاؤ اور رویوں کے بارے میں نئی تفصیلات حاصل ہوسکیں گی۔

    امریکا کے سینٹرز فار ڈیزیز کنٹرول اینڈ پریونٹیشن (سی ڈی سی) کے نیشنل سینٹر فار امیونزایشن اینڈ ریسیپٹری ڈیزیز کی وبائی امراض کی ماہر سونجا اولسن کے مطابق یہ نظام تنفس کے متعدد وائرسز کے لیے ایک قدرتی تحقیق جیسی ہوگی۔

    میڈیا رپورٹ کے مطابق رواں سال میں جب متعدد ممالک میں کووڈ 19 کی پہلی لہر کی شدت میں کمی آرہی تھی اور اکثر مقامات پر سخت ترین لاک ڈاؤن کا نفاذ ہوا، اس وقت طبی عملے کو احساس ہوا تھا کہ دنیا کے بیشتر ممالک میں فلو سیزن وقت سے پہلے تھم گیا۔

    اس کی جزوی وجہ تو یہ تھی کہ بہت کم افراد فلو کی شکایت کے ساتھ آرہے تھے، مگر بنیادی وجہ کرونا کی روک تھام کے لیے اپنائی جانے والی پالیسیوں جیسے سماجی دوری کا مؤثر ہونا تھا۔

    کرونا وائرس کی وبا کے آغاز کے بعد فلو وائرس کے مثبت ٹیسٹوں کی شرح امریکا میں 98 فیصد تک کم ہوگئی تھی، جبکہ نمونوں کو جمع کرانے کی شرح میں 61 فیصد کمی آئی۔

    زمین کے جنوبی کرے میں جب موسم سرما کا آغاز ہوا تو وہاں بھی اپریل سے جولائی 2020 کے دوران فلو کے کیسز میں حیران کن کمی دیکھنے میں آئی، حالانکہ کووڈ 19 کے کیسز میں مسلسل اضافہ ہورہا تھا۔

    آسٹریلیا، چلی اور جنوبی افریقہ میں 83 ہزار سے زیادہ ٹیسٹوں میں فلو کے محض 51 کیسز کی تصدیق ہوئی۔

    وائرلوجسٹ رچرڈ ویبی کے مطابق کچھ جنوبی امریکی ممالک نے کووڈ 19 کو کنٹرول کرنے کے حوالے سے کچھ خاص کام نہیں کیا تھا مگر وہاں بھی فلو کی شرح کم رہی، میرا نہیں خیال یہ صرف فیس ماسک پہننے اور سماجی دوری سے ہوا۔

    ان کے خیال میں بین الاقوامی سفر میں کمی بھی اس کی ایک وجہ ہوسکتی ہے۔

    فلو عام طور پر ہر سال مخصوس مہینوں میں زیادہ سرگرم ہوتا ہے، جس کے حوالے سے پورے سال میں کچھ زیادہ احتیاط بھی نہیں کی جاتی، مگر لوگوں کی نقل و حمل اس کے پھیلاؤ میں کردار ادا کرتا ہے۔

    بیشتر ماہرین نے محتاط اندازہ لگایا ہے کہ اس سال شمالی نصف کرے میں فلو سیزن زیادہ نہیں ہوگا اور یہ متعدد پہلوؤں سے اچھی خبر بھی ہے۔ بالخصوص اس سے مختلف ممالک کے طبی نظام پر بوجھ کم ہوگا۔

    مگر اس کے چند نقصانات بھی ہیں جیسے اگر اس سال فلو سیزن نہ ہونے کے برابر رہا تو 2021 کی فلو ویکسین کے لیے اس وائرس کی درست قسم کی پیشگوئی کرنا مشکل ہوگا۔

    ماہرین کے خیال میں فلو سیزن نہ ہونے کے برابر رہنے سے اس وائرس کی کم عام اقسام کا خاتمہ بھی ہوسکتا ہے اور اس سے ہمارے لیے منظرنامہ سادہ بھی ہوسکتا ہے۔

    مگر اس کے ساتھ ساتھ ان کا یہ بھی خیال ہے کہ وائرل مسابقت نہ ہونے سے مستقبل میں سوائن فلو کی نئی اقسام ابھر سکتی ہیں۔

  • خاتون بس ڈرائیور نے شدید سردی میں کمسن بچے کو بچا لیا۔۔۔ ویڈیو دیکھیں

    خاتون بس ڈرائیور نے شدید سردی میں کمسن بچے کو بچا لیا۔۔۔ ویڈیو دیکھیں

    واشنگٹن : بس ڈرائیور خاتون نے انسانیت کی اعلیٰ مثال قائم کرتے ہوئے ہائی وے پر گھومنے والے کمسن بچے کو دیکھ بئچ سڑک پر گاڑی روکی اور اسے حفاظتی تحویل دے دیا۔

    غیر ملکی خبر رساں ادارے کے مطابق امریکی ریاست وسکونسن کے شہر ملواکی میں بس ڈرائیور کی ملازمت کرنے والی بزرگ خاتون کو دوران سفر اس وقت انوکھی صورتحال کا سامنا کرنا پڑا جب انہوں نے ہائی اسپیڈ ہائی وے کمسن بچے کو بھاگتے ہوئے دیکھا۔

    غیر ملکی خبر رساں ادارے کا کہنا ہے کہ خاتون بس ڈرائیور یہ منظر دیکھ کر حیران ہوگئیں اور بیچ سڑک پر بس روک دی، بزرگ خاتون نے انسانی کی اعلیٰ مثال قائم کرتے ہوئے سخت سردی میں بس سے اتری اور بچے اٹھاکر بس میں لے آئی۔


    خاتون ڈرائیور بچے کو بس میں لائیں تو بس میں سوار ایک مسافر رحم دلی کا مظاہرہ کرتے ہوئے اپنی جیکٹ سے بچے کو ڈھپنا اور بزرگ خاتون نے فوری طور پر پولیس اور ریسکیو عملے کو واقعے کی اطلاع دی۔

    غیر ملکی میڈیا کے مطابق ملواکی پولیس اور ریسکیو عملہ جائے وقوعہ پر پہنچا تو ایک سالہ بچہ خاتون ڈرائیور کی گود میں سو رہا تھا، خاتون نے بچے کو بحفاظت پولیس کی تحویل میں دے دیا جسے وہ اپنے ساتھ لے گئے۔

    غیر ملکی میڈیا کا کہنا ہے کہ بچہ کب سے اکیلا باہر گھوم رہا تھا کچھ معلوم نہیں ہوسکا۔

    پولیس کا کہنا ہے کہ متاثرہ بچے کی ماں نفسیاتی مسائل کا شکار ہے جس کے باعث اس نے بچے کو باہر چھوڑ دیا تھا تاہم پولیس بعد میں بچے کو اس کے والد کے حوالے کردیا۔