کولمبیا کے شہر کاجیبیو کے قریب گزشتہ روز ایک المناک واقعہ پیش آیا، جس میں درخت کے نیچے پانچ افراد کھڑے کھڑے اچانک موت کا نوالہ بن گئے، جن میں چار خواتین فٹبالرز بھی شامل ہیں۔
کولمبیا ان دنوں شدید طوفانی بارشوں کی لپیٹ میں ہے، یہ واقعہ فٹبال میچ کے دوران پیش آیا جب ان پانچوں افراد نے بارش اور طوفان سے بچنے کے لیے ایک درخت کے نیچے پناہ لی۔
غیر ملکی خبر رساں ادارے کی رپورٹ کے مطابق اس دوران اچانک بجلی گرنے سے ان پانچوں افراد کی موت واقع ہوگئی، جبکہ مزید دو خواتین شدید جھلسنے کے باعث اسپتال منتقل کی گئی ہیں۔
یہ اندوہناک واقعہ وسطی کولمبیا کے قصبے کاجیبیو کے قریب پیش آیا، جہاں ایک مقامی فٹبال ٹورنامنٹ کے دوران آسمانی بجلی گری۔
رپورٹ کے مطابق ہلاک ہونے والی خواتین فٹبالرز کی شناخت جیدی مورالس، ڈینیئلا موسکیرا، لوز لیم اور ایٹل وینا موسکیرا کے ناموں سے ہوئی ہے۔ ایک نامعلوم مرد متاثرہ شخص بھی ہسپتال میں زخموں کی تاب نہ لاتے ہوئے چل بسا۔
واضح رہے کہ اس سے قبل بھی فٹبال میچز کے دوران آسمانی بجلی گرنے سے انسانی جانوں کے ضیاع کی خبریں سامنے آتی رہی ہیں۔
گزشتہ سال نومبر میں پیرو میں بھی ایک فٹبالر خوسے ہیوگو ڈی لا کروز میزا بھی بجلی گرنے سے ہلاک ہوگئے تھے۔
