نئی دہلی: بھارتی ریاست اتراکھنڈ کے ایک ریزورٹ میں ایک نوجوان خاتون کے پراسرار حالات میں قتل کے بعد مقامی کانگریس رہنماؤں نے مطالبہ کیا ہے کہ واقعے میں ملوث وی آئی پی شخصیات کا نام منظر عام پر لایا جائے۔
بھارتی میڈیا کے مطابق کانگریس ہیڈ کوارٹر میں کانگریس ریاستی صدر کرن ماہرا نے سینئر لیڈروں کے ساتھ پریس کانفرنس کے دوران انکتا بھنڈاری قتل کیس میں اتراکھنڈ حکومت پر سنگین الزامات عائد کیے ہیں۔
کانگریس نے اس پورے واقعہ کی سی بی آئی سے تفتیش کا مطالبہ کیا ہے اور کہا ہے کہ قصورواروں کو سخت سزا دی جانی چاہیئے۔
کانگریس کے ریاستی صدر کا کہنا ہے کہ جس ریزورٹ میں قتل ہوا وہ بغیر رجسٹریشن کے تھا، کئی بااثر افراد لگاتار ریزورٹ میں آتے رہے تھے، جس کے لیے ثبوتوں کو مٹایا گیا ہے۔
انہوں نے کہا کہ پولیس نے ریمانڈ لینے کے لیے کوئی درخواست نہیں لگائی، آخر کیوں؟
کانگریس رہنماؤں کا کہنا تھا کہ اس وی آئی پی شخصیت کا نام بھی منظر عام پر لایا جائے جو اس معاملے میں ملوث ہے۔
انہوں نے اب تک ہونے والی کارروائی کو ناکافی قرار دیتے ہوئے جامع تفتیش کا مطالبہ کیا۔
خیال رہے کہ اتراکھنڈ کے ریزورٹ میں چند روز قبل ایک نوجوان خاتون کا پراسرار حالات میں قتل ہوا تھا۔ خاتون کے آخری میسجز کے اسکرین شاٹس بھی منظر عام پر آئے ہیں جس میں انہوں نے ریزورٹ کے مالک پر سنگین الزامات عائد کیے ہیں۔
