Tag: Corona virus

کورونا وائرس : اپوزیشن جماعتیں تنقید برائے تنقید پرعمل پیرا ہیں، غلام سرور

اسلام آباد : وفاقی وزیر برائے ہوا بازی غلام سرور نے کہا ہے کہ کورونا وائرس کا بہترین علاج آئسولیشن (قرنطینہ) ہے، اپوزیشن جماعتیں تنقید برائے تنقید پرعمل پیرا ہیں۔

یہ بات انہوں نے اسلام آباد میں میڈیا سے گفتگو کرتے ہوئے کہی۔ انہوں نے کہا کہ کورونا وائرس کا بہترین علاج آئسولیشن ہے، کورونا وائرس سے بچاؤ کیلئے ضروری ہے کہ گھروں تک محدود رہا جائے۔

غلام سرور نے کہا کہ تمام انٹرنیشنل فلائٹس معطل کردی گئی ہیں، وقت کےساتھ ڈومیسٹک فلائٹس بھی معطل کردیں گے، سندھ میں خدشات پر کراچی، سکھر ایئرپورٹ بند کردیئے۔

وفاقی وزیر کا کہنا تھا کہ ہماری کوشش ہے لوگ کم سے کم گھروں سے نکلیں کیونکہ کم سے کم روابط سے ہی کورونا کو شکست دی جاسکتی ہے، اپوزیشن جماعتیں تنقید برائے تنقید پرعمل پیرا ہیں، نیشنل ایشوز پر سیاست کرنے والے قوم سے مخلص نہیں۔

مارچ 23, 2020
سعودی عرب میں کرونا مریضوں کے علاج معالجہ کی بہترین سہولیات

ریاض : کرونا وائرس کے پھیلاؤ کو روکنے کیلئے سعودی حکومت کی جانب سے اقدامات کا سلسلہ جاری ہے جس کے باعث اس جان لیوا وبا پر قابو پانے ہر ممکن کوشش کی جارہی ہے۔

سعودی وزارت صحت کی جانب سے حفاظتی اقدامات کے تحت بیرون ملک سے آنے والوں پر عارضی پابندی عائد کی جا چکی ہے تاکہ کورونا پر قابو پانے کے اسباب کو مستحکم کیا جاسکے۔

وزارت صحت کی جانب سے کورونا آگاہی مہم کے تحت عربی، انگلش، اردو سمیت مختلف زبانوں میں معلوماتی ہینڈ بلز بھی شائع کر کے تقسیم کرانے کا سلسلہ جاری ہے۔

سعودی عرب میں وزارت صحت کے اہلکار بلا کسی تفریق ہر ایک کو طبی امداد ومشورہ فراہم کرنے میں مصروف ہیں۔ حکومت کی جانب سے وبائی مرض کورونا کے حوالے سے وزارت صحت کی زیر نگرانی مرکزی کنٹرول روم قائم کیا گیا ہے۔

مملکت کے ہوائی اڈوں پر خصوصی یونٹس متعین کیے گئے ہیں جب کہ وزارت صحت کے تمام اسپتالوں میں عالمی ادارہ صحت کے اصولوں کو مدنظر رکھتے ہوئے قرنطینہ قائم کیے گئے ہیں۔

اس حوالے سے سعودی وزارت صحت کے عہدیدار کا کہنا ہے کہ کورونا کے حوالے سے جامع انداز میں کام کیا جارہا ہے۔ تمام انٹرنیشنل ایئر پورٹس پر خصوصی ٹیمیں متعین کی گئی ہیں جو آنے والے مسافروں کا طبی معائنہ کرنے کے علاوہ ان کی ٹریول ہسٹری لینے کے بعد ہدایات جاری کرتی ہیں۔

وزارت صحت نے عالمی ادارہ صحت کے معیار کے مطابق بین الاقوامی ہوائی اڈوں پر قرنطینہ اور آئیسولیشن سینٹر قائم کیے ہیں جہاں ابتدائی طور پر مشتبہ مریضوں کو رکھا جاتا ہے جس کے بعد انہیں وزارت کی خصوصی ایمبولینسوں کے ذریعے اسپتال منتقل کردیا جاتا ہے۔

واضح رہے کہ سعودی وزارت صحت کی جانب سے نئے کورونا وائر س کے حوالے سے ہر لمحہ باخبر رہنے کے لیے ویب سائٹ پر تازہ ترین معلومات فراہم کی جاتی ہیں۔

یاد رہے کہ نومبر2019 میں چین کے شہر ووہان سے پھوٹ پڑنے والے وبائی مرض کورونا نے اس وقت دنیا کے بیشتر ممالک کو اپنی لپیٹ میں لے لیا ہے، دنیا بھر میں ہنگامی صورتحال کا اعلان کر دیا گیا ہے جب کہ عالمی ادارہ صحت کی جانب سے بھی کورونا کو وبا قرار دیا جا چکا ہے۔

مارچ 23, 2020
کورونا وائرس : بھارت میں 31مارچ تک لاک ڈاؤن نافذ

نئی دہلی : بھارتی دارالحکومت نئی دہلی میں کورونا وائرس کو پھیلنے سے روکنے کیلئے مکمل لاک ڈاؤن نافذ کردیا گیا، میٹرو سروسز، مسافر ٹرینیں اور غیرضروری مسافر گاڑیاں کو 31مارچ تک بند رہیں گی۔

تفصیلات کے مطابق بھارت میں کورونا وائرس کے پیش نظر حکومتی اقدامات جاری ہیں اس سلسلے میں نئی دہلی کے وزیر اعلیٰ اروند کجریوال نے پوری دہلی میں بھی مکمل لاک ڈاؤن کا اعلان کیا ہے۔

وزیراعلیٰ اروند کیجریوال نے کہا کہ نئی دہلی لاک ڈاؤن کے دوران ضروری اشیاء کی سپلائی اور ضروری دکانیں کھلی رہیں گی، اس کے علاوہ تمام ڈومیسٹک پروازیں بھی 31 مارچ تک بند رہیں گی۔

نئی دہلی میں بس اور میٹرو سروسزکے ساتھ مسافر ٹرینوں اور غیرضروری مسافر گاڑیوں کو روڈ پر لانے کی پابندی بھی عائد کی گئی ہے۔ ضروری خدمات کیلئے دہلی میں صرف 25فیصد ڈی ٹی سی کی بسیں چلتی رہیں گی۔

انہوں نے کہا کہ نجی دفاتر بند رہیں گے، تمام مستقل و کنٹریکٹ ملازمین گھروں پر رہیں گے لیکن اُنہیں آن ڈیوٹی تصور کیا جائے گا اور کمپنیاں گھر پر موجود ملازمین کو لاک ڈاؤن کے دوران تنخواہ ادا کریں گی۔

کورونا کے پھیلاؤ کو روکنے کے لیے غیر معمولی اقدامات کیے جا رہے ہیں اور بھارت کے جن 75 اضلاع میں کورونا وائرس کیسز رپورٹ ہوئے ہیں اُنہیں مکمل طور پر لاک ڈاؤن کر دیا گیا ہے۔ یہ فیصلے تمام بھارتی ریاستوں اور کابینہ سیکریٹریز کے اعلیٰ سطح کے اجلاس میں لیے گئے۔

مارچ 23, 2020
اٹلی میں کورونا کی تباہ کاریاں : اطالوی وزیراعظم شہریوں کی اموات پر افسردہ ہوگئے

روم : اطالوی وزیراعظم جوزیپے کونتے اٹلی میں کورونا سے ہونے والی اموات کے ذکر پر افسردہ ہوگئے، درد بھرے الفاظ اور لڑکھڑاتی آواز میں خطاب کرتے ہوئے جذبات پر قابو نہ رکھ سکے۔

تفصیلات کے مطابق اٹلی میں کورونا وائرس کی تباہ کاریوں کے باعث وہاں کے حکمران بھی بے حد پریشان ہیں جس کا اندازہ اس بات سے لگایا جاسکتا ہے کہ گزشتہ روز اٹلی کے وزیر اعظم جوزیپے کونتے نے قوم سے خطاب کرتے ہوئے کہا کہ ریاست آپ کی مدد کیلئے موجود ہے، آپ گھبرائیں نہیں بس گھروں میں رہیں، اسٹورز کے باہر لمبی لمبی قطاریں نہ بنائیں،۔

اٹلی کے وزیراعظم نے قوم سے درد بھرے الفاظ اور لڑکھڑاتی آواز میں خطاب کرتے ہوئے دعا کی کہ خدا ہمیں اس آفت سے نجات دے اور ہمیں اس آفت سے نمٹنے کی ہمت دے۔

ان کا مزید کہنا تھا کہ لاک ڈاؤن کے دوران سپرمارکیٹس،پبلک ٹرانسپورٹ اور میڈیکل اسٹورز کھلے رہیں گے، انہوں نے اشیائے ضروریہ بنانے والی صنعت کے علاوہ تمام فیکٹریاں بند کرنے کا اعلان بھی کیا۔

واضح رہے کہ اٹلی میں کوروناوائرس سے مزید651افراد ہلاک ہوچکے ہیں، غیر ملکی خبر رساں ایجنسی کے مطابق اٹلی میں کورونا وائرس سے اموات کی تعداد اب تک 5476ہوگئی ہے جبکہ کورونا وائرس سے متاثرہ مریضوں کی تعداد59ہزار138ہوگئی اس کے علاوہ اٹلی میں کورونا وائرس سے اب تک 7024افراد صحتیاب ہوچکے ہیں۔

مارچ 23, 2020
دنیا بھر میں کرونا وائرس سے اموات کی تعداد 14 ہزار 655 ہوگئی

کراچی : دنیا بھر میں کرونا وائرس کے باعث اموات 14 ہزار 655 ہوگئیں، جان لیوا جرثومے سے متاثرہ مریضوں کی تعداد 3 لاکھ37ہزار سے زائد ہے جبکہ 98ہزار884افراد صحت یاب ہوچکے ہیں۔

تفصیلات کے مطابق دنیا بھر میں کورونا وائرس سے اموات کا سلسلہ رکنے کا نام نہیں لے رہا، کورونا وائرس سے عالمی سطح پر 14ہزار 655 افراد موت کے منہ میں جاچکے ہیں۔

سب سے متاثر ہونے والا ملک اٹلی ہے جس نے چین کو بھی پیچھے چھوڑ دیا،اٹلی میں اس جان لیوا کورونا سے مرنے والوں کی تعداد5ہزار 476ہوگئی جبکہ46 ہزار افراد اب بھی اسپتالوں میں داخل ہیں۔ چین میں وائرس سے3270افراد ہلاک ہوئے جبکہ 5120افراد متاثر ہیں۔

ایران میں کورونا کے باعث اموات کی تعداد1685ہوگئی،12ہزار متاثر ہوئے، برطانیہ میں281افراد کورونا کے باعث موت کے منہ میں چلے گئے،5ہزار متاثر ہیں، بیلجیئم میں 75، جاپان میں41افراد اور ترکی میں کورونا وائرس سے اموات کی تعداد30ہوگئی

اس کے علاوہ اسپین میں کورونا وائرس سے1772اموات ہوئیں اور 25 ہزار سے زائد افراد متاثر ہیں، امریکا میں کورونا وائرس سے419افراد لقمہ اجل بن گئے، امریکہ کے اسپتالوں میں32 ہزار سے زائد مریض زیر علاج ہیں۔

غیر ملکی خبر رساں ایجنسی کے مطابق فرانس میں674 افراد موت کا شکار ہوئے اور وائرس سے متاثر ہونے والے افراد کی تعداد14ہزارہوگئی ہے، سعودی عرب میں 350 افراد کرونا وائرس سے متاثر ہوئے۔

انڈونیشیا میں کورونا کے48 نئے کیس رپورٹ ہوئے ہیں یہاں اموات کی تعداد 33 ہوگئی، ملائیشیا میں مہلک کورونا وائرس کے130 نئے کیس رپورٹ ہو چکے ہیں یہاں پر متاثرہ مریضوں کی تعداد ایک ہزار 34 تک جا پہنچی ہے۔

بھارت میں کورونا کیسز کی تعداد 268 ہوگئی جبکہ6 افراد کے ہلاک ہونے کی اطلاعات ہیں، اس کے علاوہ دنیا بھر میں کورونا وائرس کا شکار ہوکر بیمار ہونے والے98ہزار884افراد صحت یاب ہوکر اپنے گھروں کو لوٹ چکے ہیں۔

مارچ 23, 2020
بھارت : کرونا وائرس سے متاثرہ جوڑا ٹرین میں سفر کرتا پکڑا گیا

نئی دہلی : کرونا وائرس سے متاثرہ جوڑا ٹرین میں دوران سفر پکڑا گیا، لوگوں نے ان کی ہاتھ پر مہر دیکھ کر پولیس کو اطلاع دی، مریض جوڑے کو ہنگامی طور پر علیحدہ مرکز میں منتقل کردیا گیا۔

تفصیلات کے مطابق بھارتی ریاست کے شہر تلنگانہ کے قاضی پیٹ ریلوے اسٹیشن میں اس وقت سنسنی پھیل گئی جب راجدھانی ایکسپریس میں ایک ایسا جوڑا دیکھا گیا جو کورونا کا مریض تھا۔

دونوں میاں بیوی کے ہاتھوں پر (ہوم کورنٹائن) قرنطینہ میں رہنے کی مہر لگی ہوئی تھی، اس مہر کے باوجود یہ جوڑا اس کو چھپاتے ہوئے قومی دارالحکومت کے سفر کی کوشش کررہا تھا۔

تاہم واش بیسن میں ہاتھ دھونے کے دوران ٹرین میں سفر کرنے والے ایک مسافر نے یہ مہر دیکھ لی اور اس کی اطلاع پولیس کو دے دی ، جس کے ساتھ ہی پولیس اور محکمہ صحت کی ٹیم وہاں پہنچی اور دونوں کو ٹرین سے اتار دیا گیا اور حیدرآباد کے الگ تھلگ مرکز منتقل کردیا گیا۔

بعد ازاں اسی دوران بی ون بوگی کے مسافروں کو بھی اتاردیا گیا، اس واقعے کے بعد ٹرین تقریباً ڈیڑھ گھنٹے تک اسٹیشن پر رکی رہی، اس جوڑے کے ساتھ سفر کرنے والے مسافروں کو دوسرے ڈبہ میں منتقل کردیا گیا، ٹرین میں جراثیم کش اسپرے کرنے کے بعد روانہ کیا گیا۔

دونوں میاں بیوی کی عمریں 23اور 25سال کے درمیان ہیں جو ٹرین کے بی کمپارٹمنٹ کے تھرڈ اے سی میں سفر کررہا تھا، ریلوے کے عہدیداروں کے مطابق اس جوڑے کا تعلق بنگلورو سے ہے ، جنہوں نے مکمل آستین والے شرٹس پہن رکھے تھے تاکہ اس مہر کو چھپاسکے، کافی جدوجہد کے بعد پولیس اس جوڑے کو ایمبولنس میں بٹھا کر حیدرآباد لانے میں کامیاب ہوسکی۔

مارچ 22, 2020
سندھ میں 15 روز کیلئے لاک ڈاؤن کا اعلان، وزیراعلیٰ نے ہدایات جاری کردیں

کراچی : وزیراعلیٰ سندھ مراد علی شاہ نے صوبے میں لاک ڈاؤن کا اعلان کردیا جو 15دن جاری رہے گا، لاک ڈاؤن کا اطلاق رات بارہ بجے سے ہوگا، لوگوں کو بلاضرورت گھر سے نکلنے کی اجازت نہیں ہوگی۔

تفصیلات کے مطابق کورونا وائرس کے خدشے کے پیش نظر وزیراعلیٰ سندھ مراد علی شاہ نے صوبے میں لاک ڈاؤن کا اعلان کردیا ہے اس حوالے ان کا کہنا ہے کہ اس دوران لوگوں کو بلاضرورت گھر سے نکلنے کی اجازت نہیں ہوگی۔

وزیر اعلیٰ سندھ کی ہدایات ہیں کہ بغیر کسی مضبوط وجہ کے کسی کو بھی سڑک پر نہیں آنے دیا جائے گا، اگر کوئی شخص بیمار ہے تو اسے اسپتال لے جایا جاسکے گا تاہم اسپتال جانے کیلئےگاڑی میں تین لوگوں سے زائد کی اجازت نہیں، ہوگی۔

وزیراعلیٰ سندھ نے اپنی ہدایات میں مزید کہا ہے کہ تمام سروسز، فون، یوٹیلیٹی، ٹی وی کیبل، فون، موبائل سروسز بلا تعطل جاری رکھی جائیں گی،۔

س کے علاوہ حیسکو، سیپکو، واسا، کے ڈبلیو ایس بی، ایس ایس جی سی اور دیگر اداروں کو اپنی سروسز زبردست طریقے سے دینی ہے، اے ٹی ایمز کھلے رہیں گے، بینک اپنا جو کام جاری رکھیں گے اور اپنا ضروری اسٹاف مہیا کریں گے

لاک ڈاؤن میں گھریلو کھانے پینے کی اشیاء کی دکانیں کھلی رکھنے کی اجازت ہوگی، کریانہ شاپس اور میڈیکل اسٹورز کھولنے کی بھی اجازت ہوگی۔

مزید پڑھیں : صوبے کو لاک ڈاؤن کرنے کے علاوہ اور کوئی راستہ نہیں، وزیر اعلیٰ سندھ

اس کے علاوہ ایک گاڑی میں ڈرائیور کے ساتھ صرف ایک شخص سفر کرسکے گا، لاک ڈاؤن کا اطلاق مساجد اور عبادت گاہوں پر بھی ہوگا۔

وزیر اعلیٰ سندھ نے کہا کہ ہم عوام کے لیے کرونا وائرس ٹیسٹ کی سہولیات بڑھانے جارہے ہیں، میں ان ٹیسٹ کی سہولیات پورے صوبے کے ضلعی ہیڈ کوارٹرز تک پہنچانا چاہتا ہوں، جو ٹیسٹ کیے ہیں، وہ بھی سلیکٹیو کیے ہیں۔

ان کا کہنا تھا کہ ہمیں اپنے عوام کو اس بیماری سے ہر صورت بچانا ہے، اس اہم فیصلے سے جو مسائل (یعنی روزگاریا دیگر) پیدا ہوں گے میں اُن کے حل کے لیے بھی اقدامات کروں گا

مارچ 22, 2020
سعودی عرب : سوشل میڈیا پر افواہیں پھیلانا شہری کو بہت مہنگا پڑگیا

القصیم : سعودی پولیس نے کورونا وائرس کے حوالے سے سوشل میڈیا پر افواہیں پھیلانے والے شخص کو حراست میں لے لیا، حکام کا کہنا ہے کہ ملزم کی جاری ویڈیو سے معاشرے میں خوف و ہراس پھیلا۔

تفصیلات کے مطابق سعودی عرب کے علاقے القصیم ریجن کی پولیس نے ایک شہری کو گرفتار کیا ہے، شہری پر الزام ہے کہ اس نے کورونا وائرس کے حوالے سے بے بنیاد اعداد وشمار جاری کیے اور معاشرے میں خوف وہراس پھیلایا۔

اس حوالے سے قصیم ریجن پولیس کے ترجمان لیفٹیننٹ بدرالسحیبانی کا کہنا تھا کہ سوشل میڈیا پر ایک ویڈیو وائرل ہوئی تھی جس میں ایک شخص سوشل میڈیا پر کورونا مریضوں کے اعداد و شمار بتارہا تھا۔

انہوں نے کہا ہے کہ مذکورہ شہری تحقیق کے بغیر اور مبالغے پر مبنی غیر حقیقی اعداد وشمار کے علاوہ وائرس کے انسداد کے لیے حکومتی کوشش کو مشکوک بنا رہا تھا۔

ترجمان پولیس نے کہا کہ گرفتار ہونے والے30 سالہ شہری کو ضابطے کی کارروائی کے بعد متعلقہ محکمے کے حوالے کردیا جائے گا۔ انہوں نے اپنے بیان میں شہریوں کو خبردار کرتے ہوئے کہا کہ سوشل میڈیا پر افواہیں پھیلانا اور بے بنیاد معلومات فراہم کرنا سائبر کرائم میں شامل ہے جس کی سخت سزائیں مقرر ہیں۔

ترجمان پولیس نے کہا ہے کہ مذکورہ شخص کی اطلاع ملنے پر سراغ کا سلسلہ شروع ہوا اور جلد ہی اسے قصیم شہر سے گرفتار کیا گیا ہے۔ انہوں نے کہا ہے کہ وہ ایک 30 سالہ شہری ہے، ضابطے کی کارروائی کے بعد اسے متعلقہ محکمے کے حوالے کر دیا جائے گا۔

انہوں نے خبر دار کرتے ہوئے کہا ہے کہ ’سوشل میڈیا پر افواہیں پھیلانا اور بے بنیاد معلومات فراہم کرنا سائبر کرائم میں شامل ہے جس پر سخت سزائیں مقرر ہیں۔

مارچ 22, 2020
بھارت : کورونا وائرس سے متاثرہ شخص کے ساتھ اہل محلہ نے کیا سلوک کیا

حیدرآباد دکن : کرونا وائرس میں مبتلا شخص کو اس کے پڑوسیوں نے گھر میں بند کرکے باہر سے تالہ لگا دیا، متاثرہ شخص نے فون پر پولیس کو اطلاع دی۔

تفصیلات کے مطابق بھارت کے شہر حیدرآباد دکن میں ایک شخص کو اس کے اہل محلہ نے اس کے گھر میں ہی بند کرکے باہر سے تالہ لگا دیا، دنیا بھر کو دہشت زدہ کرنے والے کرونا وائرس کے خوف نے لوگوں کو اس قدر احتیاط کا پابند بنا دیا ہے کہ وہ اپنے ساتھ دوسروں کا بھی خیال رکھنے لگے ہیں۔

جنوبی افریقہ سے واپس آنے والے حیدر آباد کے رہائشی شخص میں کرونا وائرس کی علامات ظاہر ہوئی تھیں جس کے سبب ڈاکٹرز نے اسے قرنطینہ میں رہنے کی ہدایت کی تھی۔

اس حوالے سے اہل محلہ نے بتایا کہ مذکورہ شخص گزشتہ چند روز سے اپنے گھر میں الگ تھلگ رہ رہا تھا اس نے اپنے پڑوسی سے اسی بات پر بحث وتکرار بھی کی تھی اور اس کی کوشش تھی کہ کسی طرح گھر سے باہر نکل آؤں، جس پر اہل محلہ نے فیصلہ کیا کہ علاقے کو کرونا سے محفوظ رکھنے کیلئے اسے گھر میں ہی رکھا جائے اور باہر سے تالا لگا دیا جائے ۔

مارچ 22, 2020
کورونا وائرس : اب ہینڈ سینیٹائزر خود بنانا بہت آسان، ویڈیو دیکھیں

طبی ماہرین نے کورونا وائرس سے بچنے کیلئے ہاتھوں کو صاف رکھنے کی واضح ہدایات دی ہیں، جس کیلئے سینی ٹائزر کا استعمال بہت ضروری ہے۔

مارکیٹ میں سینیٹائزر کی عدم دستیابی یا مہنگا ہونے کی وجہ سے پریشان ہونے کی ضرورت نہیں اپنا ہینڈ سینی ٹائزر خود بنانا بہت آسان ہے جس کا طریقہ اس ویڈیو میں بتایا گیا ہے ۔

کرونا وائرس کی تباہ کاریوں نے پوری دنیا کو اپنی لپیٹ میں لے لیا ہے، اس کی وجہ سے جہاں ملکی معیشت کو مجموعی طور پر نقصان پہنچا تو دوسری جانب ناجائز منافع خوروں نے بھی اس موقع کو ہاتھ سے نہ جانے دیا اور کرونا وائرس سے بچاؤ کیلئے استعمال ہونے والی اشیاء ماسک، دستانے اور سینی ٹائزر کی قیمتوں میں از خود اضافہ کرکے پریشان حال شہریوں کو مزید بے حال کردیا ہے۔

ناجائز منافع خوروں کو پیسے کی اس قدر ہوس ہے کہ موت کے دہانے پر کھڑے ہونے کے باوجود باز نہیں آرہے، محض ہاتھوں کو صاف کرنے کیلئے ملنے والی سینٹائزر کی چھوٹی چھوٹی اور مہنگی بوتلیں بھی ہماری جیبوں پر بوجھ ڈالے ہوئے ہیں۔

لیکن اس جان لیوا وائرس اور دیگر بیماریوں سے بچنے کیلئے اس کا استعمال بھی حد ضروری ہے۔ آئیے آج ہم آپ کو گھر میں سینی ٹائزر بنانے کا آسان مستند اور سستا طریقہ ایک ویڈیو کے ذریعے بتائیں۔

اس ویڈیو میں انٹرنیشنل اسلامک یونیورسٹی اسلام آباد کے پروفیسر ڈاکٹر بشیر احمد نے ہینڈ سینیٹائزر بنانے کا آسان طریقہ بتا رہے ہیں۔

مارچ 22, 2020