کوئٹہ: وزیراعلیٰ بلوچستان جام کمال کی زیرصدارت اہم اجلاس ہوا جس میں کرونا وائرس کی روک تھام کے اقدامات اور احتیاطی تدابیر کا تفصیلی جائزہ لیا گیا۔
تفصیلات کے مطابق اجلاس میں صوبائی وزرا اور اپوزیشن کے اراکین اسمبلی بھی شریک ہوئے۔ اس دوران نئی حکمت عملی پر تبادلہ خیال کیا گیا۔ بریفنگ میں کہا گیا کہ زائرین کو نئی حکمت عملی کے تحت ان کے صوبوں میں بھیجا جارہا ہے، محکمہ صحت کے پاس 200 ٹیسٹنگ کے لیے دستیاب ہیں۔
بریفنگ میں کہنا تھا کہ شیخ زید اور فاطمہ جناح اسپتال میں آئیسولیشن وارڈ قائم کیے گئے ہیں جہاں دیگر سہولیات دستیاب ہیں، آج کی تاریخ تک کرونا کا کوئی سیریس کیس سامنے نہیں آیا ہے۔
کرونا وائرس: تفتان سرحد سے مزید زائرین سکھر پہنچ گئے
وزیراعلیٰ بلوچستان جام کمال کا کہنا ہے کہ بلوچستان نے زائرین کے حوالے سے ذمہ داری اٹھائی اور نبھائی، حکومت بلوچستان نے کم وسائل کے باوجود چیلنج سے نمٹنے کی کوشش کی، کرونا قومی مسلئہ ہے اور اس سے نمٹنا مشترکہ سماجی ذمہ داری ہے، سیاست سے بالاتر ہو کر کرونا کا تدارک مشترکہ قومی فریضہ ہے۔
خیال رہے کہ ایران سے آنے والے زائرین کو بلوچستان کے سرحدی علاقے تفتان بارڈر سے لے کر مزید 4 بسیں سکھر کی لیبر کالونی پہنچ گئیں ہیں جن میں درجنوں مسافر سوار تھے، زائرین میں بچے اور عورتیں بھی شامل ہیں۔
انتظامیہ کا کہنا ہے کہ زائرین کو لیبر کالونی میں قائم آئسولیشن یونٹ میں 14 روز کے لیے قرنطینہ میں رکھا جائے گا اور اسکریننگ بھی کی جائے گی اس دوران انہیں کسی سے ملنے پر پابندی ہوگی۔
