ARYNews.tv | Urdu – Har Lamha Bakhabar

Tag: Coronavirus

  • لاہور ، جناح اسپتال سے کورونا کی مریضہ فرار

    لاہور ، جناح اسپتال سے کورونا کی مریضہ فرار

    لاہور : جناح اسپتال سے کورونا کی مریضہ فرار ہوگئی ، 24سالہ مریضہ جناح اسپتال کے ہائی ڈیپینڈینسی یونٹ میں داخل تھی ، ایم ایس کا کہنا ہے کہ مریضہ کے کوائف پولیس کو رپورٹ کررہے ہیں۔

    تفصیلات کے مطابق لاہور میں جناح اسپتال سے کورونا کی مریضہ فرار ہوگئی ،ایم ایس جناح اسپتال نے تصدیق کرتے ہوئے کہا ہے کہ 24 سالہ مریضہ دو روز قبل اسپتال سے بتائےبغیرچلی گئی، ان کے کوائف پولیس کو رپورٹ کررہے ہیں۔

    ایم ایس کا کہنا تھا کہ فرار ہونیوالی مریضہ جناح اسپتال کے ہائی ڈیپینڈینسی یونٹ میں داخل تھی اور گلشن راوی کی رہائشی تھی۔

    اس سے قبل وزیرصحت پنجاب ڈاکٹریاسمین راشد نے ایکسپوسینٹرکادورہ کیا اور ایک ہزاربستروں پر مشتمل بننے والے اسپتال کا جائزہ لیا، اس موقع پر یاسمین راشد نے کہا کہ کوروناوائرس سے نمٹنے کے لیے سہولتوں میں اضافہ کیا جارہا ہے، کالاشاہ کاکو قرنطینہ میں 1200سےزائد مریضوں کو رکھنے کی گنجائش ہے۔

    یاسمین راشد کا کہنا تھا کہ وزیراعلی پنجاب محکمہ صحت کے انتظامات سے مطمئن ہیں، عوام کوگھروں تک محدود رہ کرحکومت کا ساتھ دینا ہوگا، عوام احتیاطی تدابیر پر سختی سے عمل کریں۔

    خیال رہےپاکستان میں کوروناوائرس کےمریضوں کی تعدادایک ہزار102ہوگئی اور وائرس کے21مریض صحت یاب ہوچکے جبکہ جاں بحق ہونے والوں کی تعداد8 ہوگئی ہے۔

  • کیا اخبارات کرونا وائرس کے پھیلاؤ کا سبب بن سکتے ہیں؟

    کیا اخبارات کرونا وائرس کے پھیلاؤ کا سبب بن سکتے ہیں؟

    نئی دہلی: اخبارات کی اشاعت سے منسلک افراد کا کہنا ہے کہ اخبار کرونا وائرس کے پھیلاؤ کا سبب نہیں بن سکتے لہٰذا اس حوالے سے خدشات بالکل بے بنیاد ہیں۔

    مقامی میڈیا میں شائع اخبارات کی تقسیم و ترسیل سے منسلک ایک تنظیم کے بیان میں کہا گیا ہے کہ اخباروں کی پرنٹنگ اور پیکجنگ میں انسانی مداخلت کم ہوتی ہے اور تمام کام مشینوں کے ذریعے انجام دیے جاتے ہیں۔

    یہ وضاحت اس وقت دی گئی ہے جب ایسی خبریں سامنے آئیں کہ کرونا وائرس پھیلنے کے خدشے کے تحت بھارت میں لاکھوں افراد نے اپنے گھروں میں اخبار کی ترسیل بند کروا دی۔

    بیان میں کہا گیا کہ ایسے مواقعوں پر اخبار حالات سے باخبر رہنے کا اہم ذریعہ ہوتے ہیں لہٰذا لوگوں کو اس کی ترسیل جاری رکھوانی چاہیئے۔

    دوسری جانب عالمی ادارہ صحت نے بھی کہا ہے کہ اگر کرونا وائرس سے متاثرہ کوئی شخص کسی چیز کو چھوئے تو اس شے سے کرونا پھیلنے کا امکان کم ہوتا ہے کیونکہ اس کا انحصار اس شے کی ساخت اور باہر کے درجہ حرارت پر ہوتا ہے۔

    انٹرنیشل نیوز میڈیا ایسوسی ایشن کے سربراہ ارل جے وکنسن کا کہنا ہے کہ ابھی تک کوئی بھی ایسا کیس رپورٹ نہیں ہوا جس میں کسی شخص میں اخبار کے ذریعے وائرس منتقل ہوا ہو۔

    ان کے مطابق اگر وائرس کسی جاندار شے پر رہے تو وہاں اس کے زندہ رہنے کا زیادہ امکان ہوتا ہے، علاوہ ازیں اخبار کی سیاہی اور اس کی پرنٹنگ کا عمل بھی اسے جراثیم سے پاک کردیتا ہے۔

    اخبار کی اشاعت سے منسلک ایک ادارے کا کہنا ہے کہ اخبار کی اشاعت ڈیزائنرز کے ذریعے ہوتی ہے جو ڈیجیٹل طریقہ کار سے خبروں کو کاغذ پر منتقل کرتے ہیں، اس کے بعد پرنٹنگ کے عمل میں تمام مشینیں خود کار طریقے سے ان کو شائع کرتی ہیں۔

    ادارے کے مطابق اخباروں کی منتقلی، تقسیم اور ترسیل کے عمل میں جو افراد شامل ہیں انہیں اس وائرس کے پھیلاؤ کے بعد سے سینی ٹائزڈ کیا جارہا ہے۔

  • کرونا وائرس نے امریکی پولیس کی جرائم قابو کرنے کی صلاحیت متاثر کر دی

    کرونا وائرس نے امریکی پولیس کی جرائم قابو کرنے کی صلاحیت متاثر کر دی

    نیویارک: نئے اور مہلک وائرس COVID 19 نے امریکی پولیس کو بھی گھیر لیا ہے، جس کی وجہ سے امریکا میں جرائم کو قابو میں رکھنے کی پولیس کی صلاحیت متاثر ہونے کا شدید خطرہ پیدا ہو گیا ہے۔

    امریکی میڈیا کے مطابق مشی گن اسٹیٹ کے سب سے بڑے شہر ڈیٹرائٹ میں کرونا وائرس سے 3 پولیس اہل کار ہلاک ہو چکے ہیں، نیویارک پولیس ڈیپارٹمنٹ کے 211 اہل کاروں میں وائرس کی تصدیق ہو چکی ہے، جب کہ لاس اینجلس پولیس کے 8 افسران کو بھی وائرس لاحق ہو چکا ہے جن میں 2 اعلیٰ پولیس افسران بھی شامل ہیں۔

    بتایا جا رہا ہے کہ امریکی پولیس کی کارکردگی مفلوج ہوتی جا رہی ہے کیوں کہ تیزی کے ساتھ پولیس اہل کاروں میں کرونا وائرس پھیل رہا ہے اور آئے دن اہل کار وائرس سے بیمار پڑتے جا رہے ہیں، اس صورت حال میں سڑکوں پر پولیس فورس کی کمی کا شدید خطرہ سر پر منڈلانے لگا ہے۔

    امریکا نے اپنی افواج کی نقل و حرکت پر پابندی لگا دی

    نیویارک پولیس ڈیپارٹمنٹ کے ہر 10 میں سے ایک اہل کار بیمار پڑ چکا ہے، گزشتہ دو دنوں میں وائرس کے شکار اہل کاروں کی شرح تیزی سے بڑھ کر 38 فی صد تک جا پہنچی ہے، جس کی وجہ سے نیویارک کی سڑکوں پر پولیس اہل کاروں کی موجودگی نہایت کم ہو گئی ہے۔ خیال رہے کہ نیویارک میں کرونا وائرس سے ہلاکتوں کی تعداد 285 تک پہنچ چکی ہیں، امریکی صدر ٹرمپ نے بھی نیویارک کو آفت زدہ شہر قرار دے دیا ہے۔

    ڈیٹرائٹ میں کو وِڈ نائنٹین سے اب تک متعدد پولیس اہل کار متاثر ہو چکے ہیں، جن میں ایک پولیس کیپٹن اور ایک رینکنگ آفیسر شامل ہے جب کہ ایک ڈسپیچر ہے۔ تین اہل کار وائرس کا شکار ہو کر مر چکے ہیں۔ یہ بھی کہا جا رہا ہے کہ متاثرہ اہل کاروں کی تعداد بڑھنے کا خدشہ ہے، 200 سے زائد اہل کاروں کو قرنطینہ کیا جا چکا ہے۔

    اس صورت حال میں پولیس ڈیپارٹمنٹس نے اپنے اہل کاروں کو ہدایت کی ہے کہ وہ انفیکشن سے بچنے کے لیے عوام سے رابطے محدود کر دیں۔

  • امریکا نے اپنی افواج کی نقل و حرکت پر پابندی لگا دی

    امریکا نے اپنی افواج کی نقل و حرکت پر پابندی لگا دی

    واشنگٹن: امریکا میں کرونا وائرس سے متاثرہ افراد کی تعداد 68 ہزار سے بڑھ گئی ہے، جب کہ ہلاکتوں کی تعداد بھی ایک ہزار سے تجاوز کر گئی، دوسری طرف امریکا نے دنیا بھر میں اپنی افواج کی نقل و حرکت پر پابندی لگا دی ہے۔

    تفصیلات کے مطابق امریکا میں کرونا وائرس سے ہلاکتوں کی تعداد 1,032 ہو گئی ہے، جب کہ وائرس سے متاثر ہونے والے افراد کی مجموعی تعداد بڑھ کر 68,489 ہو گئی۔ دوسری طرف صحت یابی کا عمل سست ہے، اب تک صرف 394 مریض ہی صحت یاب ہو سکے ہیں۔

    امریکی میڈیا کے مطابق کرونا وائرس سے سب سے زیادہ 285 ہلاکتیں نیویارک میں ہوئیں، امریکا نے خراب ہوتی صورت حال کے پیش نظر دنیا بھر میں اپنی افواج کی نقل و حرکت پر پابندی عائد کر دی، امریکی وزیر دفاع مارک ایسپر کا کہنا تھا کہ یہ پابندی 60 روز کے لیے لگائی گئی ہے۔

    ڈبلیو ایچ او چین کی طرف داری کر رہا ہے: امریکی صدر کا شکوہ

    وزیر دفاع نے کہا کہ دنیا میں موجود فوجی 60 روز کے لیے موجودہ مقامات پر رہیں، اس پابندی کا اطلاق 90 ہزار امریکی فوجیوں پر ہوگا، دنیا بھر میں موجود امریکی فوجیوں کی واپسی بھی مؤخر کر دی گئی ہے۔ مارک ایسپر نے یہ وضاحت بھی کی کہ اس پابندی کا اطلاق واپس آنے والے نیول جہازوں پر نہیں ہوگا۔

    خیال رہے کہ گزشتہ روز امریکی صدر ڈونلڈ ٹرمپ نے کرونا ٹاسک فورس کے ہمراہ پریس کانفرنس کرتے ہوئے ایک بار پھر ’سب ٹھیک کر دینے‘ کا دعویٰ کرتے ہوئے کہا کہ اب میں صدر بن چکا ہوں تمام چیزیں ٹھیک کر دوں گا۔ انھوں نے نیویارک کو آفت زدہ شہر قرار دیتے ہوئے اعلان کیا میں نیو یارک کی مدد کرنے کے لیے تمام اختیارات کا استعمال کر رہا ہوں۔

  • قرنطینہ سے بھاگنے پر 7 سال سزا ہوسکتی ہے

    قرنطینہ سے بھاگنے پر 7 سال سزا ہوسکتی ہے

    ماسکو: روس میں کرونا وائرس سے نمٹنے کے لیے سخت اصول اپنانے کا فیصلہ کرتے ہوئے قرنطینہ سے بھاگنے والے افراد کے لیے 7 سال سزا کی تجویز پیش کردی گئی۔

    غیر ملکی میڈیا کے مطابق روس میں قانون سازوں نے کرونا وائرس کے پھیلاؤ کو روکنے کے لیے قرنطینہ کے اصولوں کی خلاف ورزی پر سخت سزاؤں کی تجویز دی ہے۔

    ان سزاؤں میں قرنطینہ کے لیے وضع کیے گئے اصولوں کی خلاف ورزی کے مرتکب افراد کو 7 سال قید کی سزا بھی شامل ہے۔

    غیر ملکی میڈیا کے مطابق اگر کرونا کے کسی مشتبہ یا مصدقہ مریض نے قرنطینہ میں نہ رہنے کے لیے دھوکہ دے کر لوگوں کو وائرس سے متاثر کیا یا جان بوجھ کر کسی ایک بھی شخص کی ہلاکت کا سبب بنا تو اسے 5 سال قید اور 2 یا اس سے زائد افراد کی موت کا ذمہ دار پایا گیا تو 7 سال قید ہوگی۔

    روس کے کرمنل کوڈ میں ترامیم کی یہ تجاویز روس کی پارلیمان کے اسپیکر وچسلیو ولودن اور روس کی حکمران جماعت یونائٹڈ رشیا پارٹی کے ایک سینیئر قانون دان کی جانب سے پیش کی گئی ہیں اور توقع کی جارہی ہے کہ یہ جلد منظور کرلی جائیں گی۔

    روس کے دارالحکومت ماسکو کی ڈوما اسمبلی آئندہ منگل کو ان تجاویز کا جائزہ لے گی، 144 ملین آبادی والے روس میں اب تک کرونا وائرس کے 658 کیسز رپورٹ ہوچکے ہیں۔

    ماسکو کے میئر سرگئی سوبیانین جو کرونا وائرس کے لیے قائم ٹاسک فورس کے سربراہ بھی ہیں، نے صدر ولادی میر پیوٹن کو خبردار کیا تھا کہ کرونا وائرس سے متاثرہ افراد کی اصل تعداد سرکاری اعداد و شمار سے کہیں زیادہ ہے۔

  • کیا کرونا وائرس گرمی میں ختم ہوسکتا ہے؟

    کیا کرونا وائرس گرمی میں ختم ہوسکتا ہے؟

    ریاض: سعودی وزارت صحت نے اس بات کی وضاحت کردی ہے کہ کرونا وائرس گرم موسم میں ختم ہوگا یا نہیں، ان کے مطابق وائرس سے بچنے کے لیے ہر موسم میں احتیاطی تدابیر اپنانی ضروری ہیں۔

    سعودی ویب سائٹ کے مطابق سعودی وزارت صحت کے ترجمان محمد العبد العالی کا کہنا ہے کہ کرونا وائرس دھات اور اس سے بنی اشیا پر زیادہ عرصے تک رہتا ہے، انہیں کسی بھی حالت میں چھونے سے گریز کیا جائے۔

    ترجمان کے مطابق ابھی تک کسی بھی سائنٹفک جائزے سے یہ بات ثابت نہیں ہوئی کہ کرونا وائرس 30 سینٹی گریڈ درجہ حرارت یا کسی بھی درجہ حرارت میں اپنا اثر کھو بیٹھتا ہے۔

    انہوں نے کہا کہ اس قسم کی باتوں پر اعتبار نہ کیا جائے اور اس بات کو ہمیشہ پیش نظر رکھا جائے کہ کرونا وائرس دھات والی چیزوں سے گھنٹوں چپکا رہتا ہے، اس سے بچنے کے لیے تمام ضروری تدابیر پر عمل کیا جائے۔

    انہوں نے مزید کہا کہ دھات کی کسی بھی چیز کو چھونے سے گریز کریں اور درجہ حرارت کے حوالے سے کہی جانے والی باتوں پر بھروسہ نہ کریں۔

    یاد رہے کہ سوشل میڈیا پر کہا جارہا ہے کہ کرونا وائرس 30 سینٹی گریڈ درجہ حرارت میں بے اثر ہوجاتا ہے، کئی افراد نے دھوپ میں بیٹھنے اور چلنے کو کرونا وائرس سے بچاؤ کا ذریعہ بھی بتا رہے ہیں۔

  • سندھ میں کرفیو کا کوئی امکان نہیں: ناصر حسین شاہ

    سندھ میں کرفیو کا کوئی امکان نہیں: ناصر حسین شاہ

    کراچی: وزیر اطلاعات سندھ ناصر حسین شاہ نے اے آر وائی نیوز سے گفتگو کرتے ہوئے واضح کیا ہے کہ سندھ میں کرفیو کا کوئی امکان نہیں۔

    ناصر حسین شاہ نے صوبہ سندھ میں کرونا وائرس سے پیدا ہونے والی صورت حال کے تناظر میں عوام کو پیغام دیتے ہوئے کہا کہ عوام افواہوں پر کان نہ دھریں، صوبے میں کرفیو کا کوئی امکان نہیں۔

    انھوں نے کہا کہ سندھ حکومت کا ہر اقدام عوام کے مفاد اور تحفظ کے لیے ہوگا، عوام کسی پروپیگنڈے کا شکار نہ ہوں۔

    لاک ڈاؤن مزید سخت، کراچی میں سناٹے کے ڈیرے

    دو روز قبل وزیر اطلاعات سندھ ناصر حسین شاہ نے ٹویٹر کے ذریعے کہا تھا کہ سندھ حکومت غیر معمولی اقدام اور مشکل فیصلے میں تاخیر نہیں کرے گی، یہ عالم گیر وبا انفرادی نہیں بلکہ اجتماعی نقصان کی حامل ہے، حکومت کو ان حالات میں عوام کا تعاون درکار ہوتا ہے، عوام کی بھلائی کے لیے کرفیو کی تجویز پر غور کیا جا سکتا ہے۔

    انھوں نے ٹویٹ میں لکھا تھا کہ کرونا وائرس سے پیدا صورت حال پر عوام سے ہاتھ جوڑ کر اپیل کرتا ہوں، حکومت سندھ کے احکامات، ہیلتھ ایڈوائزری پر سختی سے عمل کریں، عوام نے عمل نہ کیا تو مجبوراً سخت اور مشکل اقدام لینا پڑے گا۔

    خیال رہے کہ کراچی میں کرونا وائرس کے پیش نظر لاک ڈاؤن مزید سخت کر دیا گیا ہے، شہر میں گزشتہ رات 8 بجے کے بعد تمام دکانیں بند کرا دی گئیں، پرچون، دودھ اور دیگر دکانیں، سی این جی اسٹیشنز اور پیٹرول پمپس بھی بند رہے۔ تاہم شہر کے میڈیکل اسٹورز اور ٹیسٹنگ لیبارٹریز کھلی رہیں۔

  • ایران انسانی امداد آنے کی اجازت دے: ایلس ویلز

    ایران انسانی امداد آنے کی اجازت دے: ایلس ویلز

    واشنگٹن: امریکی نائب وزیر خارجہ برائے وسطی و جنوبی ایشیا ایلس ویلز نے کرونا وائرس سے خراب ہوتی صورت حال میں ایران سے کہا ہے کہ وہ انسانی امداد اپنے ملک میں آنے کی اجازت دے۔

    ایلس ویلز نے اپنے ٹویٹ میں کہا ہے کہ کرونا وائرس کے پیش نظر ایران انسانی امداد آنے کی اجازت دے، امریکی پابندیاں انسانی امداد پر اثر انداز نہیں ہوتیں۔

    نائب وزیر خارجہ کا کہنا تھا کہ خامنہ ای متعدد بار امریکی طبی امداد کی پیشکش کو مسترد کر چکے ہیں، امریکا کی جانب سے نقد امداد ایران میں کرونا وائرس کی ہلاکت خیزی کے خلاف فنڈ میں مدد کرے گی، نقد امداد ایران میں لوگوں کی ضروریات کے لیے نہیں۔

    خیال رہے کہ 14 مارچ کو ایرانی صدر حسن روحانی نے وزیر اعظم عمران خان کو خط لکھ کر درخواست کی تھی پاکستان امریکی پابندیاں ہٹانے کے لیے کردار ادا کرے، حسن روحانی نے خط میں پاکستان سے کرونا کے تناظر میں امداد کی بھی اپیل کی تھی۔

    ٹرمپ سے اپیل ہے انسانی بنیاد پر ایران سے پابندیاں ختم کرے، وزیراعظم

    سفارتی ذرایع کے مطابق پاکستان نے ایران سے پابندیاں ختم کرانے کے لیے سفارتی کوششیں تیز کر دی ہیں، پاکستان نے امریکا سے کرونا وائرس کی وجہ سے ایران میں خراب صورت حال پر پابندیوں کے خاتمے کا بھی مطالبہ کر دیا ہے۔

  • ڈبلیو ایچ او چین کی طرف داری کر رہا ہے: امریکی صدر کا شکوہ

    ڈبلیو ایچ او چین کی طرف داری کر رہا ہے: امریکی صدر کا شکوہ

    واشنگٹن: امریکی صدر ڈونلڈ ٹرمپ نے شکوہ کیا ہے کہ ڈبلیوایچ او کا ہمارے ساتھ رویہ منصفانہ نہیں رہا، صحت کا عالمی ادارہ چین کی طرف داری کرتا رہتا ہے۔

    تفصیلات کے مطابق امریکی صدر ڈونلڈ ٹرمپ نے کرونا ٹاسک فورس کے ہمراہ پریس کانفرنس کرتے ہوئے ایک بار پھر ’سب ٹھیک کر دینے‘ کا دعویٰ کرتے ہوئے کہا کہ اب میں صدر بن چکا ہوں تمام چیزیں ٹھیک کر دوں گا۔

    ان کا کہنا تھا کہ بہت سے میڈیا والے میرے بارے میں جھوٹی خبریں چلاتے ہیں، سرحدوں پر سخت اقدامات کر رہے ہیں، نہیں چاہتا کہ لوگ امریکا میں غیر قانونی طور پر داخل ہوں۔

    دریں اثنا، امریکی صدر ٹرمپ نے نیویارک کو آفت زدہ شہر قرار دے دیا، انھوں نے اعلان کرتے ہوئے کیا میں نیو یارک کی مدد کرنے کے لیے تمام اختیارات کا استعمال کر رہا ہوں، کانگریس میں 2 کھرب ڈالرز کا امدادی پیکج منظور کرنے پر اتفاق ہو گیا ہے۔

    ٹرمپ کا کہنا تھا کہ نوکریاں ختم ہونے والوں کو 100 فی صد تنخواہیں دیں گے، کرونا ویکسین کی تیاری کے لیے اربوں ڈالرز کے فنڈز منظور کیے ہیں، امریکا دنیا کا بہترین طبی ساز و سامان بناتا ہے، یورپی یونین سمیت دیگر ممالک بھی امریکا سے فائدہ اٹھاتے رہے ہیں، ہم نے کرونا وائرس کے سب سے زیادہ ٹیسٹ کیے، لازمی نہیں کہ پوری قوم کا کرونا ٹیسٹ کرایا جائے۔

    انھوں نے کہا جاپان نے اولمپکس ملتوی کر کے اچھا فیصلہ کیا، جب بھی اولمپکس ہوں گے جاپان ضرور جاؤں گا، آج جی 20 کی بھی اہم کانفرنس کال ہونے جا رہی ہے۔ خیال رہے کہ امریکا میں کرونا وائرس سے متاثرہ افراد کی تعداد 64 ہزار سے تجاوز کر گئی ہے، جب کہ ہلاکتوں کی تعداد 910 ہو گئی۔

  • ایس آئی یو ٹی میں کرونا کی تشخیص کا عمل رک گیا

    ایس آئی یو ٹی میں کرونا کی تشخیص کا عمل رک گیا

    کراچی: سندھ انسٹی ٹیوٹ آف یورولوجی اینڈ ٹرانسپلانٹیشن (ایس آئی یو ٹی) میں کرونا وائرس کی تشخیصی کٹس ختم ہو گئیں۔

    اے آر وائی نیوز کے مطابق ایس آئی یو ٹی میں کرونا وائرس کی تشخیص کا عمل عارضی طور پر رک گیا ہے، طبی ادارے میں وائرس کی تشخیصی کٹس ختم ہو چکی ہیں۔

    انتظامیہ ایس آئی یو ٹی کے مطابق طبی ادارے میں بڑی تعداد میں گردوں کے مریض زیر علاج ہیں، جیسے ہی وفاقی یا صوبائی حکومت کی جانب سے کٹس موصول ہوں گی، تشخیص کا عمل دوبارہ شروع کر دیا جائے گا۔

    شہر کے مختلف اسپتالوں میں تشخیصی کٹس کی عدم فراہمی کا سلسلہ بدستور برقرار ہے، ایس آئی یوٹی کی انتظامیہ کے مطابق اسکریننگ کا عمل کٹس کی عدم دستیابی کے باعث عام لوگوں کے لیے روک دیا گیا ہے کیوں کہ ایس آئی یو ٹی میں پہلے امراض گردہ کے مریضوں کی بڑی تعداد زیر علاج ہے جن کی اسکریننگ بھی کی جاتی ہے۔

    ایس آئی یو ٹی میں کورونا وائرس کی تشخیص کی سہولت کا آغاز

    آغا خان اسپتال کی انتظامیہ کے مطابق اسپتال میں مزید داخلوں کی گنجائش نہ ہونے کی کیفیت برقرار ہے اس لیے تشخیص کا عمل جاری نہیں رکھا جا سکتا جب کہ انڈس اسپتال کے ترجمان کے مطابق اسپتال میں ڈاکٹروں کی تجویز پر کرونا کی علامت والے مریضوں کی اسکریننگ کا عمل جاری ہے۔ ڈاؤ یونی ورسٹی کے ترجمان نعیم طاہر کے مطابق ادارے میں کرونا وائرس کے لیے اسکریننگ کا عمل جاری ہے، اوجھا کیمپس میں کٹس موجود ہیں۔

    اے آر وائی نیوز کے مطابق دیگر اسپتالوں میں کٹس ختم ہونے کی وجہ سے ان کا دباؤ بھی اوجھا کیمپس پر آ گیا ہے۔