Tag: Coronavirus

پنجاب: کرونا کا پھیلاؤ روکنے کے لیے 5 ارب روپے مختص

لاہور: پنجاب حکومت نے کرونا کا پھیلاؤ روکنے کے لیے 5 ارب روپے مختص کر دیے ہیں۔

اے آر وائی نیوز کے مطابق پنجاب حکومت نے کرونا وائرس کی صورت حال سے نمٹنے کے لیے پانچ ارب روپے مختص کر دیے، اس سے قبل صوبائی حکومت نے 23 کروڑ 60 لاکھ کی رقم مختص کی تھی۔

اطلاعات کے مطابق 27 فروری کو کرونا وائرس کے سلسلے میں مختص کی جانے والی معمولی رقم کا بھی مکمل استعمال نہیں کیا گیا تھا جس پر وزیر اعلیٰ پنجاب عثمان بزدار نے ناپسندیدگی کا اظہار کر دیا تھا۔

پنجاب حکومت نے حفاظتی سامان کے حصول کے لیے این ڈی ایم اے کو 50 کروڑ روپے جاری کرنے کا بھی فیصلہ کیا ہے۔

بلوچستان میں کرونا وائرس کے مزید 29 کیسز کی تصدیق

دریں اثنا، وزیر اعلیٰ پنجاب نے صوبے میں ماسک اور سینیٹائزر ذخیرہ کرنے والوں کے خلاف کریک ڈاؤن کا حکم جاری کر دیا ہے، ذخیرہ اندوزوں کے خلاف قانون کے مطابق بلاتفریق ایکشن لیا جائے گا، عثمان بزدار نے ہدایت کی ہے کہ عوام کو ماسک اور سینیٹائزر کی مقررہ قیمت پر دستیابی کو یقینی بنایا جائے۔

وزیر اعلیٰ پنجاب نے تشخیصی کٹس جلد منگوانے کے لیے ہر ممکن اقدام کرنے کی ہدایت بھی جاری کر دی ہے، ان کا کہنا تھا کہ صوبائی ایپکس کمیٹی کے فیصلوں پر من و عن عمل درآمد یقینی بنایا جائے۔ آج کرونا کے سلسلے میں قائم کابینہ کمیٹی کے اجلاس میں شاپنگ مالز اور ریسٹورنٹس کو رات 7 یا 8 بجے بند کرنے کی تجویز بھی دی گئی، جس پر وزیر اعلیٰ نے متعلقہ کمیٹیوں کو جائزہ لے کر حتمی سفارشات دینے کی ہدایت کی۔

اجلاس میں گھروں میں بھی شادی کی تقریبات بند کرنے کی تجویز سامنے آئی تھی۔

مارچ 19, 2020
بلوچستان میں کرونا وائرس کے مزید 29 کیسز کی تصدیق

کوئٹہ: صوبہ بلوچستان میں کرونا وائرس کے مزید 29 کیسز کی تصدیق کر دی گئی ہے جس کے بعد صوبے میں متاثرہ افراد کی تعداد 45 ہو گئی ہے۔

اے آر وائی نیوز کے مطابق ترجمان بلوچستان حکومت لیاقت شاہوانی نے کہا ہے کہ بلوچستان میں کرونا وائرس سے متاثرہ افراد کی تعداد 45 ہو گئی ہے، کوئٹہ قرنطینہ میں 252 افراد کے ٹیسٹ رپورٹ آ گئے۔

ترجمان بلوچستان حکومت کے مطابق تفتان میں 16 ٹیسٹ رپورٹس میں کرونا کی تصدیق ہوئی تھی، متاثرہ مریضوں کو آئسولیشن رومز میں منتقل کیا جا رہا ہے، متاثرہ مریضوں کو علاج معالجے کی سہولیات بھی فراہم کی جا رہی ہیں۔

ایک اور پاکستانی کرونا وائرس کو شکست دینے میں کامیاب

دریں اثنا، کرونا وائرس کے سلسلے میں بلوچستان میں طبی عملے کو ناقص حفاظتی آلات فراہمی کا انکشاف ہوا ہے، بلوچستان میں ڈاکٹرز کو ملنے والے حفاظتی سوٹ غیر معیاری نکلے، ذرایع کا کہنا ہے کہ بلوچستان میں ڈاکٹرز کے حفاظتی سوٹ استعمال کے پہلے روز ہی پھٹ گئے، غیر معیاری سوٹ نے صوبائی حکومت کے انتظامات کا پول کھول دیا۔

ذرایع کے مطابق بلوچستان میں کرونا مریضوں کا علاج کرنے والے ڈاکٹرز خوف کا شکار ہیں، ڈاکٹرز کا کہنا ہے کہ پھٹنے والے حفاظتی سوٹ کرونا وائرس کا مقابلہ کیسے کریں گے۔ ذرایع نے یہ بھی کہا کہ بلوچستان حکومت نے حفاظتی سوٹ کی خریداری مقامی مارکیٹ سے کی تھی۔

مارچ 19, 2020
کرونا وائرس: چین نے اپنے شہریوں کے لیے کم وقت میں ایک اور جدید اسپتال بنا لیا

بیجنگ: چینی دارالحکومت بیجنگ میں بیرون ملک سے آنے والے افراد کو قرنطینیہ میں رکھنے کے لیے 16 سو بستروں کا اسپتال تیار کرلیا گیا، یہ سینٹر خاص طور پر بیرون ملک سے وطن واپس لوٹنے والے چینی شہریوں کے لیے تیار کیا گیا ہے۔

نیا بنایا گیا یہ اسپتال اس سے قبل سارس وائرس کے مریضوں کے علاج کے لیے بنایا گیا تھا اور اب اسے تزئین نو کے بعد قرنطینیہ سینٹر میں تبدیل کردیا گیا ہے۔

چینی میڈیا کے مطابق بیجنگ ایئرپورٹ پر بیرون ملک سے پہنچنے والے افراد کے پہلے گروپ کو گزشتہ روز اس اسپتال منتقل کردیا گیا ہے۔

سینٹر کو 15 ہزار مزدوروں نے 53 روز میں تیار کیا ہے اور یہ 16 سو بستروں پر مشتمل ہے۔ یہاں 600 میڈیکل ورکرز کو تعینات کیا گیا ہے جو کرونا وائرس کے مشتبہ و مصدقہ مریضوں کا علاج کریں گے۔

یہ سینٹر خاص طور پر ان چینی شہریوں کے لیے تیار کیا گیا ہے جو وائرس کے پھیلاؤ کے دوران مختلف ممالک میں ہی رک گئے تھے، اور اب جب چین نے اس وائرس پر قابو پا لیا ہے تو یہ واپس اپنے وطن لوٹ رہے ہیں۔

ایک اندازے کے مطابق چین میں اب ہر روز 20 ہزار افراد بیرون ملک سے واپس آرہے ہیں، کرونا وائرس پر قابو پالینے کے بعد اب مختلف ممالک میں موجود چینی شہریوں کی بڑی تعداد وطن واپس لوٹنا چاہتی ہے اور اس کے لیے لوگ چارٹر طیارے میں سیٹ حاصل کرنے کے لیے 21 ہزار پاؤنڈز دینے کو بھی تیار ہیں۔

حکام نے اب تک 54 افراد کی نشاندہی کی ہے جو بیرون ملک کرونا وائرس کے مریضوں سے رابطے میں آئے، حکام نے خدشہ ظاہر کیا ہے کہ ایسے افراد کی واپسی چین کی ان سر توڑ کوشش کو زائل نہ کردے جو اس نے کرونا وائرس سے نمٹنے کے لیے کیں۔

حکام نے بیرون ملک موجود چینی شہریوں سے واپس نہ آنے کی اپیل بھی کی ہے اور ساتھ ہی اعلان کیا ہے کہ بیرون ملک سے چین آنے والے تمام افراد کو 14 دن قرنطینیہ میں گزارنے ہوں گے۔

حکام کے مطابق چین میں 7 مارچ سے اب تک کرونا وائرس کا کوئی مقامی کیس رپورٹ نہیں ہوا، تاہم اس عرصے میں 54 ایسے افراد میں کرونا وائرس کی تصدیق ہوئی ہے جوبیرون ملک سے آئے تھے۔

مارچ 19, 2020
سینٹرل جیل کراچی نے مخصوص قیدیوں کو رہا کرنے کی سفارش کر دی

کراچی: کرونا وائرس سے بچنے کی احتیاطی تدابیر جیل انتظامیہ کے لیے درد سر بن گئی ہیں، سپرنٹنڈنٹ سینٹرل جیل نے مخصوص قیدیوں کو رہا کرنے کی سفارش کر دی ہے۔

اے آر وائی نیوز کے مطابق کراچی سینٹرل جیل میں گنجایش سے زیادہ قیدیوں کی موجودگی سے صورت حال انتہائی تشویش ناک ہو گئی ہے، سپرنٹنڈنٹ سینٹرل جیل نے آئی جی جیل خانہ جات کو خط لکھ کر مخصوص قیدیوں کی رہائی کی سفارش کر دی۔

سپرنٹنڈنٹ سینٹرل جیل نے خط میں کہا ہے کہ 3 طرز کے قیدیوں کو رہا کیا جائے، ایسے قیدی جن کی عمر 65 سال اور 15 سال سزا کاٹ چکے ہیں، ایسے قیدی جو اپنی سزائیں ایک تہائی پوری کر چکے ہوں، اور وہ قیدی جو پے رول پر پورا اترتے ہوں ان کو پے رول گرانٹ کی جائے۔ ذرایع کا کہنا ہے کہ آئی جی جیل نے اس خط سے متعلق محکمہ جیل خانہ جات سندھ اور داخلہ کو آگاہ کر دیا۔

کراچی بچہ جیل کے قیدیوں کو اے کلاس ماسک فراہم کیے گئے

ایکسپو سینٹر کراچی میں پاک فوج کے تعاون سے فیلڈ اسپتال کے قیام کا بڑا فیصلہ

قبل ازیں، اتوار کو کرونا وائرس کے باعث سندھ کی جیلوں میں قیدیوں کی 3 ماہ کی سزا معاف کی گئی تھی، جس کے بعد سندھ کی جیلوں سے 7 قیدی رہا کیے گئے تھے، اور 2 ہزار 692 قیدیوں کو فائدہ پہنچا، اس سلسلے میں کراچی سینٹرل جیل سے ایک اور ملیر جیل سے 4 قیدی رہا ہوئے جب کہ حیدر آباد سینٹرل جیل سے 2 قیدیوں کو آزاد کیا گیا۔

بچہ جیل کراچی کے قیدیوں میں جراثیم کش صابن تقسیم کیے جا رہے ہیں

پیر کو سندھ ہائی کورٹ کے حکم پر کراچی سینٹرل جیل میں موجود 4 ہزار قیدیوں کی پہلی بار اسکریننگ کی گئی، جیل میں قیدیوں کا جدید مشینری سے چیک اپ کیا گیا، قیدیوں میں دوبارہ ماسک اور سینیٹائزر بھی تقسیم کیے گئے۔ کرونا وائرس سے بچاؤ کے لیے احتیاطی تدابیر کے طور پر سینٹرل جیل کے بعد بچہ جیل میں بھی فوری اقدامات کیے گئے، جیلر جوینائیل جیل گل محمد شیخ کا کہنا تھا کہ جیل میں قید بچوں میں اے کوالٹی ماسک تقسیم کیے گئے، بچہ جیل کے تمام ملازمین کو بھی ماسک تقسیم کیے گئے، جیل میں وافر مقدار میں جراثیم کش صابن بھی موجود ہیں، ڈاکٹروں کی جانب سے جیل ملازمین اور قیدیوں کو مکمل بریفنگ دی گئی اور کرونا سے بچاؤ کے لیے احتیاطی تدابیر بتائی گئیں۔

مارچ 19, 2020
شہری نے لاک ڈاؤن کے دوران پولیس کو چکمہ دے دیا

اسپین میں ایک شہری کرونا وائرس کے لاک ڈاؤن کے دوران پولیس کو چکمہ دینے کے لیے کھلونے کتے کو لے کر باہر نکل گیا اور کتے کو ٹہلانے کا ڈرامہ کرنے لگا۔

اسپین میں کرونا وائرس کے تیز رفتار پھیلاؤ کے سبب ایمرجنسی نافذ کردی گئی ہے اور لوگوں کو گھروں میں رہنے کا کہا گیا ہے۔ شہریوں کو صرف کام یا اسپتال جانے کے لیے اور روزمرہ اشیا کی خریداری کے لیے باہر جانے کی اجازت دی گئی ہے۔

خلاف ورزی کرنے اور بلا ضرورت باہر گھومنے والوں پر 601 یوروز سے 30 ہزار یوروز کے درمیان جرمانہ ہوسکتا ہے۔

اس دوران ایک معمولی نرمی یہ کی گئی ہے کہ پالتو کتے رکھنے والے افراد کو مختصر وقت کے لیے کتے کو لے کر باہر نکلنے اور ہوا خوری کروانے کی اجازت دی گئی ہے۔

اس نرمی کا فائدہ اٹھا کر ایک شخص نے کھلونے کتے کے گلے میں پٹہ ڈالا اور اسے لے کر باہر نکل گیا، اس دوران وہ کتے کو ٹہلانے کا ڈرامہ کرتا رہا تاہم جلد ہی سی سی ٹی وی فوٹیج کی مدد سے پولیس اس تک پہنچ گئی۔

مقامی پولیس نے مذکورہ شخص کو بغیر جرمانے کے وارننگ دے کر چھوڑ دیا۔

بعد ازاں سماجی رابطے کی ویب سائٹ ٹویٹر پر ویڈیو ٹویٹ کرتے ہوئے پولیس نے کہا کہ یہ ایمرجنسی لوگوں کی بھلائی کے لیے ہی لگائی گئی ہے، پولیس کو دھوکہ دینے سے پہلے کامن سینس کا استعمال کریں۔

خیال رہے کہ اسپین میں اب تک کرونا وائرس کے 14 ہزار 769 مریضوں کی تصدیق ہوچکی ہے جبکہ جان لیوا وائرس 638 افراد کی جانیں لے چکا ہے۔ وائرس سے اب تک 1 ہزار 81 افراد صحتیاب بھی ہوچکے ہیں۔

مارچ 19, 2020
کرونا وائرس: سعودی جیلوں میں احتیاطی تدابیر پر عمل درآمد شروع

ریاض : سعودی حکام نے کرونا وائرس کے پیش نظر جیل عملے اور قیدیوں کےلیے آگہی مہم اور احتیاطی تدابیر کا آغاز کردیا۔

عرب خبر رساں ادارے کی رپورٹ کے مطابق کرونا وائرس کی عالمی وبا نے دیگر ممالک کے ساتھ ساتھ سعودی عرب کو بھی متاثر کیا ہے جہاں اب تک 238 افراد میں ہلاکت خیز وبا کی تشخیص ہوچکی ہے۔

سعودی وزارت صحت اور داخلہ نے جیل میں قید افراد اور عملے کی حفاظت کو یقینی بنانے اور کرونا وائرس کی وبا کو پھیلنے سے روکنے کےلیے طبی خدمات انجام دینے والے اداروں کے تعاون سے احتیاطی تدابیر بتارہے ہیں۔

عرب میڈیا کا کہنا ہے کہ احتیاطی تدابیر اور آگہی مہم کا کام ماہر ڈاکٹر انجام دے رہے ہیں جبکہ وہ قیدی جو صحت کے اصولوں سے واقف ہیں وہ بھی آگہی مہم چلانے میں ڈاکٹر کی مدد کررہے ہیں۔

رپورٹس کے مطابق قیدیوں کو بیرکس میں جانے سے قبل اپنا مکمل طبی معائنہ کروانا ہوتا ہے جس کے لیے باقاعدہ جیل میں ایک طبی کیمپ بھی لگایا گیا ہے، عملے نے قیدیوں کو حفظان صحت کے اصولوں کے تحت ماسک اور دستانے بھی تقسیم کردئیے ہیں۔

مارچ 19, 2020
بھارت: کرونا سے بچاؤ کی ‘انوکھی’ پارٹی دینے والے بی جے پی رہنما گرفتار!

کلکتہ: بھارتی شہر کلکتہ میں بھارتیہ جنتا پارٹی کے رہنما نے کرونا سے بچاؤ کے لیے گائے کے پیشاب کی پارٹی دے ڈالی، پولیس نے گرفتار کر لیا۔

بھارتی میڈیا کے مطابق کرونا وائرس سے بچاؤ کے لیے گائے کا پیشاب پلوانے پر بی جے پی رہنما کو گرفتار کر لیا گیا، رہنما نے کرونا سے بچاؤ کے لیے گائے کا پیشاب پینے کی تقریب سجا دی تھی۔

پولیس کا کہنا تھا کہ تقریب میں ایک رضا کار نے گائے کا پیشاب پی لیا، جس پر وہ بیمار پڑ گیا، شہری کی شکایت پر بی جے پی کے مقامی رہنما نارائن چیٹر جی کو حراست میں لے لیا گیا۔ رہنما نے دعویٰ کیا تھا کہ گائے کا پیشاب کرونا وائرس سے بچائے گا اور جو پہلے ہی سے وائرس کا شکار ہیں انھیں صحت یاب کر دے گا۔

کرونا کے مریضوں پر اسٹمپ لگائی جائے گی، بھارت کا بڑا اعلان

خیال رہے کہ کرونا وائرس کے علاج کے لیے گائے کے پیشاب کی تقسیم کے عمل کو مغربی بنگال کی حکمران جماعت کے ساتھ ساتھ انڈیا کی اپوزیشن پارٹی کانگریس کی جانب سے بھی شدید تنقید کا نشانہ بنایا جا رہا ہے۔ ادھر بھارت میں کرونا وائرس سے ہونے والی اموات کی تعداد 3 ہو گئی ہے جب کہ 174 لوگ وائرس سے متاثرہ ہیں۔

مارچ 19, 2020
وہ دوا جو کرونا وائرس کے خلاف ’مؤثر‘ ثابت ہو رہی ہے

بیجنگ: چینی ماہرین کا کہنا ہے کہ کرونا وائرس کے خلاف فیوی پیراویر نامی ایک دوا مؤثر ثابت ہو رہی ہے، اس دوا کی اب تک کلینیکل آزمائش کی جارہی تھی۔

چین کی وزارت سائنس و ٹیکنالوجی کے ایک عہدیدار زینگ شن من کا کہنا ہے کہ فیوی پیراویر نامی جاپانی اینٹی وائرل دوا کے اثرات چین کے شہروں ووہان اور شینزن میں کلینکل ٹرائلز کے دوران حوصلہ افزا رہے ہیں۔

ان کے مطابق اس دوا کو 340 مریضوں کو استعمال کروایا گیا اور یہ وائرس کے خلاف محفوظ ہونے کے ساتھ ساتھ اس کے علاج میں بھی واضح طور پر مؤثر ثابت ہوئی ہے۔

رپورٹ کے مطابق شینزن میں جن مریضوں کو یہ دوا استعمال کروائی گئی ان میں ٹیسٹ مثبت آنے کے 4 دن بعد وائرس ختم ہو گیا، جبکہ اس دوا کے بغیر مرض کی علامات کے لیے دیگر ادویات کے استعمال سے صحتیابی میں اوسطاً 11 دن درکار ہوتے ہیں۔

علاوہ ازیں ایکسرے سے علم ہوا کہ اس نئی دوا کے استعمال سے 91 فیصد مریضوں کے پھیپھڑوں کی حالت میں بھی بہتری رونما ہوئی، جبکہ دیگر ادویات میں یہ شرح 62 فیصد کے قریب ہوتی ہے۔

جاپان میں بھی ڈاکٹروں کی جانب سے اس دوا کو کرونا وائرس کے معمولی سے معتدل علامات والے مریضوں پر ہونے والے کلینیکل ٹرائلز کے لیے استعمال کیا جا رہا ہے اور ڈاکٹرز کو توقع ہے کہ اس کے استعمال سے مریضوں میں وائرس کی نشوونما کی روک تھام ممکن ہے۔

جاپانی وزارت صحت کے ذرائع کا کہنا ہے کہ یہ دوا سنگین علامات والے مریضوں کے لیے ممکنہ طور پر زیادہ مؤثر نہیں کیونکہ ایسے مریضوں پر اس کا اثر دیکھنے میں نہیں آیا جن میں یہ وائرس زیادہ پھیل چکا تھا۔

ان کے مطابق اس نئی دوا کو کرونا وائرس سے ہونے والے بیماری کووڈ 19 کے لیے بڑے پیمانے پر استعمال کرنے کے لیے حکومتی اجازت کی ضرورت ہوگی کیونکہ یہ بنیادی طور پر فلو کے علاج کے لیے تیار کی گئی تھی۔

اس دوا کو فیوجی فلم ٹویاما کیمیکل نے سنہ 2014 میں فلو کے لیے تیار کیا تھا تاہم کمپنی نے چین کے حالیہ دعوے پر کوئی ردعمل نہیں دیا، البتہ چینی عہدے دار کے بیان کے بعد کمپنی کے حصص میں بدھ کو 14 فیصد سے زائد اضافہ دیکھنے میں آیا۔

دوسری جانب امریکی شہر سیئٹل میں واقع واشنگٹن ریسرچ انسٹی ٹیوٹ میں کرونا وائرس کی ویکسین کے تجربے کا آغاز کیا جاچکا ہے۔

اس ویکسین کی آزمائش 45 صحت مند انسانوں پر کی جائے گی اور اس کے حتمی نتائج جاننے میں 12 سے 18 ماہ کا وقت لگے گا۔ اس کے بعد ہی یہ تعین کیا جاسکے گا کہ ویکسین وائرس کے خلاف کس حد تک مؤثر ہے۔

مارچ 19, 2020
سعودی عرب میں گودام پر چھاپہ، 20 لاکھ سے زائد ماسک برآمد

ریاض: سعودی حکام نے ایک گودام پر چھاپہ مار کر 20 لاکھ سے زائد حفاظتی ماسک اور دستانے برآمد کر کے اپنی تحویل میں لے لیے، گودام کے مالک کو قانون نافذ کرنے والے اداروں کے حوالے کردیا گیا۔

سعودی ویب سائٹ کے مطابق سعودی وزارت تجارت کے انسپکٹرز نے سعودی فوڈ اینڈ ڈرگ اتھارٹی (ایف ڈی اے) کے تعاون سے ایک تجارتی ادارے کے گودام پر چھاپہ مار کر 20 لاکھ سے زیادہ حفاظتی ماسک اور دستانے برآمد کرلیے۔

تجارتی ادارے کا مالک مہنگے داموں فروخت کرنے کے لیے انہیں ذخیرہ کیے ہوئے تھا۔ وزارت تجارت کے انسپکٹرز کا کہنا ہے کہ تجارتی ادارے کے مالک نے وزارت کو ذخیرہ شدہ ماسک اور دستانوں سے متعلق اعتماد میں نہیں لیا تھا اور نہ مبینہ گودام کے پاس کوئی لائسنس تھا۔

وزارت تجارت نے قانونی کارروائی کرتے ہوئے برآمد شدہ ماسک اور دستانے ضبط کرلیے۔ تجارتی ادارے اور اس کے گودام کے ذمہ داران کو قانونی سزا دلانے کے لیے متعلقہ اداروں کے حوالے کر دیا گیا۔

وزارت تجارت نے ایسے تمام تاجروں کو جو غیر قانونی طریقے سے حفاظتی ماسک اور دستانے چھپائے ہوئے ہیں، خبردار کیا ہے کہ پہلی فرصت میں حفاظتی ماسک اور دستانوں کے ذخیرے سے متعلق وزارت کو مطلع کریں اور چھپایا ہوا مال مارکیٹ میں لائیں۔

حکام نے شہریوں سے بھی اپیل کی ہے کہ ایسے ادارے جو حفاظتی ماسک اور دستانے ذخیرہ کیے ہوئے ہو اور اسے مہنگے داموں فروخت کر رہا ہو، کے خلاف شکایات سینٹر وزارت تجارت کی ویب سائٹ پر رپورٹ کریں۔

مارچ 19, 2020
ایکسپو سینٹر کراچی میں پاک فوج کے تعاون سے فیلڈ اسپتال کے قیام کا بڑا فیصلہ

کراچی: سندھ حکومت نے کرونا وائرس کے ہنگامی صورت حال سے نمٹنے کے لیے ایکسپو سینٹر کراچی میں پاک فوج کے تعاون سے فیلڈ اسپتال قائم کرنے کا فیصلہ کر کے تیاریاں شروع کر دی ہیں، ادھر کراچی میں کرونا وائرس کے مزید 3 کیس رپورٹ ہوئے ہیں۔

اے آر وائی نیوز کے مطابق کمشنر کراچی افتخار شالوانی نے وفاقی وزارت تجارت کے حکام سے رابطہ کر کے ایکسپو سینٹر کراچی میں فیلڈ اسپتال کے قیام کی تجویز دی، جسے وفاق نے قبول کر لیا۔

ذرایع کا کہنا ہے کہ وفاق کی جانب سے تجویز منظور ہونے کے بعد ایکسپو سینٹر میں کرونا کے مریضوں کے لیے فیلڈ اسپتال قائم کرنے کی تیاریاں شروع کر دی گئی ہیں، وزیر اعلیٰ سندھ مراد علی شاہ نے کمشنر کو فیلڈ اسپتال کے لیے بستر اور دیگر سامان خریدنے کی ہدایت بھی کر دی ہے۔

وزیر اعلیٰ سندھ مراد علی شاہ کی زیر صدارت خصوصی اجلاس میں فیصلہ کیا گیا کہ ایکسپو سینٹر میں اسپتال، آئسولیشن سینٹر پاک فوج کے تعاون سے قائم ہوگا، سندھ حکومت اور کور کمانڈر کراچی کی ٹیمیں مل کر کام کریں گی، سندھ حکومت کی ٹیم کی سربراہی سعید غنی کریں گے، کمشنر کراچی معاونت کریں گے، جب کہ کور کمانڈر کراچی ٹیم کی سربراہی بریگیڈیئر سمیع کریں گے۔ سندھ حکومت نے 20 لاکھ راشن بیگ عوام میں تقسیم کرنے کا بھی اعلان کیا، راشن بیگ میں چاول، آٹا، گھی، چینی، پتی، دال اور مصالحے شامل ہوں گے، وزیر اعلیٰ سندھ نے راشن بیگز تقسیم کرنے کی ہدایت کر دی۔

ایک اور پاکستانی کرونا وائرس کو شکست دینے میں کامیاب

ادھر کراچی میں کرونا وائرس کے مزید 3 کیس رپورٹ ہو گئے ہیں، محکمہ صحت سندھ کا کہنا ہے کہ کراچی میں تینوں کیسز مقامی ہیں، ان کی کوئی ٹریول ہسٹری نہیں، سندھ میں کرونا وائرس کے کیسز کی تعداد 211 ہو گئی، حیدر آباد میں ایک، کراچی میں وائرس کے کیسز کی تعداد 59 ہے، تفتان سے آئے زائرین سکھر میں 151 کیسز مثبت ہیں۔

آج کرونا وائرس پر اجلاس میں وزیر اعلیٰ سندھ مراد علی شاہ نے کہا کہ وائرس میں مبتلا سندھ میں تیسرا مریض بھی صحت یاب ہو گیا ہے، جو اچھی علامت ہے۔ ہانگ کانگ، سنگاپور، تائیوان اور جنوبی کوریا نے اس انفیکشن کی رفتار پر کنٹرول کیا ہے، صرف کم سے کم سفر اور مسلسل اسکریننگ سے کرونا وائرس کو روکا جا سکتا ہے، بڑے اجتماع پر پابندی، سخت قرنطینہ کا عمل ہونا چاہیے۔

دوسری طرف سکھر کی ضلعی انتظامیہ نے کہا ہے کہ تفتان سے مزید 757 زائرین کی قرنطینہ سینٹر آمد کے بعد تعداد 1060 ہو گئی ہے، اسکرنینگ کا عمل شروع کر دیا گیا ہے، بس کے ڈرائیورز اور کنڈیکٹرز کے سیمپلز اور بایو ڈیٹا لے لیا گیا ہے، مسافر کوچز کے ڈرائیورز، کنڈیکٹرز کی تعداد 60 ہے، زائرین کو رہایش کے ساتھ کھانے پینے کی اشیا دی گئی ہیں، کراچی سے ماہر ڈاکٹروں کی ٹیم بھی سکھر کے قرنطینہ پہنچ چکی ہے۔

مارچ 19, 2020