لاس اینجلس : امریکا کے ایمی ایوارڈ یافتہ معروف اداکار میلکم جمال وارنر کوسٹا ریکا کے سمندر میں نہاتے ہوئے ڈوب کر ہلاک ہوگئے۔
مرحوم کی عمر 54 سال تھی، اداکار میلکم جمال وارنر نے 1980 کی دہائی کے مشہور ٹی وی شو "دی کاسبی شو” میں بیل کاسبی کے بیٹے تھیو کا کردار ادا کیا تھا۔
ان کی ہلاکت کی وجہ سمندر میں ڈوبنا بتائی گئی ہے، جس کی تصدیق رائٹرز کو قانون نافذ کرنے والے ایک ذریعے نے کی۔
میلکم جمال وارنر اپنے خاندان کے ساتھ تعطیلات گزارنے کے لیے کوسٹا ریکا (وسطی امریکا کا ملک) گئے ہوئے تھے۔
کوسٹا ریکا کے تفتیشی ادارے نے تصدیق کی ہے کہ ایک امریکی شہری جن کا آخری نام "وارنر” تھا، ایک سمندر میں نہاتے ہوئے ڈوب کر ہلاک گئے۔ ریڈ کراس کے لائف گارڈز نے انہیں باہر نکالا لیکن وہ اس وقت تک دم توڑ چکے تھے۔
میلکم جمال وارنر 18 اگست 1970 کو نیو جرسی میں پیدا ہوئے اور ان کا نام مشہور سول رائٹس لیڈر میلکم ایکس اور جَیَز موسیقار احمد جمال کے نام پر رکھا گیا تھا، ان کی والدہ پامیلا ہی ان کی منیجر تھیں۔
بچپن سے ہی انہیں اداکاری میں دلچسپی تھی، انہوں نیویارک کے پروفیشنل چلڈرن اسکول میں اداکاری کی ابتدائی تربیت حاصل کی۔
میلکم جمال کو ابتدا میں چھوٹے موٹے ٹی وی کردار ملے لیکن ان کی اصل پہچان "دی کاسبی شو” میں تھیو ہکسیٹیبل کے کردار سے بنی۔
1986میں انہیں ایمی ایوارڈ کے لیے نامزد کیا گیا تھا۔انہوں نے بعد میں متعدد مشہور ٹی وی شوز میں بھی اپنی صلاحیتوں کے جوہر دکھائے۔