کراچی :عدالت نے سانحہ بلدیہ کی منظم دہشت گردی کا انکشاف کرنے والے ملزم رضوان قریشی کے ناقابل ضمانت گرفتاری وارنٹ جاری کردیے۔
ملزم رضوان قریشی پر کراچی کے مختلف تھانوں میں ٹارگٹ کلنگ، ناجائز اسلحہ رکھنے کے مقدمات درج ہیں۔ ملزم پر سرسید تھانے میں دو، نارتھ ناظم آباد میں تین،عوامی کالونی تھانے میں دو، اور نیو کراچی تھانے میں ایک قتل کا مقدمہ درج ہے۔
ملزم پر آرٹلری تھانے کی حدود میں ناجائز اسلحہ رکھنے کا مقدمہ بھی درج ہے ،عدالت نے پولیس کو ہدایت دی ہے کہ گیارہ اپریل کو گرفتار کرکے پیش کیا جائے۔
ابیٹ آباد : پشاورہائی کورٹ ابیٹ آباد بنچ نے جیوکےمالک میرشکیل الرحمان کو گرفتار کرکے عدالت پیش کرنے کاایک بارپھر حکم دیا ہے۔ملزم کی پاکستان میں موجودگی کے باوجود عدم گرفتاری سوالیہ نشان ہے۔
قانون کی بالادستی کا پرچار کرنے والے جیو کے مالک میرشکیل الرحمان نے قانون شکنی میں سب سے آگے نکل گئے۔ قانون کو گھر کی لونڈی سمجھتے ہوئے عدالتی احکامات کے باوجود سماعت سے مسلسل غائب ہیں۔
پشاورہائی کورٹ ابیٹ آباد کے دورکنی بنچ نے جسٹس قلندر علی سربراہی میں توہین رسالت کیس کی سماعت کی۔ عدالت نے میرشکیل الرحمان کی عدم گرفتاری پر شدید برہمی کا اظہار کیا اور پولیس سے رپورٹ طلب کرلی۔
عدالت نے پولیس کو ایک بارپھر احکامات دیئے کہ آئندہ سماعت پر جیوکے مالک شکیل الرحمان اور دیگرملزمان کو گرفتار کرکے عدالت پیش کیا جائے۔
عدالت اس سے قبل ملزمان کی روپوشی پرانہیں اشتہاری قراردے چکی ہے۔ اطلاعات کے مطابق ملزم میرشکیل الرحمان ان دنوں اسلام آباد میں موجود ہیں۔ عدالتی احکامات کے باوجود ان کی عدم گرفتاری پولیس کی کارکردگی پرسوالیہ نشان ہے۔
لاہور : سیشن عدالت نے سزائے موت کے قیدی کے ڈیتھ وارنٹ جاری کردیئے، اطہر محمود کو 18 مارچ کو گجرات جیل میں پھانسی دی جائے گی۔
سیشن جج لاہور نے اطہر محمود کے ڈیتھ وارنٹ جاری کرتے ہوئے سپرنٹنڈنٹ جیل گجرات کو ہدایت کی ہے کہ مجرم کی پھانسی کیلئے تمام انتظامات کو حتمی شکل دیں اور 18 مارچ کو اسے تختہ دار پر لٹکایا جائے۔
اطہر محمود نے 1995 میں خاندانی دشمنی پر گجرات میں سلیم نامی شخص کو قتل کیا تھا جس پر اسے سزائے موت سنائی گئی تھی لیکن مجرم کی اپیلوں اور حکومت کی جانب سے پھانسی پر پابندی کے باعث سزا پر عمل درآمد نہیں ہوا تھا۔
لاہور: اریبہ قتل کیس میں ملزمہ طوبی کو ساتھیوں سمیت لاہور کی عدالت میں پیش کردیا گیا ۔ عدالت نے تینوں ملزمان کو تین دن کے جسمانی ریمانڈ پر پولیس کے حوالے کردیا ،ملزمان نے گزشتہ روز اعتراف جرم کیا تھا۔
پولیس کا کہنا ہے کہ ملزمان نے قتل کے اعتراف کر لیا ہے۔ تفصیلات کے مطابق ماڈلنگ کا شوق رکھنے والی مقتولہ اریبہ قتل کیس میں طوبیٰ اور دیگر ملزمان کو لاہورکی عدالت میں پیش کردیا گیا ۔
پولیس کےمطابق اریبہ قتل کیس کی تفتیش مکمل ہوگئی ہےاور ملزمہ طوبیٰ نےفاروق، ذیشان اوررخسانہ کیساتھ ملکر اریبہ کےقتل کا اعتراف کر لیا ہے۔
طوبیٰ کا اپنے بیان میں کہنا تھا کہ عریبہ کا اس کے شوہر سے تعلق تھا اسی لئے اس نے دہی میں زہر ملا کر اسے مار ڈالا۔
ملزمہ نے پولیس سے تفتیش کے دوران فری لانس صحافی فاروق کھوکھرکےقتل کا بھی اعتراف کیا۔
دوسری جانب ذرائع کا کہنا ہے کہ مقتولہ اریبہ پر دو ماہ قبل عائشہ بٹ نامی خاتون نےآئی فون کی چوری پرقتل کی دھمکیاں بھی دی تھیں۔
چند روز بعد مسلم لیگ ن سے تعلق رکھنے والی بااثر سیاسی شخصیت اریبہ کوگن پوائنٹ پر اپنے ہمراہ لےگئی تھی جس کے بعد اریبہ کی لاش بس اڈے سے بند صندوق میں ملی۔علاوہ ازیں اریبہ قتل کیس میں ملزمہ طوبی اور اس کے دوساتھیوں کوعدالت نے تین دن کے جسمانی ریمانڈ پر پولیس کے حوالے کردیا گیا ۔
نیویارک :امریکی عدالت نے پاکستانی شخص پر القاعدہ سے تعلق اوردہشتگرد حملوں کی سازش میں ملوث ہونے کا الزام عائد کردیا۔
امریکی شہرنیویارک کی عدالت میں پاکستانی شہری عابد نصیر پردہشت گرد حملوں کی سازش کے الزامات عائد کردیے گئے ہیں۔
امریکی وکیل نے عابدنصیرپربرطانوی شہرمانچسٹرمیں دہشتگردی سیل چلانے، نیویارک اورمانچسٹرمیں زیرزمین ریل سمیت اہم جگہوں پرحملوں کی سازش تیارکرنے کے الزامات عائد کیے ہیں۔
عابد نصیرنے الزامات کی صحت سے انکار کرتے ہوئے کہا ہے کہ وہ تعلیم حاصل کرنے کیلےبرطانیہ گئے تھے دہشتگردی کرنے نہیں، عابد کے دوساتھیوں نے جرم کا اعتراف کرلیا ہے۔
الزامات ثابت ہونے پرعابد نصیرکوعمرقید کی سزاسنائی جاسکتی ہے، عابد نصیر کوبرطانوی شہرمانچسٹرکے شاپنگ مال پرحملے کی منصوبہ بندی کرنے کے الزام میں دوہزارنومیں گرفتارکیا گیا تھا اورپھربے دخل کرکے امریکابھیج دیا گیا تھا۔
اسلام آباد: وزارت داخلہ نے سابق صدر پرویز مشرف کی سعودی عرب جانے کی درخواست مسترد کر دی ہے۔
سابق صدر پرویز مشرف کی جانب سے وزارت داخلہ میں ایک درخواست جمع کروائی گئی تھی جس میں موقف اختیار کیا گیا تھا کہ شاہ عبداللہ بن عبدالعزیز کے انتقال پر تعزیت کیلئے پرویز مشرف سعودی عرب جانا چاہتے ہیں اس لئے ان کا نام ایگزٹ کنٹرول لسٹ سے خارج کیا جائے۔
درخواست میں موقف اختیار کیا گیا تھا کہ سابق صدر پرویز مشرف کے سعودی عرب کے مرحوم شاہ عبداللہ بن عبدالعزیز سے دیرینہ مراسم تھے، ان کے ہی دور میں شاہ عبداللہ نے پاکستان کا دورہ کیا تھا۔
تاہم وزارت داخلہ نے سابق صدر پرویز مشرف کی یہ درخواست مسترد کر دی ہے، ذرائع کے مطابق پرویز مشرف کی جانب سے سعودی عرب جانے کی درخواست پر اعتراض وزارت قانون کی جانب سے لگایا گیا ہے۔
اسلام آباد: وفاقی کابینہ نےسابق صدر پرویز مشرف کو سعودی عرب جانے کی اجازت کا اختیار وزیراعظم کو دے دیا ہے، جس پر انہوں نے وزارت خارجہ سے رائے طلب کرلی ہے۔
سابق صدر مملکت پرویز مشرف کی طرف سے وفاقی حکومت کوسعودی عرب جانے کیلئے جمع کروائی گئی درخواست پر فیصلہ پیر کے روز کیا جائے گا، وزیر اعظم نواز شریف کی سربراہی میں آج ایک اعلیٰ سطحی اجلاس میں سابق صدر کی استدعا پر غور کیا گیا مگر کوئی حتمی فیصلہ نہیں کیا جا سکا۔
حکومتی ذرائع کا کہنا ہے کہ وزارت داخلہ کو آئین اور قانون کی روشنی میں فیصلہ کرنے کی ہدایات جاری کی گئی ہیں۔ دوسری جانب سابق صدر کے وکیل نے اس امید کا اظہار کیاہے کہ حکومت ان کے موکل کی درخواست منظور کر لے گی۔
واضح رہے پرویز مشرف نے سعودی فرمانروا شاہ عبداللہ بن عبدالعزیز کی وفات پر اظہار افسوس کیلئے سعودی عرب جانے کی اجازت طب کی تھی ہے۔
لاہور: نااہلی کا اعتراف کرتے ہوئے وزیر ریلوے سعد رفیق کا کہنا ہے کہ پیٹرول کی قلت نہیں ہونی چاہیے تھی، ذمہ داروں سے جواب طلبی ہوگی۔
لاہور کے علاقے والٹن میں سڑک کے افتتاح کے موقع پر میڈیا سے گفتگو کرتے ہوئے وفاقی وزیر ریلوے خواجہ سعد رفیق نے اعتراف کیا کہ پیٹرول کا بحران حکومت کی نااہلی کی وجہ سے پیدا ہوا ہے، وہ اپنی غلطیاں کارپٹ کے نیچے نہیں چھپائیں گے۔ انہوں نے کہا کہ جوڈیشل کمیشن سے نہیں بھاگ رہے لیکن عمران خان کو ریٹرننگ افسران کی غلطیاں حکومت کے سر پر نہیں تھونپنے دینگے۔
انکا کہنا تھا پاکستان ریلو ے کے پاس پیٹرول کا ذخیرہ موجود ہے، خواجہ سعد رفیق کا کہنا تھا کہ لاہور میں باب پاکستان کامنصوبہ رواں ماہ شروع کردیں گے۔ جس پر دس کروڑ روپے لاگت آئے گی۔ باب پاکستان ہجرت کرکے آنے والے پاکستانیوں کی یادمیں تعمیرکیاجائےگا۔ انھوں نے کہا کہ ریلوے اپنے پاوں پر کھڑی ہوسکتی ہے تو پی آئی اے کیوں نہیں ہوسکتی۔
اسلام آباد: مشرف حملہ کیس میں پھانسی کی سزا پانے والے روسی شہری اخلاص اخلاق کی میت اسلام آباد میں روسی سفارت خانہ کے حوالے کردی گئی۔
اخلاص اخلاق کو راولاکوٹ کے نواحی علاقہ ہجیرہ میں سپرد خاک کیا گیا تھا، جہاں گزشتہ شب اس کے والد نے بغیر اجازت میت نکال کر اسلام آباد پہنچادی، اخلاص اخلاق کی روسی نژاد والدہ نے روسی سفارت خانے کے ذریعے بیٹے کی میت کو روس لانےکی درخواست کی تھی ۔
جس پر حکومت پاکستان نےمیت کو روسی سفارت خانے کے حوالے کرنے کا ابھی کوئی حتمی فیصلہ نہیں کیا تھا مگر اخلاص کے والد نے اسسٹنٹ کمشنرکی اجازت سے میت کو حکومتی اجازت کے بغیر قبر سے نکال کر اسلام آباد لے جاکرروسی سفارت خانے کے حوالے کردیا، میت روسی سفارت خانے کے حوالے کرنے پر اخلاص کے والد کے خلاف ایف آر وائی درج اور فرائض میں کوتاہی برتنے پر اسسٹنٹ کمشنر ہجیرہ کو معطل کردیا گیا۔
لاہور: لاہور کی مقامی عدالت میں اے آر وائی کے دو نمائندوں کیخلاف کیس کی سماعت، ریلوے انسپکٹر نے سعد رفیق کے ملوث ہونے کا بھانڈا پھوڑ دیا.۔
مقدمے میں نئی دفعات ڈالنے کا انکشاف، ریکارڈ پیش نہ کیے جانے پر عدالت برہم، تفصیلات کے مطابق محکمہ ریلوے افسران کی نا اہلی دکھانے کے الزام میں اے آر وائی نیوز کے گرفتارنمائندوں کولاہور کی مقامی میں عدالت میں پیش کیا گیا۔
ریلوے کے لیگل انسپکٹر نے وفاقی وزیر خواجہ سعد رفیق کے ملوّث ہونے کا بھانڈا پھوڑ دیا،ریلوے کے لیگل انسپکٹر کا کہنا تھا کہ خواجہ سعد رفیق خود اس معاملے کو دیکھ رہے ہیں۔
محکمہ ریلوے کی جانب سےمقدمے کا ریکارڈ پیش نہ کرنے پرعدالت نے برہمی کا اظہار کیا، تاہم عدالتی وقت کے بعد آدھاگھنٹہ گزرنے کے باوجود ریلوے حکام ریکارڈ پیش نہ کر سکے۔ علاوہ ازیں مقدمے میں نئی دفعات ڈالنے کا بھی انکشاف ہوا ہے۔،