Tag: Covid-19

واشنگٹن: نئے کرونا وائرس کی دنیا بھر میں زبردست ہلاکت خیزی کے مشاہدات اور مطالعات کے بعد طبی ماہرین نے اب اس سلسلے میں تحقیقات شروع کر دی ہیں کہ کیا کو وِڈ 19 اب پہلے جیسا ہلاکت خیز نہیں رہا۔

دنیا بھر میں کرونا وائرس کا مرکز بننے والے مقامات پر اموات کی شرح میں نمایاں کمی آ چکی ہے حالاں کہ کرونا وبا کی نئی لہر کے دوران انفیکشن کی شرح بھی بڑھ گئی ہے، پھر بھی سائنس دان اس حوالے سے تو پُر اعتماد ہیں کہ یہ تبدیلی حقیقی ہے مگر اس کی وجوہ اور اس کا برقرار رہنا تاحال قابل بحث سمجھا جا رہا ہے۔

بوسٹن یونی ورسٹی اسکول آف میڈیسن کے وبائی امراض کے ماہر جوشوا باروکس کا کہنا ہے کہ یہ ایک رجحان ہے یا محض عارضی ٹھہراؤ، کسی کو معلوم نہیں۔ کیوں کہ اس وبا کے آغاز ہی سے اس کی شرح اموات میں اتار چڑھاؤ آتا رہا ہے۔

اس تناظر میں امریکی ریاست مشی گن کے ڈیٹرائٹ میڈیکل سینٹر میں تین ماہ مسلسل کام کرنے والے سید الزین نے دیکھا کیا کہ مئی میں اس سے قبل کے مہینوں میں آنے والے مریضوں کے مقابلے میں اب کرونا وائرس کے مریض زیادہ بیمار نہیں ہوتے۔ دل چسپ امر یہ ہے کہ یہاں سے 4 ہزار سے زائد میل دور شمالی اٹلی کی خاتون محقق کیارا پی بیلی نے بھی یہی نتیجہ نکالا۔ اسپین کے وبائی امراض کے ماہر رافیل کینٹن نے بھی اس تبدیلی کو واضح طور پر دیکھا۔

چین سے آنے والی ابتدائی رپورٹس کے مطابق کرونا وائرس کی شرح اموات 7 فی صد تک تھی لیکن یہ شرح زیادہ تر اسپتال داخل مریضوں پر مبنی تھی، جب اس کی لہر امریکا پہنچی، تو وبائی امراض کے ماہرین کا خیال تھا کہ اس کی شرح 2 سے 3 فی صد ہے۔ اب امریکا کے سینٹرز فار ڈیزیز کنٹرول اینڈ پریونٹیشن (سی ڈی سی) کے مطابق یہ شرح 0.65 فی صد ہے۔

جوشوا باروکس کا اصرار ہے کہ کم تخمینے کے باوجود لاکھوں اموات کا امکان ہے، کیوں کہ امریکا میں اس وقت کرونا وائرس کے کیسز کی شرح دنیا میں سب سے زیادہ ہے اور اموات بھی کسی اور ملک کے مقابلے میں زیادہ ہوئی ہیں، یعنی تمام اموات کا 20 فی صد۔

پبلک ہیلتھ آفیشلز شرح اموات میں کمی کی متعدد وجوہ بتاتے ہیں، جیسا کہ نوجوان اس کا زیادہ شکار ہو رہے ہیں اور ان کی قوت مدافعت صحت یابی میں مدد دیتی ہے۔ بڑے پیمانے پر ٹیسٹنگ سے کیسز کی جلد تشخیص ہو رہی ہے اور علاج کی حکمت عملیاں بھی بہتر ہوئی ہیں۔

ابتدائی تحقیق میں ایک خیال یہ سامنے آیا تھا کہ آبادی کے ایک حصے کو پہلے ہی جزوی طور پر کرونا وائرس کے خلاف مدافعت حاصل ہے، ممکنہ طور پر عام نزلہ زکام کا باعث بننے والے کرونا وائرسز یا بچپن کی ویکسی نیشن یا کسی اور وجہ سے۔ ایک اور اہم امکان یہ ہے کہ ہمارا ماحول تبدیل ہوا ہے یعنی موسم، رویے یا بذات خود وائرس۔

ماہرین کا کہنا ہے کہ بیش تر وائرسز کی ہلاکت خیزی کی صلاحیت بتدریج کم ہونے لگتی ہے جس کی مختلف وجوہ ہیں جیسے میزبانوں کی کمی، وائرس میں تبدیلیاں جو اسے کم جان لیوا بناتی ہیں، نئے طریقہ علاج یا ویکسینز۔ ماہرین کے مطابق نئے کرونا وائرس کے ساتھ بھی ایسا ضرور ہوگا، مگر یہ دیکھنا ہوگا کہ ایسا کب تک ہوگا اور جب تک مزید کتنی ہلاکتیں ہو چکی ہوں گی، تاہم اس سلسلے میں سماجی دوری اور فیس ماسک کے کردار کو بھی سراہا گیا۔

طبی ماہرین نے ایک اور نکتہ یہ دریافت کیا ہے کہ وقت کے ساتھ کرونا کے وائرل لوڈ (جسم میں وائرس کی مقدار کو جانچنے کا پیمانہ) میں ڈرامائی تبدیلی آئی ہے، کیلی فورنیا یونی ورسٹی کی وبائی امراض کی محقق مونیکا گاندھی نے اس حوالے سے اپنا نقطہ نظر بیان کرتے ہوئے کہا کہ اگر ابتدائی وائرل لوڈ کم ہو تو اس بات کا امکان ہے کہ لوگوں کے جسم اس سے زیادہ مؤثر طریقے سے لڑنے کے قابل ہوں گے۔

ان کا کہنا تھا کہ اس سے یہ عندیہ ملتا ہے کہ وائرل انفیکشن کی روک تھام کی صلاحیت بہتر ہوئی ہے اور اس کے نتیجے میں لوگوں میں اس کی شدت کم ہوئی ہے۔

دوسری لہر

کرونا وائرس کی شدت میں کمی کی ابتدائی رپورٹس مئی کے آخر میں سامنے آئی تھیں اور ان پر کافی شکوک و شبہات کا اظہار کیا گیا تھا۔

اٹلی کے شہر میلان کے سان ریفایلی اسپتال کے سربراہ ڈاکٹر البرٹو زینگریلو نے 31 مئی کو ایک انٹرویو کے دوران کہا تھا حقیقت تو یہ ہے کہ طبی لحاظ سے یہ وائرس اب اٹلی میں موجود نہیں۔ ان کا کہنا تھا کہ گزشتہ 10 دن کے دوران سویب ٹیسٹ میں جو وائرل لوڈ دیکھا گیا وہ ایک یا 2 ماہ قبل کے مقابلے میں نہ ہونے کے برابر ہے۔

ان کا کہنا تھا کہ دوسری لہر 16 مئی سے 7 جولائی تک تھی جس میں پہلے کے مقابلے میں کم تعداد یعنی 20 فی صد کو آئی سی یو کی ضرورت پڑی جب کہ 13 مارچ سے 15 مئی کے دوران پہلی لہر میں 38 فی صد مریضوں کو آئی سی یو میں داخل کیا گیا تھا۔

اسی طرح دوسری لہر کے مریضوں نے کم وقت اسپتال میں گزارا جو کہ 4.8 دن تھا جو پہلی لہر کے مریضوں میں اوسطاً 7.1 دن تھا۔ مگر سب سے اہم بات یہ تھی کہ دوسری لہر کے مریضوں میں اموات کی شرح 5.1 فی صد تھی جب کہ پہلی لہر کے مریضوں میں 12.1 فی صد تھی۔

نیویارک: امریکا میں ایک نئی اور نہایت اہم تحقیق سامنے آئی ہے جس میں اس سوال کا جواب دیا گیا ہے کہ کیا کرونا وائرس عام نزلہ زکام والے افراد کو متاثر کر سکتا ہے؟

اس سلسلے میں یونی ورسٹی آف روچسٹر میڈیکل سینٹر میں کی گئی تحقیق میں پہلی بار اس بات کا ثبوت پیش کیا گیا ہے کہ کرونا وائرس کے خلاف جسم میں طویل المیعاد قوت مدافعت پیدا ہو سکتی ہے۔

لوگوں کو بہت زیادہ پریشان کرنے والے موسمی نزلہ زکام سے متعلق دعویٰ کیا گیا ہے کہ یہ کو وِڈ نائنٹین سے کسی حد تک تحفظ فراہم کر سکتا۔

جریدے ایم بائیو میں شائع تحقیق کے مطابق کرونا وائرس سے متاثر ہونے پر ایسے بی سیلز بنتے ہیں جو طویل عرصے تک جراثیموں کو شناخت کرنے کے ساتھ ساتھ مستقبل میں بھی ان کو یاد رکھتے ہیں اور ان کے خاتمے کے لیے اینٹی باڈیز بناتے ہیں۔

بی سیلز کے بارے میں طبی ماہرین کا کہنا ہے کہ یہ عموماً کئی عشروں تک برقرار رہتے ہیں، تحقیق میں پہلی بار بی سیلز کی کراس ری ایکٹیویٹی کو بھی رپورٹ کیا گیا، یعنی عام نزلہ زکام پر حملہ کرنے والے بی سیلز بظاہر نئے کرونا وائرس کو بھی پہچان سکتے ہیں۔

ریسرچرز کو اس بات کا یقین ہو گیا ہے کہ ان افراد میں کو وِڈ 19 کے خلاف بھی کسی حد تک قوت مدافعت پیدا ہو جاتی ہے جو عام نزلہ زکام کا باعث بننے والے کرونا وائرسز سے متاثر ہوتے ہیں۔

یونی ورسٹی آف روچسٹر کے ریسرچ پروفیسر اور اس تحقیق کے مرکزی مصنف مارک سینگسٹر نے بتایا کہ اس سلسلے میں کو وِڈ نائنٹین سے صحت یاب ہونے والے مریضوں کے خون کی جانچ کی گئی تھی، جن میں سے متعدد نمونوں میں وہ بی سیلز پائے گئے جو نئے کرونا وائرس کو شناخت کر کے ان کے خلاف اینٹی باڈیز تیار کرتے ہیں۔

سینگسٹر کی تحقیق کے نتائج کی بنیاد معمولی اور درمیانے درجے کے کو وِڈ 19 سے صحت یاب ہونے والے 26 مریضوں اور ایسے 21 صحت مند ڈونرز کے خون کے نمونوں کے موازنے پر مبنی تھی جن کے خون کے نمونے 6 سے 10 سال قبل اکٹھے کیے گئے تھے یعنی نئے کرونا وائرس کے سامنے آنے سے بہت عرصہ قبل۔ ان نمونوں میں میموری بی سیلز اور اینٹی باڈیز کی سطح ناپی گئی جو اسپائیک پروٹین کے مخصوص حصوں کو ہدف بناتے ہیں، یہ اسپائیک پروٹین تمام کرونا وائرسز میں پائے جاتے ہیں اور خلیات کو متاثر کرنے کے لیے وائرسز کی مدد میں اہم کردار ادا کرتے ہیں۔

یہ اسپائیک پروٹین ہر کرونا وائرس میں اگرچہ کچھ مختلف انداز سے کام کرتا ہے، مگر اس کا ایک جز ایس 2 تمام وائرسز میں لگ بھگ ایک جیسا ہوتا ہے۔ چوں کہ یہ میموری بی سیلز (بی سیل کی ذیلی قسم جو طویل عرصے تک برقرار رہتے ہیں) مختلف کرونا وائرسز کے اسپائیک ایس 2 کے درمیان تفریق نہیں کر پاتے اس لیے بلا امتیاز حملہ آور ہو جاتے ہیں۔

ریسرچ میں یہ نہیں بتایا گیا ہے کہ یہ بی سیلز کس حد تک تحفظ فراہم کرتے ہیں، اور یہ کس طرح مریض کے نتائج پر اثر انداز ہوتے ہیں۔

ماہرین کو اب یہ دیکھنا ہے کہ ان بی سیلز کا نئے کرونا وائرس کے نتیجے میں ہونے والی کم شدت کی علامات اور کم مدت کی بیماری سے بھی کوئی تعلق ہے یانہیں۔ اور کیا یہ کرونا ویکسین کی افادیت میں بھی کوئی مدد کر سکتے ہیں یا نہیں۔

برن: سویٹزر لینڈ میں کی جانے والی ایک طبی تحقیق میں ماہرین نے یہ بات معلوم کر لی ہے کہ ایسے کتنے فی صد افراد ہوتے ہیں جنھیں کرونا وائرس لگنے کے بعد بھی علامات ظاہر نہیں ہوتیں۔

طبی جریدے پلوس میڈیسین میں شائع تحقیق کے مطابق مارچ سے جون کے دوران کی جانے والی تحقیقی رپورٹس کا تجزیہ کیا گیا جس میں معلوم ہوا کہ کرونا وائرس کے شکار ہر 10 میں سے 2 افراد میں بیماری کی علامات ظاہر نہیں ہوتیں۔

سوئٹزر لینڈ کی برن یونی ورسٹی کی اس تحقیق میں بتایا گیا ہے کہ 20 فی صد مریضوں میں علامات ظاہر نہیں ہوتیں لیکن طبی ماہرین نے کہا ہے کہ وہ پھر بھی اس بیماری کو دیگر افراد تک منتقل کر سکتے ہیں۔

ماہرین کا کہنا ہے کہ مریض میں علامات ظاہر ہوں یا نہ ہوں، وہ وائرس کو دیگر افراد تک منتقل کر سکتے ہیں، ان کا یہ بھی کہنا ہے کہ ایسے کچھ افراد میں علامات ہوتی ہیں مگر انھیں یہ اندازہ نہیں ہو پاتا کہ یہ کو وِڈ 19 کی علامات ہیں۔

دوسری طرف ہارورڈ میڈیکل اسکول کے ایک پروفیسر نے انکشاف کیا ہے کہ بغیر علامات والے کچھ افراد میں یہ وائرس ان کی جسمانی کارکردگی پر منفی اثرات مرتب کرتا رہتا ہے۔

تحقیق میں شامل ماہرین نے اس بات پر زور دیا کہ علامات کے بغیر بھی بیماری کے پھیلاؤ کا خطرہ ہے اس لیے ہاتھوں کی صفائی، سماجی دوری جیسی احتیاطی تدابیر اہمیت کے حامل ہیں۔

یاد رہے کہ اگست میں جنوبی کوریا میں ہونے والی ایک تحقیق میں کہا گیا تھا کہ بغیر علامات والے کرونا مریض وائرس کو اتنا ہی زیادہ آگے پھیلا سکتے ہیں جتنا علامات والے مریض۔ اس سے قبل اس حوالے سے شواہد محض مشاہدے پر مبنی تھے، مگر جنوبی کوریا والی تحقیق میں ٹھوس ثبوت سامنے آئے۔ معلوم ہوا کہ بغیر علامات والے مریضوں کی ناک، حلق اور پھیپھڑوں میں اتنا ہی وائرل لوڈ ہوتا ہے جتنا علامات والے مریضوں میں۔

واضح رہے کہ حالیہ تحقیق کے دوران محققین نے 6 سے 26 مارچ کے دوران بغیر علامات والے 193 مریضوں اور 110 علامات والے مریضوں کے لیے گئے نمونوں کا تجزیہ کیا تھا، تحقیق میں شامل بیش تر افراد نوجوان تھے اور ان کی اوسط عمر 25 سال تھی، ابتدائی طور پر 89 میں سے 30 فی صد کبھی بیمار نہیں ہوئے جب کہ 21 فی صد میں علامات نظر آئیں۔

انڈیایا: طبی ماہرین نے کرونا وائرس کے ایک ایسے پریشان کن اثر کا انکشاف کیا ہے جو نہ صرف وائرس سے متاثرہ مریض پر مرتب ہوتا ہے بلکہ یہ ان لوگوں میں بھی دیکھا گیا جنھیں سرے سے کرونا وائرس لاحق ہی نہیں ہوا۔

تفصیلات کے مطابق ماہرین نے بالوں سے محرومی کو کرونا کی وبا کا ایک اور اثر قرار دے دیا ہے، ان کا کہنا ہے کہ ایسے مریض دیکھے گئے ہیں جنھیں کرونا انفیکشن کے چند ماہ بعد بالوں سے محرومی کا سامنا کرنا پڑا۔

ماہرین نے یہ حیران کن انکشاف بھی کیا کہ اس مسئلے کا شکار وہ لوگ بھی ہو رہے ہیں جنھیں سرے سے کرونا وائرس لاحق ہی نہیں ہوا تھا۔حالیہ ہفتوں میں ایسے مریض سامنے آئے جو بہت تیزی سے بالوں سے محروم ہو رہے تھے، ماہرین کا خیال ہے کہ یہ وبا کی وجہ سے ہو رہا ہے جس کی زد میں وائرس سے محفوظ رہنے والے لوگ بھی آ رہے ہیں۔

طبی ماہرین کا کہنا ہے کہ اس کی بنیادی وجہ وائرس نہیں ہے بلکہ وبا کی وجہ سے پیدا ہونے والا نفسیاتی تناؤ ہے، عام طور پر بھی تناؤ والے حالات میں لوگوں کو تیزی سے بال گرنے کا سامنا ہوتا ہے۔

کلیولینڈ کلینک کی ایسوسی ایٹ پروفیسر ڈاکٹر شلپی کھترپال کے مطابق کرونا وبا سے قبل اکثر کئی ہفتوں تک ان کے پاس بال جھڑنے کا ایک بھی مریض نہیں آتا تھا لیکن اب ہر ہفتے کم از کم 20 مریض آ رہے ہیں۔

امریکی ریاست انڈیانا کی تحقیقی یونی ورسٹی میں جولائی میں ایک سروے کیا گیا، اس سروے کے مطابق کرونا سے صحت یاب 1567 مریضوں میں سے 423 کو کئی ماہ بعد بال جھڑنے کا مسئلہ لاحق ہوا۔ نیویارک کے ایشکن اسکول آف میڈیسین کی جلدی امراض کی ماہر ڈاکٹر ایما گیوٹ مین یاسکی نے بتایا کہ انھوں نے متعدد طبی ورکرز کے بالوں سے محرومی کا علاج کیا ہے، جن میں سے کچھ کو وِڈ سے متاثر تھے اور باقی نہیں تھے، یہ صورت حال کا تناؤ تھا جو ان کو بالوں سے محروم کرنے لگا تھا۔

طبی ماہرین کا کہنا ہے کہ بیش تر مریضوں میں یہ مسئلہ عارضی ہوگا جو کئی ماہ تک برقرار رہ سکتا ہے۔

طبی ماہرین کے مطابق بعض لوگوں میں تناؤ والے تجربے کے کئی ماہ بعد معمول سے زیادہ بال جھڑنے کا مسئلہ شروع ہوتا ہے، اس میں بالوں کی نشوونما کا نظام متاثر ہوتا ہے، اس طرح کا تجربہ کچھ خواتین کو زچگی کے بعد بھی ہوتا ہے، جو 6 ماہ تک برقرار رہ سکتا ہے، تاہم مسئلہ دائمی بھی ہو سکتا ہے۔

جب بہت زیادہ نفسیاتی تناؤ لاحق ہو تو پھر مدافعتی نظام بالوں کی جڑوں پر حملہ آور ہوتا ہے اور سر کے درمیان سے بال غائب ہونے لگتے ہیں، ایسے افراد کی تعداد میں بھی اضافہ ہو چکا ہے۔ کرونا سے متاثرہ مریضوں کے پلکوں سمیت پورے جسم سے بال جھڑنے کا مسئلہ بھی سامنے آیا۔ اس مسئلے کا شکار مرد و خواتین دونوں ہو رہے ہیں۔

بالوں کے ان مسائل سے بچنے کے لیے طبی ماہرین نے اچھی غذا، وٹامنز کے استعمال، یوگا اور سر کی مالش کا مشورہ دیا ہے۔