Tag: Cricket

ویلنگٹن : ورلڈ کپ کی تیاریوں کو ایک اور جھٹکا۔ نیوزی لینڈ نے پہلے ایک روزہ میچ میں پاکستان کو باآسانی سات وکٹوں سے شکست دے دی۔ دورہ نیوزی لینڈ کا آغاز مایوس کن رہا ۔

ویلنگٹن میں کیویز نے پاکستان کو آؤٹ کلاس کردیا۔تفصیلات کے مطابق ویلنگٹن میں نیوزی لینڈ نے ٹاس جیت کر پہلے فیلڈنگ کا فیصلہ کیا۔ پاکستانی ٹاپ آرڈر ناکام رہا۔

عمر اکمل، حارث سہیل اور سرفراز احمد بھی ٹیم کو مشکلات میں ڈال گئے۔ ایک سو ستائیس رنز پر چھ وکٹیں گرنے کےبعد مصباح الحق اور آفریدی نے ٹیم کو مکمل تباہی سے بچایا۔

آفریدی نے تیز کھیلتے ہوئے اکیس گیندوں پر نصف سنچری مکمل کی۔ آفریدی سڑسٹھ اور مصباح اٹھاون رنزبناکر آؤٹ ہوئے۔ پاکستانی ٹیم چھیالیسویں اوور میں دو سو دس رنزبناکر آؤٹ ہوگئی۔

[جواب میں پاکستانی بولرز کا جادو بھی نہ چل سکا۔ میزبان ٹیم نے مطلوبہ ہدف چالیسویں اوور میں تین وکٹوں کے نقصان پربا آسانی پورا کرلیا۔

علاوہ ازیں چئیرمین پی سی بی شہریار خان نے نیوزی لینڈ کے خلاف پہلے ون ڈے میں ٹیم کی شکست پر تشویش کا اظہار کرتے ہوئے کہا ہے کہ  امید ہے ٹیم کی میگا ایونٹ میں کارکردگی بہتر ہوگی۔

شہر یار خان کا کہنا تھاکہ دورہ نیوزی لینڈ میں ٹیم کا آغاز اچھا نہیں ہوا۔ ایک سوال کے جواب میں  ان کا کہنا تھا کہ سینٹرل کنٹریکٹ کا معاملہ جلد حل ہوجائے گا۔

کھلاڑیوں کو کنٹریکٹ کی شرائط پر نہیں معیاد پر اعتراض ہے۔ معیاد ورلڈ کپ کے بعد ہی بڑھائی جاسکتی ہے۔

چئیرمین پی سی بی نے کہا کہ یہ تاثر غلط ہے کہ پی سی بی محمد عامر کو جلد واپس لانا چاہ رہا ہے۔ وہ اینٹی کرپشن یونٹ کے اطمینان کے بعد ہی بین الاقوامی کرکٹ کھیل سکیں گے۔

ملک میں انٹرنیشنل کرکٹ کی بحالی پر ان کا کہنا تھا کہ بنگلہ دیش، سری لنکا اور زمبابوے نے جونئیر ٹیمیں پاکستان بھیجنے کا وعدہ کیا ہے۔