ابوظہبی ٹیسٹ:پاکستان اور نیوزی لینڈ کے مابین ابو ظہبی میں کھیلے جارہے ٹیسٹ میچ کے تیسرے دن کے کھیل میں کھانے کے وقفے تک چونتیس اوورز میں نیوزی لینڈ کے اکیاسی رنز پرتین کھلاڑی آؤٹ ہوگئے۔
تازہ ترین اطلاعات کے مطابق اس وقت تھامس لیتھم بیالیس اورایڈریسن تیرہ رنز کے ساتھ کریزپرموجود ہیں،پاکستانی باؤلر ذوالفقاربابر نے دو کھلاڑیوں کو آؤٹ کیا جبکہ راحت علی نے ایک وکٹ لی۔
واضح رہے کہ نیوزی لینڈ نے آج اپنے کھیل کا آغاز پندرہ رنزبغیر کسی نقصان کے کیا تھا۔
ابوظہبی: پاکستان کرکٹ ٹیم کے کپتان مصباح الحق اور یونس خان سینچریز کی مشین بن گئے۔
ابوظہبی ٹیسٹ کا دوسرا روز بھی پاکستانی بلے بازوں کے نام رہا، آسٹریلیا کے بعد نیوزی لینڈ پر دونوں بیٹسمینوں کی یلغارسے رنز کی بھرمارہورہی ہے۔
مصباح اور یونس کررہے ہیں کاری وار، یونس بلا لہراتے ہیں تو مصباح بھی پیچھے نہیں رہتے۔ یونس نے مسلسل تیسری میچ میں سینچری بنائی تو مصباح نے الحق نے بھی سینچریز کی ہیٹ ٹرک بنادی، مصباح اور یونس ٹیسٹ میں ریکارڈز بنارہے ہیں اور حریف ٹیم کو ناکوں چنے چبوارہے ہیں۔
مصباح الحق اور یونس کی شاندار پرفارمنس نے گرین شرٹس کی میچ میں پوزیشن مستحکم کردی، قومی ٹیم نے پہلی اننگز پانچ سو چھیاسٹھ رنز تین کھلاڑی آؤٹ پر ڈکلئیر کردی۔
دبئی: آئی سی سی ایگزیکٹیو بورڈ کا دو روزہ اجلاس کل سے دبئی میں ہوگا۔ انسداد بدعنوانی کوڈ میں تبدیلی کے بعد پابندی کے شکار پاکستانی فاسٹ بولر محمد عامر کی ڈومیسٹک کرکٹ میں واپسی متوقع ہے۔
دبئی میں شروع ہونے والے بورڈ ممبرز کے دو روزہ اجلاس میں ایگزیکٹو کمیٹی کی سفارشات جس میں انسداد بدعنوانی کوڈ میں تبدیلی کے ساتھ ساتھ آئی سی سی اینٹی ڈوپنگ کوڈ اور متنازعہ بولنگ ایکشن جیسے موضوعات پر بھی بات چیت کی جائے گی۔
ذرائع کے مطابق آئی سی سی کی چیف ایگزیکٹو کمیٹی بدعنوانی کوڈ میں تبدیلی کی منظوری دے چکی ہے۔ پابندی کے شکار کھلاڑیوں کو اپنی سزا کے خاتمے سے پانچ سے چھ ماہ قبل ڈومیسٹک کرکٹ کھیلنے کی اجازت مل سکتی ہے۔
جس سے محمد عامر آئندہ سال کے اوائل میں ڈومیسٹک کرکٹ میں واپسی کرسکیں گے۔ محمد عامر کی پابندی ستمبر دوہزار پندرہ میں ختم ہوگی۔ دوہزار دس میں پاکستانی قومی کرکٹ ٹیم کے دورہ انگلینڈ کے دوران لارڈز ٹیسٹ میں محمد عامر ، سلمان بٹ اور محمد آصف پر فکسنگ کے الزام میں پابندی عائد کی گئی تھی۔
ابوظہبی: پاکستان اور نیوزی لینڈ کے کھلاڑیوں کی اتوار سے ابوظہبی میں شروع ہونے والے سیریز کے پہلے ٹیسٹ میچ کے لئے بھرپور تیاری جاری ہے۔
متحدہ عرب امارات میں آسٹریلیا کے بعد پاکستان نیوزی لینڈ کی میزبانی کررہا ہے۔ دونوں ٹیموں کے درمیان طویل سیریز تین ٹیسٹ، پانچ ون ڈے اور دو ٹی ٹوئنٹی میچز پر مشتمل ہے۔
سیریز کا آغاز اتوار سے ابوظہبی میں کھیلے جانے والے ٹیسٹ میچ سے ہوگا۔ پاکستان اور نیوزی لینڈ کے کھلاڑیوں کی پہلے میچ کے لئے بھرپور پریکٹس جاری ہے۔
یونس خان بھرپور فارم میں ہیں۔ کپتان مصباح الحق کی تیزترین سنچری نے حریف ٹیم کے لئے خطرے کی گھنٹی بجادی ہے۔ذوالفقار بابر اور یاسر شاہ اس سیریز میں بھی توجہ کا مرکز ہوں گے۔
ابتدائی ٹیسٹ کے لئے قومی ٹیم میں کوئی تبدیلی نہیں کی گئی۔ آسٹریلیا کے خلاف فاتح اسکواڈ کو برقرار رکھا گیا ہے۔ پاکستانی ٹیم میں شامل زیادہ تر کھلاڑی پہلی بار کیویز کے خلاف میچ کھیلیں گے۔
ادھر کیوی ٹیم برینڈن میک کلم کی قیادت میں میدان میں اترے گی۔ دونوں ٹیمیں دوہزار گیارہ کے بعد طویل فارمیٹ کی کرکٹ میں ایکشن میں ہوں گی۔
دبئی:آئی سی سی نے سالانہ ایوارڈز کے لئے کھلاڑیوں کو شارٹ لسٹ کرلیا۔ پاکستان کا کوئی کھلاڑی ایوارڈ کیلئے نامزد نہیں کیا گیا۔ جبکہ محمد حفیظ آئی سی سی ون ڈے ٹیم میں جگہ بنانے میں کامیاب رہے۔
آئی سی سی ایوارڈز کے لئے چار ممالک کے کھلاڑی نمایاں ہیں۔ سال کے بہترین کرکٹر آف دی ائیر میں جنوبی افریقہ کے اے بی ڈولئیرز، مچل جونسن، اینجلو میتھیوز اور کمار سنگاکارا کو نامزد کیا ہے۔
ون ڈے کرکٹر کیلئے جنوبی افریقہ کے کوانٹن ڈی کوک، اے بی ڈولئیرز، ڈیل اسٹائن، بھارت کے ویرات کوہلی کو شاٹ لسٹ کیا گیا ہے۔ ٹیسٹ کرکٹر آف دی ائیر میں آسٹریلیا کے مچل جونسن، ڈیوڈ وارنر، سری لنکا کے اینجلو میتھیوز اور کمار سنگاکارا شامل ہیں۔
پاکستان کا کوئی بھی کھلاڑی ایوارڈز کی کیٹگریز میں نامزد نہیں کیا گیا۔ ایمرجنگ کرکٹر آف دی ائیر کے ایوارڈ کے لئے ون ڈے کی تیز ترین سینچری بنانے والے نیوزی لینڈ کے کورے اینڈرسن مضبوط امید وار ہیں۔
بھارت کے بھونیشور کمار نے آئی سی سی پیپلز چوائس ایوارڈ جیت لیا۔ آئی سی سی نے سال کی بہترین کھلاڑیوں پر مشتمل ون ڈے ٹیم کا بھی اعلان کردیا۔ پاکستان کے محمد حفیظ ون ڈے ٹیم میں جگہ بنانے میں کامیاب رہے۔
ٹیسٹ ٹیم میں کوئی پاکستانی کرکٹر شامل نہیں کیا گیا۔ ایوارڈز کے فاتح کھلاڑیوں کے ناموں کا اعلان چودہ نومبر کو کیا جائے گا۔
ابوظہبی: پاکستانی ٹیم کے کپتان اور ٹیسٹ کرکٹ کے تجربہ کار کھلاڑی مصباح الحق نے چھپن گیندوں پر سو رنز بنا کر ویون رچرڈ کا ریکارڈ برابر کردیا۔
ابوظہبی ٹیسٹ کی دوسری اننگز میں کپتان مصباح نے گیارہ چوکوں اور چھ چھکوں کی مدد سے شاندار سنچری اسکور کی، اظہرعلی بھی بھی پیچھے نہ رہے اور انہوں نے دوسری اننگز میں بھی سنچری اسکور کر ڈالی۔
شاہینوں کی اس بہترین کارکردگی کو اسٹیڈیم میں موجود تماشائیوں نے کھل کر داد دی، تازہ ترین اطلاعات کے مطابق کپتان مصباح الحق نے دو سو ترانوے رنز تین کھلاڑی آؤٹ پر اننگز ڈکلیئر کردی ہے اور پاکستان نے آسٹریلیا کو چھ سو تین رنز کا ہدف دیا ہے۔
ابوظہبی: ٹیسٹ کرکٹ کے منجھے ہوئے کھلاڑی مصباح الحق نے اپنا اندازاچانک ہی بدل دیا۔ ٹک ٹک کا داغ مصباح نے اکیس گیندوں پر ٹیسٹ کرکٹ کی تیز ترین نصف سنچری بنا کر دھودیا،
مصباح الحق شاید کئی منفرد کارنامہ انجام دینے کاسوچ کر آئے تھے۔ ان کا کیچ کیا ڈراپ ہوا۔ کپتان کے تیور ہی بدل گئے۔ پھر دھواں دار بیٹنگ شروع ہوئی اوراسمتھ ان کا نشانہ بن گئے۔ اور اکیس گیندوں پرچار چھکے اور چار چوکے لگا کر تیز ترین نصف سنچری بنانے کا ریکارڈ بنا ڈالا ۔
مچل مارش کو بھی لگاتار دو گیندوں پربھی چوکے رسید کئے۔ اسمتھ کے اگلے اوور میں ایک اور زوردار چھکا لگایا ، اس سے قبل جیک کیلس نے چوبیس اور بوم بوم شاہد آفریدی نے چھبیس گیندوں پر نصف سنچری بنانے کا ریکارڈ قائم کیا تھا جسے مصباح الحق نے اپنی جارحانہ بیٹنگ سے توڑ دیا
ابو ظہبی: پاک آسٹریلیا کرکٹ ٹیسٹ میں شاہینوں نے آسٹریلین بیٹنگ لائن کی دھجیاں بکھیر دیں، آسٹریلین ٹیم انیس سو اٹھاسی کے بعد پاکستان کیخلاف فالوآن کا شکار ہوئی لیکن مصباح الحق کے عجیب وغریب فیصلے نے سب کو حیران کردیا۔
ابو ظہبی کے میدان میں پاکستانی بولرز چھا گئے، پہاڑ جیسا پانچ سو ستر رنز کا ہدف دیکھ کر کینگروز کے ہاتھ پاؤں ہی پھول گئے، بلے بازوں کے بعد بولرز نے آسٹریلیا کو منہ توڑ جواب دیتے ہوئے کینگروز کو دبوچنا شروع کیا۔
شاہینوں کے تگڑے وار نے کینگروز کو پہلی اننگز میں صرف دو سو اکسٹھ رنز پر ڈھیر کردیا، عمران خان نے تین اور راحت علی نے دو کینگروز کا شکار کیا، ذولفقار بابر اور یاسر شاہ کی جادوہی جوڑی نے دو دو کھلاڑیوں کو پویلین کی راہ دکھائی۔
آسٹریلین ٹیم انیس سو اٹھاسی کے بعد پاکستان کیخلاف پہلی مرتبہ فالو آن کا شکار ہوئی۔ لیکن اسے مصباح الحق کی دفاعی حکمت عملی کہی جائے یا عجیب وغریب منطق مصباح الحق نے فالو آن نافذ کرنے کے بجائے خود بیٹنگ کرنے کو ترجیح دی۔
ابوظہبی: آسٹریلیا کیخلاف ابوظہبی ٹیسٹ کے پہلے روز کا کھیل مکمل ہوگیا، یونس خان اور اظہر علی کی شاندارسنچریوں کی بدولت پاکستان نے دو وکٹوں پر تین سو چار رنز بنالیے ہیں۔
شیخ زید کرکٹ اسٹیڈیم میں کھیلے جارہے دوسرے ٹیسٹ میں پاکستان ٹیم کے کپتان مصباح الحق نے ٹاس جیت کر بیٹنگ کا فیصلہ کیا۔محمد حفیظ پینتالیس اور احمد شہزادپینتیس رنز بناکر پویلین واپس پہنچے تو گراؤنڈ میں اظہر علی اور یونس خان نے قدم رکھا، مڈل آرڈر کے دونوں بلے بازوں نے شاندار سنچریاں اسکور کیں، تیسری وکٹ کی شراکت میں دونوں کھلاڑیوں نے دو سو آٹھ رنز اسکور میں جوڑے۔ دن کے اختتام تک یونس خان ایک سو گیارہ رنز اور اظہر علی ایک سو رنز بناچکے ہیں۔
لاہور: افغانستان انڈرنائنٹین ٹیم نے پاکستان انڈر نائنٹین کو یکطرفہ مقابلے بعد دس وکٹوں سے شکست دے دی۔ تین میچز کی سیریز میں افغانستان کو ایک صفر کی برتری حاصل ہوگئی ہے۔
لاہور کے قذافی اسٹیڈیم میں کھیلے گئے پہلے ایک روزہ میچ میں افغانستان انڈر نائن ٹین ٹیم نے ٹاس جیت کر فیلڈنگ کا فیصلہ کیا۔ بارش کے باعث قومی جونیئر ٹیم کی اننگز کو تینتس اوورز تک محدود کردیا۔
قومی انڈر نائن ٹین ٹیم مقررہ اوورز کھیلے بغیر ایک سو اکتیس رنز پر ڈھیر ہوگئی، بارش کی مداخلت کے سبب اٖفغانستان انڈر نائنٹین ٹیم کو جیت کیلئے بائیس اوورز میں ایک سو دو رنز کا ہدف ملا۔ اوپنرز نے جارحانہ آغاز فراہم کرتے ہوئے ہدف بغیر کسی نقصان کے سولہویں اوور میں ہدف حاصل کرلیا۔