گال :پاکستان اور سری لنکا کے درمیان دو میچز کی سیریز کا پہلا ٹیسٹ کل سے گال میں کھیلا جائے گا۔ دونوں ٹیموں کے کپتان کامیابی کے لئے پرعزم ہیں۔ گال میں پاکستان اور سری لنکا کے درمیان میدان سجنے کو ہے۔ تیاریاں جاری ہیں ۔ ایشیا کی دو بہترین ٹیموں میں گھسمان کی جنگ ہوگی ۔ دونوں ٹیموں کے کھلاڑی ایک دوسرے کی خوبیوں اور خامیوں سےبخوبی واقف ہیں ۔
میزبان ٹیم کو ہوم گراؤنڈ اور ہوم کراؤڈ کا ایڈوانٹیج ہوگا تو پاکستان کو بھی سری لنکن وکٹوں پر کھیلنے کا تجربہ حاصل ہے۔ پاکستان سری لنکا کو سبق سکھانے کے لئے بے تاب ہے۔ ادھر سری لنکن کھلاڑیوں نے بھی کمر کس لی ہے۔ سری لنکا کے سابق کپتان مہیلا جے وردھنے کیرئیر کی آخری ٹیسٹ سیریز کھیل رہے ہیں۔
گال میں پاکستانی کھلاڑیوں نے خوب نیٹ پریکٹس کی ۔ دونوں ٹیموں کے درمیان سولہ ٹیسٹ سیریز ہوچکی ہیں۔ سات میں پاکستان اور چار میں سری لنکا کامیاب رہا۔ مجموعی طور پر دونوں ٹیموں کے درمیان چھیالیس ٹیسٹ میچز کھیلے جاچکے ہیں۔
پاکستان نے سترہ اور سری لنکا نے گیارہ میں کامیابی حاصل کی۔ اٹھارہ میچز ڈرا رہے۔ قومی ٹیم دوہزار بارہ کے بعد سری لنکا کے دورے پر ہے۔ رواں سال دونوں ٹیموں کے درمیان متحدہ عرب امارات میں کھیلی جانے والی ٹیسٹ سیریز ڈرا رہی تھی۔
