اسلام آباد : پاکستان میں پہلے الیکٹرک کار چارجنگ اسٹیشن کا آغاز ہوگیا ہے، اس کار اسٹیشن پر بیک وقت تین گاڑیوں کو چارج کیا جاسکے گا۔
تفصیلات کے مطابق کلین انرجی کی جانب اہم قدم پاکستان کا پہلا الیکٹرک کار چارجنگ اسٹیشن مکمل فعال ہوگیا ، بیٹری پر چلنے والی گاڑیوں کیلئے دارالحکومت میں الیکٹریکل وہیکل چارجنگ یونٹ کا افتتاح کردیا گیا۔
الیکٹرک کار چارجنگ سروس پر لوڈشیڈنگ اثرانداز نہیں ہوسکے گی جبکہ صارفین ڈیزل اور پیٹرول سے بجلی پرمنتقل ہوکر اخراجات میں کمی کے ساتھ ماحولیاتی آلودگی پر قابو کرنے میں بھی معاون ہوں گے۔
الیکٹرک کار چارجنگ اسٹیشن فضائی آلودگی پر قابو پانے کی جانب اہم پیش رفت ہے، اس کار اسٹیشن پر بیک وقت تین گاڑیوں کو چارج کیا جاسکے گا، جس کا سروس ٹیسٹ بھی مکمل ہوگیا ہے۔
چارجنگ کے فی یونٹ چالیس روپے لگیں گے اور پوری کار دوہزار روپے میں چارج ہوگی، جو فی یونٹ تقریباً چھ کلو میٹر مائلیج دے گی۔
یاد رہے 20 جولائی کو وفاقی وزیر برائے سائنس و ٹیکنالوجی فواد چوہدری نے سماجی رابطے کی ویب سائٹ ٹویٹر پر کہا تھا کہ جناح ایونیو اسلام آباد میں الیکٹرک وہیکل چارجنگ کی سہولت کھولی جارہی ہے، مذکورہ اقدام الیکٹرک گاڑیوں کی حوصلہ افزائی کے لیے وزارت سائنس کا ہدف تھا۔
خیال رہے کہ پاکستان میں پہلی الیکٹرک وہیکل پالیسی منظور کی جاچکی ہے، پالیسی کے تحت موٹر سائیکل اور گاڑیوں کو بیٹریز پر منتقل کیا جا سکے گا۔ پاکستان میں الیکٹرک وہیکلز مینو فیکچرر یونٹس بھی قائم ہوں گے۔
وفاقی وزیر فواد چوہدری کے مطابق پاکستان میں الیکٹرک وہیکل مینو فیکچرنگ یونٹس لگانے والوں پر صرف 1 فیصد ڈیوٹی ہوگی۔
