روزمرہ زندگی کے معمول انسان کے اندر اکتاہٹ بھر دیتے ہیں اور وہ کچھ وقت کے لیے اس معمول سے ہٹ کر کچھ مختلف کرنا چاہتا ہے۔
یہ خواہش ہوتی تو ہر انسان کی ہے لیکن اسے پورا وہی کر پاتا ہے جو اس بہت سے پیسے خرچ کرنے کی استطاعت رکھتا ہو۔
ایک کروز کمپنی نے ایک ایسی کروز چلانے کا منصوبہ بنایا ہے جو 3 برس تک سمندر میں رہے گا، روزمرہ زندگی سے چھٹکارا دلانے والی یہ کروز شپ اس مدت میں ایک لاکھ 30 ہزار میل کا فاصلہ طے کرے گی اور اس کی سالانہ فیس 30 ہزار ڈالر ہوگی۔
لائف ایٹ سی کروز نے اپنے اس 3 سالہ سمندری سفر کے لیے بکنگ شروع کر دی ہے اور یہ ترکی کے دارالحکومت استنبول سے یکم نومبر 2023 کو اپنے سفر کا آغاز کرے گی۔
اس کروز کا مسافر بننے کے خواہش مند افراد کے لیے اپنے پاسپورٹ، ضروری ویکسینیشن اور دور سے کام کرنے کی صلاحیتیوں کو ترتیب دینے کے لیے ابھی 8 ماہ کا عرصہ باقی ہے۔
لائف ایٹ سی کروز کمپنی نے اعلان کیا ہے کہ ان کا کروز اس بحری سفر کے دوران سات براعظموں کے 135 ممالک میں سے گزرے گا اور دنیا بھر کی 375 بندگاہوں پر لنگر انداز ہوگا۔
اس سفر کے دوران کروز کے مسافروں کو مختلف اہم مقامات دیکھنے کا موقع بھی ملے گا۔
ان نمایاں مقامات میں برازیل کا کرائسٹ دی ریڈیمیر مجسمہ، انڈیا کا تاج محل، میکسیکو کا چی چن اٹزا اہرام، مصر کے اہرام، پیرو کا ایک گمشدہ شہر ماچو پیچو اور عظیم دیوار چین شامل ہیں۔
یہ کروز 103 جزائر پر بھی رکے گی اور اس سفر کے دوران 375 میں 208 بندر گاہوں پر رات بھر کے لیے ٹھہرے گی۔
یہ کمپنی میرے کروز نامی کمپنی کی ایک بائی پروڈکٹ ہے جو کروز انڈسٹری میں 30 سال سے سرگرم ہے، اس کروز میں 400 کیبن ہیں جن میں مجموعی طور پر 1 ہزار 74 مسافروں کی گنجائش موجود ہے۔
اس کے علاوہ ہر طرح کی ضروری سہولیات یہاں دستیاب ہوں گی۔
