پاکستان کرپٹو کونسل کے سی ای او بلال بن ثاقب نے کہا ہے کہ پاکستان میں کرپٹو کرنسی کو قانونی شکل دینے سے معیشت کو فائدہ ہوگا۔
اے آر وائی نیوز کے پروگرام اعتراض ہے میں خصوصی گفتگو کرتے ہوئے انہوں نے کہا کہ پاکستان میں بین الاقوامی سرمایہ کاری کو راغب کرنے کے لیے کرپٹو کرنسی کو قانونی شکل دینا ضروری ہے۔
اس اقدام سے ملکی معیشت کو فائدہ ہوگا، انہوں نے بھوٹان کی مثال دیتے ہوئے بتایا کہ وہ ملک جی ڈی پی کا 30 فیصد کرپٹو کرنسی سے حاصل کررہا ہے، کرپٹو کرنسی کے ذریعے پاکستان کی معیشت کو سپورٹ ملے گی۔
بلال بن ثاقب نے کہا کہ ڈیجیٹل اکانومی میں پاکستان کا ہدف آرٹیفیشل انٹیلی جنس بلاک چین اور کرپٹو مائننگ ہے۔ پاکستانی شہری کرپٹو کرنسی میں تجارت کر رہے ہیں۔ قانونی فریم ورک بن گیا تو لوگوں کا اعتماد بڑھے گا، کرپٹو کا زرمبادلہ پاکستان میں رہے گا۔
ان کا کہنا تھا کہ اے آئی اور بلاک چین میں تو ہم واقعی بہت پیچھے رہ گئے ہیں، بھارت کو ہی دیکھ لیں وہاں اے آئی کی پالیسی2017میں آچکی ہے، بھارت بلاک چین میں ہم سے 4 سال آگے ہے۔
سی ای او پاکستان کرپٹو کونسل نے اس بات پر زور دیا کہ ہمارے نوجوانوں کو اے آئی اور بلاک چین کے میدان میں آگے بڑھنا ہوگا، کرپٹو سے متعلق کنفیوژن کو وضاحت میں بدل دیں تو معیشت آگے بڑھے گی۔
پاکستان میں لوگ بلاک چین سے متعلق چھپ چھپا کر کام کر رہے ہیں، کرپٹو کرنسی کو قانونی شکل دی جاتی ہے تو ملکی معیشت ترقی کرے گی۔
بلال بن ثاقب نے کہا کہ کرپٹو سے متعلق ہماری حکومت کو ایک پالیسی پر دستخط کرنے ہیں، آئی ٹی انوائرمنٹ میں بھی ہم پیچھے ہیں اس کیلئے اقدامات کرنا ہونگے۔
