Tag: CTD

سی ٹی ڈی نے پنجاب میں دہشت گردی کا منصوبہ ناکام بنا دیا

راجن پور: صوبہ پنجاب میں کاﺅنٹر ٹیرر ازم ڈیپارٹمنٹ نے کامیاب کارروائی کرکے دہشت گردی کا منصوبہ ناکام بنا دیا۔

تفصیلات کے مطابق یہ کارروائی پنجاب کے شہر راجن پور میں کی گئی، اس دوران تین دہشت گردوں کو گرفتار کیا گیا جن کے قبضے سے بھاری مقدار میں دھماکہ خیز مواد برآمد ہوا۔

انٹیلی جنس بیسڈ آپریشن میں بی آر اے کے تین دہشت گردوں کو گرفتار کرکے ان کے قبضے سے دھماکہ خیز مواد برآمد کر لیا گیا، جبکہ مزید تفتیش بھی جاری ہے۔

ترجمان سی ٹی ڈی کے مطابق گرفتار دہشت گردوں میں عبدالکریم، عالی، محمد خان شامل ہیں جو اجن پور میں گوٹھ مزاری پولیس اسٹیشن کے علاقے موضع چک سوری میں سوئی گیس کی پائپ لائن کو نشانہ بنانے کی منصوبہ بندی کر رہے تھے۔

کوئٹہ میں سی ٹی ڈی کی کارروائی ، دو خودکش حملہ آوروں سمیت چھ دہشت گرد ہلاک

سی ٹی ڈی نے خفیہ اطلاع ملنے پر کامیاب کارروائی کرتے ہوئے دہشت گردوں کو گرفتار کر کے ان کے قبضے سے 1.3 کلوگرام دھماکہ خیز مواد، الیکٹرک ڈیٹونیٹر، ریموٹ کنٹرول ڈیوائس، بیٹری اوردہشت گردی کی سرگرمیوں کیلئے استعمال ہونے والی رقم برآمد کر لی، گرفتار دہشتگردوں سے تحقیقات جاری ہیں۔

ستمبر 14, 2019
کوئٹہ میں سی ٹی ڈی کی کارروائی ، دو خودکش حملہ آوروں سمیت چھ دہشت گرد ہلاک

کوئٹہ: بلوچستان کے صوبائی دارالحکومت کوئٹہ کے علاقے مشرقی بائی پاس پر سی ٹی ڈی اور حساس اداروں کی کاروائی کے دوران دو خود کش حملہ آوروں اور خاتون سمیت 6 دہشت گرد ہلاک جبکہ ایک سکیورٹی اہلکار شہید تین زخمی ہوگئے ۔

تفصیلات کے مطابق انسداد دہشت گردی ڈیپارٹمنٹ کے ترجمان نے اطلاع دی ہے کہ منگل اور بدھ کی درمیانی شب کوئٹہ کے نواحی علاقے مشرقی بائی پاس پر لیبر کالونی میں واقعہ گودام میں دہشت گردوں کی موجودگی کی خفیہ اطلاع پر کاروائی کا آغاز کیا گیا ۔

انہوں نے مزید بتایا کہ ا س موقع پر گودام میں موجود د ایک مبینہ خود کش حملہ آور نے خود کو دھماکے سے اڑا لیا جبکہ اس کے دیگر ساتھیوں نے گودام سے فائرنگ کا سلسلہ شروع کردیا،اس دوران سکیورٹی فورسز کے4 اہلکار زخمی ہوئے، آپریشن کے دوران ہی انہیں سول ہسپتال منتقل کیا گیا جہاں دوران ِعلاج ایک پولیس اہلکار سیف اللہ شہید ہوگیا ، زخمی پولیس اہلکاروں میں سلمان ،معصوم ابوبکر شامل ہیں۔

سکیورٹی فورسز نے جوابی کاروائی آغاز کرتے ہوئے گوام میں داخل ہونے کی کوشش کی تو ایک اور خود کش حملہ آور نے خود کو دھماکے سے اڑالیا جس کے بعد فورسز کی اضافی نفری کو طلب کر کے آپریشن کا آغاز کیا گیا ۔سکیورٹی فورسز سے فائرنگ کے تبادلے میں ایک خاتون سمیت مزیدچار افرادہلاک ہوئے ۔

ترجما ن سی ٹی ڈی کے مطابق آپریشن کے دوران دو خود کش حملہ آور اور ایک خاتون سمیت کل 6 دہشت گرد ہلاک ہوگئے ۔ہلاک ہونے والی خاتون اور ایک دہشت گرد نے خود کش جیکٹیں بھی پہن رکھی تھیں جنہیں بعد ازاں ناکارہ بنادیا گیا۔

ترجمان کے مطابق آپریشن تقریبا 5 گھنٹے تک جاری رہا سکیورٹی فورسز نے گودام سے اسلحہ و گولہ بارود، کالعدم تنظیم کا جھنڈا بھی برآمد کیا جبکہ آپریشن کے مکمل ہونے پر سکیورٹی فورسز نے ہلاک دہشت گردوں کی لاشوں کو شناخت کے لئے سول ہسپتال منتقل کردیا ۔

دریں اثناءڈی آئی جی پولیس کوئٹہ عبدالرزاق چیمہ نے سول ہسپتال کے ٹراما سینٹر کا دورہ کیا جہاں انہوں نے زخمی سکیورٹی اہلکاروں کی عیادت کی اور کامیاب آپریشن میں حصہ لینے پر انہیں مبارک باد دی اور ان کی جلد صحت یابی کے لئے نیک خواہشات کا اظہار کیا۔

واضح رہے کہ ڈی آئی جی پولیس کوئٹہ عبدالرزاق چیمہ نے دو روز قبل پریس کانفرنس میں بتایا تھا کہ کوئٹہ میں محرم الحرام کے دوران دہشت گردی کے خدشات موجود ہیں۔

ستمبر 4, 2019
کالعدم جماعت الدعوۃ کے سربراہ حافظ سعید نیشنل ایکشن کے تحت گرفتار

لاہور: کالعدم جماعت الدعوة کے سربراہ حافظ سعید کو محکمہ انسداد دہشت گردی (سی ٹی ڈی) پنجاب نے گرفتار کرلیا جس کے بعد انہیں جوڈیشل ریمانڈ پر جیل بھیج دیا گیا ہے۔

تفصیلات کے مطابق جماعت الدعوة کے سربراہ حافظ سعید کو سی ٹی ڈی پنجاب نے گرفتار کرلیا ہے، حافظ سعید اپنے خلاف درج مقدمات کا سامنا کریں گے۔

ذرائع کا کہنا ہے کہ حافظ سعید کو لاہور سے گجرانوالہ جاتے ہوئے حراست میں لیا ہے، ان کی گرفتاری نینشل ایکشن پلان کے تحت عمل میں لائی گئی ہے۔ گرفتاری کے بعد انہیں انسدادِ دہشت گردی کی عدالت میں پیش کیا گیا ، جہاں ان کا سات روزہ ریمانڈ منظورکرلیا گیا۔

یاد رہے کہ اقوامِ متحدہ کی سلامتی کونسل نے نومبر 2008 میں جماعت الدعوۃ کو دہشت گرد تنظیم قرار دیتے ہوئے پابندیاں عائد کی تھیں بعدازاں سال 2014 میں امریکا نے بھی جماعت الدعوۃ کو دہشت گرد تنظیم قرار دیتے ہوئے اس پر مالی پابندیاں عائد کیں اور حافظ سعید کے بارے میں معلومات فراہم کرنے پر ایک کروڑ ڈالر انعام دینے کا بھی اعلان کیا تھا۔

حافظ محمد سعید کی پیدائش 1948 میں اس وقت ہوئی جب ان کا خاندان انڈیا سے ہجرت کرکے پاکستان پہنچا۔ ہجرت کے اس سفر میں ان کے خاندان کے 36 افراد شہید ہوئے۔ خاندان کا کوئی بچہ زندہ نہ رہا۔ حافظ محمد سعید کا بچپن سرگودھا میں گزرا جہاں انہوں نے اپنی والدہ سے قرآن حفظ کیا اور گاؤں کے اسکول سے ابتدائی تعلیم حاصل کی۔ میٹرک کے بعد مزید تعلیم کے لیے اپنے ماموں اور عالم دین حافظ عبداللہ بہاولپوری کے پاس بہاولپور چلے گئے۔

حافظ سعید نے پہلے لشکر ِ طیبہ کے نام سے اپنی تنظیم کی بنیاد رکھی تھی جب اس پر پابندی لگی تو انہوں نے جماعت الدعوۃ کے نام سے اپنی سرگرمیاں شروع کردی تھیں۔ جب جماعت الدعوۃ پر پابندی لگی تو انہوں نے فلا ح انسانیت فاؤنڈیشن کے نام سے اپنی سرگرمیوں کا آغاز کیا۔ فلاح انسانیت فاؤنڈیشن کے کئی فلاحی پراجیکٹس چل رہے ہیں جن میں اسکول ، اسپتال اور مدرسے بھی شامل ہیں۔

جولائی 17, 2019
کوئٹہ: سی ٹی ڈی کی اہم کارروائی، ایک دہشت گرد ہلاک، 2 فرار

کوئٹہ: صوبہ بلوچستان کے شہر کوئٹہ میں انسداد دہشت گردی فورس (سی ٹی ڈی) نے اہم کارروائی کرتے ہوئے ایک دہشت گرد کو ہلاک کردیا۔

تفصیلات کے مطابق سی ٹی ڈی کی جانب سے یہ بڑی کارروائی کوئٹہ کے علاقے نوتال میں کی گئی جس کے نتیجے میں ایک دہشت گرد ہلاک جبکہ دو فرار ہونے میں کامیاب ہوگئے۔

سی ٹی ڈی حکام کا کہنا ہے کہ ہلاک دہشت گرد کی شکر اللہ کے نام سے شناخت ہوئی، ہلاک دہشت گرد 2 خود کش حملوں کا سہولت کار تھا۔

دہشت گرد شکر اللہ بارود بچھانے اور خود کش جیکٹ بنانے کا ماہر تھا، دہشت گرد 2017 میں فتح پورجھل مگسی امام بارگاہ میں خود کش حملے کا ماسٹر مائند بھی تھا۔

ادھر دو روز قبل ہی صوبہ پنجاب کے ضلع راجن پور میں سی ٹی ڈی نے کارروائی کرتے ہوئے 5 دہشت گردوں کو گرفتار کرلیا، ملزمان کا تعلق بی ایل اے کے باغی کمانڈر گروپ سے ہے۔

لاہور، سی ٹی ڈی کی راجن پور میں کارروائی، 5 دہشت گرد گرفتار

واضح رہے کہ گذشتہ دنوں امریکا نے بلوچ لبریشن آرمی (بی ایل اے) کا نام دہشت گردوں کی فہرست میں شامل کیا تھا۔

امریکی محکمہ خارجہ کا کہنا تھا کہ کالعدم بی ایل اے دہشت گردی کی کارروائیوں میں ملوث ہے، بی ایل اے مسلح علیحدگی پسند گروپ ہے جو سیکیورٹی فورسز اور عام شہریوں کو نشانہ بناتا ہے۔

جولائی 6, 2019
گجرات میں سی ٹی ڈی کی بڑی کارروائی، تین دہشت گرد ہلاک

لاہور: صوبہ پنجاب کے شہر گجرات میں انسداد دہشت گردی فورس(سی ٹی ڈی) نے بڑی کارروائی کرتے ہوئے تین دہشت گرد ہلاک کردیے۔

تفصیلات کے مطابق سی ٹی ڈی نے گجرات میں کارروائی کی جس کے نتیجے میں 3 دہشت گرد ہلاک جبکہ تین فرار ہونے میں کامیاب ہوگئے۔

سی ٹی ڈی حکام کا کہنا ہے کہ دہشت گردوں سے اسلحہ، بارودی مواد اور نقشے برآمد ہوئے، ہلاک دہشت گردوں میں طیب، بلال اور نادر شامل ہیں۔

تینوں دہشت گرد افغانستان سے تربیت یافتہ اور ریڈ بک میں شامل تھے، تینوں دہشت گرد 2007 کے پی اے ایف بس حملے میں ملوث تھے۔

سی ٹی ڈی کا مزید کہنا تھا کہ دہشت گرد سرگودھا پولیس ٹریننگ اسکول اور میانوالی پولیس چوکی حملوں میں ملوث تھے، اس حوالے سے مزید تفتیش کی جارہی ہے۔

یاد رہے کہ گذشتہ ماہ صوبہ پنجاب کے شہر گوجرانوالہ میں سی ٹی ڈی نے کارروائی کرتے ہوئے 3 مبینہ دہشت گردوں کو گرفتار کرکے بارودی مواد برآمد کرلیا تھا۔

سی ٹی ڈی کی گوجرانوالہ میں کارروائی، 3 دہشت گرد گرفتار

واضح رہے کہ گذشتہ ماہ ہی سی ٹی ڈی پنجاب نے ملتان میں کارروائی کرتے ہوئے کالعدم تنظیم کے دو مبینہ دہشت گردوں کو ہلاک کردیا تھا۔

سی ٹی ڈی حکام کا کہنا تھا کہ دہشت گرد رضوان عرف ڈاکٹر،عمران عرف ساقی کا نام ریڈبک میں شامل تھا، مقابلے میں ہلاک ہونے والے ملزمان کے قبضے سے نقشے اور دہشت گردی کیلئے استعمال ہونیوالی رقم برآمد کی گئی تھی۔

جولائی 1, 2019
لاہور: سی ٹی ڈی کی بڑی کارروائی، 2 دہشت گرد گرفتار

لاہور: انسداد دہشت گردی فورسز نے بڑی کارروائی کرتے ہوئے دو دہشت گردوں کو گرفتار کرکے دھماکا خیزمواد برآمد کرلیا۔

تفصیلات کے مطابق سی ٹی ڈی کی جانب سے یہ کارروائی پنجاب کے شہر لاہور میں ٹوبہ ٹیک سنگھ کے قریب گئی جہاں سے مبینہ طور پر دو دہشت گردوں کی گرفتاری عمل میں آئی۔

سی ٹی ڈی حکام کا کہنا ہے کہ گرفتار دہشت گردوں میں عبداللہ اور خالدخان شامل ہیں، گرفتار دہشت گروں سے تین کلو سے زائد بارودی مواد، 2ہینڈگرینیڈ اور اسلحہ برآمد کیا گیا۔

ذرایع کا کہنا ہے کہ دہشت گرد شہر میں بڑا دہشت گردی کا منصوبہ بنانا چاہتے تھے، جبکہ دہشت گردوں کا قانون نافذ کرنے والے اداروں پر حملے کا منصوبہ تھا۔

سی ٹی ڈی کی سیالکوٹ میں کارروائی، 2 دہشت گرد گرفتار

خیال رہے کہ گذشتہ ماہ سی ٹی ڈی نے سیالکوٹ میں کارروائی کرتے ہوئے 2 دہشت گردوں کو گرفتار کرکے بھاری مقدار میں دھماکا خیز مواد برآمد کرلیا تھا۔

سی ٹی ڈی کی جانب سے گرفتار کیے گئے دہشت گردوں کی شناخت حافظ محمد ابوبکر اور حافظ محمد یوسف کے نام سے ہوئی تھی۔ جبکہ دہشت گردوں سے 410 گرام دھماکا خیز مواد بھی برآمد ہوا تھا۔

جون 10, 2019
کراچی: رینجرز اور سی ٹی ڈی کی کارروائیاں، دو ٹارگٹ کلر سمیت سات ملزمان گرفتار

کراچی: رینجرز نے شہر قائد کے مختلف علاقوں میں کارروائی کرتے ہوئے پانچ ملزمان کو گرفتار کر لیا۔

ترجمان رینجرز کے مطابق حالیہ کارروائی میں پانچ ملزمان کو گرفتار کیا ہے. ماڈل ٹاؤن میں کارروائی میں رینجرز نے لیاری گینگ وار کا ملزم گرفتار کیا، عبدالعقیل نامی ملزم بھتہ وصولی اور ڈکیتی میں ملوث ہے.

ترجمان رینجرز کے گبول ٹاؤن، بلدیہ ٹاوٴن سے 4 ملزمان کوگرفتار کیا گیا، جو ڈکیتی اور منشیات فروشی میں ملوث ہیں، ملزمان سےغیر قانونی اسلحہ،ایمونیشن، مسروقہ سامان، منشیات برآمد ہوئی ہیں.

گرفتار کیے جانے والے ملزمان کو قانونی کارروائی کے لئے پولیس کے حوالے کردیا گیا.

سی ٹی ڈی کی کارروائی، دو ٹارگٹ کلر گرفتار

قبل ازیں سی ٹی ڈی انویسٹی گیشن نے مختلف کارروائیوں میں‌ دو ٹارگٹ کلرگرفتار کیے.

بلدیہ سے ایم کیوایم لندن کا کارکن فیصل پٹنی عرف برگرگرفتار کیا گیا، ملزم 2009 سے2011 تک 3 افراد کی ٹارگٹ کلنگ میں ملوث ہے.

ڈی آئی جی سی ٹی ڈی کے مطابق دوسری کارروائی میں‌ جسقم کا سرگرم کارکن مشتاق احمد گرفتار کیا گیا، جو ریلوے ٹریک دھماکوں کے لئےبارودی موادفراہم کرتا تھا.

مئی 24, 2019
لاہور میں سی ٹی ڈی کی بڑی کارروائی، 3 دہشت گرد گرفتار

لاہور: پنجاب میں پولیس نے دہشت گردی کا بڑا منصوبہ ناکام بنادیا، سی ٹی ڈی نے کارروائی کرتے ہوئے تین دہشت گردوں کو گرفتار کرلیا۔

تفصیلات کے مطابق لاہور کے علاقے بٹھائی گیٹ میں انسداد دہشت گردی فورس نے کارروائی کرکے تین دہشت گرد گرفتار کرلیے۔

گرفتار دہشت گردوں سے تین خود کش جیکٹس اور دیگر سامان برآمد کرلیا گیا ہے، جبکہ گرفتار ملزمان میں خاتون اور دوافغان باشندے شامل ہیں۔

پولیس نے ملزمان سے تفتیش کے لیے نامعلوم مقام پر منتقل کر دیا، پولیس حکام کا کہنا ہے کہ تحقیقات کے بعد مزید حقائق سامنے آئیں گے، مزید گرفتاریاں بھی ممکن ہیں۔

رواں ماہ کے آغاز میں شہر قائد میں رینجرز اور سی ٹی ڈی نے بڑی کارروائی کرتے ہوئے جنداللہ گروپ کا اہم دہشت گرد خان بادشاہ عرف عمرفاروق عرف خان گرفتار کیا تھا۔

گرفتار ملزم سی ٹی ڈی کی جاری کردہ ریڈ بک میں مطلوب دہشت گرد تھا اور دہشت گردی کی متعددکارروائیوں میں ملوث بھی رہا۔

رینجرز اور سی ٹی ڈی کی مشترکہ کارروائی : جنداللہ گروپ کااہم دہشت گرد گرفتار

یاد رہے گذشتہ ماہ بھی کاؤنٹر ٹیرر ازم ڈیپارٹمنٹ نے کراچی میں کارروائی کرتے ہوئے کالعدم تنظیم جنداللہ کے مطلوب دہشت گرد کو گرفتار کیا تھا ، راجا عمر خطاب نے کہا تھا محمد اسحاق عرف گل کانام ریڈبک میں شامل ہے۔

مئی 16, 2019
فرقہ وارانہ ٹارگٹ کلنگ میں ملوث19ملزمان گرفتار، اہم انکشافات

کراچی : سی ٹی ڈی اور ملیرپولیس نے فرقہ وارانہ ٹارگٹ کلنگ میں ملوث19اہم ملزمان کو گرفتار کرکے اسلحہ برآمد کرلیا،
پچاس افراد کے قتل میں ملوث ملزمان نے ٹارگٹ کلنگ اور ریکی کی تربیت پڑوسی ملک سے حاصل کی۔

تفصیلات کے مطابق کراچی پولیس نے شہر مختلف علاقوں میں کارروائیاں کرکے فرقہ وارانہ ٹارگٹ کلنگ میں ملوث19اہم ملزمان کو گرفتار کرکے اسلحہ برآمد کرلیا ہے۔

اس حوالے سے ڈی آئی جی ایسٹ عامرفاروقی نے میڈیا کو تفصیلات سے آگاہ کرتے ہوئے کہا ہے کہ سی ٹی ڈی اور ملیر پولیس نے19ملزمان کو حراست میں لیا ہے، ملزمان نے پڑوسی ملک سے دہشت گردی کی باقاعدہ تربیت حاصل کی تھی،گرفتار ملزمان میں سعید عمران، وقار رضا،عباس، مطلوب موسوی، سعید متاسم اور دیگر شامل ہیں،۔

عمران زیدی عرف علی نے 2015میں پڑوسی ملک سے پروفائل ٹارگٹ کلنگ اور ریکی کی تربیت حاصل کی،گرفتار ملزمان28سے زائد افراد کی ریکی کرچکے ہیں۔

ڈی آئی جی ایسٹ نے بتایا کہ ملزمان کو میڈیا کے لڑکوں کو استعمال کرنے کا ٹاسک دیا گیا تھا، سید مطلوب18دنوں کی تربیت حاصل کرچکا ہے، ملزم نے الیکشن کمیشن سے فہرست حاصل کی ہے۔

ملزمان کا کام مخصوص فرقہ کے نوجوانوں کو گروپ میں شامل کرنا بھی تھا، ملزمان کا گروہ31 وارداتوں میں 50افراد کو قتل کرچکا ہے، ان کا نام ریڈ بک میں بھی شامل ہے، پڑوسی ملک اس گروہ کو اسلحہ، گاڑی اور پیسہ فراہم کرتا ہے۔

فرقہ وارانہ ٹارگٹ کلنگ میں19افراد قتل ہوچکے ہیں، ڈی آئی جی عامرفاروقی کا مزید کہنا تھا کہ پڑوسی ملک ٹارگٹ کلرز کو40ہزار ماہانہ خرچہ دیتے تھے جبکہ ریکی کرنے والوں کو20ہزارماہانہ دیا جاتا تھا۔

عامرفاروقی کے مطابق گرفتار ملزمان کا نام لاپتہ افراد کی فہرست میں بھی شامل ہے جبکہ کئی لوگ گرفتاری سے بچنے کیلئے روپوشی اختیار کیے ہوئے ہیں، اس سلسلے میں لاپتہ افراد پر احتجاج کرنے والوں کو حقائق سے آگاہ کیا گیا ہے، قانون نافذ کرنے والےادارے محنت سے کام کر رہےہیں۔

ڈی آئی جی ایسٹ نے کہا کہ سی ٹی ڈی بھی سپاہ محمد کے چھ ٹارگٹ کلرز گرفتارکرچکی ہے، ٹارگٹ کلرز اورنگزیب فاروقی پر حملےمیں ملوث ہیں، اورنگزیب فاروقی پرحملے میں ملوث6ملزمان بھی گرفتار ہوچکے ہیں،15،20دن سےٹارگٹ کلنگ کا واقعہ نہیں ہوا۔

مئی 6, 2019
ملتان میں سی ٹی ڈی کی بڑی کارروائی، 4 مبینہ دہشت گرد گرفتار

ملتان: انسداد دہشت گردی فورس (سی ٹی ڈی) نے اہم کارروائی کرتے ہوئے چار مبینہ دہشت گردوں کو گرفتار کرلیا، جو حساس مقامات کو دہشت گردی کا نشانہ بنانا چاہتے تھے۔

تفصیلات کے مطابق سی ٹی ڈی نے صوبہ پنجاب کے شہر ملتان میں بہاولپور بائی پاس چوک کے قریب سے 4 مبینہ دہشت گروں کو گرفتار کیا۔

سی ٹی ڈی حکام کا کہنا ہے کہ گرفتار ملزمان نے حساس مقامات کو نشانہ بنانے کی منصوبہ بندی کر رکھی تھی، دہشت گردوں کے قبضہ سے چھ دستی بم، اسلحہ اور دیگر سامان برآمد کیا گیا۔

گرفتار ملزمان میں فضل، اسلم، گل اور باسط شامل ہیں، ملزمان کو تفتیش کے لیے نامعلوم مقام پر منتقل کردیا گیا۔

خیال رہے کہ رواں ماہ کے آغاز میں کاؤنٹر ٹیرر ازم ڈیپارٹمنٹ نے کراچی میں کارروائی کرتے ہوئے کالعدم تنظیم جنداللہ کے مطلوب دہشت گرد کو گرفتار کیا تھا۔

اس سے قبل کاؤنٹر ٹیرر ازم ڈیپارٹمنٹ نے کراچی کے علاقے سرجانی میں مختلف کارروائیوں میں 4 ٹارگٹ کلرز گرفتار کیا تھا، ٹارگٹ کلرز کا تعلق ایم کیو ایم لندن اور جماعت اسلامی سے بتایا گیا تھا۔

کراچی: سی ٹی ڈی کی کارروائیاں، 4 ملزمان گرفتار

یاد رہے چند روز قبل کے پی کے شہر ایبٹ آباد میں سی ٹی ڈی ہزارہ نے یہ اہم کارروائی کی اس موقع پر داعش کا نیٹ ورک چلانے والا مبینہ دہشت گرد مجیب الرحمان گرفتار کیا تھا،گرفتار مبینہ دہشت گرد کراچی اور پنجاب میں بڑی دہشت گردی کی کاروائیوں میں ملوث تھا جن میں ٹارگٹ کلنگ، بم دھماکوں، بینک ڈکیتیوں سمیت سنگین دہشت گردی کی وارداتیں شامل تھیں۔

اپریل 27, 2019