لاہور میں بغیر ہیلمٹ موٹرسائیکل سواروں کے خلاف کیے جانے والے کریک ڈاؤن کو مزید سخت کرنے کا فیصلہ کرلیا گیا، ہیلمٹ بازو میں لٹکانے، ٹینکی پر رکھنے پر بھی چالان ہوگا، سی ٹی او نے احکامات جاری کردیئے۔
اس حوالے سے سی ٹی او لاہور مستنصر فیروز نے متعلقہ افسران کو ہدایت کی ہے کہ بغیر ہیلمٹ پکڑے جانے والے افراد کی موٹر سائیکلوں کو تحویل میں لے کر ٹریفک سیکٹرز میں رکھا جائے۔
لاہور میں چھٹی کے روز 1890 موٹرسائیکلیں بند اور 8ہزار 232چالان ٹکٹس جاری کیے گئے، سی ٹی او کا کہنا ہے کہ موٹرسائیکل سواروں کے ہیلمٹ لانے پرموٹرسائیکلیں واپس کی جائیں۔
بغیر ہیلمٹ موٹرسائیکل چلانا غیر قانونی ہے اتوار کے روز بھی بغیر ہیلمٹ موٹرسائیکل سواروں، کم عمر ڈرائیورز کےخلاف اور بغیرلائسنس گاڑی چلانے کے خلاف کارروائی جاری ہے۔ pic.twitter.com/U0Y9jVGMM7
— City Traffic Police Lahore (@ctplahore) July 9, 2023
اب تک کی رپورٹ کے مطابق گزشتہ چار روز میں 41 ہزار 777 بغیر ہیلمٹ موٹرسائیکلوں کو چالان ٹکٹس جاری کیے گئے۔
سی ٹی او لاہور مستنصر فیروز نے ہیلمٹ مہم کا جائزہ لینے کیلئے شہر کی مختلف شاہراہوں کا دورہ کیا، انہوں نے کہا کہ ہیلمٹ بازو میں لٹکانے، ٹینکی پر رکھنے پر بھی چالان ہوگا۔
ان کا کہنا تھا کہ ہمارا مقصد چالان کرنا نہیں بلکہ شہریوں کا تحفظ ہماری اولین ترجیح ہے، شہری اپنی اور اپنے پیاروں کی حفاظت کیلئے ہیلمٹ کے استعمال کو یقینی بنائیں۔
