کراچی: ایف آئی اے کو مطلوب اسپیڈ منی کے مقدمے میں ملوث کسٹمز افسران کو بیرون ملک فرار ہونے سے روکنے کیلئے اہم پیشرفت سامنے آئی ہے، ملزمان کے نام اسٹاپ لسٹ پر ڈال دیے گئے۔
تفصیلات کے مطابق اسپیڈ منی کے الزامات کا سامنا کرنے والے کسٹمز افسران کے نام اسٹاپ لسٹ میں شامل کردیے گئے، کسٹمز کلکٹرز ثاقف سعید، عثمان باجوہ، عامرتھیم کا نام ایف آئی اے اسٹاپ لسٹ پر ڈال دیا گیا۔
اس کے علاوہ گرفتار کسٹم افسر یاور عباس اور طارق محمود اور چھالیہ کے اسمگلر عمران نورانی کا نام بھی ایف آئی اے نے اسٹاپ لسٹ پر ڈال دیا گیا۔
ذرائع کا کہنا ہے کہ ایف آئی اے امیگریشن کو مطلوب کسٹمز افسران کی فہرست اینٹی کرپشن سرکل نے بھیجی تھی، کسٹمزکلکٹر ثاقف سعید بیرون ملک فرار ہونا چاہتے تھے۔
ذرائع کے مطابق ثاقف سعید نے بیرون ملک جانے کیلئے ایک سال کی چھٹی بھی لے لی تھی جسے منسوخ کردیا گیا۔
دونوں اہلکاروں کو حراست میں لیے جانے کے ساتھ ہی ایک سال کی چھٹی لی گئی تھی، ایف آئی اے نے دیگر افسران کے ساتھ ثاقف سعید کیخلاف بھی مقدمہ درج کرلیا۔
