Tag: Cyclone Remal

خلیج بنگال میں بننے والا طوفان ریمل بنگلہ دیش کے بعد بھارتی ریاست مغربی بنگال کے ساحلی علاقوں سے ٹکرا گیا۔

بین الاقوامی خبر رساں ادارے کی رپورٹ کے مطابق بھارتی ساحلی علاقوں پر 120 کلومیٹر فی گھنٹے کی رفتار سے طوفانی ہوائیں چل رہی ہیں۔

کولکتا ایئرپورٹ پر طوفان ریمل کے پیش نظر فلائٹ آپریشن بھی معطل کر دیا گیا ہے، بنگلہ دیش میں طوفان کے باعث ساحلی علاقوں سے 10 لاکھ افراد کو محفوظ مقامات پر منتقل کیا گیا ہے۔

دوسری جانب امریکی شہر ہیوسٹن میں طوفانی بارشوں نے تباہی مچا دی ہے، طوفانی ہواؤں نے عمارتوں کی کھڑکیاں اڑا دیں، مختلف حادثات میں 7 ہلاک، متعدد زخمی ہو گئے ہیں۔

ہیوسٹن میں طوفانی بارش اور 177 کلومیٹر فی گھنٹہ کی رفتار سے چلنے والی ہواؤں نے عمارتوں کی کھڑکیاں اڑا دیں، کئی درخت جڑوں سے اکھڑ گئے، گھروں اور گاڑیاں کو نقصان پہنچا۔

حکام کے مطابق مختلف حادثات میں جمعرات اور جمعہ کو سات افرد ہلاک ہوئے ہیں، یہ اموات زیادہ تر درخت اور بجلی کی لائنیں گرنے اور آسمانی بجلی کی وجہ سے ہوئی ہیں۔ 57 سالہ ایک شخص گرے ہوئے بجلی کے کھمبے کو منتقل کرنے کی کوشش کرتے ہوئے ہلاک ہوا، جب کہ ایک اور شخص جس کو آکسیجن کی ضرورت تھی، بجلی جانے کے بعد موت کا شکار ہو گیا۔

رپورٹس کے مطابق جنوبی ٹیکساس میں 7 لاکھ افراد بجلی سے محروم ہو گئے ہیں، مقامی حکام کا کہنا ہے کہ متاثرہ علاقے کے رہائشی جمعرات کے طوفان کے بعد ہفتوں تک بجلی سے محروم رہیں گے۔ طوفان کے دوران انتظامیہ نے شہریوں کو گھروں میں رہنے کی ہدایت کی۔ ہیوسٹن میں تباہی مچانے کے بعد طوفان گلف کوسٹ کے لیے سیلاب کی انتباہ کے ساتھ پڑوسی ملک لوزیانا کی طرف بڑھ گیا ہے۔