لاہور: سابق نائب وزیر اعظم چوہدری پرویز الہی نے کہا ہے کہ متنازعہ خبر باہر نکالنے کے ذمہ داران کو سیکیورٹی ایکٹ کے تحت سزا دی جانی چاہیے انہوں نے حکومت کی جانب سے بنائی جانے والی کمیٹی کو قوم کے ساتھ مذاق قرار دے دیا جبکہ تحریک انصاف اور پاکستان عوامی تحریک نے بھی تحقیقات کے لیے بنائی جانے والی حکومتی کمیٹی کو مسترد کردیا۔
لاہور میں اپنی رہائش گاہ پر میڈیا سے گفتگو کرتے ہوئے چوہدری پرویز الہی کا کہنا تھا کہ ایسی کمیٹی بنانا جو نواز شریف کو رپورٹ کرے یہ قوم اور پاک فوج کے ساتھ مذاق ہے۔
چوہدری پرویز الہی نے مطالبہ کیا کہ جو کوئی بھی سکیورٹی بریچ کے پیچھے کردار ہیں انہیں سامنے لایا جائے اور ذمہ داران کے خلاف نیشنل سیکورٹی ایکٹ کے تحت کارروائی کی جائے۔
انہوں نے کہا کہ ڈان لیکس کے ذمہ داران کے خلاف نیشنل سیکیورٹی ایکٹ کے تحت کارروائی ہونی چاہیے، حکومتی کمیٹی نے حساس معاملے کی تحقیقات ریٹائرڈ جج کو سونپی ہے۔ انہوں نے سوال کیا کہ ایک ریٹائرڈ جج معاملے کی تحقیقات کیسے کرسکتا ہے۔
