پنجابی پاپ میوزک انڈسٹری کے نامور بھارتی گلوکار دلیرمہندی نے ٹوئٹر پر کیے گئے ایک مذاق کو سنجیدہ لے لیا، انہوں نے سمجھا کہ واقعی کہ شہزادہ ہیری نے ان کے گانے شوق سے سنے۔
صرف بھارت ہی نہیں بلکہ عالمی سطح پر بھی گلوکاری میں نمایاں مقام حاصل کرنے والے دلیر مہندی کی پرجوش موسیقی نے عرصہ دراز سے سامعین کو محظوظ کیا ہے اور لوگ آج بھی ان کے گانوں دیوانہ وار پر رقص کرتے ہیں۔
لیکن اس معصومیت کا کیا جائے کہ اس نامور گلوکار نے سماجی رابطے کی ویب سائٹ ٹوئٹر پر کیے جانے والے ایک مذاق کو سنجیدہ لے لیا بلکہ اگر کہا جائے کہ انہیں بے وقوف بنادیا گیا تو غلط نہ ہوگا وہ اپنے بھولے پن کی وجہ سے ایک پیروڈی ٹویٹ کا شکار ہوگئے۔
ہوا کچھ یوں کہ گزشتہ دنوں برطانوی شہزادہ ہیری کی جانب سے لکھی گئی سوانح حیات ‘اسپیئر’ میں انہوں نے اپنی زندگی کے بہت سے پوشیدہ رازوں سے پردہ اٹھایا ان کی اس کتاب نے دنیا بھرمیں خوب شہرت حاصل کی۔
اسی بات کو لے کر ایک سوشل میڈیا صارف نے ٹوئٹر پر ایک جعلی بیان جاری کیا جس میں بتایا گیا کہ ’شہزادہ ہیری اپنے مشکل وقتوں میں دلیر مہندی کی موسیقی سنتے تھے جس کا تذکرہ انہوں نے اپنی کتاب میں کیا ہے‘۔
I am grateful to the blessings of Guru Nanak, my mom and dad, I created a unique Pop Folk Ethnic Music Style.
Love you Prince Harry! God Bless you, In gratitude that my music helped you.@TeamSussex pic.twitter.com/r2mRU0mn6U— Daler Mehndi (@dalermehndi) January 20, 2023
ٹوئٹر پر جاری اس جعلی بیان میں لکھا تھا کہ ’’پرنس ہیری نے اپنی نئی کتاب ’اسپیئر‘ میں انکشاف کیا ہے کہ وہ اپنے اداس لمحات میں کس میوزک آرٹسٹ کو سنتے ہیں‘‘
جعلی ٹوئٹ کے اقتباس میں بقول ہیری لکھا گیا کہ ”جب میں اپنے خاندان سے دور تھا اور مجھے اکیلا پن محسوس ہو رہا تھا تو اس اکیلے پن کو دور کرنے کے لیے میں ہمیشہ اکیلے بیٹھ کر دلیر مہندی کو سُنتا تھا۔“
مذکورہ ٹوئٹ میں شہزادہ ہیری کے حوالے سے مزید لکھا گیا کہ ”اُن کے نغموں کے بول میرے دل کو چھوتے اور ان کے باعث مجھے مشکل وقت میں مدد ملی۔“
دلیر مہندی کی اس ٹوئٹ کو دیکھ کر خوشی کی انتہا نہ رہی اور انہوں نے اس کتاب ‘اسپیئر’ کو پڑھے بغیر ہی اس ٹوئٹ کو سچ سمجھ کر اپنے اکاؤنٹ سے جواباً شہزادہ ہیری کا شکریہ ادا کرڈالا اور اپنا پیار بھی پیش کردیا، جس سے صارفین خوب محظوظ ہورہے ہیں۔
دلیر مہندی نے اس جعلی ٹوئٹ کا اسکرین شاٹ لے کر اپنے پیغام میں لکھا کہ میں گرو نانک، اپنی ماں اور والد صاحب کی نعمتوں کا شکر گزار ہوں کہ میں نے ایک منفرد پاپ فوک ایتھنک میوزک اسٹائل بنایا۔ پرنس ہیری میں آپ سے محبت کرتا ہوں! خدا آپ کو خوش رکھے، شکر گزار ہوں کہ میری موسیقی نے آپ کی مدد کی۔
سوشل میڈیا صارفین کو جب معلوم ہوا کہ دلیر مہندی کے ساتھ سنگین مذاق ہوگیا ہے تو انہوں نے بھی دلچسپ تبصرے کیے۔ کچھ صارفین نے اس پر میمز بنائیں تو کسی نے ان کا دل رکھنے کیلئے ان کی حوصلہ افزائی کی۔
ایک صارف کا کہنا تھا کہ ’ہاں دلیر جی، ہم آپ کو کیسے بتائیں؟ جبکہ ایک اور صارف نے لکھا کہ "اوہو پراجی، یہ تو دھوکا ہوگیا. کوئی بات نہیں جی، آپ بہترین ہیں۔
