Tag: Daniel Feldman

واشنگٹن:  امریکی نمائندہ برائے افغانستان و پاکستان ڈئینیل فیلڈ مین  کا کہنا ہے کہ پاک افغان سرحد پر امن پاکستان کے استحکام کےلئے ضروری ہے، امریکا افغانستان کی فوجی اور مالی امداد جاری رکھے گا۔

امریکی نمائندہ برائے افغانستان و پاکستان ڈئینیل فیلڈ مین نےاپنے بیان میں کہا ہے کہ افغانستان کے پُرامن تصفئے کے لئے پاکستان اپنا کردار ادا کرنے کے لئے پوری طرح تیار ہے،افغانستان میں پاکستان کے کردار پر افغان صدر سے تفصیلی بات چیت ہوئی ہے۔

ان کا کہنا تھا کہ پاک افغان سرحد پر امن پاکستان کے استحکام کے لئے ضروری ہے اور پاکستان کی فوجی قیادت افغانستان کے معاملے پر متحد ہے، افغان تصفیے میں پاکستان کا ایک اہم کردار ہے، افغان صدر کے دورے کے دوران بھارت کے کردار پر کوئی بات چیت نہیں ہوئی، بھارت کے ساتھ تعلقات رکھنا افغانستان کا اندرونی معاملہ ہے۔

طالبان کے حوالے سے ڈینیئل فیلڈ مین کا کہنا تھا کہ بین الاقوامی برادری طالبان کا افغان حکومت کے ساتھ پر امن تصفیہ چاہتی ہے، یہ کہنا قبل از وقت ہے کہ طالبان کے ساتھ مذاکرات کامیاب ہوں گے کہ نہیں۔

انھوں نے کہا کہ امریکا نے طالبان کو کبھی دشمن نہیں سمجھا، امریکا ہمیشہ دہشتگردی کے خلاف رہا ہے، اگر طالبان دہشتگردی چھوڑ دیں تو وہ افغان حکومت کے معاملات میں شامل ہوسکتے ہیں۔