نارووال: این اے 75 شکر گڑھ سے آزاد امیدوار دانیال عزیز کو گرفتار کرلیا گیا ہے۔
تفصیلات کے مطابق آزاد امیدوار دانیال عزیز کی اہلیہ مہناز اکبر نے ان کی گرفتاری کی تصدیق کی ہے اور بتایا کہ دانیال عزیز کو تشدد کے بعد گرفتار کیا گیا۔
ان کی اہلیہ مہناز اکبر کا کہنا ہے دانیال کو موڑ سلہریاں پر ناکے سے گرفتار کیا گیا، دانیال عزیز پر بدترین تشدد بھی ہوا ہے۔
اہلیہ مہناز اکبر عزیز نے مزید کہا کہ دانیال عزیز کو زبردستی گاڑی میں ڈالا گیا۔
لاہور: پاکستان مسلم لیگ ن کے رہنما دانیال عزیز نے کہا ہے کہ فیول سے مہنگے پلانٹس استعمال کیے جاتے ہیں، اس معاملے کی مکمل انکوائری ہونی چاہیے۔
تفصیلات کے مطابق لیگی رہنما دانیال عزیز نے میڈیا سے گفتگو کرتے ہوئے کہا کہ سردی میں کم لوڈ کے باوجود مہنگی بجلی بنانے کی ضرورت کیوں پڑ گئی، پلانٹس سے متعلق انکوائری آرڈر کی گئی ہے، آئی پی پیز پہلے نہیں بتا رہے تھے، بعد میں 7 سے 8 کمپنیوں کے نام بتائے۔
دانیال عزیز کا کہنا تھا کہ ان کمپنیوں میں میاں منشا کے نشاط کی 2 کمپنیاں لبرٹی پاور اور ایٹلس پاور شامل ہیں، آئی پی پیز نے حبکو نارووال سمیت سات آٹھ کمپنیوں کے نام بتائے، ان کے مالکان کے نام بھی سامنے آ جائیں گے۔
تازہ ترین: مریم نواز کی آج رہائی کا امکان
انھوں نے مزید کہا کہ مہنگائی گلی کوچوں سے نہیں پالیسی کے تحت اسلام آباد سے ہوتی ہے، عوام کو ٹیکا لگانے والوں کے خلاف گھیرا تنگ کریں گے، بجلی کے بلز بنانے کے لہے آئی ایم ایف کے ساتھ معاہدہ کیا گیا، آئی ایم ایف یہ تو نہیں کہتی کہ بجلی کے لیے مہنگے پلانٹ چلائیں۔
دانیال عزیز نے مریم نواز کے ضمانتی مچلکے کے حوالے سے ایک سوال کے جواب میں کہا کہ مچلکہ سیف الملوک کھوکھر کے بیٹے فیصل کی جانب سے جمع کرایا گیا ہے۔ واضح رہے کہ آج لاہور کی احتساب عدالت میں مریم نواز کے ضمانتی مچلکے پیش کر دیے گئے ہیں، جس کے بعد ہائی کورٹ کے احکامات سمیت مچلکوں کی جانچ پڑتال کی کارروائی شروع کردی گئی ہے، جس پر آج مریم نواز کی رہائی کا امکان ہے۔
یاد رہے کہ لیگی رہنما دانیال عزیز کو گزشتہ برس جون میں سپریم کورٹ آف پاکستان نے توہین عدالت کے جرم میں عدالت کے برخاست ہونے تک سزا سنائی تھی جس کے بعد وہ پانچ سال کے لیے نا اہل ہو چکے ہیں۔
اسلام آباد : مسلم لیگ ن کے رہنما دانیال عزیز کا کہنا ہے کہ عدالتی فیصلے پر ہم نےلاک ڈاؤن یااسلام آباد پر حملہ نہیں کیا ، میری جگہ میرے والد میرے حلقے سے الیکشن لڑیں گے۔
تفصیلات کے مطابق سابق وزیرمملکت دانیال نے نااہلی کے فیصلے کے بعد میڈیا سے گفتگو کرتے ہوئے کہا کہ میرے خلاف توہین عدالت کیس کا فیصلہ سنایا گیا، میرے خلاف3 چارج تھے کچھ 8 ماہ اور کچھ ایک سال پرانے تھے۔
دانیال عزیز کا کہنا تھا کہ میرے خلاف ایک چارج تھا کہ پریس کانفرنس میں تضحیک کی، پہلے چارج کے گواہ نے تسلیم کیا میں نے وہ لفظ کہے ہی نہیں، واحد گواہ جس کیس میں پیش ہوا اس میں مجھے بری کردیا گیا۔
رہنما مسلم لیگ ن نے کہا کہ دوسراچارج ایک نجی چینل پر چلائی جانے والی ویڈیو تھی، فوٹیج چلائی تو چینل کی آڈیو میں ٹون چلی یعنی وہ لفظ بولے ہی نہیں گئے، تیسراچارج عمران خان سے متعلق فیصلے پر میرے جملے تھے، چند ماہ پہلے کے چارج پر عدالت برخاست ہونے تک سزا ملی، میں نے جاوید ہاشمی کے انکشاف کا ذکر کیا تھا، جاوید ہاشمی نے کہا تھا کسی اور طریقے سے لوگوں کو ہٹایا جائے گا
انھوں نے نے عدالت سے درخواست کی کہ ویڈیو کلپ کا ٹرانسکرپٹ دیاجائے، نجی چینل میں جو ویڈیو چلائی گئی اس میں میری گفتگو سنسرکی گئی، ویڈیو میں جو گفتگو کی گئی تھی ایک پرائیویٹ تقریب میں گفتگو تھی۔
دانیال عزیز نے مزید کہا کہ فیصلے پرعدالت میں ہی تو لوگوں نے کہا یوسف رضاگیلانی جیسا کیس ہے، آصف زرداری کوسزاہوئی توصدربن گئے، یوسف رضاگیلانی کوسزاہوئی تووزیراعظم بن گئے، میں نے اداروں کومضبوط کرنے کی تگ ودوکی ہے۔
سابق وزیر مملکت کا کہنا تھا کہ عدالتی فیصلے پر ہم نےلاک ڈاؤن یااسلام آباد پر حملہ نہیں کیا، تفصیلی فیصلہ آنے کے بعد قانونی مشاورت کریں گے، جیل کاٹی نہ یوسف رضاگیلانی جیسےعدالتی احکامات کی خلاف ورزی کی۔
انھوں نے کہا کہ میں نےمقامی حکومتوں کےنظام بنائےہیں جس پرتمغہ بھی ملا ، میرے مخالفوں کے نیب میں 3،3کیسز ہیں، سروے کے مطابق میرے حلقے میں مجھے برتری حاصل تھی، مجھ پر کرپشن کا کوئی الزام نہیں۔
دانیال عزیز کا کہنا تھا کہ میرے والد نے میرےحلقے سے کاغذات داخل کرائے ہیں، ہم نے ممکنہ طور پر متبادل فیصلہ کیا ہوا تھا، میری جگہ میرے والد میرے حلقے سے الیکشن لڑیں گے۔
یاد رہے اس سے قبل سپریم کورٹ نے مسلم لیگ ن کے رہنما دانیال عزیز کو توہین عدالت کا مرتکب قرار دیتے ہوئے آرٹیکل 63 کے تحت نااہل کردیا، اب دانیال عزیز اگلے 5 سال تک الیکشن میں حصہ نہیں لے سکیں گے۔
اسلام آباد: مسلم لیگ ن کے رہنما دانیال عزیز کو توہین عدالت کا مرتکب قرار دے دیا گیا ہے جس کے بعد وہ آرٹیکل 63 کے تحت نااہل ہوگئے۔ دانیال عزیز اگلے 5 سال تک الیکشن میں حصہ نہیں لے سکیں گے۔
تفصیلات کے مطابق مسلم لیگ ن کے رہنما اور سابق وزیر برائے نجکاری دانیال عزیز کے خلاف توہین عدالت کیس کا فیصلہ سپریم کورٹ کے جج جسٹس گلزار کی سربراہی میں 3 رکنی بینچ نے سنایا۔ عدالت نے انہیں مجرم قرار دیتے ہوئے عدالت برخواست ہونے تک کی سزا سنائی۔
فیصلے کے مطابق دانیال عزیز عدالت اور ججز کی تضحیک کے مرتکب ہوئے اور انہوں نے انصاف کی فراہمی کے عمل میں مداخلت کی۔
دانیال عزیز کی عدلیہ کے خلاف توہین آمیز تقاریر پر 2 فروری کوسپریم کورٹ نے از خود نوٹس لیا تھا۔
کیس کی سماعت کے دوران دانیال عزیز کے وکیل علی رضا نے دلائل دیتے ہوئے مؤقف اختیار کیا تھا کہ دانیال عزیز نے تضحیک آمیز بیان نہیں دیا، نجی ٹی وی نے پرائیوٹ تقریب کی ویڈیو نشر کی ہے۔
جسٹس عظمت سعید نے ریمارکس دیے تھے کہ نجی ٹی وی پر چلنے والی ویڈیو کے نکات کی تردید نہیں کی گئی۔ اس موقع پر وکیل نے منطق پیش کی کہ نجی ٹی وی کے بیان کی ٹرانسکرپٹ کو دانیال عزیز نے تسلیم نہیں کیا، دانیال عزیز نے عدالتی فیصلوں پر فقط تنقید کی ہے۔
فرد جرم عائد کرتے ہوئے جسٹس مشیر عالم نے چارج شیٹ پڑھ کر سنائی تھی جس کے مطابق ’دانیال عزیز نے جج کی تضحیک اورعدالت کی توہین کی۔ انہوں نے 8 ستمبر کو کہا کہ نگران جج نے نیب لاہور کو طلب کر کے تیار کیا‘۔
چارج شیٹ کے مطابق دانیال عزیز نے کہا کہ ’جہانگیر ترین کو سزا دے کر عمران خان کو بچایا گیا تھا یہ سب اسکرپٹ کے مطابق کیا گیا جبکہ 31 دسمبر کو دانیال عزیز نے کہا کہ جج کو بتانا ہوگا کیپٹل ایف زیڈ ای کی بات ان تک کیسے پہنچی، مشترکہ تحقیقاتی ٹیم کو ایف زیڈ ای سے متعلق تحقیقات کا کہا گیا تھا‘۔
3 مئی کو جسٹس عظمت نے دلائل کے بعد فیصلہ محفوظ کرتے ہوئے کہا تھا کہ دانیال عزیز عدالت کے فیورٹ چائلڈ ہیں، ملزم عدلیہ کا ہمیشہ فیورٹ چائلڈ ہوتا ہے۔ صفائی کا موقع دیں گے۔
توہین عدالت کیس کے فیصلے کے بعد دانیال عزیز اگلے 5 سال کے لیے الیکشن میں حصہ لینے کے لیے نااہل ہوگئے ہیں۔
یاد رہے کہ رواں سال فروری میں سپریم کورٹ نے دھمکی آمیز تقریراورتوہین عدالت کیس میں نہال ہاشمی کو 1 ماہ قید اور پچاس ہزار روپے جرمانے کی سزا سنائی تھی۔ عدالت نے نہال ہاشمی کو کسی بھی عوامی عہدے کے لیے 5 سال کے لیے نا اہل بھی قرار دیا تھا۔
دانیال عزیز 25 فروری سنہ 1965 کو پیدا ہوئے ، ان کے والد سیاست داں تھے اور ایک مرتبہ وفاقی کابینہ کا حصہ بھی رہ چکے ہیں، ان کی والدہ امریکی نژاد ہیں۔
توہینِ عدالت کے مقدمے میں نااہل قرار دیے جانے والے دانیا ل عزیز نے اپنا سیاسی سفر قومی اسمبلی کے حلقہ این اے 91 ناروال سے بطور آزاد امیدوار 1997 میں شروع کیا تھا۔
سنہ 2002 میں ہونے والے انتخابات میں وہ ایک بار پھر ناروال سے بطور آزاد امید وار کامیاب ہوئے اور بعد میں انہوں نے پاکستان مسلم لیگ ق میں شمولیت اختیار کی۔ اس سے قبل وہ نیشنل ری کنسٹرکشن بیورو کے چیئر مین بھی رہے تھے۔
سنہ 2008 کے انتخابات میں انہوں نے این اے 116 ناروال سے مسلم لیگ ق کے ٹکٹ پر الیکشن میں حصہ لیا تاہم فتح یاب نہ ہوسکے، مارچ 2013 میں انہوں نے پاکستان مسلم لیگ ن میں شمولیت اختیار کی اور سنہ 2013 کے عام انتخابات میں این اے 116 ناروال سے قومی اسمبلی کے ممبر منتخب ہوئے۔
سنہ 2017 میں سابق وزیراعظم نواز شریف کی نا اہلی کے بعد شاہد خاقان عباسی وزیراعظم منتخب ہوئے تودانیال عزیز وفاقی وزیر برائے نجکاری مقرر کیا گیا۔ 31 مئی کو جب حکومت کی مدت ختم ہوئی تو دانیال عزیز کا عہدہ بھی ختم ہوگیا اور آج سپریم کورٹ نے انہیں توہینِ عدالت کے جرم میں پانچ سال کے لیے نا اہل قرار دے دیا ہے۔
خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔
اسلام آباد: سپریم کورٹ میں مسلم لیگ ن کے رہنما دانیال عزیز کے خلاف توہین عدالت کیس کا فیصلہ آج سنایا جائے گا.
تفصیلات کے مطابق جسٹس عظمت سعید شیخ کی سربرائی میں کل تین رکنی بینچ دانیال عزیز کیس کا فیصلہ سنائے گا، دانیال عزیز کے خلاف فیصلہ 3 مئی کو محفوظ کیا گیا تھا.
واضح رہے کہ دوران سماعت دانیال عزیز کے وکیل علی رضا نے دلائل دیتے ہوئے موقف اختیار کیا تھا کہ دانیال عزیزنے تضحیک آمیزبیان نہیں دیا، نجی ٹی وی نے پرائیوٹ تقریب کی ویڈیوکو نشر کی ہے۔
اس پر جسٹس عظمت سعید نے ریمارکس دیے کہ نجی ٹی وی پر چلنے والی ویڈیو کے نکات کی تردید نہیں کی گئی، اس موقع پر وکیل نے منطق پیش کی کہ نجی ٹی وی کے بیان کی ٹرانسکرپٹ کو دانیال عزیزنےتسلیم نہیں کیا، دانیال عزیز نےعدالتی فیصلوں پر فقط تنقید کی ہے۔
جسٹس عظمت نے دلائل کے بعد فیصلہ محفوظ کرتے ہوئے کہا تھا کہ دانیال عزیزعدالت کے فیورٹ چائلڈ ہیں، ملزم عدلیہ کا ہمیشہ فیورٹ چائلڈ ہوتا ہے، صفائی کاموقع دیں گے.
اب توہین عدالت میں محفوظ کیا جانے والا یہ فیصلہ آج بہ روز جمعرات سنایا جائے گا.
خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔
اسلام آباد : مسلم لیگ ن کے رہنما اور وفاقی وزیرنجکاری دانیال عزیز نے تھپڑ مارنے پر نعیم الحق سے معافی کا مطالبہ کرتے ہوئے کہا کہ عمران خان اور جہانگیر ترین سرٹیفائیڈ چور ہیں عمران خان نے ایمنسٹی اسکیم سے فائدہ اٹھایا،ٹیکس ایمنسٹی اسکیم چوری کے زمرےمیں آتی ہے حکومت کی مہربانی ہے جو ایکشن نہیں لیا۔
تفصیلات کے مطابق مسلم لیگ ن کے رہنما دانیال عزیز کا کہنا ہے کہ نعیم الحق تھپڑمارنے پرمجھ سےمعافی مانگیں، میں نے کہا تھا پی ٹی آئی کی لیڈر شپ چور ہے، میں آج بھی اپنے بیان پر قائم ہوں۔
دانیال عزیز کا کہنا تھا کہ عمران خان اور جہانگیرترین نے لکھ کر دیا انہوں نے ٹیکس چوری کیا، عمران خان نے ایمنسٹی سکیم سے فائدہ اٹھایا، ٹیکس ایمنسٹی اسکیم چوری کے زمرے میں آتی ہے، حکومت کی مہربانی ہے اس پر کوئی ایکشن نہیں لیا۔
رہنما مسلم لیگ ن نے کہا کہ جہانگیرترین نے مالی اورباورچی کے نام آف شورکمپنیاں بنائیں، عمران خان اور جہانگیر ترین سرٹیفائیڈ چورہیں، نعیم الحق ثابت کریں کہ عمران خان اور جہانگیر ترین چور نہیں۔
گذشتہ روز وفاقی وزیرنجکاری دانیال عزیز نے احتساب عدالت کے باہر میڈیا سے گفتگو میں کہا تھا کہ پی ٹی آئی کے 100 دن کےایجنڈے میں ایک خفیہ راز ہے، 100دن کا پلان پاکستان کو تباہی کی طرف لے جانے کا ہے، جب میں نشاندہی کرتا ہوں تو یہ بوکھلا جاتے ہیں۔
دانیال عزیز کا کہنا تھا کہ افسوس کی بات ہے جوٹی وی پرچلاوہ پورا کلپ نہیں تھا، تھپڑ سے پہلے اور بعد کی گفتگو نہیں دکھائی گئی، صاف نظرآرہا ہے کہ یہ ایک طے شدہ منصوبے کے تحت کیا گیا۔
ان کا کہنا تھا کہ یہ کبھی خواجہ آصف پرسیاہی پھینکتے ہیں، کبھی جاویدہاشمی پر، کبھی وزیراعظم کوجوتا مارتے ہیں، کبھی اس طرح کے تھپڑ، یہ ایک سوچ ہے، جس کے پیچھے ان کی ناکامیوں کی بوکھلاہٹ ہے۔
اسلام آباد : سپریم کورٹ نے دانیال عزیز کیخلاف توہین عدالت کیس کافیصلہ محفوظ کرلیا، جسٹس شیخ عظمت سعید نے کہا دانیال عزیزعدالت کےفیورٹ چائلڈہیں، ملزم عدلیہ کا ہمیشہ فیورٹ چائلڈہوتا ہے، صفائی کاموقع دینگے۔
تفصیلات کے مطابق سپریم کورٹ میں جسٹس عظمت سعید شیخ کی سربراہی میں بنچ نے دانیال عزیز کیخلاف توہین عدالت کیس کی سماعت کی، دوران سماعت دانیال عزیز کے وکیل علی رضا نے دلائل دیتے ہوئے کہا کہ دانیال عزیزنےتضحیک آمیزبیان نہیں دیا، نجی ٹی وی نےپرائیوٹ تقریب کی ویڈیوکو نشر کیا۔
جسٹس عظمت سعید نے کہا نجی ٹی وی پر چلنے والی وڈیوکےنکات کی تردید نہیں کی گئی، جس پر وکیل نے منطق پیش کی کہ نجی ٹی وی کےبیان کی ٹرانسکرپٹ کو دانیال عزیزنےتسلیم نہیں کیا، دانیال عزیز نےعدالتی فیصلوں پرتنقیدکی۔
جسٹس عظمت نے کہا تحریری بیان کاجائزہ بھی لیا، فردجرم عدالتی فیصلوں پرتنقیدکرنے پرعائد نہیں کی، دانیال عزیزکا نجی ٹی وی پرچلنے والی ویڈیو پرموقف پرکھیں،وکیل دانیال عزیز نے کہا کہ ویڈیو سے غلط تاثر دینے کی کوشش کی گئی۔
وکیل نے جب یہ کہا کہ دانیال عزیزعدلیہ کی عزت کرتےہیں اس میں کوئی اگرمگرنہیں، تو جسٹس عظمت نے کہا اگرمگرتوہے،کیا آپکا موقف ہے کہ توہین ہوتی تو افسوس ہے۔
جسٹس عظمت نے دلائل کے بعد فیصلہ محفوظ کرتے ہوئے کہا دانیال عزیزعدالت کےفیورٹ چائلڈہیں، ملزم عدلیہ کا ہمیشہ فیورٹ چائلڈ ہوتاہے، صفائی کاموقع دیں گے،ایسےفیصلہ نہیں کریں گے، ٹرانسکرپٹ تیارکرنے میں غلطی کومان لیں گے۔
یاد رہے کہ مسلم لیگ ن کے رہنما اور وزیر برائے نجکاری دانیال عزیز کی عدلیہ کے خلاف توہین آمیز تقاریر پر 2 فروری کوسپریم کورٹ نے ازخود نوٹس لیا تھا اور 13 مارچ کو فرد جرم عائد کی گئی تھی۔
واضح رہے رواں سال یکم فروری کو سپریم کورٹ نے دھمکی آمیز تقریر اور توہین عدالت کیس میں نہال ہاشمی کو 1 ماہ قید اور پچاس ہزار روپے جرمانے کی سزا سنائی تھی اور ساتھ ہی نہال ہاشمی کو کسی بھی عوامی عہدے کے لیے 5 سال کے لیے نا اہل بھی قرار دیا تھا۔
بعدازاں رہائی کے بعد نہال ہاشمی نے ایک بار پھرعدلیہ مخالف بیان دیا تھا جس کا چیف جسٹس نے دوبارہ نوٹس لیا اور ایک بار پھر توہین عدالت کیس میں سپریم کورٹ نے نہال ہاشمی کا تحریری جواب مسترد کیا بعد ازان ان کی معافی قبول کرلی گئی تھی۔
اسلام آباد : پاکستان تحریک انصاف کے ترجمان فواد چوہدری نے دانیال عزیز کے بیان پرردعمل دیتے ہوئے کہا کہ حلقہ بندیاں کرنے والے ارکان کو دھمکیاں دینے پر دانیال عزیز پرمقدمہ درج کیا جائے۔
تفصیلات کے مطابق پاکستان تحریک انصاف کے ترجمان فواد چودھری نے وفاقی وزیر برائے نجکاری کے حلقہ بندیوں سے متعلق بیان پر رد عمل دیتے ہوئے کہا کہ سب کچھ وزیراعظم اورنا اہل لیگی قیادت کے ایما پر ہو رہا ہے۔
فواد چوہدری کا کہنا تھا کہ آئینی ادارے کو کس طرح کھلےعام دھمکیاں دی جاسکتی ہیں، اب حکومت نے الیکشن کمیشن کو دھمکیاں دینی شر وع کردی ہیں۔
انہوں نے کہا کہ دانیا ل عزیز پہلے ہی توہین عدالت کا کیس بھگت رہے ہیں، اب دانیال عزیزالیکشن کمیشن کو دھمکیا ں دینے پر اترآ ئے ہیں۔
ترجمان پاکستان تحریک انصاف نے مطالبہ کیا کہ حکومت 24 گھنٹے کے اندر پوزیشن واضح کرے اور دانیا ل عزیز کے خلاف دھمکیاں دینے پر مقدمہ درج کیا جائے۔
خیال رہے کہ نئی حلقہ بندیوں سے متعلق پارلیمانی کمیٹی کے ورکنگ گروپ نے پرانی حلقہ بندیوں کے مطابق انتخابات کرانے کے لیے آئین میں ترمیم کی تجویز پیش کی ہے، ورکنگ گروپ نے نئی حلقہ بندیوں کا مسودہ ناقص قرار دے کر مسترد کردیا۔
خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔
اسلام آباد : سپریم کورٹ آف پاکستان نے وفاقی وزیر برائے نجکاری دانیال عزیز کے خلاف توہین عدالت کیس کی سماعت 16 اپریل تک ملتوی کردی ۔
تفصیلات کے مطابق سپریم کورٹ میں جسٹس شیخ عظمت سعید کی سربراہی میں سپریم کورٹ کا 3 رکنی بینچ وفاقی وزیر دانیال عزیز کے خلاف توہین عدالت کیس کی سماعت کی۔
عدالت عظمیٰ میں وفاقی وزیر برائے نجکاری دانیال عزیز اور گواہ ڈی جی مانیٹرنگ پیمرا حاجی آدم ، ساجد حسین موجود تھے۔
ڈی جی پیمرا مانیٹرنگ حاجی آدم خان کا بیان قلمبند
ڈی جی مانیٹرنگ پیمرا حاجی آدم نے کہا کہ عدالت میں سچ کہوں گا کوئی غلط بیانی نہیں کروں گا، میرا کام پروگرامز کو مانیٹرکرنا ہے، دانیال عزیزکی پوری تقریردیکھی۔
گواہ حاجی آدم نے عدالت عظمیٰ کو بتایا کہ پی آئی ڈی کی 8 ستمبر2017 کی تقریرمکمل دیکھی اورسنی، میں 8 ستمبرکی تقریرکا متن بھی ساتھ لایا ہوں۔
سپریم کورٹ میں 15 دسمبر2017 کی دانیال عزیزکی ویڈیو کلپ چلائی جائے، جسٹس عظمت سعید شیخ نے کہا کہ یہ نہ ہوکسی اورجرم میں فرد جرم عائد کرنی پڑجائے۔
عدالت عظمیٰ میں دانیال عزیزکا احاطہ عدالت میں میڈیا ٹاک کا کلپ چلایا گیا، گواہ حاجی آدم نے کہا کہ کلپ کی اپنے ریکارڈ سے تصدیق کرسکتا ہوں، جسٹس عظمت سعید شیخ نے کہا کہ کارٹون نیٹ ورک دیکھ لیا کریں۔
دانیال عزیز کے وکیل نے سوال کیا یہ ایک مخصوص ٹی وی پرچلنے والی کلپ ہے جس پر گواہ حاجی آدم نے جواب دیا کہ یہ کلپ مخصوص ٹی وی کے پروگرام میں چلایا گیا۔
وفاقی وزیربرائے نجکاری دانیال عزیز کے وکیل نے کہا کہ ایک اورکلپ بھی چلایا گیا تھا، ڈی جی پیمرا نے مبینہ توہین آمیزکلپ کی سی ڈی عدالت میں جمع کرا دی جسے عدالت نے ریکارڈ کا حصہ بنا دیا۔
دانیال عزیز کے وکیل علی رضا نے گواہ حاجی آدم سے سوال کیا کہ کلپ کا سورس ویریفائی کرسکتے ہیں جس پر انہوں نے جواب دیا کہ نہیں سورس ویریفائی نہیں کرسکتا۔
گواہ سے سوال کیا گیا کہ جوویڈیو کلپ چلا کیا وہ پہلے سے ایڈٹ ہوسکتا ہے جس پرگواہ حاجی آدم نے جواب دیا کہ جی کلپ پہلے ایڈٹ ہوسکتا ہے۔
دانیال عزیز کے وکیل نے کہا کہ پیمرارولز کے مطابق لائسنس ہولڈر کسی دوسرے کا کلپ نہیں چلا سکتے، کیا آپ نے مخصوص چینل کو کلب چلانے پرنوٹس جاری کیا۔
ڈی جی مانیٹرنگ پیمرا حاجی آدم نے جواب دیا کہ مخصوص چینل کودوسرے چینل کا کلپ چلانے پرنوٹس نہیں دیا، دانیال عزیز کے وکیل نے سوال کیا کہ کیا21 دسمبر2017 کو یہ کلپ دوبارہ چلا؟۔ گواہ حاجی آدم نے جواب دیا کہ نہیں دوبارہ نہیں چلا۔
گواہ ساجد حسین
دانیال عزیز کے وکیل نے سوال کیا کہ یہ درست ہے دانیال عزیزسے منسوب الفاظ آپ کے اپنے الفاظ ہیں؟ جس پر ساجد حسین نے جواب دیا کہ میں پہلے کہہ چکا ہوں میں نے اخذ کیا ہے۔
گواہ نے کہا کہ سیاسی رپورٹنگ میرا کام نہیں، 23 سال سےا کانومی کورکررہا ہوں، یہ نجکاری کے وزیرتھے اس لیے میں نے پریس کانفرنس کو کورکیا۔
وفاقی وزیر کے وکیل نے سوال کیا کہ نجی اخبار کے ساتھ کب سے منسلک ہیں جس پر انہوں نے جواب دیا کہ ساڑھے 3 سال سے نجی اخبار سے منسلک ہوں۔
انہوں نے سوال کیا کہ نگراں جج نے نیب ریفرنسز تیار کرائے یہ دانیال عزیز نے کہا؟ جس پر گواہ ساجد حسین نے جواب دیا کہ پریس کانفرنس میں دانیال عزیز کی اس بات میں اخذ کیا تھا۔
ایڈیشنل اٹارنی جنرل نے کہا کہ عدالت سے درخواست کروں گا کہ وکیل صفائی کی شہادت ایک بارہی آ جائے۔
بعدازاں سپریم کورٹ نے وفاقی وزیردانیال عزیز کے خلاف توہین عدالت کیس کی سماعت 16 اپریل تک ملتوی کردی۔
توہین عدالت کیس: دانیال عزیز پر فرد جرم عائد کردی گئی
خیال رہے کہ 13 مارچ کو توہین عدالت کیس میں سپریم کورٹ آف پاکستان نے آئین کے آرٹیکل دو سو چار کے تحت وفاقی وزیر برائے نجکاری دانیال عزیز پر فرد جرم عائد کی تھی۔
جسٹس مشیرعالم نے فرد جرم کی چارج شیٹ پڑھ کر سنائی تھی جس کے مطابق دانیال عزیز نے جج کی تضحیک اورعدالت کی توہین کی۔ انہوں نے آٹھ ستمبر کو کہا تھا کہ نگران جج نے نیب لاہور کو طلب کرکے تیار کیا۔
وفاقی وزیرنے کہا تھا کہ جہانگیر ترین کو سزا دے کر عمران خان کو بچایا گیا تھا یہ سب اسکرپٹ کے مطابق کیا گیا تھا جبکہ 31 دسمبر کو دانیال عزیز نے کہا تھا کہ جج کو بتانا ہوگا کیپٹل ایف زیڈای کی بات ان تک کیسے پہنچی، جے آئی ٹی کو ایف زیڈ ای سے متعلق تحقیقات کا کہا گیا تھا۔
اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر ضرور شیئر کریں۔
اسلام آباد: نجکاری کے وفاقی وزیر دانیال عزیز نے کہا ہے کہ نجکاری کے معاملے پر قیاس آرائیاں مناسب نہیں. یہ معاملہ حکومت کے لیے مسئلہ بنا ہوا ہے، جسے فوری حل کرنا ہوگا۔
دانیال عزیز کا کہنا تھا کہ پی آئی اے پر حکومت کے یومیہ 15 کروڑ روپے ضایع ہورہے ہیں، دوسری جانب اسٹیل مل جیسی بند کارپوریشن کے لئے تنخواہیں دی جارہی ہیں، جو ملکی خزانہ پر بوجھ ہیں۔
[bs-quote quote=” اسٹیل مل خریدنے والا ملازمین کو تنخواہیں اور مراعات دے گا، یوں نجکاری سے اسٹیل مل ملازمین کی تنخواہیں حکومت کے سر سےاتر جائیں گی” style=”style-2″ align=”left” author_name=”دانیال عزیز” author_job=”وفاقی وزیر نجکاری” author_avatar=”https://arynewsudweb.wpengine.com/wp-content/uploads/2018/03/Daniyal60x60.jpg”][/bs-quote]
ن لیگ کے مرکزی رہنما کا کہنا تھا کہ ہم ملازمین کی تنخواہوں کی مد میں سالانہ 300 ملین ڈالر ادا کر رہے ہیں. ہمارے مخالفین ڈالرمہنگا ہونے کا شورمچا رہے ہیں، درحقیقت اسٹیل مل سے متعلق بروقت فیصلہ نہ کرنے سے ڈالر مزید مہنگا ہو جائے گا۔
انھوں نے کہا کہ اسٹیل مل خریدنے والا ملازمین کو تنخواہیں اور مراعات دے گا، یوں نجکاری سے اسٹیل مل ملازمین کی تنخواہیں حکومت کے سر سےاتر جائیں گی. اسٹیل مل کی نجکاری سے حکومتی واجبات کم ہوجائیں گے.
وزیرنجکاری دانیال عزیز کا کہنا تھا کہ یہ تصور کہ نجکاری سے یہ ہو جائے، وہ ہوجائے گا، درست نہیں، اسٹیل مل کی نجکاری سے سندھ سدرن گیس کمپنی کا بل ادا ہوگا اور نیشنل بینک کا قرضہ بھی ادا ہو جائے گا. یہ ملکی معشیت کے لیے ایک سود مند فیصلہ ہے.
یاد رہے کہ گذشتہ چند ماہ سے حکومت کی جانب سے اسٹیل مل کی نجکاری کی حمایت میں بیانات دیے جارہے ہیں. کچھ روز قبل مشیر خزانہ مفتاح اسماعیل نے کہا تھا کہ اگر کوئی پارٹی پی آئی اے اور اسٹیل مل کے واجبات ادا کرنے کی یقین دلائی کروائے، تو ایک ڈالر میں حکومت یہ ادارے فروخت کر دے گی.
حکومتی موقف اور اقدامات پر اپوزیشن کی جانب سے سخت ردعمل سامنے آیا. سابق چیئرمین سینیٹ رضا ربانی نے اپنے ایک حالیہ بیان میں کہا تھا کہ پیپلزپارٹی ایسے کسی بھی اقدام کی بھرپور مخالفت کرے گی.
خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔