لاہور: مسلم لیگ ن کے رہنما خواجہ حسان کے بطور چیئرمین یوسی منتخب ہونے کے خلاف دائر درخواست لاہور ہائیکورٹ نے مسترد کردی ۔
تفصیلات کے مطابق لاہور ہائی کورٹ میں ایک شہری مسعود عزیز نے خواجہ حسان کی نااہلی کیلئے درخواست دائر کی تھی جس میں خواجہ حسان کے کاغذات نامزدگی کو چیلنج کیا گیا تھا۔
جسٹس شاہد کریم نے دائر درخواست کی سماعت کی ۔درخواست گزار کی جانب سےعدالت کو بتایا گیا کہ خواجہ حسان چیئرمین لاہور ٹرانسپورٹ کمپنی اور وائس چیئرمین ایل ڈی اے کے طور پر کام کرتے رہے ہیں۔
چیئرمین یوسی منتخب ہونے سے چند روز قبل ہی انھوں نے عہدہ چھوڑا جبکہ قانون کے مطابق سرکاری عہدے کے بعد دو سال تک الیکشن میں حصہ نہیں لیا جاسکتا مگر اس کے باوجود خواجہ حسان بلامقابلہ چیئرمین یوسی ایک سو سات منتخب ہوئے۔
عدالت نے درخواست مسترد کرتے ہوئے کہا کہ درخواست گزار نےریٹرننگ افسر کے سامنے اعتراضات نہیں اٹھائے لہذا درخواست ناقابل سماعت ہے۔
جسٹس کریم نے درخواست پر چند روز پہلے فیصلہ محفوظ کیا تھا جو کہ آج سنا دیا گیا ہے۔
