ڈسکہ : باپ نے بیٹی کے دوست اور رکشہ ڈرائیور کو قتل کردیا، ملزم نے واردات کو ڈکیتی کا رنگ دینے کی ناکام کوشش کی۔
اے آر وائی نیوز ڈسکہ کے نمائندے رانا غلام مصطفیٰ کی رپورٹ کے مطابق ڈسکہ کے نواحی علاقے رحمت پورہ میں دہرے قتل کا واقعہ پیش آیا ہے جس میں باپ نے اپنی بیٹی کے دوست اور ایک رکشہ ڈرائیور کو گولیاں مار کر قتل کردیا۔
رپورٹ کے مطابق رحمت پورہ کی رہائشی صبا جو ایک بیوٹی پارلر چلاتی تھی اس کی دوستی طلحہ نامی نوجوان سے ہوگئی جس کا لڑکی کے والد کو علم ہوگیا۔
بعد ازاں باپ نے بیٹی کے دوست طلحہ کو بیٹی سے فون کروا کر گھر بلایا تو وہ نوجوان ایک رکشہ میں بیٹھ کر ملنے آیا، رکشہ ڈرائیور محض ملزم کی بیٹی کے دوست کو چھوڑنے آیا تھا۔
جیسے ہی رکشہ رکا تو ملزم نے دونوں پر فائرنگ کردی جس کے نتیجے میں دونوں موقع پر ہی دم توڑ گئے۔
واردات کے بعد ملزم نے واقعہ کو ڈکیتی کارنگ دینے کیلئے خود پولیس کو فون کیا، تاہم ابتدائی تفتیش میں ہی اس نے سچ اگل کر اعتراف جرم کرلیا۔
ڈسکہ پولیس نے دونوں باپ بیٹی کو حراست میں لے کر ان کے خلاف مقدمہ درج کرلیا، مقتولین کی لاشیں پوسٹ مارٹم کے بعد ورثاء کے حوالے کردی گئیں، مزید قانونی کارروائی جاری ہے۔
https://urdu.arynews.tv/karachi-father-shoots-his-daughter-and-her-friend-in-malir/
