کراچی : پاکستان شوبز کی اداکارہ عائشہ طور نے کہا ہے کہ خواتین سے اکثر سب سے پہلا سوال یہی کیا جاتا ہے کہ کیا آپ کی شادی ہوگئی؟ جو کہ نامناسب بات ہے۔
اے آر وائی ڈیجیٹل کے پروگرام گڈ مارننگ پاکستان میں شریک اداکارہ عائشہ طور نے اس حوالے سے اپنبے خیالات کا اظہار کیا اور معاشرے میں ہونے والے واقعات پر روشنی ڈالی۔
پروگرام کی میزبان ندا یاسر نے بتایا کہ ہمارا آج کا موضوع ہے کہ لڑکیاں بوجھ نہیں ہیں، اسی سلسلے میں انہوں نے اداکارہ عائشہ طور سے ان کے خیالات جاننے کی کوشش کی۔
عائشہ طور نے کہا کہ جن لوگوں کو لڑکیاں بوجھ لگتی ہیں تو وہ مت پیدا کریں، کیونکہ لڑکیاں اگر بوجھ ہیں تو آپ خود لڑکوں پر بوجھ ڈالتے ہیں، کسی نے آپ سے زبردستی تو نہیں کی کہ دس بچے پیدا کریں۔ اس کا مطلب یہ ہوا کہ آپ بچے سنبھال ہی نہیں سکتے۔
ان کا مزید کہنا تھا کہ ہمارے دوستوں میں بھی آپس کی گفتگو میں خواتین سے یہی سوال دہرایا جاتا ہے کہ کیا آپ کی شادی ہوگئی اگر ہوگئی تو کتنے بچے ہیں؟ وغیرہ وغیرہ، تو اسی بات کو لے کر ہم بھی یہی سوچنے پر مجبور ہوجاتے ہیں کہ شاید میری عمر زیادہ ہوگئی یا میرا رنگ کالا ہوگیا۔
یاد رکھیں کہ بیٹیاں اگر پڑھی لکھی اور باشعور ہوں گی تو ان میں خوداعتمادی پیدا ہوگی جس سے ان میں زمانے کے نشیب و فراز سے نمٹنے اور رشتوں میں پیدا ہونے والی اونچ نیچ یا الجھنوں کو سلجھانے کی صلاحیت پیدا ہوگی۔
