Tag: David Gower

لندن : کرکٹ کے دو مایہ ناز کمنٹٹرزآئیان بوتھم اور ڈیوڈ گوور نے بیس سال بعد ریٹائرمنٹ کا اعلان کردیا، دونوں شخصیات نے 1970ء کی دہائی میں بطور کرکٹر اپنے کیریئر کا آغاز کیا تھا۔

تفصیلات کے مطابق دنیائے کرکٹ کے دو معروف ترین کمنٹیٹرز نے ریٹائرمنٹ کا اعلان کر دیا، غیر ملکی خبر رساں ایجنسی کے مطابق یہ کمنٹیٹرز سر آئیان بوتھم اور ڈیوڈ گوور ہیں جنہوں نے اسکائی ٹی وی کرکٹ کمنٹری کے بیس سالہ شاندار کیریئر کو گزشتہ روز خیرباد کہ دیا۔

سر آئیان بوتھم نے ریٹائرمنٹ کا اعلان کرتے ہوئے کہا کہ ”بس اتنا ہی، میں چلتا ہوں۔“ان کے ساتھ سابق برطانوی آل راﺅنڈر اور طویل عرصے تک اسکائی ٹی وی پر کمنٹری کرنے والے ڈیوڈ گوور نے بھی اسی وقت ریٹائرمنٹ کا اعلان کیا۔

واضح رہے کہ دونوں شخصیات نے1970ءکی دہائی میں بطور کرکٹر اپنے کیریئر کا آغاز کیا تھا اور کرکٹ سے ریٹائرمنٹ کے بعد طویل عرصے تک کمنٹیٹر کے طور پر دنیائے کرکٹ سے وابستہ رہے۔

سر آئیان بوتھم اور ڈیوڈ گوور نے اپنی ریٹائرمنٹ کی وجہ بتاتے ہوئے کہا کہ اسکائی ٹی وی نے ان کے ساتھ کنٹریکٹ کی تجدید کرنے سے انکار کر دیا تھا جس پر انہوں نے ریٹائرہونے کا فیصلہ کیا۔