ARYNews.tv | Urdu – Har Lamha Bakhabar

Tag: Day of Martyrdom

  • میجر طفیل محمد شہید کا 66 واں یوم شہادت، عسکری قیادت کا خراج عقیدت

    میجر طفیل محمد شہید کا 66 واں یوم شہادت، عسکری قیادت کا خراج عقیدت

    لاہور : لکشمی پور مشرقی پاکستان میں دشمنوں کو ناکوں چنے چبوانے والے میجر طفیل محمد شہید نشان حیدر کے 66 ویں یوم شہادت کے موقع پر عسکری قیادت کی جانب سے خراج عقیدت پیش کیا گیا ہے۔

    پاک فوج کے شعبہ تعلقات عامہ ’آئی ایس پی آر‘ کے مطابق مسلح افواج، چیئرمین جوائنٹ چیفس آف اسٹاف کمیٹی، سروسز چیفس نے خراج عقیدت پیش کرتے ہوئے خصوصی پیغام جاری کیا ہے۔

    عسکری قیادت کا کہنا ہے کہ میجر طفیل محمد نشان حیدر کا اعزاز حاصل کرنے والے پاکستان کے دوسرے سپوت تھے۔ انہوں نے1958میں مشرقی پاکستان کے لکشمی پور سیکٹر میں دشمن کا بےخوف ہوکر مقابلہ کیا۔

    دشمن کو کاری ضرب لگاتے ہوئےاپنی جان کانذرانہ پیش کرکے عظیم الشان داستان شجاعت رقم کی، انہوں نے شدید زخمی ہونے کے باوجود غیر متزلزل عزم کی مثال قائم کرتے ہوئے اپنا مشن مکمل کیا۔

    آئی ایس پی آر کے مطابق میجر طفیل محمد شہید کا یوم شہادت افواج پاکستان کی غیرمعمولی قربانیوں، بےلوث لگن کی یاد دلاتا ہے۔

    عسکری قیادت کا کہنا ہے کہ دھرتی کے ان بہادر بیٹوں کو بھرہور خراج تحسین پیش کرتے ہیں، ان بہادر بیٹوں نے قوم کی خودمختاری، علاقائی سالمیت کے تحفظ کیلئے لازوال قربانیاں دیں۔

  • بینظیر شہید کی عظیم قربانی رائیگاں نہیں جانے دیں گے، آصف زرداری

    بینظیر شہید کی عظیم قربانی رائیگاں نہیں جانے دیں گے، آصف زرداری

    لاڑکانہ : پیپلزپارٹی کے شریک چیئرمین آصف علی زرداری نے کہا ہے کہ محترمہ بینظیر بھٹو شہید کے ہر خواب کی تعبیر کریں گے۔

    بینظیر بھٹو شہید کے یوم شہادت کے موقع پراپنے جاری بیان میں آصف زرداری نے کہا کہ عوام کومعاشی مشکلات سےنجات کیلئےجدوجہدجاری رکھیں گے۔

    انہوں نے کہا کہ یہ پاک وطن ہمارے لیے اپنی جانوں سے زیادہ عزیز ہے ملک کی آزادی، وقار خودداری اور عزت پر ہرگز سمجھوتہ نہیں کریں گے۔

    آصف زرداری کا کہنا تھا کہ اس وقت ملک خطر ناک صورت حال سے گزر رہا ہے،معیشت تباہ ہوگئی ہے، خارجہ امور زبوں حالی کے شکار ہیں، قانون کو موم بنا دیا گیا ہے۔

    سابق صدر نے کہا کہ غریب مشکلات کا شکار اور ریاست ثمرات سے محروم کیے جارہے ہیں، 2013کے بعد مسلسل پارلیمنٹ کے اختیار پر حملے ہو رہے ہیں۔

    پی پی رہنما کے کہا کہ پارلیمنٹ کی عزت اور وقار کو بے توقیر کیا جا رہا ہے، پیپلزپارٹی پارلیمنٹ کی بے توقیری کی مزاحمت کر رہی ہے۔

    آصف زرداری نے کہا کہ پیپلزپارٹی کی قیادت نے تباہ حال ملک کی دوبارہ تعمیر کی، پی پی نے ملک بچایا اب ملک کو مشکلات سے نکالے گی۔

    ان کا مزید کہنا تھا کہ صبر اور برداشت ہماری کمزوری نہیں ہے ہمارا اصول ہے، بینظیر بھٹو شہید کی عظیم قربانی رائیگاں نہیں جانےدیں گے۔

  • کراچی : شہید راشد منہاس کا 48 واں یوم شہادت آج منایا جا رہا ہے

    کراچی : شہید راشد منہاس کا 48 واں یوم شہادت آج منایا جا رہا ہے

    کراچی : نشان حیدر کا اعزاز حاصل کرنے والے پاک فضائیہ کے پائلٹ آفیسر راشد منہاس کا 48 واں یوم شہادت آ ج بھر پورانداز میں منایا جا رہا ہے۔

    پاک فضائیہ کے آفیسر پائلٹ راشد منہاس 17 فروری 1951 کو کراچی میں پیدا ہوئے، انہوں نے جامعہ کراچی سے ملٹری ہسٹری اینڈ ایوی ایشن ہسٹری میں ماسٹرز کیا۔

    انہوں نے 13 مارچ 1971 کو پاک فضائیہ میں بطور کمیشنڈ جی ڈی پائلٹ شمولیت اختیار کی۔ راشد منہاس شہید ابتدا ہی سے ایوی ایشن کی تاریخ اور ٹیکنالوجی سے متاثر تھے، ان کو مختلف طیاروں اور جنگی جہازوں کے ماڈلز جمع کرنے کا بھی شوق تھا۔

    راشد منہاس اگست 1971ء کو پائلٹ آفیسر بنے، 20 اگست 1971 کوان کی تربیتی پرواز میں فلائٹ لیفٹنینٹ مطیع الرحمان بھی ان کے ساتھ سوار ہوا، مطیع نے اپنے مذموم مقاصد کے لیے نوجوان پائلٹ پرضرب لگائی اور طیارے کا رخ ہندوستان کی جانب موڑ لیا۔

    راشد منہاس نے وطن پر جان قربان کرتے ہوئےدشمن کی اس سازش کو ناکام بناتے ہوئے جہاز کا رخ زمین کی جانب موڑ دیا اور اس دشمن کے عزائم کو خاک میں ملاتے ہوئے جام شہادت نوش کیا۔

    راشد منہاس شہید نے اپنی جان قربان کرکے ملک کے دفاع اور حرمت کی لاج رکھ لی۔ان کی بے مثال قربانی پر حکومت پاکستان نے انھیں اعلیٰ ترین فوجی اعزاز نشانِ حیدر سے نوازا گیا۔

    اٹک میں قائم کامرہ ایئر بیس کو راشد منہاس شہید کے نام سے منسوب کیا گیا، قوم کوعظیم سپوت کی قربانی اور کارنامے پر ہمیشہ فخر رہے گا۔

    پاکستان میں نشانِ حیدر پانے والے سب سے کم عمر شہید راشد منہاس کراچی کے فوجی قبرستان میں آسودہٗ خاک ہیں۔

  • حضرت علی کرم اللہ وجہہ کا یوم شہادت آج عقیدت و احترام سے منایا جائے گا

    حضرت علی کرم اللہ وجہہ کا یوم شہادت آج عقیدت و احترام سے منایا جائے گا

    کراچی : رمضان کی اکیس تاریخ پیعمبر ِاسلام حضرت محمدؐ کے چچا زاد بھائی اور عالم اسلام کے خلیفۂ راشد حضرت علی کرم اللہ وجہہ کی شہادت سے منسوب ہے اوران کی یاد میں ملک بھر میں جلوس و مجالس ِ عزا اور کانفرنسز کا انعقاد کیا جاتا ہے۔

    آج ملک بھر میں شہادت ِ حضرت علی کرم اللہ وجہہ کے لئے منعقد ہونے والی مجالس ِ عزا اور جلوسوں کی سیکیورٹی کے لئے انتہائی سخت انتظامات کئے گئے ہیں، کراچی سمیت ملک کے کئی بڑے شہروں میں ڈبل سواری پر پابندی عائد کی گئی ہے جبکہ مرکزی شہروں میں حکومت نے موبائل آپریٹرز کو کسی بھی وقت سروس منقطع کرنے کے لئے تیار رہنے کا حکم دیا ہے۔ماتمی جلوسوں کی گزرگاہوں کو کنٹینر لگا کر بند کیا گیا ہے اور اس کے بعد بم ڈسپوزل اسکواڈ نے بھی گزرگاہوں کی تلاشی لی ہے۔

    کراچی کا مرکزی جلوس نشتر پارک نمائش سے برآمد ہوگا مجلس سے خاورامام بارگاہ حسینیہ ایرانیان پر اختتام پذیرہوگا اس موقع پر شہر بھر میں سولہ ہزار سیکیورٹی اہلکار تعینات کئے گئے ہیں۔

    لاہور شہر کا مرکزی جلوس نثار حویلی سے برآمد ہوگا جلوس کی حفاظت کے لئے اندرون شہر آنے والے راستوں پر ناکے بھی قائم کئے گئے ہیں اور کل دس ہزار اہلکار اس موقع پر سیکیورٹی کے فرائض انجام دیں گے۔

    حضرت علی کرم اللہ وجہہ کو 19 رمضان سن چالیس ہجری میں عبدالرحمن ابن ملجم نامی ایک خارجی نے مسجدِ کوفہ میں زہر بجھی تلوار سے اس وقت قتل کیا کہ جب آپ روزے سے تھے اور حالت ِ نماز میں تھے، تین دن زہر کے زیر اثر رہنے کے بعد اکیس رمضان کو آپ کی شہادت ہوئی۔

    یوم علی پر ملک بھر میں سیکیورٹی کے سخت انتظامات

    یوم علی کے موقع پر ملک بھر میں سیکیورٹی انتہائی سخت کردی گئی ہے، امن وامان برقرار رکھنے کے لئے فول پروف سیکیورٹی کے انتظامات کئے جارہے ہیں، کئی شہروں ٕمیں ڈبل سواری پر پابندی عائد کردی گئی ہے جبکہ بڑے شہروں میں موبائل فون سروس بند رہنے کا بھی امکان ہے۔