نائیجیریا میں موسلادھار بارشوں اور سیلاب کی تباہ کاریاں جاری، مکانات تباہ، مختلف حادثات میں 100 سے زائد افراد لقمہ اجل بن گئے۔
بین الاقوامی خبر رساں ادارے کی رپورٹ کے مطابق وسطی نائیجیریا کے مختلف علاقوں میں شدید بارشوں کے بعد سیلاب نے نظام زندگی درہم برہم کردی اور کم از کم 115 افراد ہلاک ہوگئے جبکہ یہ تعداد مزید بڑھنے کا خدشہ ہے۔
سیلاب بدھ کی رات سے جمعرات کی صبح تک ہونے والی موسلادھار بارشوں کے سبب آیا، جس نے ریاست نائیجر کے کنارے واقع شہر موکوا اور آس پاس کے علاقے شدید متاثر ہوئے۔
نائیجر اسٹیٹ ایمرجنسی مینجمنٹ ایجنسی کے ترجمان کا کہنا تھا کہ اب تک 115 لاشیں نکالی جا چکی ہیں جبکہ کئی افراد تاحال لاپتہ ہیں،مزید لاشیں ملنے کا امکان ہے کیونکہ کافی افراد دریا کی نذر ہوچکے ہیں۔
ترجمان کے مطابق مرنے والوں کی کچھ لاشیں تباہ شدہ گھروں کے ملبے سے نکالی گئیں، امدادی ٹیموں کی جانب سے ریسکیو آپریشن جاری ہے۔
رپورٹس کے مطابق مقامی رہائشی بھی ملبے میں اپنے پیاروں کو ڈھونڈتے نظر آئے جبکہ سیلابی پانی اب بھی کئی علاقوں میں موجود ہے۔
اس سے قبل بھارت کے شہر ممبئی میں مون سون کے طوفانی اسپیل نے تباہی مچا دی، 107 سال کا ریکارڈ ٹوٹ گیا، قبل از وقت بارشوں سے ممبئی میں نظام زندگی درہم برہم ہوگیا۔
بھارتی میڈیا رپورٹ کے مطابق 135ملی میٹر کی برسات نے میٹرو لائن کا حشرنشر کردیا، بارش کا پانی میٹرو اسٹیشن میں بھی داخل ہوگیا جس کے باعث ٹرین سروس روک دی گئی، وزیراعظم مودی نے اس کا17 دن پہلے ہی افتتاح کیا تھا۔
شدید بارشوں سے دیگر ریلوے ٹریک بھی تالاب بن گئے، سڑکوں پر سیلاب آگیا، شہریوں کی جان پر بن آئی، نظام زندگی درہم برہم ہوکر رہ گیا۔۔ محکمہ موسمیات نے مزید بارشوں کی پیش گوئی کی ہے۔
ماحولیاتی تبدیلی سے 4 ارب لوگوں کیلیے شدید گرمی کا ایک مہینہ بڑھ گیا
بھارت کے محکمہ موسمیات نے ممبئی کے لیے ’یلو الرٹ‘ جاری کیا ہے، جس میں بادل چھائے رہنے، گرج چمک، بجلی گرنے اور 40 سے 50 کلومیٹر فی گھنٹہ کی رفتار سے تیز ہواؤں کی پیش گوئی کی گئی ہے۔ آئندہ 4 گھنٹوں میں ممبئی، تھانے، رائے گڑھ، سندھو درگ، رتناگری، ستارا، کولہا پور اور ناسک میں شدید بارش متوقع ہے۔