کراچی: سائبر کرائم سرکل کراچی نے بینک نمائندہ بن کر صارفین کے ڈیبٹ کارڈ کی تفصیلات حاصل کرنے والا کال سینٹر عملہ گرفتار کر لیا۔
سائبر کرائم سرکل کراچی نے غیر قانونی سرگرمیوں میں ملوث جنریشن 96 نامی کال سینٹر پر چھاپا مار کر کراچی کے علاقے گلشن اقبال سے 3 ملزمان کو گرفتار کر لیا۔
گرفتار ملزمان میں عبدالحمید، شاہان افضل اور نعمان علی شامل ہیں، جو خود کو بینک نمائندہ ظاہر کر کے جدید ترین ٹیکنالوجی کا استعمال کرتے ہوئے جعلی کال کرتے تھے، اور اس طرح صارفین کے ڈیبٹ کارڈ کی تفصیلات حاصل کر کے اس کا غلط استعمال کرتے تھے۔
ملزمان جعل سازی سے حاصل کردہ ڈیبٹ کارڈز کو ہوائی ٹکٹ خریدنے اور ہوٹل کی بکنگ کے لیے استعمال کرتے تھے، انھوں نے مذکورہ کارڈز سے مقامی اور بین الاقوامی طلبہ کے لیے داخلہ فیس بھی ادا کی، اور جائیداد کی خریداری سمیت مختلف لین دین کے لیے بھی ڈیبٹ کارڈز کا استعمال کیا۔
ملزمان دھوکا دہی سے گاہکوں کو مختلف مصنوعات کی خریداری پر آمادہ کرتے تھے، جعلی ویب سائٹس بھی بنا رکھی تھیں، اور پیسے وصول ہونے کے باوجود پراڈکٹ ڈیلیور نہیں کی جاتیں تھیں۔
ترجمان ایف آئی اے کے مطابق ملزمان کو گرفتار کر کے ان سے تفتیش کا آغاز کر دیا گیا ہے، جب کہ دیگر ملزمان کی گرفتاری کے لیے چھاپے مارے جا رہے ہیں۔
