نئی دہلی: تنازعوں اور تلخ و شیریں اونچ نیچ سے بھرپور زندگی گزارنے والے بھارتی اداکار سنجے دت کا کہنا ہے کہ جب انہیں اپنے کینسر کا علم ہوا تو وہ مرنے کی خواہش کرنے لگے تھے۔
بھارتی اداکار سنجے دت نے انکشاف کیا ہے کہ وہ کینسر کے علاج کے بجائے موت کو گلے لگانا چاہتے تھے۔
سنہ 2020 میں فلم شمشیرا کی شوٹنگ کے دوران اداکار میں پھیپھڑوں کے کینسر کی تشخیص ہوئی تھی لیکن چند ماہ بعد ہی انہوں نے علاج کے ذریعے کینسر کو شکست دے دی تھی۔
حال ہی میں دیے گئے ایک انٹرویو میں سنجے دت نے بتایا کہ جب انہیں پہلی مرتبہ معلوم ہوا کہ انہیں کینسر ہے تو کیمو تھراپی کے بجائے انہوں نے مرنے کو ترجیح دی تھی۔
انہوں نے بتایا کہ جس وقت مجھے کینسر کی خبر دی گئی میرے پاس میری بیوی، میری فیملی اور میری بہنوں میں سے کوئی نہیں تھا، میں اکیلا تھا کہ مجھے ایک لڑکے نے آ کر کینسر کی خبر دی۔
اداکار نے بتایا کہ میری والدہ اور میری اہلیہ کا انتقال کینسر سے ہوا تھا اس لیے جب مجھے کینسر کا پتہ چلا تو میں نے فیصلہ کیا کہ مرجاؤں گا لیکن کیمو تھراپی نہیں کرواؤں گا۔
تاہم اداکار نے اپنی اہلیہ منیاتا دتہ کے حوصلہ دینے پر اپنا علاج شروع کروایا اور اکتوبر 2020 میں انہوں نے اعلان کیا کہ وہ کینسر سے نجات حاصل کرچکے ہیں۔
