پشاور : خیبر پختونخوا پولیس کے بارودی مواد سونگھنے والے دو سراغ رساں کتے اپنی ملازمت کے 8 سال پورے کرنے کے بعد ریٹائر ہوگئے۔
یہ سنِفر ڈاگز ’ڈیپ اور کین‘پولیس کے سرچ اینڈ اسٹرائیک آپریشنز میں شامل ہوتے تھے، پولیس کا مؤثر ہتھیار کہلانے والے ڈیٹکیٹو ڈاگز کی مزید آپریشنز میں خدمات حاصل نہیں کی جائیں گی۔ ،
اے آر وائی نیوز پشاور کی رپورٹ کے مطابق ان دونوں سراغ رساں کتوں ’ڈیپ اور کین‘ نے دہشت گردی کیخلاف جنگ میں اہم کردار ادا کیا ہے۔ سال 2016 میں پیدا ہونے والے یہ کتے 8 سال تک ’کے نائن یونٹ‘ کا حصہ رہے۔،
اس حوالے سے کے نائن یونٹ کے ڈائریکٹر عدیل ابدال نے اے آر وائی نیوز کو بتایا کہ اس وقت پولیس کے پاس مجموعی طور پر 39 کتے ہیں، ریٹائر ہونے والے ان کتوں کی طبعی عمر تقریباً 10 سال ہے اور 8سال کے بعد ان کی سونگھنے کی صلاحیت متاثر ہونا شروع ہوجاتی ہے اس لیے انہیں 8 سال بعد ریٹائر کردیا جاتا ہے۔
بارودی مواد کی کھوج لگانے کے ماہر ڈیپ اور کین نے سال2021 میں ڈی آئی خان میں 5 اور سال 2022 میں پشاور میں 2 کلو ایل ڈیز بموں کا سراغ لگایا۔
اس کے علاوہ سیاسی سرگرمیوں اور وی آئی پی موومنٹ اور حساس مقامات کی تلاشی میں بھی ان دونوں کتوں نے کامیابی سے اپنی خدمات انجام دیں۔
ریٹائرمنٹ کے بعد ان دونوں ہیروز کو پشاور پولیس کے ’کے نائن یونٹ‘ میں ہی رکھا جائے گا جہاں ان کو تمام تر مطلوبہ سہولیات فراہم کی جائیں گی۔