Tag: Deepika Padukone

ممبئی: بالی ووڈ اداکارہ دپیکا پڈوکون نے رواں برس ساتھی اداکار رنویر سنگھ سے شادی کرنے سے متعلق خاموشی توڑتے ہوئے ناقدین کو کرارا جواب دے دیا۔

تفصیلات کے مطابق بھارتی ذرائع ابلاغ میں یہ بات زیر گردش ہے کہ پدمنی کی رانی اور بادشاہ علاؤ الدین خلجی رواں برس شادی کرنے کا ارادہ رکھتے ہیں جس پر دونوں خاندان راضی ہیں اور شادی کی رسم کے لیے جگہ کے انتخاب اور خریداری کا سلسلہ  بھی جاری ہے۔

بھارتی میڈیا کے ذرائع کا دعویٰ ہے کہ ’دونوں اداکار بیرونِ ملک میں کسی مقام پر مذہبی رسم کے بعد نئی زندگی کا آغاز کریں گے، اس تقریب میں صرف خاندان کے قریبی لوگ اور اہم دوستوں کو شرکت کی دعوت دی جائے گی‘۔ میڈیا ذرائع کا کہنا یہ بھی ہے کہ ’ازدواجی بندھن میں بندھنے کے بعد دپیکا اور رنویر وطن واپس لوٹیں گے اور پھر ساتھی فنکاروں یا دیگر افراد کے لیے شاندار تقریب منعقد کریں گے‘۔

اداکارہ کا حالیہ ردعمل

دپیکا پڈوکون نے گذشتہ روز بھارتی میڈیا کو انٹرویو دیتے ہوئے رنویر سنگھ کے ساتھ شادی کی افواہوں پر حیرانی کا اظہار کیا اور تمام خبروں کو بے بنیاد قرار دیا،  ڈمپل گرل کا کہنا تھا کہ ’میرے لیے رنویر بہت اچھا اور قابلِ بھروسہ دوست ہے، ہم اکثر مختلف موضوعات پر بات کرتے ہیں جس میں ہمیشہ اتفاق نہیں ہوتا اور یہی ہمارے رشتے کا حسن ہے‘۔

مزید پڑھیں: دپیکا کا جیون ساتھی کون سا بالی ووڈ اداکار ہے؟

بالی ووڈ اداکارہ سے جب دوستی کے حوالے سے سوال کیا گیا تو ان کا کہنا تھا کہ جو لوگ رنویر کے ساتھ میرا کوئی اور رشتہ جوڑتے ہیں اُن کو کھلا چلینج کرتی ہوں کہ آئیں اور سامنے آکر کوئی الزام لگائیں تاکہ انہیں جواب مل سکے‘۔

شادی سے متعلق سوال پر دپیکا نے اظہار برہمی کرتے ہوئے کہا کہ ’اگر ایسا کوئی ارادہ ہوا یا شادی کا فیصلہ کیا تو آپ سب کے علم میں ضرور آئے گا مگر فی الحال ایسا کوئی ارادہ نہیں ہے‘۔

دوسری جانب اداکار رنویر سنگھ نے بھی شادی سے متعلق خبروں کی تردید کرتے ہوئے کہا ہے کہ رواں سال تو ازدواجی بندھن میں بندھنے کا کوئی ارادہ نہیں البتہ مستقبل کے بارے میں بھی کچھ نہیں کہہ سکتا۔

اس سے قبل بالی ووڈ اداکار رنویر سنگھ نے گزشتہ دنوں نجی ٹی وی چینل کے ایک شو میں شرکت کی اور مختلف سوالات کے جواب دیے، اس دوران اینکر نے اُن سے دپیکا سے تعلقات کے بارے اور شادی سے متعلق اچانک سوال  کیا تھا۔

یہ بھی پڑھیں: دپیکا سے تعلقات، رنویر سنگھ نے خاموشی توڑ دی

سوال سُن کر پدماوت کے علاؤ الدین خلجی مسکرائے اور شادی سے متعلق خبر کی تصدیق یا تردید نہیں کی البتہ تعلقات کے حوالے سے اُن کا کہنا تھا کہ ’ہم نے جتنی بھی فلمیں ساتھ کیں دپیکا نے میری بہت مدد کی، حتیٰ کہ انہوں نے میری اس قدر رہنمائی فرمائی کہ اُن کی وجہ سے میری زندگی پرسکون ہوگئی‘۔

شادی کا سوال دوبارہ پوچھنے پر رنویر سنگھ کا کہنا تھا کہ  اس میں کوئی شک نہیں کہ ہم عرصہ دراز سے ایک دوسرے کے بہت اچھے دوست ہیں، میرے نزدیک دپیکا بہت اچھی شخصیت کی حامل اداکارہ ہیں جن کی جتنی تعریف بھی کی جائے وہ کم ہے۔

واضح رہے کہ بھارتی میڈیا نے رواں سال کے آغاز پر انوشکا اور ویرات کوہلی کی شادی کے بعد دعویٰ کیا تھا کہ ایک اور بالی ووڈ اداکارہ ساتھی فنکار کے ساتھ ازدواجی بندھن میں بندھنے جارہی ہیں۔

دپیکا اور رنویر سنگھ کی دوستی اور محبت کے چرچے میڈیا کی زینت بنتے آرہے ہیں بلکہ ایک بار تو یہ بھی دعویٰ سامنے آیا تھا کہ دونوں ایک دوسرے کی محبت میں گرفتار ہیں تاہم کچھ عرصے بعد دونوں کے تعلقات ختم ہونے کی خبریں بھی سامنے آئیں تھیں۔

اسے بھی پڑھیں: دپیکا اور رنویر کب شادی کریں گے؟ اہم دعویٰ سامنے آگیا

بھارتی میڈیا کے ذرائع نے رواں سال جنوری میں خبر کچھ اس طرح دی تھی کہ رنویر سنگھ اور دپیکا جلد سری لنکا کی اڑان بھریں گے جس کے بعد اُن کے اہل خانہ منگنی کی تقریب کے منعقد کرنے کے لیے جگہ کا انتخاب بھی کریں گے۔

خیال رہے کہ رنویر سنگھ اور دپیکا پڈوکون نے سنجے لیلا بھنسالی کی 2013 میں ریلیز ہونے والی فلم رام لیلا، باجی راؤ مستانی میں کام کیا تھا تاہم چار سال بعد دونوں ایک بار پھر سنجے لیلا بھنسالی کی فلم پدماوت میں مرکزی کردار ادا کرتے نظر آئے، دپیکا نے رانی پدمانی جبکہ رنویر نے بادشاہ علاؤالدین خلجی کا مشکل کردار ادا کیا تھا۔

خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں