راولپنڈی: پاک فوج کے شعبۂ تعلقاتِ عامہ کے ڈائریکٹر جنرل میجر جنرل آصف غفور نے کہا ہے کہ پاکستان کے لیے جان دینے والا ہر فرد قابلِ احترام ہے۔
ڈی جی آئی ایس پی آر میجر جنرل آصف غفور اے آر وائی نیوز سے خصوصی گفتگو کر رہے تھے، انھوں نے یومِ دفاع و شہدا کے سلسلے میں اے آر وائی کی خصوصی ٹرانسمیشن کی تعریف کی۔
میجر جنرل آصف غفور نے کہا ’میں چند گھنٹوں سے آپ کا پروگرام دیکھ رہا ہوں، میڈیا نے یومِ دفاع اور یومِ شہدا پر جو مہم چلائی ہے وہ قابلِ تعریف ہے۔‘
ڈی جی آئی ایس پی آر نے پروگرام میں گفتگو کرتے ہوئے کہا شہید تو شہید ہیں، پاکستان کے لیے جان دینے والا ہر فرد قابلِ احترام ہے، ہمیں اپنے شہدا کی قربانیوں کو یاد رکھنا ہے۔
انھوں نے مزید کہا ’آرمی چیف شہیدوں کے گھر جاتے ہیں، ان کا کسی شہید کے گھر جانا سب سے مشکل کام ہے، شہید کے گھر والوں کا دکھ بانٹنا سب سے مشکل مرحلہ ہوتا ہے۔‘
آصف غفور نے پروگرام میں کہا کہ شہدا کے اہلِ خانہ نے آج محسوس کیا ہوگا کہ ہم ان کے احسان مند ہیں، ملک کی بات آئے تو ہم سب ایک ہیں، مسلح افواج کی پہلی ترجیح امن قائم کرنا ہے۔
قوم آج یوم دفاع پاکستان ملی جوش وجذبے سے منارہی ہے
ڈی جی آئی ایس پی آر کا کہنا تھا کہ جس سے آپ کو پیار ہوتا ہے اس کی برائیاں اور کم زوریاں بھول جاتے ہیں، پاکستان سے پیار کریں اور متحد رہیں۔
انھوں نے کہا ’پاک فوج ہر مشکل کا مقابلہ کرنے کی صلاحیت رکھتی ہے، قوم اپنی فوج پر مکمل یقین رکھے، قوم یقین رکھے کہ کوئی ایسا خطرہ نہیں جس سے پاک فوج نمٹ نہیں سکتی۔‘
