ملک بھر میں آج یوم دفاع ملی جوش و جذبے سے منایا جا رہا ہے۔
تفصیلات کے مطابق آج شہدا اور بہادر سپوتوں کو خراج عقیدت پیش کرنے کا دن ہے، ملک بھر میں یوم دفاع ملی جوش و جذبے سے منایا جا رہا ہے۔
آج ہی کے دن 1965 میں پاک فوج کے بہادر جوانوں نے مکار دشمن کی تمام تر چالوں کو ناکام بنایا تھا، بزدل دشمنوں کو ارض پاک کی طرف میلی آنکھ سے دیکھنے پر سبق سکھایا۔
شجاعت، ایثار اور بہادری کی لازوال داستان رقم کرنے والوں کو قوم آج سلام پیش کرتی ہے، قوم آج مادر وطن کے دفاع کے لیے لہو کا آخری قطرہ بہانے والے شہدا کو خراج عقیدت پیش کرے گی۔
کراچی میں مزار قائد پر گارڈز کی تبدیلی کی پروقار تقریب منعقد کی گئی، پاک فضائیہ کے کیڈٹس نے مزار قائد پر اعزازی گارڈز کی ذمہ داری سنبھالی۔ علامہ اقبال کے مزار پر بھی گارڈز کی تبدیلی کی پروقار تقریب کا انعقاد ہوا، ڈی جی پنجاب رینجرز میجر جنرل سید آصف حسین نے مزار اقبال پر حاضری دی اور پھول چڑھائے۔
چھ ستمبر انیس سو پینسٹھ کے تاریخی دن کی مناسبت سے پاک فضائیہ کی جانب سے مختصر دستاویزی فلم جاری کی گئی ہے، جس میں پاک فضاؤں کے دفاع کے عظیم فریضے کو ادا کرنے والے شاہینوں کو خراجِ تحسین پیش کیا گیا۔
دستاویزی فلم میں چھ ستمبر کے دن لڑے جانے والے فضائی معرکے کا احوال بیان کیا گیا ہے۔
اسلام آباد : قومی ایئر لائن پی آئی اے نے یوم دفاع پر اندرون ملک پروازوں کے کرایوں میں کمی کااعلان کردیا ، یہ سہولت یکم ستمبر سے7ستمبر تک ہوگی۔
تفصیلات کے مطابق اندرون ملک سفر کرنے نے والے مسافروں کے لئے اچھی خبر آگئی ، یوم دفاع کے موقع پر پی آئی اے کااندرون ملک پروازوں کے کرایوں میں کمی کااعلان کردیا۔
پی آئی اے انتظامیہ کا کہنا ہے کہ اندرون ملک سفر کرنے کے لئے یکطرفہ کرایہ 5985مقررکردیاگیا ہے ، یہ سہولت یکم ستمبر سے7ستمبر تک ہوگی۔
یاد رہے پاکستان انٹرنیشنل ایئر لائن (پی آئی اے) نے جشن آزادی کے موقع پر خصوصی ڈسکاؤنٹ کا اعلان کیا تھا، جشن آزادی کے موقع پر اندرون ملک پروازوں پر 14 فیصد ڈسکاؤنٹ کی پیشکش کی گئی تھی۔
ترجمان پی آئی اے کا کہنا تھا کہ مذکورہ پیشکش 14 تا 16 اگست تک سفر کرنے پر محدود رہے گی، ٹکٹس فوری فروخت کے لیے دستیاب ہیں۔
اسلام آباد : پاک فضائیہ کے ڈی سی اے ایس آپریشنز ایئر مارشل حسیب پراچہ نے کہا ہے کہ27 فروری جیسے معرکے کی بھرپور تیاری کر رکھی تھی، اس سے کیا فرق پڑتا ہے کہ کسی کو ضرب میرے دائیں ہاتھ سے پڑے یا بائیں ہاتھ سے۔
یہ بات انہوں نے اسلام آباد میں یوم دفاع پاکستان کے حوالے سے منعقدہ تقریب سے خطاب کرتے ہوئے کہی۔ اس موقع پر انہوں نے26 اور27 فروری کو پیش آنے والے واقعات کے بارے میں تفصیلی گفتگو کی۔
ایئر مارشل حسیب پراچہ نے 27فروری کو پاک فضائیہ کی جانب سے ایف 16 طیارہ استعمال کیے جانے کے حوالے سے بھارت کو زبردست جواب دیا۔ ان کا کہنا تھا کہ بھارتی میڈیا کی جانب سے یہ دعویٰ کیا جاتا ہے کہ پاکستان نے ابھی نندن کا طیارہ گرانے کیلئے ایف16 طیارے کا استعمال کیا تھا۔
انہوں نے کہا کہ اس سے کیا فرق پڑتا ہے کہ کسی کو ضرب میرے دائیں ہاتھ سے پڑے یا بائیں ہاتھ سے پڑے۔ ایئر مارشل حسیب پراچہ کا مزید کہنا تھا کہ جب وہ نوجوان تھے تو انہوں نے27 فروری جیسے معرکے کی بھرپور تیاری کر رکھی تھی۔27فروری کا واقعہ پیش آیا تو ہمیں افسوس یہ تھا کہ ہم کاک پٹ میں نہیں تھے بلکہ ڈیسک کے اوپر تھے۔
ایئر مارشل حسیب پراچہ کے مطابق پاکستان نے26 فروری کو بھارت کو بتادیا تھا کہ کچھ کیا تو منہ توڑ جواب دیا جائے گا۔ انہوں نے بتایا کہ 26 فروری کو بھارت کے چار طیاروں نے اپنا بارود پھینکا اور چلے گئے۔
بھارتی فضائیہ20 طیارے لے کر آئی لیکن اس کے صرف چار طیارے بم پھینک سکے۔ ہم نے فوراً میٹنگ کال کی کیونکہ دشمن کو جواب دینا بہت ضروری تھا۔
سفارتی اور عسکری طور پر بھارت کو سخت پیغام دیا، ہم نے منصوبہ بندی کی اور اہداف سے دور بم پھینکے گئے، پاک فضائیہ نے 4 ٹارگٹس پر 6 بم گرائے، پونچھ اور راجوڑی سیکٹر ہمارا ٹارگٹ تھے۔
کراچی : یوم دفاع کے موقع پر سانحہ کراچی ایئرپورٹ کے شہداء کو خراج عقیدت پیش کیا گیا، ڈی جی اے ایس ایف میجر جنرل ظفر الحق کی ہدایت پر کراچی ایئرپورٹ کے شہداء کو خراج عقیدت پیش کیا گیا۔
تفصیلات کے مطابق ملک بھر میں یوم دفاع یوم یکجہتی کشمیر کے طور پر منایا گیا، جس کا مقصد وطن عزیز کے لیے جانوں کا نذرانہ پیش کرنے والے شہداء کے ساتھ ساتھ بھارت مقبوضہ کشمیر میں مظلوم کشمیریوں کے ساتھ پاکستانی عوام کی حمایت کا اعادہ کرنا ہے۔
اس سلسلے میں سانحہ کراچی ایئرپورٹ کے شہید سب انسپکٹر سرور کی قبر پر لاہور کے سی ایس او لیفٹیننٹ کرنل ٹیپو علی خان نے حاضری دی اور پھول چڑھائے۔
اس کے علاوہ اے ایس ایف لاہور کے سی ایس او کرنل ٹیپو علی خان نے شہید سب انسپکٹر سرور کے اہل خانہ سے ملاقات کی، اس موقع پر شہید سب انسپکٹر کو خراج عقیدت پیش کیا گیا۔
سی ایس او لاہور لیفٹیننٹ کرنل ٹیپو علی خان کا کہنا تھا کہ پوری قوم کو اپنے شہداء پر فخر ہے۔ یاد رہے کہ آٹھ جون2014 کو کراچی ایئرپورٹ پر بہادری اور جواں مردی کے ساتھ اپنے فرائض نبھاتے ہوئے سب انسپکٹر سرور شہید نے جام شہادت نوش کیا۔
اسلام آباد : آج ملک بھر میں یوم دفاع وشہدا ملی جوش و جذبے سے منایا جارہا ہے، آج شہداء یادگاروں پر پھول رکھے جائیں گے۔ غازیوں اور شہداء کے ساتھیوں کے گھر جاکر ان سے محبت کا اظہار کیا جائے گا۔
مرکزی تقریب رات آٹھ بجے جی ایچ کیو میں ہوگی جس کے مہمان خصوصی وزیر اعظم عمران خان ہوں گے، چھ ستمبر ملکی سرحدوں کے دفاع اور تجدید عہد وفا کا دن ہے، وہ دن جب دشمن ناپاک ارادوں کے ساتھ ارض پاک میں گھسا۔
وہ دن جب پاک فوج نے دشمن کے ناپاک قدموں کو پسپا کردیا۔ اس سلسلے میں ہمیں پیار ہے پاکستان کے نام سے آئی ایس پی آر کی خصوصی مہم جاری ہے۔
شہیدوں اور ان کے اہل خانہ کو ملک بھر میں خراج تحسین دینے کا سلسلہ جاری ہے، آج شہداء یادگاروں پر پھول رکھے جائیں گے۔ غازیوں اور شہداء کے ساتھیوں کے گھر جاکر ان سے محبت کا اظہار کیا جائے گا۔
واضح رہے کہ چھ ستمبر انیس سوپینسٹھ وہ دن ہے جب دشمن نے اُس قوم کو للکارا جس کی اساس شجاعت اور بہادری ہے۔ بھارت کی پندرہویں بکتر بند ڈویژن رات کی تاریکی میں پاکستان پر حملہ آور ہوئی۔
طاقت کے نشے میں چور بھارتی فوج نے بے خبری میں حملہ اور صبح تک لاہور میں ناشتہ کا دعویٰ کیا لیکن انہیں معلوم نہ تھا کہ سرحدوں کی رکھوالی خالد بن ولید اور ٹیپو سلطان کے جانشین کررہے تھے۔
پاک فوج نے اپنے سے کہیں بڑی فوجی طاقت کا غرور خاک میں ملادیا۔ بھارت چونڈہ کا مقام کبھی نہیں بھولے گا جسے پاک فوج کے جوانوں نے بھارتی ٹینکوں کا قبرستان بنایا۔
بی آر بی کے مقام پر میجر راجہ عزیز بھٹی شہید نے دشمن کی صفوں میں گھس کر انہیں بھاگنے پر مجبور کیا۔ کوہ میں دشت میں صحرا میں پاک فوج کے جوان ہر محاذ پر بہادری سے لڑے، پاک فضائیہ کے مٹھی بھر جنگی جہازوں نے ملک کی فضاؤں کو محفوظ بنایا۔
ایم ایم عالم کو کیسے کوئی بھول سکتا ہے۔ تیس سیکنڈ میں دشمن کےچھ جہاز ڈھیر کردیئے، جنہیں لاہور میں ناشتہ کرناتھا وہ اپنے علاقے بھی چھوڑ کر بھاگ رہے تھے۔
غیر ملکی اخباروں میں پاک فوج کے کارنامے بیان کیے جارہے تھے۔ پاکستانی قوم بھی وطن کے دفاع کے لیے فوج کے شانہ بشانہ کھڑی تھی، شہریوں کا ڈنڈے اٹھائے سرحدوں پر جانا، چندے اکٹھے کرنا اور نور جہاں کا ریڈیو پر ملی نغموں سے سے جوانوں کا جذبہ بڑھانا، یہ وہ سترہ دن تھے جب اٹھارہ سال پہلے بننے والے ملک نے ایک قوم بن کر اور یک جان ہوکر اپنا دفاع کیا۔
راولپنڈی: آرمی چیف جنرل قمر جاوید باجوہ نے کہا ہے کہ افغانستان کی جنگ پاکستان میں نہیں لڑ سکتے، بہت ڈو مور کرلیا اب دنیا ڈو مور کرے،عالمی طاقتیں اپنی ناکامیوں کا ذمہ دار ہمیں نہ ٹھہرائیں، بھٹکے ہوئے لوگوں کا عمل جہاد نہیں فساد ہے، جہاد ریاست کا حق ہے اسی کے پاس رہنا چاہیے،تعلیمی درس گاہوں، مدارس، پولیس اور قانون میں اصلاحات ناگزیر ہیں۔
یہ بات انہوں نے یوم دفاع کے موقع پر جی ایچ کیو میں منعقدہ مرکزی تقریب سے بطور مہمان خصوصی خطاب کرتے ہوئے کہی۔
مرکزی تقریب جنرل ہیڈ کوارٹر (جی ایچ کیو) میں یادگارہ شہدا پر منعقد ہوئی جس میں تینوں مسلح افواج کے سربراہان، جوائنٹ چیف آف آرمی اسٹاف، سابق آرمی چیف راحیل شریف، چینی سفیر سی وی ڈونگ، ڈی جی آئی ایس پی آر آصف غفور، خواجہ آصف، ایاز صادق، خورشید شاہ، خرم دستگیر، احسن اقبال، مریم اورنگزیب، مشاہد اللہ ، عبدالقادر بلوچ، راجا ظفر الحق اور دیگر اعلیٰ حکام نے شرکت کی۔
اس موقع پر شہید فوجیوں کے اہل خانہ کو بھی خصوصی طور پر مدعو کیا گیا تھا۔
جو قومیں اپنے شہدا کو بھول جائیں تاریخ انہیں کبھی معاف نہیں کرسکتی
آرمی چیف نے کہا کہ شہدائے وطن کے ورثا کا احسان مند ہوں کہ جن کے پیاروں کی بدولت آج ہم اس مقام پر ہیں، ان کا خون ہم پر قرض ہے، جو قومیں اپنے شہدا کو بھول جائیں تاریخ انہیں کبھی معاف نہیں کرسکتی، جو اپنی جانوں کا نذرانہ پیش کرکے ہمیشہ کے لیے امر ہوگئے ان شہدا کو فوج، عوام اور پورے پاکستان کی طرف سے سلام پیش کرتا ہوں۔
ہر بار فوجی اور سویلین نے وطن کی پکار پر ہمیشہ لبیک کہا
قمر باجوہ نے کہا کہ دفاع وطن ہمارا قومی امتیاز ہے، 1947ء سے لے کر آج تک فوجی اور سویلین نے وطن کی پکار پر ہمیشہ لبیک کہا ہے، جب تک بزرگوں کا حوصلہ اور جوانوں کی جرات برقرار ہے پاکستان کا کوئی نقصان نہیں کرسکتا، اس جذبے کا تعلق قومی ترقی کے ہر پہلو سے ہے۔
فوج دہشت گردوں کو ختم کرسکتی دہشت گردی نہیں
انہوں نے کہا کہ دہشت گردی کے خلاف جنگ میں قومی کا تعاون اور اس کی آگاہی بہت ضروری ہے، فوج دہشت گردوں کو تو ختم کرسکتی ہے لیکن دہشت گردی اور انتہا پسندی کو ختم کرنے کے لیے ہر شہری کو آپریشن رد الفساد کا سپاہی بننا ہو اور اس میں میڈیا اپنا کردار ادا کرے کیوں کہ یہ جنگ نظریاتی اور ذہنی بھی ہے، ہمیں چاہیے کہ ہم ایسا پاکستان تشکیل دیں جہاں طاقت کا استعمال آئین اور قانون کے مطابق صرف ریاست کے پاس ہو۔
یہ بھٹکے ہوئے لوگ ہیں، جو کچھ کررہے ہیں وہ جہاد نہیں فساد ہے
انتہا پسندوں کو مخاطب کرتے ہوئے آرمی چیف نے کہا کہ میں بھٹکے ہوئے افراد سے کہتا ہوں کہ وہ جو کچھ کررہے ہیں وہ جہاد نہیں فساد ہے، ان کے طرز عمل سے ان کے وطن اور عوام کا سب سے زیادہ نقصان ہورہا ہے، ان کی لگائی ہوئی آگ کی قیمت نہ صرف پورا پاکستان ادا کررہا ہے بلکہ دشمن ممالک بھی اس کا فائدہ اٹھا رہے ہیں۔
جہاد ریاست کی ذمہ داری ہے یہ حق اسی کے پاس رہنا چاہیے
انہوں نے کہا کہ دین میں واضح حکم ہے کہ جہاد ریاست کی ذمہ داری ہے یہ اسی کا حق ہے اور یہ حق ریاست کے پاس ہی رہنا چاہیے۔
اپنے ایمان اور روایات کے لیے کسی سرٹیفکیٹ کی ضرورت نہیں
قمر باجوہ کا کہنا تھا کہ لاالہٰ کے وارث ہونے پر ہمیں فخر ہے، سبز اور سفید دونوں رنگوں پر نازاں ہیں، اپنے ایمان اور اپنی روایات کے لیے ہمیں کسی کے سرٹیفکیٹ کی ضرورت نہیں، یہ برداشت نہیں کہ کوئی بھی مذہب، ذات، فقہ یا لسانی بنیاد پر ہماری جڑیں کھوکھلی کرے، ان بنیادوں میں ہمارے شہدا کا خون شامل ہے ہم اس خون کی حرمت کا پاس کریں گے۔
ماضی میں بہت نقصان اٹھالیا، اب ترقی کا وقت ہے
آرمی چیف نے کہا کہ ہم نے ماضی میں بہت نقصان اٹھایا ، اب دشمن کی پسپائی اور ہماری ترقی و کامرانی کا وقت ہے، ہمارے دشمن کوئی حربہ آزمالیں ہم ہمیشہ متحد رہیں گے۔
تعلیمی درس گاہوں، مدارس، پولیس اور قانون میں اصلاحات ناگزیر ہیں
سیکیورٹی کے حوالے سے انہوں نے کہا کہ ہم بہت سی اصلاحات کے لیے حکومت اور قومی اداروں سے رابطے میں ہیں جن کے بغیر نیشنل ایکشن پلان شرمندہ تعبیر نہیں ہوسکتا ان میں تعلیمی درس گاہوں اور مدارس کی اصلاحات، پولیس کی اصلاحات اور دہشت گردوں کی سرکوبی کے لیے قانون میں اصلاحات شامل ہیں۔
تقریر کی مکمل ویڈیو
اب دنیا کو ڈو مور کرنا ہوگا
انہوں نے کہا کہ دہشت گردی کی جنگ میں قربانیوں کے باوجود ہمیں کہا جارہا ہے کہ ہم نے کچھ ہیں کیا، اگر پاکستان نے کچھ نہیں کیا تو دنیا بھر میں کسی نے کچھ نہیں کیا، اتنے محدود وسائل میں اتنی بڑی کامیابی پاکستان کا ہی کمال ہے، آپریشن شیردل سے لے کر ، راہ نجات، راہ راست، ضرب اور اب رد الفساد تک ہم نے قیمت اپنے لہو سے ادا کی ہے، اب دنیا کو ڈو مور کرنا ہوگا۔
مسلط کردہ جنگ کو انجام تک پہنچائیں گے
ان کا کہنا تھا کہ ہم پر مسلط کی گئی اس جنگ کو ہم منطقی انجام تک پہنچا کر دم لیں گے، ملک میں امن قائم کیے بغیر سے نہیں بیٹھیں گے کیوں کہ یہ ہماری بقا کی جنگ ہے۔
عالمی طاقتیں اپنی ناکامیوں کا ذمہ دار ہمیں نہ ٹھہرائیں
آرمی چیف نے کہا کہ عالمی طاقتیں اگر اس جنگ میں ہمارا ہاتھ مضبوط نہیں کرسکتیں تو اپنی ناکامیوں کا ہمیں ذمہ دار بھی نہ ٹھہرائیں، اگر ہم ناکام ہوئے تو یہ خطہ عدم استحکام کا شکار ہوجائے گا، ہم بلوچستان کے امن کو خراب کرنے والے دشمن کی تدابیر پر نظر رکھے ہوئے ہیں، ایسے عناصر سن لیں ہم ان کا مقابلہ کرنے کے لیے تیار ہیں، ہر پاکستانی بلوچستان کے لیے خون دینے کو تیار ہے، ہمیں بلوچستان کے غیور عوام پر فخر ہے جنہوں نے دہشت گردوں اور علیحدگی پسندوں کو مسترد کردیا ہے۔
دشمن کا ایک مقصد سی پیک کو نشانہ بنایا ہے
ان کا کہنا تھا کہ دشمنوں کا ایک مقصد سی پیک کو نشانہ بنانا بھی ہے تاکہ پاکستان کے مستقبل کے ساتھ ساتھ پاک چین دوستی پر ضرب لگائی جائے۔
بھارت ہمارے پانیوں پر قبضے کا منصوبہ بناچکا
قمر باجوہ نے کہا کہ ہم دہشت گردی کے خلاف ہیں دنیا بھر کے تمام ممالک کے ساتھ عزت اور برابری کی بنیاد پر تعلقات چاہتے ہیں، کشمیر میں کھلی ناانصافی اور ہمیں دو لخت کرنے پر بھارت کا کردار سب کے سامنے ہے اور اب ان بھارتی کوششوں میں دہشت گردوں کی کھلی معاونت اور ہمارے پانیوں پر قبضہ کرنے کا منصوبہ بھی اس میں شامل ہوچکا ہے۔
کشمیریوں کی جدوجہد ہماری در اندازی کی محتا ج نہیں
انہوں نے کہا کہ کشمیر یوں کی حالت زار پر دل گرفتہ ہیں، دونوں ممالک کے عوا م کی فلاح امن سے وابستہ ہے لیکن ایل او سی پر شہریوں کو نشانہ بنانے کا عمل بند کیا جائے، لاکھوں کشمیریوں کی پرامن جدوجہد پاکستان یا آزاد کشمیر سے در اندازی کی محتا ج نہیں، یہ ہندوستان کے اپنے مفاد میں ہے کہ وہ مسئلہ حل کرنے کے لیے پاکستان کے خلاف گالی اور کشمیریوں کے خلاف گولی کے بجائے سیاسی وسفارتی سطح پر بات کرے۔
جنوبی ایشیا میں نیوکلیئر ہتھیار ہم نہیں لائے
آرمی چیف نے کہا کہ پاکستان ایک ذمہ دار ملک ہے، جنوبی ایشیا میں نیوکلیئر ہتھیار ہم نہیں لائے، اب بھی یہ مہلک ہتھیار ہمارے نزدیک طاقت کے نشے میں چور دشمن کی یلغار کے جواب میں امن کی ضمانت ہیں، یہی دشمن جنوبی ایشیا میں غیر روایتی جنگ لے کر آیا، سپر پاورز کی شروع کردہ جنگوں کی قیمت ہم نے دہشت گردی، انتہا پسندی اور اقتصادی نقصان کی صورت میں اد ا کی۔
افغانستان کی جنگ پاکستان میں نہیں لڑ سکتے
افغانستان کے معاملے پر انہوں نے کہا کہ ہم نے افغانستان کو بھی اپنی بساط سے بڑھ کر سہارا دینے کی کوشش کی لیکن ہم افغانستان کی جنگ پاکستان میں نہیں لڑ سکتے، ہم نے بہت نیک نیتی سے افغانستان میں مذاکرات اور امن کی کوشش کی ہے تاہم افغانستان ایک خود مختار ملک ہے جو اپنے فیصلوں میں آزاد ہے۔
افغان مہاجرین کی جلد اور باعزت واپسی کے لیے مدد کرنا چاہتے ہیں
ان کا کہنا تھا کہ اگر آج بھی افغان دھڑوں کا راستہ جنگ کی طرف جاتا ہے تو ہم اس جنگ کا حصہ نہیں بن سکتے تاہم ہم یہ ضرور کریں گے کہ مکمل غیر جانب داری کے لیے افغان مہاجرین کی جلد اور باعزت واپسی کے لیے مدد کریں اور اپنی بارڈر کی حفاظت کریں جس کے لیے پاک افغان سرحد پر 2600 کلو میٹر طویل بارڈ لگار ہے ہیں اور 900 سے زیادہ چیک پوسٹیں اور قلعے بھی تعمیر کررہے ہیں۔
مغربی سرحد کے پار پناہ لینے والے دہشت گردوں کے خلاف کارروائی کی امید ہے
انہوں نے کہاکہ ہم امید کرتے ہیں کہ جن دہشت گردوں نے مغربی سرحد کے پار پناہ لے رکھی ہے ان کے خلاف کارروائی ہوگی۔
ہمارے سیکیورٹی معاملات کو بھی مد نظر رکھا جائے
قمر باجوہ نے کہا کہ امریکا کے ساتھ حالیہ تعلقات پر قوم کے جذبات سب کے سامنے ہیں، ہم امداد نہیں اعتماد چاہتے ہیں ہماری قربانیوں کو تسلیم کیا جائے، ہم نیٹو فورسز کے ہر اس اقدام کی حمایت کریں گے جس سے افغانستان اور خطے میں امن قائم ہو لیکن ہمارے سیکیورٹی معاملات کو بھی مد نظر رکھا جائے۔
قبل ازیں تقریب میں علاقائی لباس میں ملبوس بچوں نے ملی نغموں پر ٹیبلو پیش کیا، گلوکار عاطف اسلم نے ملی نغمہ گایا۔
ویڈیو دیکھیں
پاک فوج کے چاق و چوبند دستے نے روایتی پریڈ کا مظاہرہ کیا جسے دیکھ کر حاضرین نے انہیں داد اور پاک فوج کی پریڈ کو سراہا۔
ویڈیو دیکھیں
اس موقع پر تقریب میں آپریشن رد الفساد پر بنایا گیا ایک خصوصی گیت ’’ جب تک فساد ہے رد الفسار بھی رہے گا‘‘بھی حاضرین کو دکھایا گیا:
ویڈیو دیکھیں
تقریب میں بتایا گیا کہ شہدا کی بیوائیں زندگی کیسے گزارتی ہیں؟ اس موضوع پر ایک گیت دکھایا گیا جس نے عکاسی کی کہ کسی فوج کے شہید ہونے کے بعد اس کی بیوہ کو کن حالات کا سامنا کرنا پڑتا اور وہ کیسے صبر کرتی ہے، اس نغمے کو دیکھ کر حاضرین آب دیدہ ہوگئے۔
کراچی : یوم دفاع کے موقع پر ملیر گیریژن میں پاک فوج کے زیر اہتمام خصوصی نمائش کا انعقاد کیا جائے گا، نمائش کے دوران آرمی ایوی ایشن کے ایلوٹ اور مشاق طیارے فلائی پاسٹ کریں گے۔
۔تفصیلات کے مطابق6دسمبر یوم دفاع کے موقع پر پاک فوج کے زیر اہتمام ملیر گیریژن میں خصوصی نمائش منعقد کی جائے گی، نمائش میں ٹینکوں، اے پی سی اور چاق و چوبند دستوں کا مارچ پاسٹ ہوگا۔
اس کے علاوہ نمائش میں رکھا گیا مختلف نوعیت کا جدید اسلحہ اور جنگی آلات خصوصی دلچسپی کا باعث ہوں گے، تقریب کے مہمان خصوصی جنرل آفیسر کمانڈنگ ملیر گیریژن میجر جنرل زاہد محمود ہوں گے۔
ذرائع کے مطابق توقع ہے کہ نمائش میں ریٹائرڈ اور حاضر سروس افسران اپنے اہل خانہ کے ہمراہ بڑی تعداد میں شریک ہونگے۔
علاوہ ازیں یوم دفاع کے موقع پر حیدرآباد اور پنو عاقل گیریژن میں بھی خصوصی تقریبات منعقد کی جائیں گی، ان شہروں میں بھی عوام کی دلچسپی کے لئے جنگی آلات رکھے جائیں گے۔
