ARYNews.tv | Urdu – Har Lamha Bakhabar

Tag: delegation

  • سعودی اور اماراتی وفود کی سوڈانی عسکری کونسل کے سربراہ سے ملاقات‘ تعاون کا خیر مقدم

    سعودی اور اماراتی وفود کی سوڈانی عسکری کونسل کے سربراہ سے ملاقات‘ تعاون کا خیر مقدم

    خرطوم : سوڈان کی فوجی عبوری کونسل کے سربراہ لیفٹیننٹ جنرل عبدالفتاح البرھان عبدالرحمان نے سوڈان کے سعودی عرب اور متحدہ عرب امارات کے ساتھ مثالی تعلقات کی تحسین کی ہے۔

    تفصیلات کے مطابق افریقی ملک سوڈان میں 30 برس سے عہدہ صدارت پر براجمان عمر البشیر کے خلاف گزشتہ تین ماہ سے جاری احتجاجی مظاہرے کے نتیجے میں ایک ہفتہ قبل سیاسی تبدیلی رونما ہوئی جس میں عمر البشیر نے اپنے عہدے سے استعفیٰ دیا اور فوج نے انہیں گرفتار کرلیا۔

    عبوری فوجی کونسل کے سربراہ کا کہنا ہے کہ سوڈانی قوم کے امارات اور سعودیہ کے ساتھ ازلی تعلقات قائم ہیں اور آنے والے دور میں یہ تعلقات مزید مضبوط اور مستحکم ہوں گے۔

    سوڈانی عسکری کونسل کے سربراہ کی طرف سے یہ بیان سعودی عرب اور متحدہ عرب امارات کے ایک مشترکہ وفد سے ملاقات کے بعد جاری کیا گیا۔

    سعودیہ اور امارات کے اعلیٰ سطحی وفد نے منگل کو خرطوم میں مسلح افواج کے ہیڈ کواٹر میں جنرل عبدالفتاح البرھان عبدالرحمان سے ان کے دفتر میں ملاقات کی۔

    عرب ممالک کے وفد نے سوڈانی عسکری کونسل کو اپنے بھرپور تعاون کا یقین دلایا، اماراتی اور سعودی وفد نے سوڈان کی عسکری کونسل کے وائس چیئرمین جنرل محمد حمدان دقلو موسیٰ سے بھی ملاقات کی۔

    غیر ملکی خبر رساں ادارے کا کہنا تھا کہ ان ملاقاتوں میں وفد کے ارکان نے سوڈانی قیادت کو یقین دلایا کہ سعودی عرب اور متحدہ عرب امارات سوڈانی قوم کی ہر ممکن مدد کے لیے تیار ہیں۔

    مزید پڑھیں : سوڈان : فوجی کونسل کے سربراہ نے ایک دن بعد ہی استعفیٰ دے دیا

    خیال رہے کہ سوڈان کی فوجی کونسل کے سربراہ و وزیر دفاع عود بن عوف نے سابق آمر عمر البشیر کا تختہ الٹنے کے ایک دن بعد ہی استعفیٰ دے دیا تھا، عود ابن عوف نے اپنے فیصلے کا اعلان سرکاری ٹی وی پر کیا۔

    فوجی کونسل کے سربراہ عود بن عوف نے لیفٹیننٹ جنرل عبدالفتاح عبدالرحمان برہان کو اپنا جانشین نامزد کردیا، فوج کا کہنا ہے کہ 2 سال تک اقتدار میں رہنے کے بعد انتخابات کرائے گی۔

    مزید پڑھیں : سوڈان میں مارشل لاء نافذ، ملک چلانے کے لیے عبوری کونسل تشکیل، صدرگرفتار

    یاد رہے کہ سوڈانی عوام گزشتہ تین مہینوں نے صدر عمر البشیر کے خلاف مظاہرے کررہے تھے جو آج رنگ لے آئے اور صدر عمر حسن البشیر صدارت سے مستعفی ہوگئے جس کے بعد انہیں فوج نے گرفتار کرکے نظر بند کردیا تھا اور وہ تاحال نظر بند ہیں۔

    غیر ملکی میڈیا کا کہنا ہے کہ سوڈان میں فوج نے ملک کے انتظامی امور چلانے کے لیے جنرل عود بن عوف کی سربراہی میں ایک عبوری کونسل تشکیل دے دی ہے، جنرل عود سبک دوش ہونے والے صدر عمر البشیر کے نائب اول اور سوڈان کے وزیر دفاع ہیں۔

  • وزیراعظم سے دنیا کی سب سے بڑی آئل کمپنی ایگزون کے وفد کی ملاقات

    وزیراعظم سے دنیا کی سب سے بڑی آئل کمپنی ایگزون کے وفد کی ملاقات

    اسلام آباد : ملک سے بیروزگاری کے خاتمے کے لیے وزیرِ اعظم عمران خان نے ایک اور قدم اٹھاتے ہوئے دنیا کی سب سے بڑی آئل کمپنی ایگزون کے وفد سے ملاقات میں سرمایہ کاروں کےلیےدوستانہ ماحول فراہم کرنے کی یقین دہانی کرادی۔

    تفصیلات کے مطابق دنیا کی سب سے بڑی آئل کمپنی ایگزون نے بھی ستائیس سال بعد پاکستان میں دفتر کھول لیا، ایگزون کمپنی کے وفد نے وزیرِ اعظم عمران خان سے ملاقات کی۔

    وزیراعظم عمران خان نے دنیا کی سب سے بڑی آئل کمپنی ایگزون کے وفد سے ملاقات کی ، چیئرمین ایماکوکرین نے کہا پاکستان میں بڑے پیمانے پر سرمایہ کاری کرنےجارہےہیں۔

    وزیرِ اعظم نے امید ظاہر کی کہ سرمایہ کاری کے ذریعے پاکستان میں روزگار کے مواقع بڑھیں گے اور سرمایہ کاروں کےلیےدوستانہ ماحول فراہم کرنے کی یقین دہانی کرائی۔

    اس سے قبل وفاقی وزیرخزانہ اسدعمر نے سماجیہ رابطے کی ویب سائٹ ٹویٹر پر گذشتہ روز غیرملکی سرمایہ کاری کےلئے بہترین دن قراردیا تھا۔

    اسدعمر نے کہا کہ سوزوکی موٹرزنے پاکستان میں مزید پینتالیس کروڑڈالرسرمایہ کاری کی پیشکش کی ہے اور توانائی کمپنی ایگزون موبل نےستائیس سال بعد پاکستان میں اپنےدفاتردوبارہ کھول لئے ہیں۔

    خیال رہے کہ گزشتہ روز امریکی آئل کمپنی کی چیئرمین ایماکو کرین وفد کے ہمراہ پاکستان پہنچی  تھیں، امریکی آئل کمپنی بھی پاکستان میں بھاری سرمایہ کاری کا ارادہ رکھتی ہے۔

    مزید پڑھیں : امریکی آئل کمپنی آج پاکستان میں اپنے پہلے دفتر کا افتتاح کرے گی

    امریکی آئل کمپنی کے وفد اور وفاقی وزرا کے ساتھ ملاقات میں تفصیلی بات چیت کے دوران طے پایا تھا کہ امریکی کمپنی کراچی کی سمندری حدود میں آف شور آئل ڈرلنگ کرے گی۔ پاکستان میں ایل این جی ٹرمنل بھی لگایا جائے گا۔

  • غیر ملکی مشروب کمپنی کی پاکستان میں اربوں ڈالر سرمایہ کاری کی خواہش

    غیر ملکی مشروب کمپنی کی پاکستان میں اربوں ڈالر سرمایہ کاری کی خواہش

    اسلام آباد: غیر ملکی مشروب کمپنی نے پاکستان میں اربوں ڈالر سرمایہ کاری کی خواہش ظاہر کی جس پر وزیر اعظم نے انہیں مکمل تعاون فراہم کرنے کی یقین دہانی کروائی۔

    تفصیلات کے مطابق وزیر اعظم عمران خان سے غیر ملکی مشروب کمپنی کے وفد کی ملاقات ہوئی۔ ملاقات میں غیر ملکی کمپنی نے پاکستان میں اربوں ڈالر سرمایہ کاری کی خواہش ظاہر کی۔

    وزیر اعظم نے سرمایہ کاروں کو تمام سہولتیں فراہم کرنے کی یقین دہانی کروائی۔

    وزیر اعظم کا کہنا تھا کہ موجودہ حکومت سرمایہ کاروں کے لیے دوستانہ ماحول فراہم کر رہی ہے، حکومت کاروباری اور سرمایہ کار طبقے کو مکمل تعاون فراہم کرے گی۔

    انہوں نے کہا کہ سرمایہ کاری کے ذریعے پاکستان میں روزگار کے مواقع بڑھیں گے۔

    خیال رہے کہ گزشتہ روز بھی امریکی آئل کمپنی کی چیئرمین ایماکو کرین وفد کے ہمراہ پاکستان پہنچی تھیں۔ امریکی آئل کمپنی بھی پاکستان میں بھاری سرمایہ کاری کا ارادہ رکھتی ہے۔

    امریکی آئل کمپنی کے وفد اور وفاقی وزرا کے ساتھ ملاقات میں تفصیلی بات چیت کے دوران طے پایا تھا کہ امریکی کمپنی کراچی کی سمندری حدود میں آف شور آئل ڈرلنگ کرے گی۔ پاکستان میں ایل این جی ٹرمنل بھی لگایا جائے گا۔

  • اراکین اسمبلی کے بجائے بلدیاتی نمائندوں کو ترقیاتی فنڈز دیں گے: علیم خان

    اراکین اسمبلی کے بجائے بلدیاتی نمائندوں کو ترقیاتی فنڈز دیں گے: علیم خان

    لاہور: صوبہ پنجاب کے سینئر وزیر برائے ترقی علیم خان کا کہنا ہے کہ اراکین اسمبلی کے بجائے بلدیاتی نمائندوں کو ترقیاتی فنڈز دیں گے۔ سالانہ ترقیاتی پروگرام کا 30 فیصد حصہ بلدیاتی نمائندے استعمال کریں گے۔

    تفصیلات کے مطابق ورلڈ بینک کے 3 رکنی وفد نے سینئر وزیر پنجاب علیم خان سے ملاقات کی۔

    ملاقات کے دوران ڈائریکٹر ورلڈ بینک نے لوکل گورنمنٹ اور دیگر شعبوں میں تعاون پر بریفنگ دی۔

    علیم خان کا کہنا تھا کہ ہاؤسنگ سیکٹر میں مضبوط منصوبہ بندی سے معیشت مضبوط ہوگی، گزشتہ حکومت کے اکثر منصوبے معیشت پر بوجھ ہیں، پنجاب میں سرمایہ کاروں کے لیے آسانیاں پیدا کریں گے۔

    انہوں نے کہا کہ منصوبوں کے لیے چیک اینڈ بیلنس کے ساتھ مانیٹرنگ سسٹم ضروری ہے، وزیر اعظم پر دوسرے ملکوں کے اعتماد میں اضافہ ہو رہا ہے، اراکین اسمبلی کے بجائے بلدیاتی نمائندوں کو ترقیاتی فنڈز دیں گے۔

    علیم خان کا کہنا تھا کہ پنجاب کا نیا بلدیاتی نظام ترقی کے بہتر نتائج دے گا، سالانہ ترقیاتی پروگرام کا 30 فیصد حصہ بلدیاتی نمائندے استعمال کریں گے۔ عالمی بینک کے نمائندوں کی پنجاب کے بلدیاتی نظام میں دلچسپی ہے۔

    ورلڈ بینک کے وفد کی جانب سے کہا گیا کہ پنجاب کے مختلف شعبوں میں مثبت کردار ادا کریں گے۔ سینئر وزیر اور عالمی بینک کے وفد نے آئندہ ہفتے دوبارہ اجلاس کرنے کا فیصلہ کیا ہے۔

  • وزیر ریلوے سے ایشیائی ترقیاتی بینک کے وفد کی ملاقات

    وزیر ریلوے سے ایشیائی ترقیاتی بینک کے وفد کی ملاقات

    اسلام آباد: وزیر ریلوے شیخ رشید کا کہنا ہے کہ ریلوے کی اپ گریڈیشن اولین ترجیح ہے، پاکستان ریلویز ایشیائی ترقیاتی بینک کو خوش آمدید کہتا ہے۔

    تفصیلات کے مطابق وزیر ریلوے شیخ رشید سے ایشیائی ترقیاتی بینک کے وفد کی ملاقات ہوئی۔

    ملاقات میں شیخ رشید کا کہنا تھا کہ ریلوے کی اپ گریڈیشن اولین ترجیح ہے، پاکستان ریلویز ایشیائی ترقیاتی بینک کو خوش آمدید کہتا ہے۔

    انہوں نے کہا کہ پاکستان ریلوے کو جامع منصوبوں کی اشد ضرورت ہے، حکومتی ضروریات اور ترجیحات کو مد نظر رکھنا ضروری ہے۔

    وزیر ریلوے نے کہا کہ ملک کا مفادات اولین ترجیح ہے۔

    خیال رہے کہ وزیر ریلوے نے محکمے کی حالت سدھارنے کے لیے مختلف کمپنیوں اور بیرون ملک پاکستانیوں کو سرمایہ کاری کی دعوت دے رکھی ہے۔

    اس سے قبل شیخ رشید نے کہا تھا کہ ای سی سی نے 70 ہزار پری پیڈ میٹر لگانے کا فیصلہ کیا ہے، 100 دن میں 10 نئی ٹرینیں چلائی جائیں گی۔

    انہوں نے کہا تھا کہ این ایل سی کے 10 انجن ہیں جن کا 5 کروڑ روپے ماہوار خرچہ ہے۔ ریلوے کی حالت ایسی ہے کہ اب فیصلے نہ کیے تو کبھی نہیں کر پائے گی۔

  • چینی وفد کی گوادر آمد، ترقیاتی منصوبوں پر جاری پیشرفت کو سراہا

    چینی وفد کی گوادر آمد، ترقیاتی منصوبوں پر جاری پیشرفت کو سراہا

    راولپنڈی: چین کا اعلیٰ سطح وفد دو روزہ دورے پر گوادر پہنچا،وفد نے اقتصادی راہداری سمیت دیگر منصوبوں پر ہونے والے ترقیاتی کاموں کی پیش رفت کو سراہا۔

    آئی ایس پی آر کے مطابق اعلیٰ سطح چینی وفد گزشتہ روز دو روزہ دورے پر گوادر پہنچا جہاں انہیں ترقیاتی منصوبوں کے حوالے سے تفصیلی بریفنگ دی گئی، وفد کے اراکین کا چیئرمین دوستین جمال دینی اور دیگر حکام نے ائیرپورٹ پر پرتپاک استقبال کیا۔

    اس موقع پر وفد کے ارکان کو گوادر میں جاری ترقیاتی منصوبوں کے بارے میں بریفنگ دیتے ہوئے بتایا گیا کہ پاک چین اقتصادی راہداری اور گوادر پورٹ کی تکمیل سے پاکستان سمیت پورے خطے پر مثبت معاشی اثرات مرتب ہوں گے۔

    وفد کے ارکان نے گوادر پورٹ کا تفصیلی معائنہ اور  چائنہ اوورسیز  پورٹس ہولڈنگ کمپنی کے مسٹر لی نے وفد کا خیر مقدم کیا اور ارکان کی اہلکاروں سے ملاقات کروائی اور اراکین نے پاک چائنہ فرینڈ شپ اسکول فقیر کالونی کا دورہ بھی کیا۔ چینی وفد کے ارکان کو جاری منصوبوں پر بریفنگ دی گئی جس پر انہوں نے ترقیاتی کاموں میں پیشرفت کو سراہا۔

  • مسئلہ کشمیر پر پاکستان کا مؤقف بہت اہم ہے، چینی وزیر اعظم، نوازشریف سے ملاقات

    مسئلہ کشمیر پر پاکستان کا مؤقف بہت اہم ہے، چینی وزیر اعظم، نوازشریف سے ملاقات

    نیویارک: وزیر اعظم میاں محمد نوازشریف اور چینی وزیر اعظم کے درمیان ملاقات ہوئی جس میں چین کے سربراہ نے ہر سطح پر پاکستان کا ساتھ دینے کا اعلان کیا۔

    تفصیلات کے مطابق پاکستان اور چین کے وزرائے اعظم کے درمیان اہم ملاقات ہوئی جس میں  باہمی تعلقات مزید بہتر بنانے اور اقوام متحدہ کے اجلاس سمیت خطے کی صورتحال پر تفصیلی تبادلہ خیال کیا گیا۔

    اس موقع پر نواز شریف نے کہا کہ ’’پاکستان ہر قسم کی دہشت گردی کی مذمت کرتا ہے، خطے میں امن اور پڑوسی ممالک سے بہتر تعلقات ہمارا ویژن ہے جس پر ہرصورت گامزن رہیں گے‘‘۔

    میاں محمد نوازشریف کا کہنا تھا کہ ’’آپریشن ضربِ عضب کامیابی سے جاری ہے، ملک سے دہشت گردوں کا نیٹ ورک توڑدیا ہے‘‘، وزیر اعظم پاکستان نے چینی سربراہ کو مقبوضہ کشمیر میں ہونے والے بھارتی مظالم کے حوالے سے تفصیلی طور پر  آگاہ کیا‘‘۔

    چینی وزیر اعظم لی کی چنگ نے دو طرفہ تعلقات پر اعتماد کا اظہار کرتے ہوئے کہا کہ ’’ہر فورم پر پاکستان کے ساتھ کھڑے ہیں اور اس کی حمایت میں ہمیشہ آواز بلند کرتے رہیں گے‘‘۔

    لی کی چنگ کا مزید کہنا تھا کہ ’’کشمیر پر پاکستان کے مؤقف کو بہت اہمیت دیتے ہیں اور امید ہے کہ اس معاملے پر عالمی برادری بھی بھر پور توجہ دے گی، خطے میں امن و امان کی فضا برقرار رکھنے کے لیے پاکستان اور بھارت کے درمیان بہترین تعمیری کردار ادا کرنے کو تیار ہیں‘‘۔

    چینی وزیر اعظم نے دہشت گردی کے خاتمے کے لیے پاکستان کے کردار کو سراہتے ہوئے کہا کہ ’’دونوں ممالک کے درمیان گہرا رشتہ ہے جو گزرتے وقت کے ساتھ مضبوط ہوتا جارہاہے۔ گوادر میں فراہم کی گئی سہولتوں میں آئندہ اضافہ کریں گے‘‘۔

  • کراچی میں میٹرو بس پراجیکٹ جلد شروع ہوجائے گا، ملک ریاض

    کراچی میں میٹرو بس پراجیکٹ جلد شروع ہوجائے گا، ملک ریاض

    کراچی: ملک ریاض نے کہا ہے کہ کراچی میں میٹرو بس پراجیکٹ جلد شروع ہوجائے گا، کراچی میں روزگار کے ایک لاکھ موقع پیداکرنا چاہتے ہیں۔

    بحریہ ٹاون کے سربراہ ملک ریاض کا کہنا تھا کہ میٹرو بس پراجیکٹ کراچی کےشہریوں کیلئے تحفہ حکومت ٹینڈر طلب کرے،کوئی اورسامنےآناچاہےتو آسکے میٹروبس2روٹس پرچلائی جائےگی۔

    انہوں نے بتایا کہ پہلاروٹ بحریہ ٹاون سےٹاورتک ہوگا دوسراروٹ بحریہ ٹاون سےڈی ایچ اےتا ائیرپورٹ ہوگا۔

    ملک ریاض نے کہا ہے پراجیکٹ سے روزگار کے ایک لاکھ موقع پیدا ہوں گے انہوں نے کہا کہ بیروزگاری ختم ہو گی تو دہشتگردی بھی ختم ہوگی۔

  • پاکستان دو سال میں دبئی اور انگلینڈ جیسا ہوسکتا ہے، ملک ریاض

    پاکستان دو سال میں دبئی اور انگلینڈ جیسا ہوسکتا ہے، ملک ریاض

    لندن : چیئرمین بحریہ ٹاون ملک ریاض کاکہنا ہے کہ حکومت مدد کرے تو نجی شعبے میں 21 لاکھ ملازمتیں پیدا کر سکتے ہیں۔

    لندن میں پریس کانفرنس کے دوران چیئر مین بحریہ ٹاؤن نے کہا کہ پاکستان یورپ،امریکا اوردبئی کیوں نہیں بن سکتا، ان کا کہنا تھاکہ حکومت کی پالیسیاں درست نہیں،پاکستان دو سال میں دبئی اور انگلینڈ جیساہوسکتاہے۔

     ملک ریاض کا کہناتھا کہ وہ گلگت اور اسکردومیں سیاحوں کیلئے ریزورٹ بناناچاہتےہیں اور حکومت مدد کرے تو ملازمتوں کے اکیس لاکھ نئےمواقع پیداہوسکتے ہیں،کراچی منصوبےسےہزاروں ملازمتیں پیدا ہوئیں۔

     ان کا کہنا تھا کہ کراچی میں آٹھ لاکھ نمازیوں کےلیےمسجدکی تعمیر شروع کی ہے اور جلدمیڈیکل کالج کا بھی افتتاح کیا جائے گا۔

     ملک ریاض کا کہنا تھا کہ کراچی میں لوگوں کواس سال تین ہزار گھر مفت بناکردیں گے، ملک ریاض کا کہنا تھا کہ حیدرآباد میں الطاف حسین یونیورسٹی کاسنگ بنیاد جمعے کو رکھا جائے گا۔

    چیئرمین بحریہ ٹاون ملک ریاض کاکہنا ہے کہ حکومت مدد کرے تو نجی شعبے میں 21 لاکھ ملازمتیں پیدا کر سکتے ہیں۔

  • بحریہ ٹاؤن کے سربراہ ملک ریاض ایم کیوایم کے مرکز نائن زیرو کا دورہ

    بحریہ ٹاؤن کے سربراہ ملک ریاض ایم کیوایم کے مرکز نائن زیرو کا دورہ

    کراچی: گورنرسندھ ڈاکٹرعشرت العباد کے ہمراہ بحریہ ٹاؤن کے سربراہ ملک ریاض ایم کیوایم کے مرکز نائن زیروپہنچے، جہاں ایم کیوایم کے کارکنوں نے ان کاپرتپاک استقبال کیا۔

    استقبالیہ خطاب میں ایم کیوایم کے رہنما حیدر عباس رضوی نے ملک ریاض کونائن زیرو آمد پرخوش آمدید کہا، حیدرعباس رضوی نے بتایاکہ ملک ریاض نے حیدرآباد اور کراچی میں الطاف حسین کے نام سے منسوب دوجامعات قائم کرنے کااعلان کیاہے۔

    حیدرعباس رضوی کاکہناتھاچیئرمین بحریہ ٹاؤن نے ایم کیوایم کے شہدا کارکنوں کے ورثا کوپلاٹ دینے کااعلان کیاہے، ملک ریاض کی نائین زیرو آمد پر ایک جشن کا سماں تھا۔ شہداء کے لواحقین کو پلاٹس دینے کے اعلان پر ایم کیو ایم کے کارکنان نے بھنگڑے ڈالے۔ اور ڈھول کی تھاپ پر رقص کیا۔

    بحریہ ٹاون کے سربراہ ملک ریاض نے ایم کیوایم کے مرکز نائن زیرو پرخطاب کرتے ہوئے حیدرآباد میں الطاف حسین کے نام سے یونیورسٹی بنانے کا اعلان کردیا ،ملک ریاض کا کہنا تھا کراچی میں مجھےجتنی عزت دی گئی ہے اس کے لیے الطاف حسین کا شکر گزار ہوں ۔

    ملک ریاض کا کہنا تھا کہ اپنے اثاثوں کا75 فیصد ملک کے ہی حوالے کروں گا، مجھےجتنی عزت دی گئی بہت مشکورہوں،میرے پاس جتنی دولت ہے ملک کےلئے ہی ہے آصف زرداری نےکہا یونیورسٹی الطاف حسین کے نام پر بنائیں اللہ کا دیا بہت کچھ ہے لیکن میں نے بہت کم دیا ہے،نئے 58 دسترخوان کراچی میں شروع کریں گے۔

    اس موقع پرگورنرسندھ ڈاکٹرعشرت العباد نےکراچی اورحیدرآباد کی مجوزہ دونوں جامعات الطاف حسین کے نام سے منسوب کرنے پرملک ریاض کاشکریہ ادا کیا۔