اسلام آباد: وزیر خارجہ شاہ محمود قریشی برسلز کے سرکاری دورے پر روانہ ہوگئے جہاں وہ پاکستان ای یو اسٹریٹجک ڈائیلاگ کی مشترکہ صدارت کا حصہ ہوں گے۔
تفصیلات کے مطابق وزیر خارجہ شاہ محمود قریشی وفد کے ہمراہ بیلجیئم کے دارالحکومت برسلز کے 3 روزہ سرکاری دورے پر روانہ ہوگئے، وزیر خارجہ چھٹے پاکستان ای یو اسٹریٹجک ڈائیلاگ کی مشترکہ صدارت کا حصہ ہوں گے۔
جون 2019 میں پاکستان اور یورپی یونین میں اسٹریٹجک انگیجمنٹ پلان پر دستخط ہوئے تھے، تاریخی اسٹریٹجک انگیجمنٹ پلان پر دستخط کے بعد یہ ڈائیلاگ کا پہلا اجلاس ہوگا۔
وزیر خارجہ قریشی نیٹو ہیڈ کوارٹرز میں نیٹو سیکریٹری جنرل جینز اسٹولٹن برگ سے بھی ملیں گے جبکہ یورپی ارکان پارلیمنٹ کے ساتھ ملاقات اور تبادلہ خیال کریں گے، وزیر خارجہ بیلجیئم اور لکسمبرگ میں مقیم پاکستانی کمیونٹی سے بھی ملیں گے۔
وزیر خارجہ کا کہنا ہے کہ پاکستان اور بیلجیئم میں جمہوریت اور باہمی احترام کے ساتھ دوستانہ مراسم ہیں، دو طرفہ سیاسی، اقتصادی، تجارتی، ثقافتی، تعلیمی اور عوامی روابط میں اضافہ ہوا۔
انہوں نے کہا کہ بیلجیئم یورپی یونین میں پاکستان کا پانچواں بڑا تجارتی شراکت دار ہے، دو طرفہ تجارت کا موجودہ حجم 10.883 بلین امریکی ڈالر ہے۔ ہمارے درمیان روابط کے فروغ اور دو طرفہ تعلقات مزید مستحکم ہوں گے۔
