ARYNews.tv | Urdu – Har Lamha Bakhabar

Tag: Development Program

  • پنجاب کے ترقیاتی پروگرام میں غیر معمولی اضافہ

    پنجاب کے ترقیاتی پروگرام میں غیر معمولی اضافہ

    لاہور: وزیر اعلیٰ پنجاب سردار عثمان بزدار کا کہنا ہے کہ صوبے میں ترقیاتی پروگرام کا حجم 645 ارب روپے تک بڑھایا گیا، یہ صوبے کی تاریخ کا سب سے بڑا ڈویلپمنٹ پروگرام ہے۔

    تفصیلات کے مطابق وزیر اعلیٰ پنجاب سردار عثمان بزدار کا کہنا ہے کہ ترقیاتی پروگرام میں غیر معمولی اضافے کا اعزاز ہماری حکومت کو حاصل ہے۔

    وزیر اعلیٰ کا کہنا تھا کہ ترقیاتی پروگرام 22-2021 کے حجم میں 85 ارب روپے کا اضافہ ہوا، اضافے سے ترقیاتی پروگرام کا حجم 645 ارب روپے تک بڑھایا گیا۔

    انہوں نے کہا کہ یہ صوبے کی تاریخ کا سب سے بڑا ڈویلپمنٹ پروگرام ہے، اسکیموں کے آغاز سے مکمل ہونے کا ٹائم فریم مرتب کیا گیا اور سالانہ ترقیاتی پروگرام کے فنڈز کا بروقت اور شفاف استعمال یقینی بنایا گیا۔

    عثمان بزدار کا کہنا تھا کہ پنجاب کے تاریخ ساز ترقیاتی پروگرام پر عملدر آمد کی خود نگرانی کی، فنڈز لیپس کے منفی کلچر کی بھی حوصلہ شکنی کی گئی۔

  • سعودی عرب نے جنگ زدہ یمن میں اسکول و کالجز کا جال قائم کردیا

    سعودی عرب نے جنگ زدہ یمن میں اسکول و کالجز کا جال قائم کردیا

    ریاض: سعودی عرب یمن کے جنگ زدہ علاقوں میں نئی نسل کی تعلیم و تربیت کے لیے کوشاں ہے، سعودی عرب کی جانب سے یمن میں اسکول و کالجز کا جال قائم کردیا گیا۔

    سعودی ویب سائٹ کے مطابق سعودی عرب نے یمن کی تعمیر و ترقی کے پروگرام کے ضمن میں 22 ماڈل اسکول قائم کیے ہیں جو سائنسی لیباریٹریوں سے لیس ہیں۔

    سعودی عرب کی جانب سے کمپیوٹر لیبز قائم کی گئیں، مختلف کھیلوں کے لیے گراؤنڈ بنائے گئے اور طلبہ و طالبات کے لیے اسکول بیگ، اسٹیشنری، کورس کی کتابیں، کرسیاں، بینچز اور میزیں فراہم کی گئی ہیں۔

    سعودی عرب نے مشرقی یمن کے المہرۃ صوبے میں 8 نئے اسکول کھولے ہیں، ان میں 10 ہزار 952 طلبہ و طالبات نے داخلے لیے ہیں، صوبے ارخبیل سقطری، حجۃ اور حضر موت میں بھی 2، 2 اسکول قائم کیے گئے ہیں۔

    اسی طرح عدن میں 4 اور تعز میں ایک اسکول کھولا گیا ہے۔

    سعودی عرب کی جانب سے یمن میں اسکولوں اور جامعات کے طلبہ و طالبات کی آمد و رفت کے لیے ٹرانسپورٹ سسٹم بھی مہیا کیا گیا ہے، المہرۃ میں 12 بسیں، سقطری میں 8، مارب میں 4 بسیں اور عدن میں 2 بسوں کا انتظام کیا گیا ہے۔

  • بھاشا، مہمند اور داسو ڈیم منصوبوں کو آگے بڑھایا جا رہا ہے، خسرو بختیار

    بھاشا، مہمند اور داسو ڈیم منصوبوں کو آگے بڑھایا جا رہا ہے، خسرو بختیار

    اسلام آباد : وفاقی وزیر منصوبہ بندی مخدوم خسرو بختیار نے کہا ہے کہ آئندہ مالی سال کا قومی ترقیاتی پروگرام 1837 ارب روپے کا ہوگا، بھاشا، مہمند اور داسو ڈیم منصوبوں کو آگے بڑھایا جا رہا ہے۔

    ان خیالات کا اظہار انہوں نے حکومتی عہدیداران کے ہمراہ مشترکہ پریس کانفرنس سے خطاب کرتے ہوئے کیا، وزیر منصوبہ بندی مخدوم خسرو بختیار نے کہا کہ اگلے مالی سال کا وفاق کا پبلک سیکٹر ترقیاتی پروگرام925ارب ہوگا۔

    اس کے علاوہ قومی ترقیاتی پروگرام1837ارب روپے کا ہوگا، جبکہ جی ڈی پی گروتھ کاہدف4فیصد ہے، وزیرمنصوبہ بندی کا مزید کہنا تھا کہ تمام علاقوں کو مساوی طریقے سے ترقی یافتہ بنانا چاہتے ہیں۔

    بلوچستان کی ترقی حکومت کی اولین ترجیح ہے، گوادر کو نیشنل گرڈ سے منسلک کر رہے ہیں۔ بجٹ سے متعلق انہوں نے بتایا کہ آئندہ مالی سال کیلئے زراعت کا بجٹ15سے20فیصد زیادہ رکھا گیا ہے۔

    اس کے علاوہ نالج اکنامی کی بڑھوتی کیلئے مربوط اور جامع پروگرام لے کرآرہے ہیں، اگلے مالی سال کے پی ایس ڈی پی میں علاقائی مساوی ترقی پر توجہ دی جائے گی، گلگت بلتستان کی ترقی کیلئے آئندہ مالی سال میں17بلین روپے رکھےگئے ہیں۔

    انہوں نے بتایا کہ بھاشا، مہمند اور داسو ڈیم منصوبوں کو آگے بڑھا رہے ہیں۔ وزیر منصوبہ بندی نے پلانٹ فار پاکستان منصوبے کے بارے میں بتایا کہ حکومت 10 ارب درختوں کی شجر کاری کیلئے 10 ارب روپے مختص کر رہی ہے۔