اسلام آباد: وزیر اعظم عمران خان سے ڈائریکٹر جنرل اینٹی کرپشن اعجاز حسین شاہ کی ملاقات ہوئی جس میں وزیر اعظم نے ملک بھر میں بدعنوان اور کرپٹ عناصر کے خلاف کارروائیاں تیز کرنے کی ہدایت کردی۔
تفصیلات کے مطابق وزیر اعظم عمران خان سے ڈائریکٹر جنرل اینٹی کرپشن اعجاز حسین شاہ کی ملاقات ہوئی۔ ملاقات میں وزیر اعلیٰ پنجاب سردار عثمان بزدار بھی موجود تھے۔
اس موقع پر وزیر اعظم کا کہنا تھا کہ کرپشن کا خاتمہ حکومت کی اولین ترجیح ہے، کرپشن کے ناسور نے نہ صرف ملکی معیشت کو ناقابل تلافی نقصان پہنچایا بلکہ اداروں کو بھی تباہ کیا ہے۔
وزیر اعظم کا کہنا تھا کہ کرپشن نے عام آدمی کی زندگی کو متاثر کیا ہے، کرپشن اور ترقی کا سفر ایک ساتھ نہیں چل سکتا۔
وزیر اعظم نے کہا کہ کرپشن کے خاتمے اور بدعنوان عناصر کے خلاف بلا تفریق و امتیاز کارروائی کو ایک مشن سمجھ کر پورا کیا جائے، حکومت اس ضمن میں ہر ممکن تعاون فراہم کرے گی۔
اس سے قبل وزیر اعظم نے اپنی ایک ٹویٹ میں کہا تھا کہ منی لانڈرنگ کرنے والے افراد سے اگر سوال پوچھا جائے تو ان کا رد عمل یہ ہوتا ہے کہ وہ غصے میں لال پیلے ہو جاتے ہیں۔
انہوں نے فرانسیسی ماہر معاشیات فریڈرک باسٹائٹ کا ایک اقتباس شیئر کیا تھا جس میں باسٹائٹ کہتا ہے کہ جب کسی سماج میں ایک طبقے کے لیے لوٹ مار معمول کا کام بن جاتا ہے تو وقت کے ساتھ ساتھ وہ اپنی لوٹ مار کے لیے قانون کا سہارا بھی لے لیتے ہیں۔
