واشنگٹن: آئی ایس پی آر کے ڈائریکٹر جنرل میجرجنرل عاصم سلیم باجوہ واشنگٹن پہنچ گئے۔
ڈی جی آئی ایس پی آر عاصم سلیم باجوہ سولہ نومبر سے آرمی چیف جنرل راحیل شریف کے دورہ امریکہ کے حوالے سے امریکی حکام سے ملاقاتیں کریں گے، آرمی چیف جنرل راحیل شریف کو دورے کی دعوت امریکی فوج کے سربراہ نے دی تھی۔ ذرائع کے مطابق جنرل راحیل شریف کے دورہ امریکہ پر دونوں ممالک کی افواج کے سربراہوں کے درمیان افغانستان سے امریکی فوج کے انخلا پر بات ہوگی۔
اسلام آباد: ڈی جی آئی ایس پی آرکا کہنا ہے کہ دتہ خیل اور دیگرعلاقوں میں چھپے دہشتگرد پہنچ سے باہر نہیں ہیں ،شدت پسندوں کا آخرتک پیچھا کیا جائے گا۔
ڈی جی آئی ایس پی آرمیجر جنرل عاصم سلیم باجوہ نے اپنے ٹویٹ میں کہا ہے کہ شمالی وزیرِستان میں دہشت گردوں کے خلاف پاک فوج کی موثر کارروائیاں جاری ہے، تازہ کارروائی میں آرمی ایوی ایشن، فضائیہ کی جانب سے شدت پسندوں کونشانہ بنایا گیا، جس میں شدت پسندوں کو بھاری نقصان پہنچنے کی اطلاعات ہیں۔
ڈی جی آئی ایس پی آرکے مطابق دتہ خیل اوردیگرعلاقوں میں چھپے دہشت گرد پہنچ سے باہر نہیں، شدت پسندوں کا آخرتک پیچھا کیا جائے گا، شمالی وزیرستان میں دہشتگردوں کے خلاف جاری آپریشن ضربِ عضب میں کامیابیوں کا سلسلہ جاری ہے، دہشتگرد فرارکا راستہ تلاش کر رہے ہیں۔
واضح رہے کہ شمالی وزیرستان میں دہشت گردوں کے خلاف آپریشن گیارہ جون کو کراچی میں جناح انٹرنیشنل ایئرپورٹ پر حملے کے بعد پاک فوج نے پندرہ جون کو آپریشن”ضربِ عضب ” کے نام سے شروع کیا گیا تھا۔
آپریشن ضربِ عضب میں اب تک سیکڑوں شدت پسند ہلاک کیے جاچکے ہیں اورشمالی وزیرستان کے کئی علاقے دہشت گردوں سے پاک کر الیے گئے ہیں جبکہ دہشت گردوں کے اسلحہ ڈپو اورکئی ٹھکانوں کو بھی تباہ کیا جا چکا ہے۔
راولپنڈی: ڈی جی آئی ایس پی آرکاکہناہے کہ شدت پسندوں کی پاکستان میں منظم حملے کرنے کی صلاحیت ختم کردی ہے۔
طالبان کی پاکستان میں منظم حملوں کی صلاحیت ختم کردی،طالبان کی دوسرے درجے کی قیادت ماری گئی یاگرفتارہوگئی۔ یہ کہناتھا ڈی جی آئی ایس پی آر میجرجنرل عاصم باجوہ کا، برطانوی خبررساں ایجنسی سے انٹرویو کے دوران پاک فوج کے ترجمان نے اس تاثر کوبھی غلط قراردیاکہ شدت پسند دوبارہ سر اٹھا رہے ہیں، طالبان بکھر جانے کے بعد ادھر ادھر حملے کر رہے ہیں۔
میجرجنرل عاصم باجوہ نے بتایا کہ ملا فضل اللہ اپنے ساتھیوں سمیت آپریشن ضربِ عضب شروع ہونے سے پہلے ہی فرار ہوچکا ہے اور وہ کنڑ میں موجود ہے، ہم نے افغان حکومت سے اس کی حوالگی کی بارہا درخواست کی ہے۔
ڈی جی آئی ایس ایس پی آرکاکہناتھا کہ فوج سیاسی بحران میں کسی فریق کی حمایت نہیں کر رہی نہ فوج سیاست میں ملوث ہے،شروع سےیہی مؤقف ہےکہ یہ سیاسی مسئلہ ہےسیاسی طورپر ہی حل ہوناچاہئے،انہوں نے یہ بھی کہا کہ فوج کسی فریق کا ساتھ دینے کی متحمل نہیں ہو سکتی کیونکہ یہ پوری قوم کی فوج ہے، پہلے کسی فریق کی حمایت کی نہ آئندہ کریں گے۔
راولپنڈی: ڈی جی آئی ایس پی آرکا کہنا ہے کہ ملالہ پرحملے کرنے والے دہشت گردوں کے گروہ کوگرفتارکرلیا گیا ہے۔
ڈی جی آئی ایس پی آرمیجرجنرل عاصم سلیم باجوہ نےکہا کہ ملالہ پرحملہ کرنےوالاشوریٰ نامی گروہ مولوی فضل اللہ کی ہدایت پرعمل کرتاتھاجنہیں گرفتارکرلیاگیاہے، انہوں نے بتایا کہ مولوی فضل اللہ پاکستان میں ہونے والے حملوں میں بھی ملوث ہے۔
ڈی جی آئی ایس پی آر نے بتایا کہ نہ صرف زیارت ریذیڈنسی پرحملہ کرنے والے ملزمان کوگرفتارکیا گیا ہےبلکہ کوئٹہ اورڈاکیارڈ پرحملے بھی ناکام بنائےگئے ہیں، پاک فوج کے ترجمان نے حملے ناکام بنانے کوانٹیلی جنس کی اہم کاوش قرار دیا۔
ڈی جی آئی ایس پی آر کا یہ بھی کہنا تھا کہ پاک فوج واضح طورپرملک میں جمہوریت کی حمایت کرچکی ہے،پاک فوج کوسیاست میں ملوث کرنے پرافسوس ہوا،جبکہ مسلح افواج سیلاب زدگان کی مدد کیلئے متاثرہ علاقوں میں موجود ہے اورریلیف کی ہرممکن کاوشیں جاری ہیں۔
جنرل عاصم باجوہ کاکہناتھا کہ آپریشن ضرب ِعضب کامیابی سے جاری ہے، آپریشن دو محاذوں پر چل رہا ہے اوراب تک دتہ خیل اور میران شاہ کلیئر ہو چکے ہیں، شمالی وزیرستان کو غیر ملکی دہشتگردوں نے یرغمال بنایا ہواتھا، جبکہ آپریشن ضربِ عضب کے ساتھ ساتھ پورے ملک میں دہشت گردوں کے خلاف کارروائی کے لئے ایک میکینزم بنایا گیا تھا اوراب تک 134خطرناک دہشتگردپکڑے جاچکے ہیں۔
فوج ہر جگہ الرٹ ہے، آخری دہشتگرد کے خاتمے یا پکڑے جانے تک آپریشن جاری رہے گا، ابھی تک 2200 سے زائد آپریشن کئے جا چکے ہیں اور یہ انٹیلیجنس کی کامیابی ہے کہ بعد میں کئے گئے آپریشن میں تخریب پسن عناصر بہت بڑی تعداد میں پکڑے گئے ہیں۔
اسلام آباد میں میڈیا سے گفتگو کرتے ہوئے چوہدری نثار علی خان نے کہا کہ میں آئی ایس پی آر کے بیان کی حمایت کرتا ہوں۔
انہوں نے کہا کہ ہم نے فوج کو کبھی نہیں کہا کہ وہ ہمارے ضامن بنیں
ان کا کہنا تھا کہ پاکستان کی فوج بالکل غیر سیاسی ہے، آرمی چیف سے ملاقات پر ایک پیغام کو غیرآئینی لبادہ پہنادیاگیا۔
ان کا مزید کہنا تھا کہ آئی ایس پی آر نے سہولت کار کا لفظ استعمال کیا ہے جو کہ آئین کے دائرے میں آتا ہے۔
چہودری نثار نے یہ بھی کہا کہ ریڈ زون کی حفاطت کی ذمہ داری آرٹیکل 245 کے تحت فوج کے حوالے ہے۔
ان کا یہ بیان ڈی جی آئی ایس پی آر عاصم سلیم باجوہ کی جانب سے سماجی رابطے کی ویب سائٹ’ٹوئٹر‘ پر دئے گئے پیغام کے بعد آیا جس میں انہوں نے کہا کہ ’’حکومت نے فوج کو حالی سیاسی بحران میں سہولت کار کے فرائض انجام دینے کا کہا ہے‘‘۔
لاہور : پاک فوج کے ترجمان میجر جنرل عاصم سلیم باجوہ نےکہا ہےمیر علی میں بھی زمینی آپریشن شروع کردیا گیا ہے۔
پاک فوج کے امدادی کیمپ میں میڈیا سے گفتگو کرتے ہوئے میجر جنرل عاصم سلیم باجوہ نے کہا کہ وزیرستان میں ملکی اور غیر ملکی اسلحہ کے ذخائر سے اندازہ ہوتا ہے کہ طالبان مذاکرات میں سنجیدہ نہیں تھے، میرانشاہ میں مزاحمت ہوئی، میر علی میں تازہ جھڑپ میں طالبان کمانڈر سمیت سات دہشت گرد مارے گئے۔
پاک فوج کے ترجمان میجر جنرل عاصم سلیم باجوہ نے کہا کہ ابتک شمالی وزیرستان متاثرین میں ایک ارب روپے کی امدادی اشیاءتقسیم کی جاچکی ہیں، تاہم اب متاثرین کو جوتوں، کپڑوں اور پانی کی ضرورت ہے، اٹھائیس غیر سرکاری تنظیموں میں سے پانچ کو کام کی اجازت دے دی گئی ہے۔
ڈی جی آئی ایس پی آر نے کہا کہ علی حیدر گیلانی اور دوسرے مغویوں کے بارے میں کچھ کہنا قبل از وقت ہوگا، افغانستان کی جانب سے گولہ باری پر بات چیت جاری ہے تاہم پاکستان کے پاس تمام آپشنز موجود ہیں، پاک فوج کے ترجمان نے کہا کہ آپریشن شروع ہونے سے پہلے کوئی دہشت گرد افغانستان نکل چکا ہو تو الگ بات اب فوج نے انہیں ہر طرف سے گھیر لیا ہے۔
