لاہور : اندرون موچی دروازے میں بارودی مواد پھٹنے سے دومنزلہ مکان زمین بوس ہوگیا، گیارہ گھنٹے کے ریسکیو آپریشن کے دوران نوجوان لڑکے کی لاش نکال لی گئی جبکہ ملبے سے 11 ناکارہ دستی بم بھی برآمد ہوئے ہیں۔ حادثے میں خواتین سمیت 8افراد زخمی ہوئے۔
تفصیلات کے مطابق لاہور کے علاقہ اندرون موچی گیٹ میں نماز فجر کے وقت دو منزلہ مکان زور دار دھماکے سے اچانک زمین بوس ہو گیا جس سے ملحقہ دو گھروں کی چھتیں بھی گر گئیں۔
حادثے میں خواتین سمیت 8افراد کو نکال کر میو ہسپتال منتقل کیا گیا جہاں ایک شخص زخموں کی تاب نہ لاتے ہوئے دم توڑ گیا ہے جبکہ دیگر کی حالت خطرے سے باہر ہے لمحہ بہ لمحہ حالات اس وقت تبدیل ہوتے دکھائی دئیے جب ملبے سے ناکارہ دستی بم نکلنے کا سلسلہ شروع ہوا۔
ریسکیو آپریشن میں ریسکیو 1122 کے ساتھ، پولیس، بم ڈسپوزل اسکواڈ، سول ڈیفنس ، سی ٹی ڈی اور فارینزک ٹیموں نے حصہ لیا تو اس دوران ملبے سے 11 ناکارہ دستی بم برآمد ہوئے۔
دھماکے کی تصدیق کرتے ہوئے ڈی آئی جی آپریشنز ڈاکٹر حیدر اشرف کا کہنا تھا کہ واقعے کی تحقیقات جاری ہیں واقعہ کا مقدمہ سی ٹی ڈی درج کرے گی۔
اندرون لاہور کی تنگ گلیوں کے باعث ریسکیو 1122 کوریسکیو آپریشن میں شدید مشکلات کا سامنا رہا 11 گھنٹے کی جدوجہد کے بعد علی افضال نامی 22 سالہ لڑکے کی لاش نکال لی گئی۔
اطلاعات کے مطابق 22 مرلے پر مشتمل مکان میں 5 خاندان رہائش پذیر تھے، حادثے میں 17 افراد زخمی ہوئے جن میں 4 کی حالت تشویشناک بتائی جا رہی ہے۔
