گوادر : حق دو تحریک کے سربراہ مولانا ہدایت رحمان نے دھرنا ختم کرنے کا اعلان کردیا، حکومت نے مولانا کا نام فورتھ شیڈول سے خارج کردیا۔
تفصیلات کے مطابق گوادر میں ایک ماہ سے زائد عرصے سے جاری ماہی گیروں کے دھرنے کے حوالے سے حکومتی مذاکراتی کمیٹی اور مولانا ہدایت الرحمان کی بات چیت میں اہم پیش رفت ہوئی ہے۔
وزیراعلیٰ بلوچستان عبدالقدوس بزنجو اور حق دو تحریک کے سربراہ مولانا ہدایت الرحمان کے مابین ہونے والے معاہدے پر دستخط کردیئے گئے۔
معاہدے کے بعد حق دو تحریک کے سربراہ مولانا ہدایت رحمان نے دھرنا ختم کرنے کا باقاعدہ اعلان کردیا ہے، جبکہ مولانا ہدایت الرحمان کا نام فورتھ شیڈول سے خارج کرنے کا نوٹیفکیشن بھی جاری کردیا گیا ہے۔
اس موقع پر وزیراعلیٰ بلوچستان عبدالقدوس بزنجو نے دھرنے کے شرکا سے خصوصی خطاب کیا ان کا کہنا تھا کہ میں نے اسمبلی میں پہلا خطاب کاروبار کھولنے سےمتعلق کیا تھا۔
انہوں نے کہا کہ ہماری حکومت کا کام روزگار چھیننا نہیں بلکہ روزگار فراہم کرنا ہے، حق دو تحریک کے تمام مطالبات جائز اور آئینی ہیں، آپ کے مطالبات پر جلد عمل درآمد کیا جائے گا۔
اس سے قبل گوادر میں وفاقی وزیر زبیدہ جلال اور صوبائی وزراء کے ہمراہ میڈیا سے گفتگو کرتے ہوئے اسدعمر نے کہا کہ وعدے صرف دھرنے سے اٹھانے کیلئے نہیں کیے جا رہے بلکہ وزیراعظم یقین رکھتے ہیں کہ لوگوں کو ان کا حق ملنا چاہیے۔
