Tag: Diet plan

  • بچے کی پیدائش کے بعد نئی ماؤں کے لیے ڈائٹ پلان کیا ہونا چاہیے؟

    بچے کی پیدائش کے بعد نئی ماؤں کے لیے ڈائٹ پلان کیا ہونا چاہیے؟

    پہلی بار ماں بننے والی خواتین کیلیے انتہائی ضروری ہے کہ بچے کی پیدائش کے بعد ڈائٹ پلان میں غذائیت والی خوراک کا انتخاب کریں۔

    ہر عورت کیلیے پہلی بار ماں بننے کا احساس انتہائی خوشگوار ہوتا ہے لیکن زچگی سے پہلے اور بعد میں ماں کو جو پیچیدگیاں اور طبی مسائل درپیش ہوتے ہیں ان پر قابو پانا بھی انتہائی ضروری ہے۔

    اس حوالے سے اے آر وائی ڈیجیٹل کے پروگرام گڈ مارننگ پاکستان میں ڈاکٹر عائشہ نے خصوصاً پہلی بار ماں بننے والی خواتین کو صحت سے متعلق مفید مشورے دیے۔

    انہوں نے بتایا کہ بچے کی پیدائش کے بعد نئی ماؤں کی صحت کے لیے ڈائٹ پلان میں اچھی خوراک اور بہترین غذائیت بہت اہمیت کی حامل ہے۔

    حمل کے دوران ماں کئی پیچیدہ مراحل سے گزرتی ہے، بچے کی پیدائش کے بعد وہ جسمانی طور پر کافی کمزور ہو جاتی ہے، اس وقت ماں کو اپنے کھانے پینے پر کافی توجہ دینے کی ضرورت ہوتی ہے۔

    ڈاکٹر عائشہ کا کہنا تھا کہ بچے کی پیدائش کا عمل عورت کو کافی حد تک کمزور کردیتا ہے اس کے بعد بچے کی دیکھ بھال کیلیے ماؤں کی نیند اور کھانے پینے کا شیڈول بھی متاثر ہوتا ہے جو ان کی صحت پر منفی اثرات مرتب کرتا ہے۔

    انہوں نے نئی ماؤں کو ہدایت کی کہ اگر آپ کو کولڈ ڈرنکس، چاکلیٹ اور چائے کافی وغیرہ پینے کا شوق ہے جس میں کیفین کی زیادہ مقدار ہوتی ہے تو انہیں فوری طورپر روک دیں خاص طور پر جب تک آپ کا بچہ ماں کا دودھ پی رہا ہے۔

    ان کا کہنا تھا کہ جب ماں صحت مند رہے گی، تو بچہ بھی صحت مند رہے گا اس کیلیے ضروری ہے کہ مائیں دودھ، دہی پھل اور گوشت کا استعمال لازمی کریں کیونکہ جو آپ کھائیں گی اس کا اثر بچے کی صحت پر لامحالہ پڑے گا۔

  • بالوں کی سفیدی : اس ڈائیٹ پلان پر عمل لازمی کریں

    بالوں کی سفیدی : اس ڈائیٹ پلان پر عمل لازمی کریں

    عمر کے ساتھ بالوں کا سفید ہونا معمول کی بات ہے لیکن اگر بالوں کی سفیدی جوانی میں ہی ظاہر ہونا شروع ہوجائیں تو وہ فکر میں مبتلا کردیتے ہیں۔

    بالوں کی سفیدی روکنے کے لیے مختلف اقسام کی ادویات اور تیل وغیرہ کا استعمال کثرت سے کیا جاتا ہے۔ اس کے علاوہ کچھ گھریلو نسخوں سے بھی بالوں کو سفید ہونے سے روکا جاسکتا ہے۔

    اے آر وائی نیوز کے پروگرام باخبر سویرا میں معروف ڈرماٹولوجسٹ ڈاکٹر کاشف احمد ملک نے ناظرین کو بالوں کی سفیدی سے متعلق احتیاطی تدابیر اور مفید مشوروں سے آگاہ کیا۔

     

    View this post on Instagram

     

    A post shared by ARY News (@arynewstv)

    انہوں نے بتایا کہ بالوں کی سفیدی کی دو بڑی وجوہات ہوتی ہیں پہلی جینیٹک پرابلم یعنی خاندانی اثرات اور دوسری جسم میں کاپر اور زنک کی کمی اس کی اہم وجہ ہے۔

    بالوں کی سفیدی کیلیے ڈائیٹ پلان

    ان کا کہنا تھا کہ سفید بال بڑھنے سے روکنے میں انسان کی خوراک اہم کردار ادا کرتی ہے، اس مسئلے کے حل کیلیے ڈائٹ پلان پر عمل کرنا ضروری ہے جس میں چقندر، کلیجی، ساگ، لوبیا دالیں دہی دودھ اور مچھلی شامل ہیں۔ یہ تمام چیزیں بہترین ہیئر فوڈ کہلاتی ہیں، ان اشیاء میں قدرتی طور پر کاپر اور زنک وافر مقدار میں موجود ہوتے ہیں۔

    ڈاکٹر کاشف نے کہا کہ ذہنی پریشانی (ٹینشن) کی وجہ سے بھی بال جلدی سفید ہوجاتے ہیں، ساری بیماریوں کی جڑ اسٹریس ہے، اس کے علاوہ وٹامن بی-6، بی-12، بایوٹین، وٹامن ڈی، یا وٹامن ای کی کمی بھی قبل از وقت بال سفید ہونے کی وجہ بن سکتی ہے۔

    ان کا مزید کہنا تھا کہ سفید بالوں سے بچاؤ کیلیے سی فوڈ کو زیادہ ترجیح دیں اسے سارا سال بھی کھا سکتے ہیں لیکن اعتدال بھی ضروری ہے۔ اس کے علاوہ اپنے معالج کے مشورے سے اومیگا تھری کی ٹیبلیٹس بھی لے سکتے ہیں۔

    ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
    نوٹ : مندرجہ بالا تحریر معالج کی عمومی رائے پر مبنی ہے، کسی بھی نسخے یا دوا کو ایک مستند معالج کے مشورے کا متبادل نہ سمجھا جائے۔

  • ماہ رمضان وزن کم کرنے کا بہترین موقع، ڈائٹ پلان پر عمل کریں

    ماہ رمضان وزن کم کرنے کا بہترین موقع، ڈائٹ پلان پر عمل کریں

    ماہِ رمضان چند دنوں بعد جلوہ افروز ہوگا جس کا انتظار ہر مسلمان کو ہوتا ہے اس مبارک مہینے میں رکھے جانے والے روزوں کی برکت سے لوگ بہت سی بیماریوں سے محفوظ بھی رہتے ہیں۔

    ایک جانب تو عبادات کا زور ہوتا ہے تو دوسری طرف سحری اور افطاری میں بہت سی ایسی غذائیں استعمال کی جاتی ہیں جو ہماری صحت کیلئے بلکل بھی فائدہ مند نہیں ہوتیں اور وزن میں اضافے کا باعث بنتی ہیں۔

    اس مہینے میں وزن کم کرنے کیلئے کیا ڈائٹ پلان مرتب کیا جائے اس حوالے سے ڈاکٹر فرح صادق نے ایک پروگرام میں تفصیلی ذکر کیا کہ کون سی غذائیں وزن کم کرنے میں مددگار ثابت ہوسکتی ہیں۔

    انہوں نے بتایا کہ ان دنوں تیزابیت کا مسائل بہت زیادہ ہو جاتے ہیں یا گیس بننا شروع ہوجاتی ہے یا طبیعت میں بھاری پن محسوس ہوتا ہے کیوں کہ بہت سے لوگ کھانا اور تلی ہوئی اشیاء کھا کر لیٹ جاتے ہیں یا کھانے کے بعد چہل قدمی نہیں کرتے۔

    سحر اور افطار میں کھانوں کا شیڈول ہفتے کے آغاز پر ہی کرلیں اور کوشش کریں کہ غذائیت سے بھرپور کھانے ڈائٹ پلان میں شامل کریں جن میں پھل اور سبزیوں سمیت پروٹین والی غذائیں لازمی شامل کریں۔

    سحری میں کیا کھائیں؟

    ڈاکٹر فرح صادق نے بتایا کہ سحری میں سب سے پہلے ایک گلاس پانی یا لسی پیئیں اس کے بعد کوئی ایسی چیز کھائیں جس جو پروٹین سے بھرپور ہو مثال کے طور پر ابلا ہوا انڈا، دہی یا چیز وغیرہ۔

    وزن بڑھنے کا تعلق میٹھی اشیاء سے ہوتا یے اس لیے چینی سے دور رہیں، ان کے علاوہ کاربوہائیڈریٹس والی غذائیں جیسا کہ دلیا، براؤن چاول، روٹی اور ڈرائی فروٹس وغیرہ کھائیں ان کھانوں سے دیر تک پیٹ بھرے رہنے کا احساس ہوتا ہے۔ اس کے علاوہ بیکری آئٹمز سے دور رہیں۔

    افطار میں کیا کھائیں؟

    افطاری ہو یا سحری کھجور دونوں وقت استعمال کرسکتے ہییں اور ساتھ کوئی اور موسمی پھل بھی کھائیں، ان کے ساتھ ساتھ آلو سے بنی اور بغیر تلی کوئی چیز استعمال کریں۔

    ان چیزوں کے علاوہ سلاد کا استعمال بھی کافی مفید ہے جس میں ابلے آلو شامل ہوں۔ کوشش کریں کہ رمضان میں پانی کا زیادہ سے زیادہ استعمال کیا جائے تا کہ جسم میں پانی کی کمی نہ ہو۔

    تاہم افطار کے بعد پانی پینے کا جب بھی موقع ملے ضرور پیئیں۔ تلی ہوئی اشیاء اور کولڈ ڈرنکس سے جتنا ممکن ہو سکے گریز کریں اور ناریل کے پانی سمیت جوس پینے کو ترجیح دیں اور 30 منٹ روزانہ ورزش لازمی کریں۔

  • ایئر فریئر میں بنائیں انڈے کی ایک مزیدار ڈش

    ایئر فریئر میں بنائیں انڈے کی ایک مزیدار ڈش

    کھانوں کو تیل میں ڈبوئے بغیر انہیں فرائی کرنے کے لیے آج کل ’ایئر فرئیر‘ ایک مقبول ترین طریقہ کار بن گیا ہے۔

    ایسے لوگ جو کم تیل کی غذائیں اپنے ڈائٹ پلان میں شامل کرنا چاہتے ہیں تو ایئر فرائی پکوان آپ کا بہترین انتخاب ہوسکتے ہیں۔

    اگر آپ مزیدار، کرسپی اور صحت مند ڈش ایئر فریئر میں بنانے کی ترکیب ڈھونڈ رہی ہیں تو اب ہم نے آپ کی یہ مشکل آسان کردی ہے۔

    اے آر وائی ڈیجیٹل کے پروگرام گڈ مارننگ پاکستان میں شوبز انڈسٹری کی معروف اداکارہ شرمین علی  نے ’ایئر فرئیر ‘ میں انڈے بنانے کی آسان ترکیب بیان کی۔

    انہوں نے بتایا کہ اس کو بنانے کیلئے زیادہ چیزوں کی بھی ضرورت نہیں پڑتی کیونکہ بیشر اشیاء اکثر گھروں میں پہلے سے ہی موجود ہوتی ہیں۔

    اجزاء :

    آلو 5 سے 6 عدد، انڈے 4 سے 5 عدد، مشروم، کٹی ہوئی پیاز، کوکنگ آئل، کریم ، چیز اور سفید تل

    ترکیب :

    اداکارہ شرمین علی نے بتایا کہ اسے مکمل تیار کرنے میں زیادہ سے زیادہ 30 سے 40 منٹ لگیں گے، پہلے آلوؤں کو باریک ٹکڑوں میں کاٹ کر ابال لیں، ٹکڑے جتنے چھوٹے ہوں گے، ایئر فریئر انہیں اتنی ہی تیزی سے پکائے گا۔

    سب سے پہلے فرائنگ پین میں آلو کے بھرتے کی ایک تہہ اور اس کے اوپر مشروم کی تہہ بھی لگا دیں، اس کے بعد کٹی ہوئی پیاز کے باریک گول گول ٹکڑے بھی بچھا دیں۔

    اداکارہ شرمین علی نے کہا کہ پھر اس کے اوپر کوکنگ آئل چھڑک کر اسے دس منٹ تک پکانا ہے اس کے بعد اسے مکس کرکے بغیر پھنینٹے ہوئے انڈے توڑ کر ڈالیں اور چمچ سے اس کے اوپر پھیلادیں۔

    یہ کام کرنے کے بعد اس کے اوپر کریم ، چیز اور سفید تل ڈالنے ہیں، آپ کا ایئر فریئر ایگ تیار ہے، یہ ایسی چیز ہے جسے آپ ناشتے میں یا برنچ میں بھی لے سکتے ہیں۔

  • زیادہ وزن والے بچوں کو کیسی غذائیں دینی چاہیئں؟

    زیادہ وزن والے بچوں کو کیسی غذائیں دینی چاہیئں؟

    ہمارے مشاہدے میں اکثر یہ بات سامنے آتی ہے کہ کچھ بچے بہت چھوٹی عمر میں ہی موٹاپے کا شکار ہوجاتے ہیں جس کی بڑی وجوہات میں جنیاتی عوامل، جسمانی سرگرمیوں کی کمی یا غیر صحت بخش کھانے اور ضرورت سے زیادہ کھانا بھی شامل ہے۔

    اس حوالے سے اے آر وائی ڈیجیٹل کے پروگرام گڈ مارننگ پاکستان میں ڈاؤ یونیورسٹی اسپتال سے تعلق رکھنے والی بچوں کی ماہر امراض ڈاکٹر سیما آفتاب نے بتایا کہ بچوں کا وزن کا بڑھنا طبی عوامل جیسے ہارمونل مسئلے کی وجہ سے بھی ہوسکتا ہے لیکن ایسا بہت کم ہی ہوتا ہے۔

    انہوں نے کہا کہ جن بچوں کے گھر کے تمام افراد کا وزن زیادہ ہوگا اس بچے کا وزن بڑھنے کا بھی امکان زیادہ ہوتا ہے لیکن اس میں بھی اہم کردار اس بچے کی روزانہ کی کھانے پینے اور رہن سہن کی عادات کا ہوتا ہے۔

    ماہر اطفال نے بتایا کہ باقاعدگی سے زیادہ کیلوریز والی غذائیں کھانا جیسے فاسٹ فوڈ، سینکی ہوئی اشیاء، اسنیکس وغیرہ کھانے سے بھی آپ کے بچے کا وزن بڑھ سکتا ہے۔ اس کے علاوہ کینڈیز، چاکلیٹس اور میٹھے مشروبات بھی وزن بڑھانے کی ایک بڑی وجہ مانے جاتے ہیں۔

    ان کا کہنا تھا کہ موٹے بچوں کو زیادہ دیر بھوکا رکھنا کہ اس سے موٹاپا کم ہوجائے گا بہت نقصان دہ عمل ہے۔ اس کیلئے ڈاکٹر کے مشورے سے بچے کا ڈائیٹ پلان بنائیں۔

    ڈاکٹر سیما آفتاب نے بتایا کہ اس معاملے میں چند میڈیکل ٹیسٹس آپ کی رہنمائی کرسکتے ہیں جن میں بچوں کا ہارمون کا ٹیسٹ کرانا بھی ضروری ہے اس کے علاوہ ایسے بچوں میں تھائی رائیڈ کا مسئلہ بھی پیدا ہوسکتا ہے اس لیے والدین کو چاہیے کہ بچوں کے موٹاپے کو آسان ہرگز نہ لیں۔

  • وہ غذا جو وزن کنٹرول میں رکھے اور توانائی بھی فراہم کرے

    وہ غذا جو وزن کنٹرول میں رکھے اور توانائی بھی فراہم کرے

    معروف اداکاراؤں حنا خواجہ اور نازش جہانگیر نے وزن کنٹرول میں رکھنے کا ڈائٹ پلان بتا دیا۔

    تفصیلات کے مطابق اے آر وائی ڈیجیٹل کے مارننگ شو گڈ مارننگ پاکستان میں اداکارہ حنا خواجہ اور نازش جہانگیر نے شرکت کی۔

    دونوں نے اپنے ویٹ کنٹرول ڈائٹ پلان کے بارے میں بتایا۔

    حنا کا کہنا تھا کہ وہ اپنے کھانے میں نمک اور چینی کا استعمال بے حد کم کرتی ہیں۔

    نازش جہانگیر نے بتایا کہ وہ سب کھاتی ہیں، البتہ اعتدال میں کھاتی ہیں، انہوں نے بتایا کہ وہ ناشتہ نہایت صحت مند اور بھرپور کرتی ہیں جس میں دو انڈے، ایواکاڈو اور دہی شامل ہوتا ہے۔

    نازش کا کہنا تھا کہ ڈائٹ کرتے ہوئے روٹی کبھی بھی نہیں چھوڑنی چاہیئے، وہ جسم کی غذائی ضروریات پوری کرتی ہے اور توانائی فراہم کرتی ہے۔

    حنا خواجہ نے بھی کہا کہ ہمارے یہاں عموماً روٹی کھائی جاتی ہے اور ہمارے جسم کو اس کی عادت ہے لہٰذا روٹی کی مقدار کم کردیں لیکن اسے چھوڑنا نہیں چاہیئے۔

  • موٹاپے سے کیسے جان چھڑائی، سعدیہ امام نے راز کی بات بتادی

    موٹاپے سے کیسے جان چھڑائی، سعدیہ امام نے راز کی بات بتادی

    کراچی : پاکستان شوبز انڈسٹری کی معروف اداکارہ سعدیہ امام نے اپنے مداحوں کو دوبارہ سے اسمارٹ ہونے کا راز بتا دیا۔

    سعدیہ امام جو اپنی شادی اور بیٹی کی پیدائش کے بعد جسمانی طور پر بہت فربہ ہوگئیں تھیں لیکن انہوں نے مخصوص غذا، انتھک محنت اور مستقل مزاجی سے اس موٹاپے کو ختم کردیا۔

    اے آر وائی ڈیجیٹل کے پروگرام گڈ مارننگ پاکستان میں میزبان ندا یاسر سے گفتگو کرتے ہوئے انہوں نے اپنی حالیہ زندگی کے بارے میں اپنے مداحوں کو مکمل تفصیلات سے آگاہ کیا۔

    سعدیہ امام نے کہا کہ جب میری بیٹی پیدا ہوئی تو میں ملک سے باہر تھی اور میرے ساتھ گھر کی کوئی بزرگ یا تجربہ کار خاتون بھی نہیں تھیں جو مجھے ان حالات میں مفید مشورے یا گائیڈ کرتیں۔

    انہوں نے بتایا کہ اس لیے مجھے بہت ساری پریشانیوں کا سامنا کرنا پڑا جس کے نتیجے میں میرا جسم پھیلنا شروع ہوگیا اور اس موٹاپے کی وجہ سے میں ڈپریشن میں جانے والی تھی۔

    سعدیہ امام کا کہنا تھا کہ بالآخر میں نے ایک ڈاکٹر سے مشورہ کیا جنہوں نے مجھے یہ ڈائٹ پلان دیا اور کچھ ورزشیں بتائیں جن پر عمل کرکے آج میں نے موٹاپے پر کافی حد تک قابو پالیا ہے۔

  • سردیوں میں ٹھنڈ اور انفیکشن سے بچاؤ کیلئے مفید مشورے

    سردیوں میں ٹھنڈ اور انفیکشن سے بچاؤ کیلئے مفید مشورے

    سرد موسم کا باقاعدہ آغاز ہوچکا ہے ان دنوں لوگوں میں کھانے پینے کا رجحان بھی کافی حد تک بڑھ جاتا ہے۔ویسے بھی یہ موسم گرمیوں کے مقابلے میں زیادہ کھانے کے لیے بہتر سمجھا جاتا ہے مگر اس میں ہر چیز کو شامل نہیں کیا جاسکتا۔

    ماہرین صحت اس موسم میں صحت مند اور توانا رہنے کیلئے خشک میوہ جات، سبز پتوں والی سبزیوں سمیت خاص موسمی پھلوں کو زیادہ کھانے کی ترغیب دیتے ہیں۔

    اس حوالے سے اے آر وائی نیوز کے پروگرام باخبر سویرا میں ڈاکٹر بلقیس نے ناظرین کو سردیوں میں صحت مند رہنے کیلئے مختلف قیمتی مشورے دیئے۔

    انہوں نے کہا کہ اس موسم میں پانی کا استعمال کم نہیں کرنا چاہئے، چائے اور کافی کا زیادہ استعمال بھی صحت کیلئے نقصان دہ ہے اور اگر چائے پینا ضروری ہے تو اس میں ادرک کا استعمال لازمی کریں۔

    ڈاکٹر بلقیس نے بتایا کہ اس موسم میں وٹامن اے سے بھرپور سبزیوں اور فروٹ کا استعمال لازمی کریں جیسا کہ گاجر خوب کھائیں اور اگر ہوسکے تو اس کا جوس پیئں اور اسے جلد اور بالوں کی جڑوں میں لگائیں۔

    اس کے علاوہ انار، چیکو اور بادام میں وٹامن اے سے بھرپور ہوتے ہیں اس کے علاوہ وٹامن سی کیلئے کینو اوراورنج کلر والے پھل بھی کھائیں، سردیوں کی دھوپ بھی بہت اہمیت کی حامل ہے۔