لاہور : چاروں مکاتب فکر کے رہنماؤں نے حرمین الشریفین کے تحفظ کیلئے حکومت پاکستان سے سعودی عرب کی حکومت کے ساتھ مکمل تعاون کی اپیل کرتے ہوئے فی الفور فوج بھجوانے کا مطالبہ کیا ہے۔
لاہور پریس کلب میں پاکستان علماء کونسل کے زیراہتمام شیعہ سنی دیوبندی اور اہل حدیث علماء نے 15 جولائی کو ملک بھر میں یوم تحفظ حرمین الشریفین منانے کا اعلان کرتے ہوئے کہا ہے کہ ارض حرمین الشریفین کے خلاف ہونے والی مبینہ سازشوں اور تکفیری فتنوں کی سازشوں سے آگاہی کیلئے ملک گیر مہم چلائی جائے گی۔
انہوں نے کہا کہ 14 جولائی کو اسلام آباد میں مختلف مذہبی و سیاسی جماعتوں کا نمائندہ اجلاس بلانے کا فیصلہ کیاہے۔ ان کا کہنا تھا کہ امت مسلمہ میں فتنہ وفساد پھیلانے کیلئے داعش جیسے گروہ اسلامی ممالک میں تخریب کاری کر رہے ہیں۔
رہنماؤں کا کہنا تھا کہ مسلم نوجوانوں کو ان تکفیری اور خارجی گروہوں سے بچانے کیلئے علماء اسلام اور مفکرین کو اپنا بھر پور کردار ادا کرنا ہو گا۔
قائدین نے داعش سے مسلم نوجوانوں کو بچانے کیلئے فکری اور نظریاتی اتحاد کے قیام کی تجویز دی۔
مزید پڑھیں : مدینہ منورہ اور قطیف میں خود کش حملے، 4 افراد شہید
یاد رہے کہ رواں ماہ چار جولائی کو سعودی عرب کے مشرقی شہر قطیف اور مدینہ منورہ میں تین بم دھماکوں میں چار سیکیورٹی اہلکار شہید ہوگئے تھے۔
