ڈی آئی جی عرفان بلوچ نے انکشات کیا کہ گزشتہ روز ڈمپر جلانے کے واقعات حادثے کا نتیجہ نہیں بلکہ باقاعدہ منصوبہ بندی کے تحت جلائے گئے۔
ڈی آئی جی ویسٹ عرفان بلوچ نے اے آر وائی سے گزشتہ روز پیش آنے والے واقعے پر گفتگو کی ہے، انہوں نے بتایا کہ کل کوئی حادثہ نہیں جھگڑا ہوا، ڈمپر ڈرائیور بھاگا تو موٹر سائیکل زد میں آئی جس پر کو ئی سوار نہیں تھا۔
ڈی آئی جی عرفان بلوچ نے کہا کہ افواہوں، سوشل میڈیا پر جھوٹی معلومات نے جلتی پر تیلی کا کام کیا، نامعلام افراد اب نامعلوم نہیں رہے ہم نے معلوم لگا لیا ہے۔
ڈی آئی جی ویسٹ نے بتایا کہ اسپتال میں نہ کوئی زخمی پہنچانہ ہی کوئی ہلاکت ہوئی ہے، ڈمپر ڈرائیور منگھو پیر تک گیا تو اس کا پیچھا کیا گیا، ڈمپر ڈرائیور کو گرفتار کرلیا گیا۔
ڈی آئی جی ویسٹ عرفان بلوچ نے مزید بتایا کہ گرفتار ڈرائیور نے بتایا کہ جھگڑا کیسے ہوا ہے، سی سی ٹی وی فوٹیجز کی مدد سےگرفتاریاں کی ہیں۔
واضح رہے کہ گزشتہ روز کراچی کے علاقے نارتھ کراچی میں پاور ہاؤس چورنگی کے قریب ڈمپر کی ٹکر سے موٹرسائیکل سوار شخص زخمی ہوگیا تھا جس کے بعد مشتعل افراد نے کئی ڈمپر جلا دیے۔
پولیس کا کہنا ہےکہ کراچی میں 99 روز میں ہیوی گاڑیوں کی ٹکر سے جاں بحق افراد کی تعداد 78 ہوگئی ہے، اس کے علاوہ کراچی میں رواں سال اب تک ٹریفک حادثات میں جاں بحق افرادکی تعداد 256 ہوچکی ہے۔
