لاہور : لاہور ہائی کورٹ نے نجی اسکولوں کو وصول کی گئی 5 فیصد سے زائد اضافی فیسیں واپس کرنے کا حکم دیتے ہوئے 2017 کے بعد نجی اسکولزکی5فیصد سے زائد فیسوں کوکالعدم قرار دے دیا۔
تفصیلات کے مطابق لاہور ہائی کورٹ کے جسٹس ساجد محمود سیٹھی نے نجی اسکولوں کی جانب سے اضافی فیسیس وصول کرنے سے متعلق کیس کا فیصلہ جاری کر دیا ہے، فیصلہ چھ صفحات پر مشتمل ہے۔
فیصلے میں عدالت نے نجی اسکولوں کی جانب سے وصول اضافی فیسیں واپس کرنے کا حکم دیتے ہوئے 2017 کے بعد نجی اسکولوں کی جانب سے پانچ فیصد سے زائد بڑھائی گئی فیسوں کو کالعدم قرار دے دیا۔
عدالت نے فیسوں کے معاملے پر سپریم کورٹ کے فیصلے پر من و عن عمل کرنے کا حکم دیا اور ڈسٹرکٹ رجسٹریشن اتھارٹی کی جانب سے اسکولوں کی فیسوں میں پانچ سے 8 فیصد اضافہ کا حکم کالعدم قرار دیا۔
فیصلے میں کہا گیا کہ نجی اسکول فیسوں میں سپریم کورٹ کی جانب سے دی گئی رعایت کو واپس نہیں لے سکتے، درخواست گزاروں کے وکیل اظہر صدیق نے موقف اختیار کیا کہ نجی اسکول سپریم کورٹ کے احکامات کے باوجود اضافی فیسیں وصول.کر رہے ہیں ، لہذا عدالت سکولوں کو اضافی فیسیں وصول کرنے سے روکے۔
یاد رہے سپریم کورٹ نے نجی اسکولوں کا فیسوں میں اضافہ کالعدم قرار دیا تھا ، حکمنامے میں کہا گیا تھا کہ اسکول جنوری دو ہزار سترہ والی فیسیں وصول کریں اور لی گئی اضافی فیس آئندہ فیسوں میں ایڈجسٹ کریں۔
عدالت نے حکم دیا تھا کہ نجی اسکول قانون کے مطابق اپنی فیسوں کا دوبارہ تعین کریں، اسکول فیس کی ری کیلکولیشن کی نگرانی متعلقہ ریگولیٹری اتھارٹی کرے گی، متعلقہ ریگولیٹری اتھارٹی کی منظورشدہ فیس ہی والدین سے لی جاسکےگی۔
